دموع....كبريااء

أجبر الحزن بداخلى دمعتى على النزول

أشعر بالألم

سريعا مسحتها بيدى بكبرياء

قوة داخلية رفعت رأسى

زادت من لمعان عيناى

وأبت دمعتى الثانيه ألا تسقط

رغم أنف كل الظروف

نعيب زماننا......!!!

مش عارفه ليه دايما بنقول الزمن بقى وحش والحياة بقت صعبة؟؟!!

كنت دايما بسأل نفسى السؤال ده والنهارده سمعت كلمة شدتنى جداا وأنا راكبة العربية من واحد من الركاب فى تعليق ليه على موقف معين من شاب بيقول

"عيشه وزمن زفت ومجتمع زبالة"...واكتر من مرة اسمع نفس الكلمتين دول بيتكرروا وفى مواقف مختلفة.

كل واحد يلعن الزمن ويسب فى المجتمع ويقول "الله يرحم أيام زمان"

"طب ونلعن الزمن ليه؟"

رديت عليه فى نفسى ...هو ايه الفرق بين أيام زمان ودلوقتى؟؟؟..الساعات هى الساعات والدقايق هى الدقايق والثوانى هى الثوانى

وحدات الزمن واحدة لكن لو جينا ندورايه اللى اختلف هنلاقيه

احنا الناس ..البشر .."سكان الزمن".

أيام زمان كانت الناس افقر من دلوقتى بكتير مع كده احنا بنحسدهم....كانت امكانياتهم أضعف بكتير ومع كل امكانياتنا دلوقتى بنحسدهم ..يمكن على راحه بالهم!!؟؟

حد فينا عمره سأل نفسه ليه؟؟

بيحكولى إن أيام زمان الجار كان بيحس بجاره ومكانش بياكل حاجه الا لما يبعتله منها الاول لا وكانوا ممكن ياكلوامع بعض فى طبق واحد. كان لما واحد يتعب جاره اللى

يحس بيه ويجرى يجيبله دكتور ....دلوقتى!!!

الاخ نفسه مابيعملش كده ...ونسب الزمن؟؟!!

والله أنا شايفة المفروض نلعن أنفسنا ونسيب الزمن فى حاله

يمكن متطلبات الحياة كترت اه ومشاكلها زادت لكن لو دورنا هنلاقى برضه احنا السبب ولو ماكناش احنا يبقى احنا اللى مقدرناش نكيف نفسنا ونرضى

افتقدنا فى حياتنا معنى جميل وسلوك دينى أكثر من رائع اسمه "الرضا" الوحيد اللى يقدر يرسم على وش اى واحد فينا البسمة فى عز الازمة . بعدنا قوى عن ديننا أخلاق مجتمعنا اللى اتربينا فيه .ونعيب الزمن!!!

دلوقت بقى كل واحد فينا يشكى مر التعامل مع الناس ولدغات الحبايب والاصحاب والمعارف ويقول على نفسه الملاك الطاهر البرئ

طب لوكلنا ملايكة فين الشياطين بقى؟؟!!

الحكاية كلها إن كلنا بنغلط لكن مفيش حد بيعترف بغلطه ولو اعترف مش بيحاول يصلح الغلط ده فيبقى الموضوع بلا جدوى.

واللى لعن المجتمع ده كنت عايزه اسأله " هو المجتمع ده اصلا يعنى ايه ؟ " ومـتأكده انه هيجاوب غلط لأن المجتمع ده هو أنا وانت وهو ..أهلى واهلك ..جيرانى وجيرانك ...صحابى وصحابك يعنى باختصار هو احنا بحياتنا ومعتقداتنا وموروثاتنا وافكارنا يعنى لما نسبه نبقى بنسب انفسنا وعلشان نصلح المجتمع اللى مش عاجبنا لازم نصلح أنفسنا وكل واحد عليه بنفسه أولا ولو قدر يصلحهاهيتصلح المجتمع كله بكل عيوبه .

"نعيب زماننا والعيب فينا وما لزماننا عيب سوانا

ونهجو ذاالزمان بغير ذنب ولو نطق الزمان لنا هجانا"

انا أؤمن بالكلام ده جدا ااا.

