السبت، أبريل 25

حاجات ايــه جابها فى بالى؟!!



صورة بروفايلى...براءة العالم



ألم مالوش حدود..خايفة أعيشها


نفسى أعيش لحظة زيها


بحسدهم..الله يرحمك يامحمد


كتير بحس إنى زيه




ومن الحب ما قتل...كتير بتحصلى


دى حقيقة بس ياترى أنا هبقى كده؟!

الخميس، أبريل 23

سعادة العمر..عمرها لحظات



هل نظرت لنفسك يوما فى المرآه عندما تبتسم؟!

هل فكرت يوما فى حجم سعادتك وابتسامتك مع إختلاف الاسباب التى استطاعت أن ترسم تلك الابتسامة على وجهك؟

إن اجبت أنا ستكون الاجابة ..لا. لم افكر يوما فى السبب ولكنى أسعى لاستغلاله واغتنامه فقط كى أشعر بقليل من السعاده أختلسها من وسط هموم الحياه.


أردت فقط ان اقارن احساس السعاده الذى يضفيه عليا أى سبب كان فلا أجد وجها للمقارنه بينه وبين ذلك الاحساس الذى اشعر به عندما أنجح أنا فى رسم ابتسامة على وجه حزين أو أرى نظرة رضا فى عينى وجه ساخط 
وأكون أنا سببا فيها.

حين عقدت تلك المقارنة ....وفــقــط

علمت أننى قد أكون سعيدة عندما ينجح أحد فى اسعادى 
ولكنى حتما أكون أسعد وأسعد حين أنجح أنا فى إسعاد روح حزينة ولو كانت سعادة قصيرة الأجل

"عمـــرهـــا "لحـظـــات

الخميس، أبريل 16

حدث...فى مثل هذا اليوم



النهاردة بجد يوم تاريخى.اللى هو 16/4 يعنى 
سجله التاريخ فى صفحاته لاهميته
-هما لحد دلوقت مش سجلوه بس هيحصل ان شاء الله صبركوا بالله بس-


طبعا بما إن معظم اللى قاعدين بيقروا دلوقت جاهلين بتاريخ مصر الحديث مش هيعرفوا.

وطبعا كلكوا هتفتكروا إنى بتكلم مثلا عن اليوم اللى حرر فيه محمد على بك الصغنطط القدس سنه 1984 م...هقولكوا لأ


هتقولوا طيب ده اليوم اللى سعد باشا زغطوط عمل فيه معاهدة كامب ديفيد سنة 1805 ...برضو هقولكوا لأ


هتقولوا طيب يمكن ده اليوم اللى ابو كريكه وقع فيه عقد الاحتراف مع بايرن ميونيخ لاول مره فى الاربعينيات...الاجابة لأ


اخر احتمال ممكن يورد على بال حد فيكوا هو إن رمسيس التانى سافر لفرنسا لقضاء شهر العسل مع زوجته الاميرة ديانا من سنتين...برضو لأ


طبعا غلب حماركوا...مش قلتلكوا جهلة بتاريخ مصر الحديث؟!

كده لازم اتكلم بقى

فى مثل هذا اليوم السادس عشر من ابريل عام الف وتسعمائه وسبع وثمانين 

"أنــا اتــولــدت"
ايه يابشر بقولكوا انا اتولدت

ايوة البوليكا اللى انا عاملاها دى كلها علشان عيد ميلادى
هو يعنى هيجيلكوا أعز ولا اغلى منى؟؟؟ عجايب والله

يلا كل سنة وانا طيبه
النهاردة عجزت وبقى عندى 22 سنة بحالهم وعقبال 100 سنه يارب يانور يابنت طنط أم نور وعمو ابو نور
-ده انا اللى بقوله لنفسى على فكره-


وعلى ذكر قولى على ماما طنط وبابا عمو-طبعا مفيش حد اخد باله-
أنا مرة كنت بسأل عيل صغير شكله متشرد كده انت اسمك ايه؟
قالى أحمد
قلتله احمدمين انت ابن مين ياض؟
قالى انا ابن خالتى سميه
قلتله انت ابن خالتك؟ :))
فكرنى بااحمد بدير لما قال لسكينة انا ابن عمى

وبالمناسبه دى هعرفكوا حاجه مهمه جدا عنى
شوفتوا الصورة دى؟
والله لوعايزة أنام بيبقى شكلى كده اصل النوم ده حبيبى 


وطبعا مفيش تورتات ولا جاتوهات ولا اشتغالات ولا افلامانات من دى

وعايزة شويه احمر حلوين اوعوا حد يدخل من غير هدية
عايزة صفحة الكومنتات تنفجر من اللى فيها وانا هبقى ادخل بعد شويه المهم

عايزة احس انى عندى شويه عيال اصدقاء عزوة كده فى بلوجر ونجيلكوا فى الافراح يارب وهدية قليلة تمنع بلاوى كتيرة

وهنيالك ياجايب الهدايا والثواب

ايه رايكوا بذمتكوا مش عندى موهبة دفينه انى انفع شحاته؟ :)

السبت، أبريل 11

جـنـون الـلـهـفـه



كم احترم تلك المشاعر التى تدفعنا لتعقب حركات وهمسات من نحب بدافع الغيرة أو القلق أو ربما الشوق وإن كنت اتهمها بالجنون

حين يغيب العقل ويصبح هدفنا الاول والاخير وأقصى أمانينا هو طمئنة قلوبنا بصوته أو بصورته!.

