وصلت الموقف متأخر..مالحقتش احجز كرسى فى اخر ميعاد للاتوبيس اللى طالع من المدينه رايح القاهره
مكنش قدامى غير الاضطرار للحجز واقف رغم طول المسافه.
ركبت والطرقة كلها شباب ومش عارفه اقف واتحركت على امل الاقى كرسى قاعد على اوله واحده ست اسند ضهرى ليها طول الطريق.
لفت نظرى بنت صغيره محجبة حجاب رقيق اوى ووشها فيه من براءة الدنيا مافيه رحت ناحيتها وسندت على كرسيها وكان جمبها اختها واخوها.
جالى موبايل افقدنى القدره على الاتزان من طول مدة الكلام ودخت استأذنتها انها تدخل جوه الكرسى شويه عشان تاخدنى بجمب جمبها بعيد عن الولاد
ودار بينى وبينها الحوار ده..
أنا: حبيبتى لو سمحتى مكن تدخلى شويه عالكرسى وتاخدينى جمبك مش عارفه اقف وسط الولاد
هى-بابتسامه هاديه- : طبعا اتفضلى
أنا: ضحكت وطبطبت على كتفها وشكرتها
طول الطريق خلانى غصب عنى بقيت اراقبها خصوصا لما شفت كميه الحنان اللى نيمت بيها اخوها على رجلها والطريقه اللى صحته بيها عشان ياكل
ولما شويه طلبت من اختها تديها جزء من الساندويتش اللى فى ايدها
لقيتها بتقولى اتفضلى ده ليكى
أنا: شكرا ياحبيبتى مش جعانه كليه انتى
هى: لا انا مش عايزة اكل انا اخدته من اختى عشانك
للمره التانيه طبطبت على كتفها وابتسمت فى وشها
وسألتها: انتى اسمك ايه؟
هى: منــه
أنا: انتى عسوله خالص يامنه وحجابك امور عليكى اوى..انتى عندك كام سنه؟
هى: 12 سنه
انا: وعايزة لما تكبرى تبقى ايه يامنه؟
هى: دكتوره صيدلانيه
انا:ايه ده؟ ومش عايزه تبقى مهندسه؟ مش عيب يعنى؟
هى:لا مهندسه حلو اه بس انا نفسى ابقى دكتوره
انا: ربنا يوفقك للى تحبيه يامنه ياقمر ..اختك اسمها ايه؟
هى: اسمها منار تحبى اصحيهالك تكلميها؟
انا: لا خليها ياحبيبتى شكلها مرتاحه وهى نايمه فى حضنك :)
دلوقت بس اخدت بالى من واحده منتقبه راكبه على الكرسى اللى قدامى
اتلفتت مره واحده وبلهجه شبه حاده قالت
ليه يامنه كده؟ ازاى مقعده طنط -اللى هى انا يعنى-جمبك بالشكل ده؟
كده هى مش مرتاحه فى قعدتها
لو سمحتى هاتى اخوكى معايا هنا ووسعيلها كرسى لوحدها تقعد عليه عيب كده
اذهلنى الموقف وماقدرتش ارد بغير
"متشكره لحضرتك انا مرتاحه كده المهم انى مش واقفه فى النص وسط الناس"
ردت عليا "لا ياحبيبتى ارتاحى"
شكرتها وقلتلها ربنا يبارك فيها ويباركلها فى منه
ووقتها بس عرفت ليه منه جميله كده؟
وان ماينفعش حد غير الست دى يخرج بنت زى منه
!!!