صحيح والله وبعدين ربنا عز وجل بيقول

"لا تسبوا الدهر فأنا الدهر"

معلش بقى يمكن يكون كلامى ملخبط شويه بس هو ده حالى مع أحوال الدنيا.... "شوية لخبطة"

لأ ناصحة ....بتهزر !!!!

من يومين كده وانا بتفرج على التليفزيون ودى مش بتحصل كتير شفت كليب ظريف جداااا للفنانة العسولة نجوى كرم وفرحت قوى بيه والله فى الاول وبعد كده مافضيتش افرح ولا حاجة لانى اتشغلت بكلامها جداا وهقولكوا ازاى دلوقتى



لقيتها بتقول ....

فى معنى الكلام لحبيبها انها بتحبه بتلات ترباع قلبها والربع الباقى ممنوع.، قلت ياااااسلام ناصحة يابنتى والله

شوية بتقول لان التلات ترباع دول ضاعوا فالربع الباقى ده من حقها.، قلت برافووووووو

شويه وتقول انها خايفة لتموت لو فشل المشروع .،قلت ياعينى هى دى الستات ولا بلاش برافو يابنتى كنترول هايل احييكى عليه



شويه ولقيتها بتقول بثقة شديدة شووو !! .... صدقت ؟؟!! ....معقوول؟؟!!.... انا عم بمزح معك

وإذا بصوت يخرج من حلقى بيقولوا عليه شهقة وماقدرتش امسك لسانى يانهار اسود ماانتى كنتى ماشية كويس .. اشربى بقى

و ادى الجزء اللى سمعته من الاغنية الهايلة بجد والله

الك بقلبى تلات ترباعه والربع الباقى ممنوع......

بالكى تلات ترباعه ضاعوا حقى بالباقى مشروع ...... بدك يعنى إنى موت إذا مثلا فشل المشروع ؟؟ ....

شوو ؟...صدقت ؟؟!!....معقول؟؟!!.... أنا عم بمزح معك

بجد كلامى مع نفسى وأنا بسمع الأغنية أثار جوايا تساؤلات قلت اعرضها عليكوا يمكن تجاوبونى عليها

هو صحيح ممكن الواحد يقدر يعمل كونترول على نفسه فى حبه ويحب بقدر معين من خوفه على نفسه؟

طب لو كان ده صحيح ...صح اصلا ولا غلط إن الواحد يعمل كده اقصد يجزأ عواطفه ومشاعره؟

قالولى إن الحب الاول بيكون حب قلب بس والحب التانى حب قلب مع عقل اما الحب التالت حب عقل بس .... هو ده بقى صح ولا غلط؟

فى من الناس اللى بيبقى شايف إن البنت لما تحب مرة تبقى كده اتلوثت اقصد مش بقت نقية زى وهى لسه قلبها مادقش لحد ... هو ده حقيقى ؟؟ ولو كان مش حقيقى طب ليه تفكير إن الراجل من حقه يحب مرة واتنين والف ومن غير مايبقى غلط إنما البنت بيتمسك الحب عليها على إنه غلطة؟؟

ده كله دار فى بالى وفكرت فى إجابته لوحدى ... ياترى ممكن الاقى ليه إجابة عندكوا؟؟؟؟؟؟

تدبيسى وتاج راسى....كلاكيت 3 و 4 مرة

اولا وقبل أى كلام أنا مش عارفه اشكر الناس اللى وقفت جبنى بعد البوست اللى فات اللى مكنتش لاقيه ليه عنوان ده ازاى. بجد البوست ده قد ماكانت حالتى النفسية فيه تعبانه الا انه عرفنى إن ليا عيلة تانيه واحباب تانيين غير اللى كنت فاكراهم موجودين انا دلوقتى مدينة ليهم بوقفتهم جنبى وربنا يقدرنى وارد لهم جزء من جميلهم ده وعلشان كده قلت اطلعهم من مود الكآبه اللى دخلتهم فيه بعد البوست ده وبالمرة احل اى واجب من الواجبات اللى اتكومت عليا دى

التاج المرادى اتنين مش واحد دمجتهم وهما من صديقين اعزاء جدااا على قلبى هما الجميل "حاتم" صاحب مدونة "ولو" و صديقى العزيز "د/عمرو فاروق" صاحب مدونة "كلام من القلب" ومش عارفه والله اشكرهم ازاى على المصيبة قصدى الفرصة الجميلة دى - وش بيعض فى شفايفه -