تلك المشاعر التى يتلاشى أمامها العقل وتبقى نبضات القلب هى القوة المحركة الوحيده حيث تظل عقولنا حبيسة جدران الظنون خوفا عليه أو على أنفسنا من أن نقع فى طيات النسيان.

تلك المشاعر التى لا تظهر منا سوى ضعفنا أمام من نحب بل وضعفنا من خلفه أيضا إذا ما إبتعد
فنبقى كطفل صغير يبكى قلبه ويتلاشى وجدانه حين تبتعد عنه أمه.

ونبقى نحن أسرى إنفعالات صغيرة منبعها نبض قلوبنا قد لا نجد لها مسمى آخر سوى ...

"جـنـون الـلهـفـه"

الأربعاء، أبريل 8

أنا أضحك إذن أنا شباب


فى مرة من ذات المرامير وايام الامتحانات اللى بصحى فيها زى المضروبه على دماغها صحيت على صوت الراديو فى الاوضه اللى جمبى وعادة بتكون ماما خرجت للشغل وسايباه مفتوح على اذاعة القرآن الكريم لكن المرادى كان مفتوح على اذاعه غريبه الشكل والمعالم أو يمكن تكون معروفه انما انا اللى جاهله راديو بصراحه.

الـمـــــهــــــــم

وقفت على باب الاوضه اتنصت لقول عمنا المذيع لما لقيته جايب سيرة الدراسات العلميه قلت اعمل فيها بتاعه واتابع اللى بيقوله قوم قال اييييه

" سمعتوش ياجماعة إن اخر الدراسات العلميه الامريكية بتقول إيه؟ دى بتقول خير اللهم اجعله خير إن فقدان الاحساس بالنكتة هو أحد أعراض الشيخوخه". 

ورغى بشويه كلام مالهمش لازمه المهم انه ختم حديثه قائلا 
"إن الشعب المصرى اتعرف منذ قديم الازل بإنه شعب ابن نكتة يعنى كله شباب!!!"

اسم الله هو البعيد مابيشوفش ولا ايه؟ ولا هى بلد بتاعت شهادات صحيح على رأى عادل امام

المهم انى أول مانطق نتيجة الدراسة أنا قلت أكيد الناس دى معملتش حد من المصريين فار تجارب للدراسة دى والا كانوا  عرفوا إن فى نوع من الضحك بيسموه تهييس وده اللى بيضحكها المصريين كلهم اللى هما مغلوبين على أمرهم وطافحينه من الهم والغلب.
اللى بيقعدوا عالقهاوى ينكتوا سخرية من واقع زى الزفت عايشينه وبيقولوا بدال هم بره وهم جوه نخليها جوه بس.

حسيت إنى عايزة أقوله دراسة غلط ولو هى صح يبقى المصريين كلهم عواجيز من وهما عندهم 15 سنه وممكن نوسع ال 
 شويه ونقول وهما عندهم 10 سنين لما بيخرجوا يشتغلوا فى ورش ويسيبوا الدراسة.Range 

أفتكر إنى مرة شفت لقطة فى فيلم جاءنا البيان التالى لما محمد هنيدى كان مراسل ومفروض يعمل ريبورتاج عن ليلة راس السنه وأحوال الناس فيها قام لاقى اللى بيتكلم وهو عايش فى مزبله واللى قاعد عالقهوة واللى بيندب حاله ف علشان يخلى الدنيا حلوة فى عيون المشاهدين راح مأجر واحد يقول إنه دكتور شاطر وعايش كويس وعنده فلوس كتير ومتجوز اتنين ومش عنده أى حاجه يعملها فى السنة الجديدة لانه خلاص خلص اللى هو عايز يعمله السنه اللى فاتت وساعتها افتكر إن انفعالى التلقائى جدا فى وقتها كان
" ده قصر ديل يا اذعر" :)

وفعلا بعدها لقيته بيتخانق مع هنيدى علشان أجر المسرحية اللى هو عملها دى المفروض يبقى أكتر من 20 جنيه :D
طب بالله عليكوا الامريكان يعرفوا حاجة عن الناس دى؟؟
هفضل كل مره اقول 
هم يهأها وهم يهئهئ