هناك 62 تعليقًا:
اول تعليق
ل
رومانسى
اخيرا اخيرا
فيه حد جميل فى الدنيا
احمدك يارب
طب مخدتيش عنوان منه
والله دى عروسه زى العسل
يدوب على ما اخلص الشقه
ههههههههههه
الله يبارك فيها هى والدتها
فاظفر بذات الدين تربت يداك
صدق رسول الله
بجد بجد موضوع جميل قوى
ب يدل ان الدنيا بخير والله
وفيها ناس جميله وطيبه قوى
وناس عايشه على الفطره
وناس طيبنن
معلش بقى سامحينى
بقالى كتير مجتش هنااا
ومدونتك وحشانى قوى
مع منه
تبقى الحياه جنه
تبقى الحياه مليانا
بالزينه والحنه
مع منه
هتلاقى حوريه م الجنه
هتلاقى ملاك ع الارض
اطلبها اتمنى
مع منه
دى الدنيا حيشالنا
حب خير ودا كله علشانا
مع منه
تبقى الحياه جنه
تصدقى انا دخلت كده من غير ما اسلم ولا اقول يا خلق يا هووووووووو
اخبارك ايه يا قمر
يا رب يكون كله تمااااام
مشروع ونتيجه وكله بخير
منه نستينا نسلم
دا عيب الحاجه الحلوه اللى فى حياتنا بتنسينا نفسنا
يلا بقى
ادينا سلمنا وعلقنا
وان شاء الله اتمنى تكونى بخير
نسيت اقولك
كل سنه وانتى طيببه
لالالا يا رومانسي
انا غيرت من منه(وش متنرفز)
اولا
عم رومانسي خد كل التعليقات
المهم اذيك يا حبيبه اخبارك ايه
انتي وحشاني كتير والله ياقمر معلش متزعليش مني بس انتي علي طول في بالي اليومين اللي فاتو كنت مشغوله وما صدقت ادخل انهارده ولو تلاحظي اني مش بدخل الجمعه ودخلت انهارده اهو والله طول اليوم لحسابي علي الجهاز
اولا انا لو مكان منه وانتي بتتلمضي وتقولي ياحبتتي وتعمليني زي الاطفال كنت رخمت عليكي ومردش اقعدك (وش مطلع لسانه)
بصي يا بيبه فعلا لازم تعرفي ان التربيه مهمه جدا يعني مامتها ست محترمه وبتفهم في الاصول والاحترام اكيد ربت بنتها علي كده
ربنا يبارك فيها ويحميها وفي كل الناس الجميله دي واكيد انتي حد جميل عشان ربنا بيوقف في طريقك ناس بنت حلال
والله فعلا الدنيا لسه بخير
ربنا يكتر منهم
قولي امين يابت
وحشتيني من غير .....
كل سنه وانتي طيبه
الحمد لله ان لسه في ناس بتربي اولادها صح
كويس انها مشدتش معاكي و عملتلك حوار مش تمام
الله على الجمال والاخلاق الطيبة
ربنا يعزك ياحبيبتى كما كتبتى لنا هذا الموقف النبيل
ايه ده هو انا غلطت في العنوان و لا ايه؟؟؟لحظه ارجع اتاكد
طبعا طالما الشجره كويسه اكيد حيطلع الفرع كويس
بس على فكره انا لسه عندي احساس اني مش في مكاني
:)
ايوه هو ده تعليقي : :)
الابتسامه دي كانت هي رد فعلي وانا بقرا الكلام ده .. حقيقي لسه في ناس بجد ..
يعنى نفهم من كده انك قومتى البنت الصغيره القمر دى
وقعدتى مكنها وارتحتى
والبنت كمان اخدت كلمتين من امها
علشان مقمتش بحق الضيافه كامل
طب نعمل فيكى ايه دلوقتى
بهزر
شوفى ياستى
كمان ان المال والولد رزق ايضا كل ما يصيب المسلم رزق
ورزق المسلم ربما يكون فى خيار الناس
وحسن خلقهم معه
وربما يكون رد لمعروف قام به المسلم ونساه
وربما يكون علامه من الله لهذا الشخص بانه على صواب
فانا اشعر ان منه كانت رزقك فى ذك اليوم
وامها ايضا
بارك الله فى جميع ابناء المسلمين
تحياتى
................الله.................
