طبعا فى فترة غيابى اللى فاتت وصلنى تاجات كتير من حبايبى واتكومت عليا مكنش ينفع اطنش لانى بحب الناس دى فقررت انى اجاوبهم كلهم وادمج بعضهم فى بعض لكن التاج ده مكنش ينفع غير انه يتجاوب لوحده لانه طويل وكمان لانه من الجميل العزيز عليا " محمد الفارس الملثم " ومن حسن حظى ان اول تاجين اجاوبهم يبقوا من فوارس ...
- بسم الله نفتتح الجلسة -
لو اعطيتك تلات وردات من هم ال 3 اشخاص اللى هتهديلهم الوردات ؟
الاولى : هحطها على قبر بابا حبيبى الله يرحمه
التانيه : نينا حبيبتى ام ماما ولو عايزة تدى منها ورقتين لماما معنديش مانع
التالتة بقى : هشيلها واحافظ عليها علشان ابقى اديها لجوزى بعد عمر طويل ان شاء الله
لو ان ورقة فيها 3 سطور تكتب اللى انت عايزه تكتب ايه؟
الاول : يارب ارحم بابا وعوضنى عنه
التانى : اللهم رضنى بقضائك حتى لا احب تعجيل ما اخرت ولا تأخير ماعجلت
التالت : اللهم لك الحمد حتى ترضى ولك الحمد إذا رضيت ولك الحمد بعد الرضا
ماهو هدفك فى الحياه ؟
اكون ام وزوجة جميلة ومهندسة شاطرة . وبسسسسسسس
" إن شاء الله بكره هيكون احسن من انهارده ".... هل تصدق هذه العبارة ؟
لو هنحسبها بالعقل يبقى لا ... لكن انا شخصيا مؤمنة بالمقولة " تفاءلوا بالخير تجدوه " علشان كده بقول يارب بكره احسن للاسلام وللبلد.
أجمل مقولة سمعتها فى حياتك ؟ ....
هما 3 بصراحه
الاولى " فإن رضيت بما قسمته لك ارحت بدنك وعقلك وكنت عندى محمودا ، وإن لم ترض بما قسمته لك فوعزتى وجلالى لاسلطن عليك الدنيا تركض فيها ركض الوحوش فى الفلاة ثم لا يصيبك منها الا ما قد قسمته لك " ... حديث قدسى بجد اجمل كلام سمعته فى حياتى
التانيه " ومن يتهيب صعود الجبال يعش ابد الدهر بين الحفر "
التالته " كن كالنخيل عن الاحقاد مرتفعا يرمى بصخر فيلقى اطيب الثمر "
من المغنى اللى بتحبه وإيه اكتر اغنيه ليه ؟
الطبيعى يعنى انى مش بحب مغنى معين لكن بحب أغانى المهم تكون الاغنيه كويسه وخصوصا من القديم لكن لو اتكلمنا فى اقربهم هيكون فضل شاكر وبحب ليه قوى " معقول "
غزة تمثل ايه فى حياتك ؟
أعظم حالة انسانيه قابلتها ومالقيتش قلب رحيم للاسف .
اعطى لانتماءك لوطنك درجة بالمائة
100 % بلاشك فعلا انا بحب البلد جدا وبتمنى لو انها تعمر بولادها ومش متخيلة انى اعيش فى بلد غيرها رغم ظروفها المنيلة بنيلة والله مش شعارات فارغه ده حتى على راى اللى قال " لو لم اكن ألمانيا لوددت ان اكون صينيا "
لو تزوجت وانجبت بنتين وولدين أسمائهم هتكون ايه؟
مااحنا قلنا قبل كده فى الحلقة الاولى من تدبيسى وتاج راسى
البنتين " ميس وملك " والودين " مهند ومازن " - ايوة يالمض انت وهى امبراطورية ميم يعنى-
عمرك غشيت فى امتحان وانت صغير ؟
لا والله ابدا اصلى كنت بطلع اول المدرسة دايما وكنت تنكة قوى فى الامتحانات والعيال كانوا بيتخنقوا من لجنتى
قول 3 صفات ب 3 كلمات توصف بيهم شخصيتك .