نبدأ بتاج ولو

"هواياتى"

والله ده السؤال اللى طول عمرى بسأله لنفسى ومش لاقيه ليه اجابة لحد دلوقتى ....حتى بقعد أقول لنفسى الله يخرب بيتك كل العيال بتحب حاجات وبتعملها الا انتى .... بس ممكن نقول إنى اكتب اللى بحسه بدون قيود مع انى كنت اتمنى اكون شاطرة فى اللغة العربية علشان اكتب كلام حلو زى الناس لانى عمرى ماكتبت غير بوستين اتنين باللغة العربية .

"أشهر عيوبى"

يااااادى الفضايح ؟؟!! ياجماعة أنا معنديش عيوب طبعا ده انا فزيعة خالص مفيش منى يعنى بس ممكن اتبلى على نفسى واقول

عصبية شوية برغم إنى بعرف اتمالك نفسى فى اوقات كتير جداا

عنيدة شوية برضه مع اللى يستاهل العند

ممكن اقول انى بفكر كتير قوى لدرجة انى بتعب نفسى جداا

معنديش اسرار مفضوحة يعنى بجد قليل لما تلاقى فى حياتى حاجه احرص على انى اخبيها ونادرا لما بقدر فى حين انى منتهى الامانه بجد فى حفظ اسرار اللى يأتمنونى والحمد لله لكن الحقيقة ان وشى هو مرايتى

ده بقى سر رهيب انا للاسف محترفة فى الكدب بجد لو اضطريت اكدب ولا اجدع عبقرى يكشف كدبتى بس الحمد لله والله مش بعملها الا لو اضطريت وبيكون لحد تانى مش ليا لانى والحمد لله مش بعمل حاجه ابدا تضطرنى انى اكدب ولو ليا بفضل السكوت عن الكلام

نساية لدرجة وحشة خصوصا فى الاسماء ودى حاجه بتحطنى فى مواقف محرجة اوقات كتير بس بطلع منها ب ياجميل وياقمر وياعسل مش بغلب يعنى

شفتوا مفيش منى ازاى؟؟؟ ولا غلطة !!!!!

"حاجات بكرهها جدا"

اااااااه...... قلة الذوق ......ياربى بموت منها وببقى عايزة اغتال اللى قدامى

الغباء

الزن عالودان -الالحاح يعنى-

قلة الاصل

التناكة - الصنف اللى بيعيش الدور ده عارفينه؟؟ ....أبو ديل قصير ده -

الكآبة

ان حد ينتقد عيب فى حد وهو فيه اصلا ببقى هتشل منه

النسيان لانى نساية جدا زى ما قلت و بتحط فى مواقف محرجة

وياخرابى بقى عالصحيان بدرى بكرهه اعوذ بالله بس حكم القوى

"حاجات بحبها قوى ومش بمل من تكرارها"

مش عارفه والله بيتهيالى مفيش حاجة مش بمل منها وإن كان مع طول المدة ممكن امل من قراية المدونات وتصفح النت والرغى مع اصحابى فى التليفون -خراب بيوت يعنى- غير كده بمل بسرعة جدا

وبعدين ايه الاسئلة الصعبة دى ؟!

"سؤال بيستفزنى"

اكون متعصبة وراكبنى ميت عفريت والاقى حد يسألنى فى ايه؟ بالحاح وانا شكلى مش عاوزة اتكلم ببقى عايزة انط فى كرشته خصوصا لو كان حد مش بحب اتكلم معاه اصلا وبيسأل فضول مش اطمئنان

كمان اكون انا قاعدة سنه اشرح فى حاجة لحد وبعدين بعد مااخلص فى الاااخر خالص الاقيه فاتح بقه وبيقولى ها؟؟ مافهمتش !!بموت من الغيظ وبعض فى شفايفى واحلف تلاتين يمين ماانا عايدة تانى مين ماكان هو بسلامته

"امنيتى فى الحياة"

مااحنا قلنا قبل كده فى الحلقه التانيه اللى كان بختها وحش دى انى اكون ام وزوجة جميلة ومهندسة شاطرة