مسائك سكر يا نونو
اخبارك ايه
يارب تكونى بالف خير يارب
كل سنة وانت طيبة
رمضان كريم
ما شاء الله ربنا يبارك فيها يارب و يجازى مامتها و باباها كل الخير لتربية السليمة و الصحيحة
ماهو مش كل الناس بتعرف تراعى ربنا و تربى اولادها على طاعة الله واخلاق رسولنا و تعاليم دينا الحنيف
ربنا يارب يرزقنا الذرية الصالحة الللى نقدر نحسن تربيتهم و ينفعوا نفسهم و ينفعوا الجميع يارب
كل سنة وانت طيبة يا قمر
تحياتى
يويو
اقلك ياستي مشغوله في ايه
البت صحبتشي الانتيخ متجوزه ومسافره خارج البلاد لسه راجعه بقي وهنعيد ايام العربده والسكر من جديد بس لما جوزها يسافر بالسلامه ان شاء الله اصلها جارتنا لما تيجي عند مامتها بقي وتسيب شقتها بس خوساره مش هنعرف نعربد اوي عشان رمضان علي الابواب
بس ياجميل فمشغوله عشان كده
انما انت مالك ياقمر؟
ولسه لما يجي رمضان بقي ده ليه انشغال تاني خالص
كل سنه وانتي طيبه ياقمر
فى ناس كتير كدة
ياااااااااااااااااة
هو لسه فيه حد كدا؟؟؟؟
السلام عليكم
اخبارك
على فكرة قلبى بيفرح جدا
لما بلاقى شخصيات كدا
بجد ربنا يحميها
يارب
السلام عليكم ورحمة الله
ازيك يابشمهندسة اخبارك ايه
اشتغلتي والله لسة؟؟؟
اوعك اتكوني تقضي في وقت فراغك علي القهاوي ههههههههههههههه
بهزر طبعاً
ما قولتيش انتى منتي رايحة فين؟؟؟
اكيد رايحة تزوري حد يعني صلة رحم علي شان كدة ربنا كرمك بست طيبة وبنوتة زي العسل في الاوتبيس
ربنا يكرمك وايحبب خلقة فيك وايوقفلك اولاد وبنات الحلال دايما يا رب
حبيبة صديقتى
وشحتينى بجد جدا
الموضوع جميل اوى ومنة دى ربنا يبارك فيها واكيد شخصية زى منه جاية من تربة خصبة طيبة وامها فعلا كده
تحياتى صديقتى
كل سنة وانتى بخير
سيبك بقى من منه وام منه......وانتى اساسا بتروحى الموقف ليه متأخر ومش تلاقى مكان وتقفى وسط الاتوبيس....شوفى يا ست حبيبه بعد كده يا اما تروحى بدرى يا اما تاخدى الميعاد اللى بعديه.
على فكره طبع منه وام منه مش غريب ابدا على المكان اللى انتى منه....ده طبع أهل بلدكم
تحياتى وشكرا
بجد الموقف ده يثبت لناس كتير بتتكلم وحش عن المنتقبات ان مش معنى ان فيه ناس معاملتها وحشة ان كل الناس كده بالعكس ان الاصل فى الدين المعاملة وان الخير فى الانسان بيظهر على مظهره الخارجى
جزاكى الله خير على الموقف الجميل ده
دمتى بكل الود
ازيك يا حبيبه
شين حالك...ياك تكون امورك باهيه... بالحق..انتي بتشتغلي في القاهره و لا دي كورسات و لا ايه الحدوته...
المهم ان انا مقصر موت معاكي..بس انا والله ما بدخل المدونه خالص و مبعرفش مين اللي كتب و مين اللي مكتبش..بعدين انا امتحاناتي يوم 7 اكتوبر و دخلنا في الغميق و ربنا يسترها و دعواتك...
