من كام يوم قريت خبر فى مدونة "أيام وأيام" نقلا عن جريدة اليوم السابع بيقول ان شركة الكرمه للانتاج التعليمى الترفيهى هتبتدى فى خلال الايام القليله اللى جايه تصوير الموسم العاشر من عالم سمسم
الخبر طبعا اسعدنى جدا فى الحقيقه لانى كنت بحب خوخه جدااا :)
بصراحه البرنامج كله كنت بعشقه يمكن اكتر من الاطفال
اولا لانه كان بيقدم وجبة جميله من البراءه والتلقائيه اللى ترضى الطفل اللى جوا أى حد فينا
وثانيا لأنه كان بيقدم وجبة تانيه أكتر دسامه واحترام وهى سلسله جميله من الاداب والعادات الجميله اللى ممكن تتنقل بدورها للاطفال عن طريق حبهم لخوخه وفلفل ونمنم وبالتأكيد حب لتقليدهم وكمان الاطفال الحقيقيين اللى كانوا بيجيبوهم يمثلوا معاهم صور حيه من حياتهم الحقيقيه
زى مثلا ان عالم سمسم هو كان من الذ البرامج واكترها تقديم لعادات اسلاميه واجتماعيه جميله افتكر منها على سبيل المثال لا الحصر
الاطفال اللى كانوا بيجوا يتوضوا ويصلوا
اللى كانوا بيساعدوا اطفال محتاجين
اللى كانوا بيجوا يزرعوا شجر ويرووه
واللى بيساعدوا اهلهم سوا بنت فى شغل البيت مع مامتها او ولد فى الارض مع باباه
فضلا عن انهم كانوا بيقدموا الحكمه من ورا تقديمهم لكل نموذج من النماذج دى عشان ببساطه الطفل يفهمها ويحاول يتبعها
وعشان مااطولش فى الكلام مااحزننى بجد ان دلوقت بقى وللاسف فى انتاج الموسم العاشر مش شركه الكرمه لوحدها اللى هتقوم بالانتاج
لأ الانتاج بقى مشترك مع "سيستم وورك شوب" الأمريكيه ووزراة التربيه والتعليم من خلال المنحه المخصصه ليها من المعونة الامريكيه
بمعنى اننا وببساطه مش هنشوف دلوقت حد بيصلى ولا بيتوضأ ولا اى حاجه تمت للاسلام بصله
واذا قدموا حد بيزرع او بيساعد او بيساهم هيبقى من باب التحضر والتمدن والاتيكيت احيانا
المشكله بقى انى قريت عند ماما فى المكتبه من حوالى 3 او 4سنين كتب كانت جايه للمدرسه من المعونه الامريكيه
طبعا الكتب رائعه مايتقالش فيها كلمة وكفايه عوامل الجذب اللى كانت متحليه بيها
بس لما فتحتها اتصدمت
كلها اعلانات عن كوكاكولا وماكدونالدز ومنتجات امريكانا كلها تقريبا!!
حسيت انى ماشيه على كوبرى اكتوبر ولا فى ميدان رمسيس او داخله سينما مش بقرا فى كتاب جاى لاطفال فى مدرسه ابتدائى!!
وإذا كانوا بيعلنوا للاطفال عن الحاجات دى فى السن ده اكيد هيستخدموها وهما مغمضين يعنى سياسه السم فى العسل
وإذا كانت المعونات الامريكيه اللى جت لوزاره التربيه والتعليم زمان واللى ساهمت فى بناء اضعاف اضعاف عدد المدارس اللى كانت موجوده اساسا فى مصر منعت تخصيص مساحه ولو مترين فى مترين تستخدم كمصليه فى المدارس وطبعا حقهم لان المال مالهم
دلوقت مش هنقدر نقول بم لو قدمولنا اى صوره او فكره ايا كانت حتى لو احنا رافضينها
اعتقد إن الموسم العاشر من عالم سمسم هيكون مختلف كتير عن اللى كانوا قبل كده ومش هيسعدنى زيهم
يعنى بيتهيألى مش هستنى من عالم سمسم ده غير"خوخه وفلفل ونمنم وخاله خيريه وعم حسين"
أما أى حاجه تانيه كنت بحترمها حتى لو جت هبقى شاكه فى سلامة النيه من ورا تقديمها
حد يقولى بس مع المنحه الامريكيه ازاى هنقنع العيال بالمقاطعه
يخرب بيت كدا بجد
اوف
