الثلاثاء، مايو 20

عدولة دخل سنة أولى

"عدولة دخل سنة اولى....يالا نغنى لعدولة". جزء من أغنية قديمة من التراث المصرى أنا شخصيا بسمعه كتير لأن أى ولد صغير أو بنت عندنا بيدخل سنة اولى -ابتدائى يعنى- ماما بتقوله ليه. أى حد فينا عنده عدولة وداخل سنه أولى سوا كان عدولة ده ابنه ولا اخوة بيبقى فرحان بيه قوى مايعرفش ياعينى اللى مستنى عدولة لما يدخل سنه أولى .........

وهما بقى ياحول الله بيقولوا بسلامة نيه " الدكتور عدولة راح .....الدكتور عدولة جه " ربنا أمر بالستر.

التعليم عندنا بيطلع اللى هيبقوا دكاترة -زى الدكتور عدولة كده- من ثانوية عامة مايعرفوش حاجة يعنى كل طالب مهما كان شاطر بيقى كل اللى يعرفه منهج سنته وخلاص وأول ما يخرج منها ؟؟؟؟ يامولاااااى كما خلقتنى !!!!!
يمكن ايوة العيب فينا شوية كطلبة بس كمان طريقة التدريس و المناهج اللى بتحطهالنا وزارتنا المبجلة تجيب احباط يعنى .....اه والله.

ده اللى خلانا أنا وزمايلى واحنا فى الجامعة وبيقولوا علينا بعد الشر مهندسين المستقبل وقال ايه..!!!! عمار مصر على أيادى جيلنا -lol-
بنعانى من إننا بنخرج من سنة لسنة أعلى وإحنا محتاجين كل كلمة درسناها , ونكتشف إن احنا علشان نفهم اما الدكتور يشرح المنهج القديم تانى , او نرجع نتطفل على العيال اللى أصغر مننا ونحضر معاهم المحاضرات اللى احنا عايزينها .
*ليه ده بقى ....؟؟؟!!! ............. ليه؟؟؟
علشان مااتعودناش من الاول اننا ناخد طبيعة مناهج بتخاطب الفكر وبتقرب من طبيعة اللى بيدرسوا مش بتاعت كلمتين حفظ وتسميع فى الامتحان ...-وكان الله بالسر عليم-
مناهج تعبانة وماشية على عصاية , وسياسة تعليم فى العناية المركزة ،،،،،،،

ويا فرحتى "شالوا سنه ساته .،، حطوا سنه ساته .،، عالم رايقة وفاضية " - كما قالت الحكيمة فرح -

وده علشان قال ايه ؟؟!! يكبروا دماغ العيال سنه ويدوهم فرصة أكبر للفهم .- أصل دى اللى هتعدل المايل !!!! -
وآدى أخرتها عايزين الحاجة الوحيدة اللى كانت صح فى الثانوية العامة تبقى غلط وهى ان درجات الطالب كلها على الامتحان وكل واحد وشطارته دلوقتى بقى بقت روح الطلبة فى أيادى المدرسين..... شفتوا الخيبة ؟؟؟؟؟!!!!
ماعلينا ،،، معتقدش ان فى حد فى مصر دلوقتى مايعرفش إن فى فجوة عندنا فى التعليم بين اللى عايزين نبنى بيه فكر أولادنا وشخصيتهم وبين اللى بندرسه ليهم - ده طبعا فى المراحل اللى قبل ثانوى -
وبين اللى هياخدوة فى الجامعة واللى بيدرسوه فى ثانوى
اما عن الداهية الكبيرة الا وهى الفجوة بين مناهج الجامعة واللى هيطلعوا الغلابة طلبة الجامعات يطلعوا يشتغلوا فيه فى السوق.

........ويا أسفاااااااااا على الدكتور عدولة ..........