تعليقا ع الموضوع..دايقني رد الاخ رومانسي لما قال اخيرا حد جميل في الدنيا دي.. و كأن الدنيا مجموعه من الشياطين طويلي الذيول مدببي القرون و كابتين حرية الملايكه.. انا بشوف الناس كلها كويسه دايما و صعب فعلا اننا نلاقي حد وحش
منه بنت عسوله فعلا و امها ست مربيه فاضله... لكن ممكن نقف وقفه و نسأل نفسنا..لو كانت ام منه مش كده كانت منه هتبقى كده؟.. الأجابه اه..ليه لأ يعني...الانسان باللي جواه مش بالتوجيهات اللي بيتوجهاله..انا مؤمن جدا بان الانسان انا..مش انا و هم... ممكن اكون انا دماغي متعنته شويه و شخصيه صعب التأثير عليها..بس دي دايما رؤيتي للأمور..
بس مفيش اعتراض على منه و لا حاجه لا سمح الله.. اعتراضي بس على انك صورتي الموضوع بحجم اكبر دخل معايا في نطاق الاساطير و المعجزات..
بس قشطه يا نور و متدايقيش مني..يمكن بس حبيت اناقش مناقشه فلسفيه لاي موضوع و السلام.... :)
اشطاااااااااااااااااات و ادعيلي
والله لسه في ناس بتعرف تربي
ماشاء الله علي منه ربنا يحميها ويبارك لامها
ابنتى الحبيبة نور
سعيد بك وبأحاديثك وملاحظاتك العفوية لمن حولك .. اما عن منة فقد رأيتها بعيناك ورأيت فيها النقاء والتربية التى يفتقدها الكثيرات من بنات هذا الجيل ..
واصبحت اتمنى لها ان تنول فى الدنيا كل ما تتمناه
كويس ان لسة في بنت كدة
لسة محتفظة بالبراءة دي
حتى مع وجود ام زي دي
اتمنى تزوري مدونتي
هي لسة جديدة
لا يا باشمهندسه لا يمكن نقاطعك ابدا
لكن الحقيقه الريدر عندي مش بيقرا اول ما الموضوع بينزل
وبعد ما بينزل باجي أعلق بلائي نفسي رقم 30 او 50 وانا مش بحب اتوه في الزحمه هنا بالذات!!!
شكرا إنك كتبتي القصة الكتكوتة دي
على فكرة فيه ناس كدة كتيــر بس هم مش باينين من كتر الوحش اللي حواليهم
المهم يا ستي... لما تتجوزي و تجيبي بنوتة زي القمر زيك إن شاء الله.... ابقي علميها تكون حد كويس فعلا ويحترم الناس اللي حواليه.. عشان جيلنا فيه كتير اوي نسيوا الأخلاق واهتموا بحاجات تانية غريبة، فربيها عشان تكون حد فعلا كويس و تفيد الناس حاليها وتدي أمل في الحياة كدة زي ما منة إديتك أمل :)
موضوعك حلو اوي
ده اول زيارة ومستنية زيارتك
romancy
********
ايه الاحتلال ده ياعم انت؟!!!
عيب كده انت افتكرت البلوج دى ملهاش صاحب ولا ايه؟
لا اصحى انا هنا واحمى مدونتى لاخر زرار فى كى بوردى
فيه لسه ناس جمال كتير بس الوحش اكتر عشان كده هما بس مش ظاهرين اكتر
متشكره انك ارهقت نفسك وفكرت فى الكلام المنسق اللى قلته عن منه ده:)
سمكه واحده
**********
تصدقى انك بت ضميرك مش صافى
يعنى لو انا كنت اتكلمت معاكى بذوق وانتى مكانها وقلتلك ياحبيبتى مكنتيش هتعبرينى؟
ايون ماهى المعامله الكويسه ماتنفعش معاكى انتى عايزة تتخبطى على راسك بحاجهp:
وبعيدن متغاظه من رومانسى ليه عشان مش عارفه تعملى زيه؟
طبعا التربيه ياسموكه ومن موقعى هذا احب احيى طنط مامتك على انها عرفت تخرجك لسانك طويل كده:)
