الأربعاء، فبراير 25

"مفيش حاجه..." جامده جداااا



مانيش عايزة خلاص حاجه ولا محتاجه من حاجه
ولو عايزة صحيح حاجه ماخلتوليش ولا حاجه

عموما بصوا فيه حاجه
هقولها بس محتاجه عقول تفهم 
ولو حاجه ماهيش مفهومه أو حاجه
نفكرها بكام حاجه..نوضحها بكام حاجه
واهى حاجه مع حاجه هتظهر وتبان لنا حاجه

وأنا مابخافش من حاجه..مانيش مسنوده ولا حاجه
لكن مابخافش من حاجه..لكن فرضا لو هقول حاجه
هيحصل ايـــــه؟! ...ولا حاجه
هيعملــوا ايـــــه؟!...ولا حاجه

وبعد الشر بعد الشر لو واحد من القاعدين
من السامعين..من الضالين فهم حاجه
هيعملــوا ايـــــه؟!...اكيد برضو ولا حاجه
 فنتوكل على الستار لوجه الله نقول حاجه

فى ناس بتعيش عشان حاجه
وناس بتموت عشان حاجه
وناس بتموت على الحاجه


وناس تديلك الحاجه وتبقى ليها محتاجه
وناس تديلك الحاجه تاخد قدامها 100 حاجه
وناس تكبر تكون حاجه
وناس تصغر عشان حاجه
وناس منظر ومش حاجه

!!وتلقى كبيـــر..حرس ونفير...عليه منظر
وهو جبان وشيخ منصر..ولا يبانش عليه حاجه

كلامى ياخلق فيه حاجه؟
لحد دلوقت فيه حاجه؟
كلام عادى وبسيط جدا ولا فهشى ولا حاجه

ماانا مقدرش اقول حاجه
صحيح نفسى أقول حاجه و 100 حاجه 
لكن مش قادره اقول حاجه

لأنى لو هقول حاجه
هييجى ناس بتوع حاجه
وياخدونى ورا الحاجه
وهو لو سمع حاجه هيعملوهالى 100 حاجه

عموما بصوا لو واحد من القاعدين عايزنى ابلغه بحاجه
يقول مايخافش من حاجه

نعم؟!!...فى ايــــه؟؟!!

لالالالالالالالالأ
مفيش سرقه ولا تهليب ولا تهريب ولا حاجه

وبتقول ايـــــه؟!
مصمصوا ايه؟..وخصخصوا ايه؟
ده كله كلام مفيش حاجه
قضيه ايه؟ّ!..حرامى ايه؟!

ولبخ ايه؟..وهرب ايه؟
شفافيـــــــه ومفيش حاجه

وبتقول ايــــــه؟؟
لالالالالالالالالالأ عيييييييييب
لا فيه تخليس ولا ترقيص ولا تدبيس ولا حاجه

سمعمع هووووووووووس

أنا حاسه إن فيه حاجه
دقيقه سكات لتبقى حداد
أنا حاسه إن فيه حاجه

زمانكوا ياخلق فيه حاجه
ولازمه كام و 100 حاجه
ده لو يعنى ده كان فيه حاجه

أنا عن نفسى مش حاسه إن فيه حاجه
ولا مضايقه ولا حاجه
سعادتك برضو مش زيى مفيش حاجه؟
جنابك برضو مش زيى وعشان زيى مفيش حاجه؟

ماانا قلتلكوا من الاول مفيش حاجه
عليا النعمه يااخوانا مافيه حاجه
ورحمه ابويا ويا ابوك على اللى جابوك مافيه حاجه

وعهد الله وعهد الله وعهد الله 
ماخلوا لنا ولا حاجه

بقولك ايه؟ خلااااااااص خلص
وفيـــــــــــركش يلا يااخوانا مفيش حاجه
:)

البتاعه دى أنا سمعت واحده معرفهاش فى مؤتمر معرفوش بتقول لناس معرفهاش الكلام ده وعجبنى جدا قلت اوريه ليكوا 
هاااا ايه رأيكوا؟
 

السبت، فبراير 21

لقاء الفراق



تلاقت الأعين
تلامست الايدى
 علت الحيرة النظرات


سؤال حائر بداخله..
هل هى ؟ أم أن أفكاره تتلاعب به؟
اقترب ليطبع على جبين الطفلة قبلة حانية
وسألها عن اسمها
فأجابته.."فاطمه"


فاطمه؟؟!!!
رددها وأحرف الكلمة تكاد تختنق بحلقه
اغرورقت عيناه بالدموع


الآن ادرك انها هى
وقتما وقع على مسامعه الاسم الذى لطالما حلما ليال طوال 
بأنه سيكون إسم ابنتهما معا