بصوا هو انا قاعده بفكر فى الحكاية دى وأنا بكتب فى التاج عبير صحبتى كانت قاعدة جمبى ومخروسة خالص من اول ما بدأت اكتب فى التاج لحد السؤال ده لقيتها مرة واحده عمالة تعد فى صوابعها ووصفتنى بالتلات كلمات دول " مرحة - عاقلة - لذيذة "
أما أنا شايفه فى وصفى والله أعلم " عاقلة ومجنونة - ذوق - اصيلة "
- طبعا مميزاتى كتير ياجماعة وماتتقالش فى تلات كلمات عيب قوى يعنى -
لو مرتبك كبير يكفى تجيب أغلى هدية تجيب لكل فرد فى عيلتك ايه؟
أولا :هسفر ماما تحج لانها نفسها قوى تحج بس ده طبعا مش عايز مرتب ده عايز جمعية لمدة سنة واقبضها الاول - اصل السعوديين افتروا قوى-
ثانيا : أفتح لاخويا صيدلية فخمة فى مكان محترم .
ثالثا : ادى لاخويا المجرم الصغير الفلوس ويشترى اللى هو عاوزه لأنه مابيعجبوش العجب ولا الصيام فى رجب - أعوذ بالله منه-
رابعا : اطلع جدو ونينا لامى يحجوا معاها
الباقيين بقى ...اللى عايز حاجة يطلبها منى وانا اعملها له هو انا عقلى دفتر ؟ خصوصا مى بنت عمى وبنتى وحبيبة قلبى دى لو طلبت عنيا هديهالها من غير ماافكر
برضه بكلمة واحدة ايه الصفه اللى عايزها فى شريك حياتك ؟
حنوووووووووووووووون
ايه المجال اللى غير دراستك وشايف نفسك فيه حتى لو كان الرسم على الحيطة ؟
برضه للمرة التانيه عبير صحبتى نطت فى الاجابة وقالتلى تنفعى مربية أجيال يابت... ههههههههه ولازمتها ايه مربية اجيال بقى ماهى بت كفاية . إنما انا بصراحة مش شايفة نفسى غير مهندسة ولو اخترت بعقلى وبروحى هختار اكون اخصائية اجتماعية - طبعا لانى معقدة-
طب دلوقتى حالا إيه المكان اللى نفسك تكون فيه ؟
بما إنى الساعة 8 صباحا فى مقر الشركة الموقرة بمدينة السادس من الكتوبر - اقصد محافظة - ومانمتش على سريرى حبيبى بقالى اسبوعين تقريبا فكان نفسى وانا نايمة كده أكون هناك على سريرى واحضنه واقوله وحشتنى ياحبيبى - والله ده سريرى مش حاجة تانيه-
اهدى التاج لمين ؟
مش عارفه بصراحة لان معظم الناس اللى بحبها منقطعة عن التدوين والباقيين جاوبوا على تاجات كتير قوى بس ممكن نهديها للى غايبين لحد مايرجعوا وهما
توتا المحتارة
فارس بلا جواد
blue nile
سفينة
momken
الاسطى حمزة
من غير ترتيب كلهم بحبهم بجد
رغيت كتير بس معلش التاج هو اللى طويل مش انا اللى رغاية -واضح طبعا-
هناك 16 تعليقًا:
حبيبة ازيك
اجاباتك جميلة
ربنا يوفقك يارب ويخليلك عيلتك ويفرحو بيكي وانتي مهندسة اد الدنيا
ميرسي عالواجب ان شاء الله اجاوبه اول ما اخلص واجب الامتحانات اللي ورايا
اتوصي بالدعوات والنبي :)))
ازيك يا حبيبه
التاج جميل جدا
وردودك منتهى منتهى الروعه
خفه دم وايمان ودبلوماسيه وادب
وكمان رقه واحساس عالى
نيجى بقى لموضوع تمرير التاج
ياستى انا مش شاطر زيك ولا نصك ولا ربعك حتى
انا مش بعرف اعمل تاجات خالص
لسبب بسيت انى معرفش عن نفسى مميزات كتير
ومش منظر ادخل اشتلكوا فروحى يعنى
اصل روحى عزيزة عليا
بس انا اخدت التاج واحتفظت بيه
واول ما هاكون عندى القدره على عمل تاج هعمله على طول وانشره
تحياتى
التاج رائع
وعجبني اووووووووووووووي
أجمل مقولة سمعتها فى حياتك ؟ ....