"حاجات مؤمن بيها جدا"

تفاءلوا بالخير تجدوه

إنا لانضيع أجر من احسن عملا

اخلص لحلمك يستجب لك الكون ولو بعد حين

لا تحاول ان تجعل ملابسك أغلى مافيك حتى لا تجد نفسك يوما ارخص مما ترتديه

....هكذا انتهينا

ندخل على تاج د/عمرو

"مين دبسنى فى التاج ده"

طبعا صديقى الجميل والعزيز على قلبى د/ عمرو فاروق صاحب مدونة كلام من القلب

"القوانين المتعلقة بهذا الواجب"

ورحمة ابويا ماحد قاللى حاجه عن الموضوع ده بس ممكن تبقى انى اشكره واجاوب التاج وبعدين اعرفه انى جاوبته علشان يجى يشوف اللى عمله فيا بس هو كده كده جاى من غير ماانا اقوله فمش رايحه وخلاص

"ستة أسرار قد لا يكتشفها من يقابلك لأول مرة"

انى رومانسية لانى ببان قدام اللى يقابلنى معظم الوقت- إن لم يكن كله- جادة وبحب الشغل مع إنى مرحة وبحب الهزار بس إن حد يقول عليا رومانسية؟ نوووو وبالرغم من إنى رومانسية اكتر منى جادة الا إن كل صفة منهم بتظهر فى مكانها اللى المفروض تظهر فيه

إنى بسيطة لان معظم اللى بيشوفنى بيقول عليا مغرورة لانهم بيشوفوا منى ثقه رهيبه فى نفسى المعظم او الكل من غير مايتعامل معايا بيفهمها غلط

إنى بتكسف لأن بحكم قوة شخصيتى ببان فى معظم الوقت جريئة لكن الحقيقة إنى لو اتحطيت فى موقف يكسف وشى بيحمر وبقلب الوان الطيف وبترعش وببقى نكتة خالص

إنى اجتماعية وبحب الناس لانى فى مجتمع الجامعة زعيم بمشى اوزع سلامات انما بره هادية جدا ومش بكلم حد تقريبا الا لو كلمنى

نظرتى الاولى واحساسى باللى قدامى مش ممكن يخيب ابدااااا يعنى لما اشوف حد الدنيا كلها بتقول عليه كويس وانا اقول سوسه بيطلع سوسه والعكس لو قلت على حد كويس وامة لا اله الا الله شايفينه مش كويس بيطلع كويس والوقت بيثبت كده والحمد لله .يعنى انا من الاخر فيا حاجة لله زى مابيقولوا هههههههههه

إن عندى مشاكل كتير والحمد لله لان كل اللى بيشوفنى بيفتكر إن حياتى وردى ومش بزعل خالص مع إنى والحمد لله كلاكيع عالاخر

"امرر التاج لمين"

والله مش عارفه

بس ممكن لدول انا بحبهم جدا وربنا يعلم

قلب ينبض لله

حنين

طارق كوارث

بس ربنا يهديهم ويجاوبوه

ميرسى جدا لحسن القراءة ياجماعة واستحملونى بقى

تدبيسى وتاج راسى....كلاكيت 2 مرة

طبعا فى فترة غيابى اللى فاتت وصلنى تاجات كتير من حبايبى واتكومت عليا مكنش ينفع اطنش لانى بحب الناس دى فقررت انى اجاوبهم كلهم وادمج بعضهم فى بعض لكن التاج ده مكنش ينفع غير انه يتجاوب لوحده لانه طويل وكمان لانه من الجميل العزيز عليا " محمد الفارس الملثم " ومن حسن حظى ان اول تاجين اجاوبهم يبقوا من فوارس ...