ولكن حالت إرادة الله دون تلبية صرخات إرادة البشر 


وحينها أيضا علم أن صدفة اللقاء 
تكتب على جبينه قدر أبدى بالفراق
 

الثلاثاء، فبراير 17

على أطلال الفارس...بكينا


يوم صعب وشاق
شاق على الروح اكتر من الجسد
 الزياره كانت لبيت محمد الفارس الملثم
بدأ الاتفاق من امبارح بينى انا ومى صحبتى صاحبه مدونه مدينه الملائكه بالتفكير فى عمل زياره لوالده محمد لانه كان من أعز اصدقاء التدوين ليا أنا وهى
وكلمت والده محمد استأذنها فى السماح لينا بزيارتها
واصرت موجه صحبتى وصاحبه مدونه بين السماء والارض حديثه الدخول للتدوين
 كمان انها تصاحبنى فى الزياره لانها خافت عليا من أثر المقابله وانى اواجه لوحدى
اتفقنا واتقابلنا احنا التلاته
بدأت موجه بالتنبيه عليا علشان احاول مش اعيط لما اشوف والدته علشان اهون عليها مش ازود همها
ورغم انى حاولت مع نفسى كتير انى اجمد الا ان الموقف كان اشد منى ومنهم
لفت نظرى هدوء الحى وغرابه الجو وكأن كل حاجه واخده جنب وهاديه ومرسوم عليها ملامح حزنها عليه
اتأكدنا من العماره ولقيت نفسى بدأت الرهبه تتسلل لقلبى وايديا تترعش ومسكت فى موجه وكأنى بستخبى فيها
مش عارفه ليه حسيت ان ملامح العماره كئيبه وكأنها هى كمان زعلانه على فقدان الفارس حتى انها بدت زى الاطلال
استقبلتنا زوجه اخوه على السلم لما اتصلت بيها وانا تحت اسألها عن الدور واستأذنها فى الطلوع .
بدأت احدث نفسى واوصيها بالصلابه
ومع كل درجه من درجات السلم وانا حاسه ان الخوف والقلق والرهبه بيزيدوا لحد ما دخلت للشقه
اول ماوقعت عينى على والدته حسيت  ان الجبل اللى فضلت ابنيه جوايا طول الطريق وحاولت صحبتى تبنيه بدأ يتهاوى
اختنقت بالدموع وانا بسلم عليها وقبلت ايدها وتعمد اناديلها طول اللقاء ب ياأمى
فضلت قاعده لفتره بحاول اتأمل المكان واتصور محمد فى كل جزء فيه
اشارت لينا والدته على صوره ليه متعلقه عالحيط فى الصاله وقالت ده محمد وهو فى خامسه ابتدائى وبدأت من هنا فى سرد مواقف ومميزات تشهد بيها لحسن اخلاقه معاها ومع كل اللى حواليه
"هو ياحبيبى كان متفوق فى دراسته حتى من غير دروس وكان طول عمره شاطر
حتى كان دايما يقولى الصلاه ياماما هى اللى هتنفعك لازم تحافظى عليها
ماتزعليش حد ياماما واوعى تحرجى حد
ولما ايام الجامعه كان يخلينى اصور كتب ليه هو واصحابه مكنش ابدا يرضى ياخد منهم فلوس وينبه عليا"
وقتها ردت زوجه اخوه
"اه والله طول عمره حنين وطيب
والله حتى لما كان جوزى يزعلنى كان هو اللى ياخدلى حقى منه
وكان دايما لما يشوفنى لابسه بنطلونات يقولى لا حرام البسى عبايات او جيبات
هو كان غالى عندى اوى"
الكلام كان بيتحكى وانا قاعده انا والبنات اسمع وبس
كنت بترجى دموعى تخرج بهدوء
مش تخرج بصوت الالم اللى جوايا وانا بسمع الكلام وشايفه عيون امه ماليها الدموع
واول ماتكلمت سألتها
"محمد تعب ياامى قبل وفاته؟"
جاوبتنى
"والله يابنتى هو دور البرد اللى اشتكى منه بس وكان تعبان يوم الجمعه خالص
واخد الحقن يوم السبت وبقى كويس ولحد المغرب طلب اكل وشاى بلبن وصلى المغرب
نادى عليا وقالى اضغطى على ضهرى لانى حاسس انى مش بتنفس كويس"
وبعدها نطق الشهادتين وخرجت روحه"
وفى الوقت ده ماقدرتش امسك لا دموعى ولا انات صوتى اللى بتقطع فيا انها تخرج
واترميت فى حضن موجه وبكينا بألم شديد لدرجه ان والدته وزوجه اخوه اللى بدأوا يهدونا
قد ايه حسيت فى وقتها انى ضعيفه
والانهيار كان قريب اوى وسهل اوى قدام ست من اقوى وانبل السيدات اللى قابلتها فى حياتى
يمكن هى استوعبت الموقف بشكل كان يصعب على اى حد يتحمله ولا اتصور انى لو مكانها كان ممكن ابقى بالصمود ده وبقوه الايمان بالقدر دى
طلبت منها انها تدعيله دايما فى صلواتها وانها تدعيلى انا كمان علشان انول شرف دعائها ليا
رددت كتير "لو بتعزوه اقروله القرآن وادعولوا فى صلاتكوا
هو فى الجنه انا مش خايفه عليه
هو ارتاح من عذاب كتير كان شايفه"
اتذكر دلوقت اول مره كلمتها فيها علشان اعزيها وقالتلى"
محمد استريح لانه فى مكان احسن من الدنيا لكن سابنى انا مكسوره زى الطير الحزين"