متشكره ياسموكه على ذوقك وكل سنه وانتى طيبه ياعسسسسل
المعلم محمد صاحب المطعم - طعمية سخن
*********************************
بصراحه خفت والله يامعلم من اللهجة اللى هى اتكلمت بيها فى الاول بس طلعت محترمه الحمد لله :)
منور يامعلم
موناليزا
********
ويعزك ياجميله نورتى البلوج
:)
Meme
****
ليه يابت مش ماشى معايا ولا ايه؟
ارجعى يااختى بدال ماانتى قاعده تقولى ياغربتى ياغربتى كده
كل سنه وانتى طيبه ياعسل
اخبارك ايه؟
hager za3bal
************
:) كويس انى عرفت ارسم الابتاسمه دى على وشك
بس على فكره مش انا اللى رسمتها دى منه:)
نورتى ياقمر
momken
*******
انا اللى اعمل ايه فى لماضتك دى
ياعم انت رمضان داخل لم لسانك اللى عايز قطعه ده
لو مكانتش امها كده مااعتقدش كانت هى بقت قمر كده
منور يامنكن وفعلا ده بيبقى رزق بس ياترى انا عملت ايه كويس ربنا يردهولى فى حد النظره فى وشه بس بتريح زى منه كده؟؟!! :)
نورتنى وكل سنه وانت طيب ياقمر
أبو العريف
***********
ازيك؟
رمضان كريم يامحمد
yoyo
****
ازيك انتى
مساء النور ياعسل
ربنا يستجيب لدعاكى ياقمر
ربنا يرزقك بحد قمر زيها كده وان شاء الله هتعرفى تربيه زيها كده برضو
رمضانك كريم وكل سنه وانتى طيبه ياجميله
:)
سموكه تانى
*********
ينيلك يابت
سكر ايه وعربده ايه يخرب بيتك لو اى حد سمعك كده مش هيرضى يتجوزك واحنا اساسا عايزين نخلص منك النهارده قبل بكره عيب عليكى كده والله
طيب يااختى ربنا يديم الود والمحبه بينكوا يارب ياحبيبتى
انا كمان صحبتى الانتيم متجوزه ومابصدق انها تيجى بيت باباها عشان تقعد نرغى ولوك لوك لوك لوك لحد مابقنا يتعب من الرغى
منوره ياسمكمك ياقمر وكل سنه وانتى طيبه ياسكر
كيكى عوووووو
**************
معنديش شك ان فى ناس كتير كده
لكن انا مكنتش بتكلم فى الموقف اد مابتكلم فى مبدأ التربيه المحترمه اللى فيها غرس قيم
حتى لو كانوا كتير فالوحش اكتر بكتير
منوره ياقمر
blue-wave
**********
ماهو لو فضلنا نقول كده مفيض حد هيبقى كده
لكن لازم نؤمن بمبدأ عليك بنفسك عشان لو كلنا صلحنا نفسنا وعاملنا الناس زى مانحب انهم يعاملونا اكيد هيبقى فى ناس كتير كده
مش كده ولا ايه؟
رمضان كريم يادكتور واهلا بيك فى مدونتى من تانى
smilyrose
**********
وعليكم السلام ورحمة الله وبركاته
اهلا اجمل وردات بلوجر
ازيك واخبارك انتى
فرحى قلبك لان فى ناس كتير لسه كده بس اعتقد احنا اللى بنبنيهم لو احنا اتصلح حالنا هما كمان هيتصلح حالهم
نورتينى جدا وفرحت بزيارتك اوى
كل سنه وانتى طيبه
siraj
******
ازيييييييييييك
كل سنه وانت طيب
لا انا مقضياها على القهاوى فعلا ومش بقعد فى بيتنا عالم صايعه بقى ههههههههه
لا ياسيدى لسه مااشتغلتش ومكنتش رايحه صلة رحم انا باخد كورسات فى اخر بلاد المسلمين وكنت مسافره راجعه من الكورس
انت اللى اخبارك ايه ولسه مشغول.؟
ناوى تصوم ولا لا؟
عيب ياسراج بقى انت كبرت وعديت ال30ومفروض تصوم الله بقى:)