- بسم الله نفتتح الجلسة -

لو اعطيتك تلات وردات من هم ال 3 اشخاص اللى هتهديلهم الوردات ؟

الاولى : هحطها على قبر بابا حبيبى الله يرحمه

التانيه : نينا حبيبتى ام ماما ولو عايزة تدى منها ورقتين لماما معنديش مانع

التالتة بقى : هشيلها واحافظ عليها علشان ابقى اديها لجوزى بعد عمر طويل ان شاء الله

لو ان ورقة فيها 3 سطور تكتب اللى انت عايزه تكتب ايه؟

الاول : يارب ارحم بابا وعوضنى عنه

التانى : اللهم رضنى بقضائك حتى لا احب تعجيل ما اخرت ولا تأخير ماعجلت

التالت : اللهم لك الحمد حتى ترضى ولك الحمد إذا رضيت ولك الحمد بعد الرضا

ماهو هدفك فى الحياه ؟

اكون ام وزوجة جميلة ومهندسة شاطرة . وبسسسسسسس

" إن شاء الله بكره هيكون احسن من انهارده ".... هل تصدق هذه العبارة ؟

لو هنحسبها بالعقل يبقى لا ... لكن انا شخصيا مؤمنة بالمقولة " تفاءلوا بالخير تجدوه " علشان كده بقول يارب بكره احسن للاسلام وللبلد.

أجمل مقولة سمعتها فى حياتك ؟ ....

هما 3 بصراحه

الاولى " فإن رضيت بما قسمته لك ارحت بدنك وعقلك وكنت عندى محمودا ، وإن لم ترض بما قسمته لك فوعزتى وجلالى لاسلطن عليك الدنيا تركض فيها ركض الوحوش فى الفلاة ثم لا يصيبك منها الا ما قد قسمته لك " ... حديث قدسى بجد اجمل كلام سمعته فى حياتى

التانيه " ومن يتهيب صعود الجبال يعش ابد الدهر بين الحفر "

التالته " كن كالنخيل عن الاحقاد مرتفعا يرمى بصخر فيلقى اطيب الثمر "

من المغنى اللى بتحبه وإيه اكتر اغنيه ليه ؟

الطبيعى يعنى انى مش بحب مغنى معين لكن بحب أغانى المهم تكون الاغنيه كويسه وخصوصا من القديم لكن لو اتكلمنا فى اقربهم هيكون فضل شاكر وبحب ليه قوى " معقول "

غزة تمثل ايه فى حياتك ؟

أعظم حالة انسانيه قابلتها ومالقيتش قلب رحيم للاسف .

اعطى لانتماءك لوطنك درجة بالمائة

100 % بلاشك فعلا انا بحب البلد جدا وبتمنى لو انها تعمر بولادها ومش متخيلة انى اعيش فى بلد غيرها رغم ظروفها المنيلة بنيلة والله مش شعارات فارغه ده حتى على راى اللى قال " لو لم اكن ألمانيا لوددت ان اكون صينيا "

لو تزوجت وانجبت بنتين وولدين أسمائهم هتكون ايه؟

مااحنا قلنا قبل كده فى الحلقة الاولى من تدبيسى وتاج راسى

البنتين " ميس وملك " والودين " مهند ومازن " - ايوة يالمض انت وهى امبراطورية ميم يعنى-

عمرك غشيت فى امتحان وانت صغير ؟

لا والله ابدا اصلى كنت بطلع اول المدرسة دايما وكنت تنكة قوى فى الامتحانات والعيال كانوا بيتخنقوا من لجنتى

قول 3 صفات ب 3 كلمات توصف بيهم شخصيتك .

بصوا هو انا قاعده بفكر فى الحكاية دى وأنا بكتب فى التاج عبير صحبتى كانت قاعدة جمبى ومخروسة خالص من اول ما بدأت اكتب فى التاج لحد السؤال ده لقيتها مرة واحده عمالة تعد فى صوابعها ووصفتنى بالتلات كلمات دول " مرحة - عاقلة - لذيذة "

أما أنا شايفه فى وصفى والله أعلم " عاقلة ومجنونة - ذوق - اصيلة "

- طبعا مميزاتى كتير ياجماعة وماتتقالش فى تلات كلمات عيب قوى يعنى -

لو مرتبك كبير يكفى تجيب أغلى هدية تجيب لكل فرد فى عيلتك ايه؟

أولا :هسفر ماما تحج لانها نفسها قوى تحج بس ده طبعا مش عايز مرتب ده عايز جمعية لمدة سنة واقبضها الاول - اصل السعوديين افتروا قوى-

ثانيا : أفتح لاخويا صيدلية فخمة فى مكان محترم .