لعل الراحه النفسيه اللى حسيتها فى جو بيتهم كان ليها أثر كبير فى تهدئه اعصابى ورجوعى لحالتى الطبيعيه رغم احساسى بإن اركان البيت نفسها بتفتقد وجوده فيها
شفت هناك ولاد اخوه اللى حكالى عنهم كتير والبنت جارته اللى كان بيشرحلها التاريخ اللى سقطت فيه كتير ومش نجحت الا لما هو درسه ليها واللى كان باين عليها آثار حزنها عليه

الحاجه اللى قد ايه فرحتنى انى عرفت منها ان فى حد اتصل بيها من السعوديه وقالها انه عمل عمره ووهب اجرها لمحمد
لكن اكتر الكلام اللى قتلنى كلمتها
"انا فرحت اوى لما ناس كتير كلمونى وقالولى انهم بيحبوه من غير مايعرفوه
اصلى كنت فاكره انى انا بس اللى بحبه لانه مكنش بيخرج ومكنش ليه علاقه بحد
بس هو مكنش بيتأخر عن اى حد يحتاج منه حاجه علشان كده الكل زعل عليه"
قعدنا معاها حوالى ساعه ونص
حسينا فيها اننا اخدنا عليهم واخدوا علينا
طلبت انا من والدته السماح لى بزيارتها من وقت للتانى وهو وافقت بالترحيب
خرجنا من البيت بعد السلام عليهم وخرجت معانا زوجه اخوه لحد الشارع
وقبل مانمشى قالتلى كلمه طمنتنى اوى ودعيت بيها ربنا يجمعنا بمحمد فى اخرته.
قالتلى
" اطمنوا ياللى بتحبوه انا دخلت عليه بعد الغسل وقبلت جبينه 
الشيخ قالى ده حرام بس انا قلتله ده اخويا
ووقفت قدامه املى عينى من وشه اللى كان بجمال عمرى ماشفته على وشه فى الدنيا"

للمره التانيه غبت تقريبا عن الوعى
وسلمنا عليها ومشينا وانا فى حاله يرثى لها
واعصابى كلها تعبانه
اليوم كان من اصعب ايام حياتى
لكنه من اكتر الايام اللى أثرت فى روحى
رحمك الله يامحمد
وجمعنا بك فى دار الحق

السبت، فبراير 14

هابى فالن طين تو مى

بيقولوا النهارده عيد الحب 
والله عمرى ماعرفت تاريخ عيد الحب ده الا السنه اللى فاتت
كنت اصلا بعرفه بالصدفه لما الاقى اف ام شايطه وعماله تطلع حاجات حمرا وانا بذاكر من أيام ثانوى

ومكنتش اعرف تاريخه ايه الا لما حفظته السنه اللى فاتت
قلت يابت عيب انتى كبرتى ولازم تبقى مثقفه وتعرفى تاريخ عيد الحب
اومال ايه !