والله من كتر ما أنا شايفة قدامى أزمة فى تعليمنا ..أنا حاسة إنى لما ابقى أم عدولة مش هبقى ادخلة سنه أولى ...........
"ويالا نغنى لعدولة ............-lol-"


الثلاثاء، مايو 13

هما 30% زيادة اجور..ولا 30% زيادة مشاكل ؟؟؟؟؟

فرحونى يوم عيد العمال وقالولى... "اسكتى مش هدية الريس لينا فى عيد ميلاده 30 % زيادة على كل المرتبات" قلت :لا لا لا أنا المفروض" ازغرت" ......هما اه مش هيعملوا حاجة فى غلا الأسعار ده لكن...
اهه نواية تسند الزير ،، واهو نص العمى ولا العمى كله..!!!
أيوة بس والله أنا نصفتهم لما قلت نص العمى أصل علشان يعدلوها ويخلوها تلبس نضارة بس لازم الرواتب تزيد بنسبة 300% على الأقل !. يعنى هما تقريبا كده نسيوا صفر ع اليمين؟!
* المهم...............
ويافرحة ماتمت ..بعدها بيومين اخدها الغراب وطار،،،،،،،،،،
وانا رايحة الجامعة الصبح لقيت فى الطريق ظباط مرور كتييير!!! ماهتمتش -اصلنا بقينا شبه متعودين على كده من كتر الطوارئ-
بس المرادى بزيادة شوية !!!!! فكرونى بايام الانتخابات ياخبر دلوقتى بفلوس بعد نص ساعة بقى ببلاش ...............
وأنا مسترخية على الكرسى وباصه من الشباك وسرحانه فى الطريق اذا بصوت غليظ وعالى بيفوقنى وبيقول:
"الأجرة غليت ياجماعة وانتوا عارفين الأسعار بقت نااار ده حتى الجاز غلى هو احنا هنجيب منييين ؟...و...و.."
وحسيت انه شوية كده وهيشحت . وقضينا بقية الطريق فى مشاكل وصداع ومشادات بين الركاب والسواق.
- أتاااااااارى المرور صاحى انهاردة والامن مستعد قوى !!!!!!!! -
وعرفت ان بركات ال 30% بدأت تظهر واولها ارتفاع سعر صفيحة الجاز من 15 ل 22 جنيه مرة واحدة ،
وما خفى كان أعظم ...؟؟؟؟ - ربنا يستر -
وعلى اخر اليوم ظهرت صور اعتصامات السواقين فى المواقف ونزل ورق التسعيرة الجديدة فى المواصلات العامة وظهر كمان السخط على وشوش الناس .
والظريف بقى ان المرتبات اللى نازل عليها الزيادة اللى فيها الطمع لسه أصلا مانزلتش !!!!!!!!

والله الهدية دى كانت واجب علينا احنا ...وكان بلاهم ال 30% زيادة دول يمكن كانت الناس فضلت كاتمة وساكتة
وماكنتش الدنيا ولعت زيادة ....
وااااااااااااااه ياخوفى من اللى جاى اااه ياخوفى

الأربعاء، مايو 7

ياسلاااااام عليك يا شباب مصر

أول مرة اخرج فى رحله وأنا فى الجامعه مع اصحابى وزمايلى قد ايه كان وقت جميل قضيناه فى القاهرة وأجمل ماكان فيه كان النيل الله عليه وعلى هواه
وفى ليل مصر الساحر السهران ...وزى وقعت عنيه على حاجات كتيييير جميله وقعت عنيه على حاجات تانيه مقدرتش امنع نفسى من التفكير فيها....

يااااه على شباب مصر ...!!!
مصر فيها شباب زى الورد زى مابيقولوا واللى ممكن يكون كلام الرسول عليه الصلاة والسلام"خير أجناد الأرض" اتقال فيه مش فى الحرب بس ،انما فى أى مجال عمل.قد ايه هما رجاله. لكن..........

ده مايمنعش انى شفت أشكال لشباب تانى يااااسلام عليه!!!حاجه كده كنت فاكرة انى ممكن اشوفها فى المسلسلات والأفلام وبس،انما للاسف طلعت حقيقه مش خيال وشغل افلام..شباب ماشى مسطول...وشباب واقف فى وسط الشارع مجموعات بتشرب سجاير وتطلع الدخان فى وش بعضها....وشباب واقف على النواصى بس علشان يتفرج على اللبس الخليع اللى البنات لابساه،ولا بقى منظر بنت وولد قاعدين فى وضع لايليق بمجتمعنا الشرقى ولا باخلاقنا وديننا!!!

وقعدت أفكر ....................