ثالثا : ادى لاخويا المجرم الصغير الفلوس ويشترى اللى هو عاوزه لأنه مابيعجبوش العجب ولا الصيام فى رجب - أعوذ بالله منه-

رابعا : اطلع جدو ونينا لامى يحجوا معاها

الباقيين بقى ...اللى عايز حاجة يطلبها منى وانا اعملها له هو انا عقلى دفتر ؟ خصوصا مى بنت عمى وبنتى وحبيبة قلبى دى لو طلبت عنيا هديهالها من غير ماافكر

برضه بكلمة واحدة ايه الصفه اللى عايزها فى شريك حياتك ؟

حنوووووووووووووووون

ايه المجال اللى غير دراستك وشايف نفسك فيه حتى لو كان الرسم على الحيطة ؟

برضه للمرة التانيه عبير صحبتى نطت فى الاجابة وقالتلى تنفعى مربية أجيال يابت... ههههههههه ولازمتها ايه مربية اجيال بقى ماهى بت كفاية . إنما انا بصراحة مش شايفة نفسى غير مهندسة ولو اخترت بعقلى وبروحى هختار اكون اخصائية اجتماعية - طبعا لانى معقدة-

طب دلوقتى حالا إيه المكان اللى نفسك تكون فيه ؟

بما إنى الساعة 8 صباحا فى مقر الشركة الموقرة بمدينة السادس من الكتوبر - اقصد محافظة - ومانمتش على سريرى حبيبى بقالى اسبوعين تقريبا فكان نفسى وانا نايمة كده أكون هناك على سريرى واحضنه واقوله وحشتنى ياحبيبى - والله ده سريرى مش حاجة تانيه-

اهدى التاج لمين ؟

مش عارفه بصراحة لان معظم الناس اللى بحبها منقطعة عن التدوين والباقيين جاوبوا على تاجات كتير قوى بس ممكن نهديها للى غايبين لحد مايرجعوا وهما

توتا المحتارة

فارس بلا جواد

blue nile

سفينة

momken

الاسطى حمزة

من غير ترتيب كلهم بحبهم بجد

رغيت كتير بس معلش التاج هو اللى طويل مش انا اللى رغاية -واضح طبعا-

فى قطار العودة

قلبى يرفرف......شوقا لبلادى ... عائدة اليها بعد غياب .....

انتظرت القطار طويلا .... وأخيرا سمعت صفيرة ... لقد أتى ......
أشعر بالفرح ....سريعا قفزت بداخله واخذت مكانى بالجلوس ،،،،،.....

تتوجه أنظارى للخارج... إلى الطريق ,, ومن النافذة أراه ،،،ارى البيوت تمر والشجر والناس تجرى من حولى ،،،،،وأنا باقية فى سكون ....

وجمت مع أنغام الموسيقى فى أذنى وإذا بعيناى تتوجهان داخل القطار فوقعتا على عينان تاهت بى السبل بداخلهما ....

عينان يغشاهما وجوم طويل ,,,, تارة يكسوهما اللون الاحمر ويفيضان بدموع قاتلة وتارة أخرى يغيب عنهما ذلك اللون فيصفيان كحبات الثلج ثم تبتسم الشفاه قليلا بإبتسامة تأخذ القلب وتريح النظر ..... وسرعان ماتختفى الابتسامة مع الكساء الاحمر للعينان من جديد .

مضت ساعات القطار وهى على تلك الحال لم أشعر بضيق أو ملل من طول الطريق وظللت مع خيالها ..

التمست من ملامحها البراءة والرقة والهدوء ...ومع انهمار دموعها رأيت أحزان سكنت قلبها ...ومع ابتسامتها رأيت فرح زارها ....

اقتربنا من الوصول فاستدرت دون قصد لأرى أجمل ابتسامة رأيتها فى حياتى فى وجه طفل صغير فى مقعد إلى جوارى ..

شعرت أن الحياة محطات كمحطات القطار ... هنا محطة الحزن ....وهناك محطة الفرح وقد يكون كلاهما فى محطة واحدة ولا ندرى نحن .
تركت كل محطات حياة رفيقة القطار والطفل ذو أجمل ابتسامة رأيتها ونزلت فى اخر محطاتى ....

محطات قطار العودة