الظريف بقى انى المره الوحيده اللى حضرت فيها عيد الحب فى الجامعه جالى احباط
ابص الناحيه دى الاقى صندوق احمر رايح 
والناحيه دى كيس هدايا احمر جاى
وهنا بوكيه ورد احمر ماشى
وهناك ورده حمرا بتتحرك
والجامعه كلها مسكتها الحصبه

لحد ما شفت بوكيه ورد ماقدرتش اقاوم جماله 
قلت لااااااا لازم اشوف بنت المحظوظه اللى البوكيه ده رايح لها 
انا همشى ورا الواد لحد مايقابلها واشوفها 
شويه وهى اللى جت واشوف بت اكلتها البرومه 
هو اى نعم الواد كمان كان الصدا واكله بس البوكيه كان حلو

انا فضلت اقول ياعينى ناس ليها ورد وناس ليها بهيه على رأى صلاح ذو الفقار فى فيلم رد كلبى

الصراحه بيقولوا حرام البتاع ده
يعنى مش مفروض نحتفل بيه خصوصا ان الحب مش لازم يبقى فى يوم بعينه
بس يلا خلى العالم بتوع الهدايا يسترزقوا

الظريف بقى انى كنت قاعده بشيت مع واحده صحبتى امبارح الساعه 12
لقيتها بتقولى
"ها هتقضى الفالتنين مع مين السنادى؟"

انا برضو رديت عليها برد اظرف "يعنى هو انا يختى كنت قضيته مع مين قبل كده علشان اقضيه مع حد السنادى؟..اللى يسمعك بتقولى كده يقول البت يعنى اشطه وآخر تمام وكل عيد حب مظبطه نفسها!

ده انا حتى ناقص ابوس على ايد الموبايل علشان حد يعبرنى ويقولى كل سنه وانتى اى حاجه 
شكلى والله انا اللى هبعت مسج لنفسى علشان اهنى نفسى بعيد الحب
اه
وكمان وانا راجعه من الجامعه بكره هروح اشترى لنفسى قلب احمر 
واحطه فى اوضتى واكتب عليه
love

عاتى عاتى
هو اى نعم محمد الفارس مات وسايب فى روحى جرح باتساع السما
واى نعم برضو قرفانه وكارهه الدنيا وقلوب الناس اللى حواليا خصوصا اللى بحبهم ومش بيحسوا
واى نعم برضو مرضانه وعيانه وزهقانه

بس برضو
هى دى مناسبه حد يفوتها؟
!!!
ده الفالنتين يارجاله
وسمعنى احلى سلام حيرت قلبى معاك وانا بدارى واخبى 
للفنان والمطرب الشعبى العبقرى فريد الاطرش 

وكل فالن طين وانتى طيبه يابت يابيبه
ولا تزعلى نفسك خااااااااالص
الصحه بالدنيا

الخميس، فبراير 12

.... :(



مش عارفه ابدأ الكلام ازاى ولا اقول ايه؟
بس لازم اقول
الكلام جه متأخر بس كان لازم يجى
آخر كلام كان ممكن اتوقع انى اقوله فى مدونتى

محمد واحد من اعز اصدقائى فى التدوين ان لم يكن اغلاهم

محمد اللى مكنتش اتوقع انى فى يوم ممكن ارثاه 
موته زلزل الارض من تحت رجليا
وحسسنى انى كرهت الدنيا باللى فيها

محمد كان خلوق اوى 
وكنت دايما اقوله "انت انضف حد انا اتعاملت معاه فى حياتى"

رغم ان ربنا ماكتبش انى ازوره ولا مره فى مرضه
بس دايما كنت بحس لما بتكلم معاه ان الدنيا لسه بخير

ولو كنت مره سمعت ان الملايكه موجودين على الارض اكيد كنت اقسمت وانا على يقين بأنه واحد منهم

مش ببالغ فى كلامى ويعلم الله

قد ايه صدمنى الخبر
وصوت والدته قتلنى لما كلمتها
ودموعها خلتنى انهرت ومابقتش حتى قادره انى اواسيها 

كنت اتمنى اتكلم عنه زى كل المدونين اللى اتكلموا وعملوا حاجات ليه
لانى كنت من اقرب اصحابه ليه
بس تعبى منعنى
يمكن لحد دلوقت مش عارفه اتكلم اقول ايه

لكن كل اللى اعرفه
انى كرهت الدنيا
وكرهت الموت اللى بياخد اللى بنحبهم مننا
وفى يوم هياخدنا من اللى بيحبونا

اقسم بإن محمد يستاهل كل دعوه تترفع بيها ايد اى حد فينا للسما تطلب ليه الرحمه
ويستاهل ان كل واحد فينا يقرأ القرآن ويوهب اجره ليه


بالله عليكوا بلاش تنسوه من الدعاء  بالرحمه والمغفره
واهله وحبايبه بالصبر


خلاص مابقاش عندى كلام
بس الالم كبير 
كبير اوى
والدموع اكتر واكتر

ربنا يرحمه