كل سنه وانت طيب ورمضانك كريم
Hossam
*******
اهلا اهلا اهلا
ازيك ياحسام اخباراتك
كل سنه وانت بكل خير ومنور بلوجر ياصديقى
ربنا يوعدك ببنت اموره زيها وتعرف تربيها كويس وتطلع مثقفه زيك كده :)
غير معرف
********
بوصل متأخر ليه؟ :)
عشان كده يعنى
عشان انا مابحبش اوصل فى معادى ابدا ;)
وبعدين ايه عرف حضرتك بقى ان ده مش غريب على اهل بلدنا
عموما هما مكانوش فى بلدنا اصلا دول كانوا فى القاهره:)
متشكره لاطراء حضرتك ولذوقك
بس هو حضرتك اللى فى بالى وبتعلق بغير معرف على طول ولا حد تانى؟؟؟؟
على اى حال كل سنه وحضرتك بخير
Dr.A.S. black armor
********************
وجزاك يادكتور
الله ينور عليك كويس انك اخدت بالك
ماانا برضو بالمستخبى كنت عايزة اقول ياللى بتتكلموا عن المنتقبات وحش اتهدوا بقى وليكوا فيهم قدوه حسنه
نورتنى يادكتور وكل سنه وحضرتك طيب
prince4ever
***********
اهلا اهلا اهلا
ازيك ياروميو يابرنس
كل سنه وانت طيب
بص ياسيدى انا اولا مش اديت الموقف اكبر من حجمه ولا حاجه لانى شرحت حوار حصل بحذافيره مغيرتش فيه حاجه
ولما حكيت الحوار مكنش قصدى اصور منه على انها بطل اسطورى وصعب يتوجد وهو ملاك فى وسط شياطين
الحكايه اولا بقى انى كنت عايزة اقول انى ارتحت للبنت دى جدا وحبيتها
وثانيا انى احترمت اسلوب تربيتها جدا واعجبت بان والدتها كان موقفها محترم كده وده دليل ان التربيه المحترمه بتفرق كتير
وثالثا حبيت اقول ياللى بتتكلموا عالمنتقبات وحش اهى دى تربيه واحده منتقبه وليكوا فيها اسوه حسنه
ورابعا حبيت ياجماعه ده موقف اهو حصل من بنت صغيره ياريت نتعلم منها
وخامسا عشان اقول الدنيا لسه فيها ياللى بتقولوا الخير مابقاش موجود
يعنى انا مش حكيت الموقف لذاته وانما لغايات تانيه كتير فى نفسى
الحكايه ياسيدى دى مش شغل دى كورسات فعلا
نورتنى وطبعا مش زعلانه ابدا منك ياروميو
رمضانك كريم :)
كيارا
*****
وليه لا اذا كانوا اللى هيربوا محافظين على اخلاقهم وقيمهم ؟
كل سنه وانتى طيبه
وميض ابتسامه
*************
:)
ده بس عشان قلب حضرتك طيب
ازى حضرتك
رمضانك كريم وكل سنه وانت بكل خير يارب
منورنى دايما
آه من قلبى
*********
حتى مع وجود ام زى دى؟؟؟!!!!!
دى مامتها هى السبب !
عموما اهلا بيكى فى عالم التدوين ياجميله وان شاء الله تتالقى:)
كل سنه وانتى طيبه
لورنس العرب
***********
تانى ياعمو؟
ماشى براحتك ياسيدى بس خلاص الصراع اللى كان عندى فى التعليقات انفض خلاص الله يرحم ايامه
منور دايما
Wish I were a Butterfly ...
****************************
:) حاضر وانتى كمان ربيها زى ماانتى اتربيتى
اكيد هتدى امل لناس كتير :)
كل سنه وانتى طيبه يابوبه
ورمضانك كريم ياقمر
كلام فى الحب
**********
نورتينى ومتشكره لزيارتك وازورك اقريب ان شاء الله
كل سنه وانتى طيبه:)
كل سنه وانتى طيبه بمناسبة شهر رمضان
وانت طيب ياعتلم
بجد متشكره ودايما سباق بالخير
نورتنى
إرسال تعليق