ليه الشباب بقى بيلبس كده؟؟؟!!! -لبس عبدة الشيطان اللى بنشوفه فى الافلام والعياذ بالله-!!!
وياترى ليه بقت البنت دلوقتى بترضى تتجوز الولد أبو سلسلة وحظاظه؟؟؟!!!-اسفه على المصطلحات-
هل هى دى الشياكه من وجهة نظر شبابنا؟
ولا السيجارة اللى معبيه حاجات اعوذ بالله هى اللى بترمز للرجولة؟

أنا والله بستغرب.........!!!!!!!!

امتى بقى اللى ضايع من شبابنا هيفوق ويقتدى باللى ملتزم وعارف شغله ومتحمل مسئولية؟

امتى هيعرف ان البنطلون اللى وسطه ساقط وشعرة الواقف والسلسلة والسيجارة والسهر فى الكافيهات والشوارع لحد الفجر مش هما اللى هيملوه بنى ادم؟

ومقدرش أختم كلامى من غير ماأضرب تعظيم سلام لشباب عارف يعنى ايه وقت ومسئولية وشغل هما اللى عملوه رااجل بمعنى الكلمة...
وفى مصر برضه....!!!!!

الخميس، مايو 1

كلمة شرف

فى اول مدوناتى قررت...انى اكتب عن موضوع هو اللى شجعنى اساسا على انى لنشر مدونات. ولقيت انسب عنوان للموضوع هو "كلمة شرف" مش علشان اللى يقراه كده من اولها يقول عنى شخصيه مثاليه لكن علشان الموضوع استفزنى قوى كواحده عايشه فى مجتمع طول عمر اهله معروفين بالطيبه والامانه وحب الخير ده غير انه مجتمع اسلامى اساسا . ونبدأ من البدايه........لما اتكلمت مع شخصيه عزيزة عليا جدا شاب طموح بيشتغل مشرف مبيعات فى واحده من اكبر شركات المنتجات الغذائيه فى مصر ولقيته على غيرالعاده مكتئب وقرفان وشايل هم الدنيا على دماغه فى حين انه دايما كنت بحس انه زى الفراشه فى خفته ونشاطه ومرحه المهم......ولما سألته ..مالك يابنى؟؟معقدها كده ليه وبقالك فترة مختفى قاللى :اصل الدنيا سودة فى وشى وهظهر ليه ؟ انا اصلا كاره الدنيا ومش عايز اشوف حد. ياخبر ليه كده بس ؟ وفين عربيتك؟!! وأخبار شغلك ايه؟؟ ضحك ضحكة سخريه وقاللى : هاها أنا فى اجازة مفتوحه اصلى شبه اترفدت من الشغل ..الله الله وليه كده؟؟!!!!ووقع الكلام عليه بتأثير صدمه غير متوقعه ازاى بس حد مجتهد فى شغله زى ده ويترفد؟؟!! وحكالى.....انه باع لواحد من العملاءالموثوق فيهم جدا بضاعه تقدر بحوالى 80 الف جنيه والمقابل " كلمة شرف" ابعتلى البضاعه كالمعتاد وأنا هبعتلك الفلوس وانتظر ....فين الفلوس ؟؟؟؟؟؟؟؟؟؟؟ اكتشف ان العميل المحترم طمع فى المبلغ وسافر بيه بره وطبعا ... دمر المبلغ نفسيته . كان خاطب اتفلكشت الخطوبه علشان فلوس الجواز سددها للشركه وياكده يالحبس وبقى فى لحظه فى الشارع من غير شغل بسبب كلمه شرف كان صاحبها مش قدها. وحياته الخاصه كمان اتاثرت ده غير نفسيته اللى بقت تحت الصفر من غير احساس الفراغ بعد ماكان مشغول بالعشرين ساعه فى اليوم . طيب سألت نفسى سؤال ...ليه كده؟؟؟؟!!! وفين اخلاقنا احنا كمسلمين وفين ضميرنا كبنى ادمين ..ليه ندمر شاب زى ده كان مثال ناجح لشباب جيله ياترى حد فينا عنده تفسير ليه ده يحصل ؟ ومين المسئول عن حاجه زى دى ؟ ياترى الضمير اللى انعدم ؟ ولا الاخلاق والفيم اللى ضاعت ؟ ولا ظروف مجتمعنا اللى زى الزفت ؟ والحاله الاقتصاديه المعدمه اللى احنا عايشينها ؟؟؟؟ ولا حاجه تانيه؟؟ ياترى اييييييييييه؟؟؟؟؟؟؟؟؟؟؟!!!!!!!!!!!!!