هما 3 بصراحه
الاولى " فإن رضيت بما قسمته لك ارحت بدنك وعقلك وكنت عندى محمودا ، وإن لم ترض بما قسمته لك فوعزتى وجلالى لاسلطن عليك الدنيا تركض فيها ركض الوحوش فى الفلاة ثم لا يصيبك منها الا ما قد قسمته لك " ... حديث قدسى بجد اجمل كلام سمعته فى حياتى
التانيه " ومن يتهيب صعود الجبال يعش ابد الدهر بين الحفر "
التالته " كن كالنخيل عن الحقاد مرتفعا يرمى بصخر فيلقى اطيب الثمر "
فعلا من اجمل المقولات اللي سمعتها في حياتي بجد
اتمنني لو تزوري مدونتي البسيطه
وارغب في تبادل الروابط معكي
نسيت اقول لكي حاجه
ربنا يرحم والدلك ويسكنه أعلي الجنان
ازيك يا حبيبه اللينك بتاعى مش بيفتح علشان انتى بتفتحيه على مدونتى القديمه خالص وانا طفل هههههههههه
اللينك الجديد دبل اوة كده
http://moomken.blogspot.com/
كلمه ممكن دبل اوة
صلحيها فى التمبليت
تحياتى
اهو تدبيسك في التاجات كدا علي طول مصلحة لينا علشان نعرفك أكتر ونعرف أد أيه أنتي جميله ورقيقه
التاجات والواجبات دي مشكله
لا والناس عماله تحدف بعض بيها
بس اجمل حاجه فيها انها بتخلينا نتكلم ونرغييييييييييي ونقول كل اللي جوانا
اجاباتك جميله ...
بغض النظر عن موضوع امبراطورية ميم ده :))
ربنا يوفقك ويكرمك يارب
وتحققي كل احلامك
ليكوريكا
blue nile
**********
ربنا يخليكى ياحبيبتى وربنا يقويكى على امتحاناتك ومستنيه حل الدوفوار على راى نور شاهين
عيونى دعواتى معاكى ومن قلبى ترجعيلنا بالسلامه يارب
momken
*******
اولا دايما ببقى مبسوطه بوجود تعليقك عندى وبستناه وبزعل لما بتغيب
ثانيا كلك زوق ياممكن بجد انا مش عارفه ايه الكلام الحلو ده كله ؟ !
ثالثا انا مش عارفه ازاى انت مش بتعرف تتكلم عن نفسك ؟ انت بارع فى كلماتك معقول تكون عاجز عن التعبير عن شخصيتك ولا انت عايزها تبقى دايما سر مستخبى عن الناس؟
رابعا نفسى تغير رأيك ياممكن وتنزل التاج ده لانى بجد نفسى اعرف اى حاجه عنك
ومتشكرة ياسيدى على الارشاد المهم ده اللينك فعلا اتصلح .
يارب دايما موجود معايا ومنورنى كده
دمت بكل خير
السهم المكسور
*************
اهلا بيك منورنى فى اول زياره ليك عندى
الحمد لله ان المدونه عجبتك ويارب يدوم التواصل.
صحيح متشكرة قوى عالدعوة الحلوة دى بجد ربنا يستجيب ومتشكرة قوى عليها
دمت بخير
قلب ينبض لله
***********
ربنا يخليكى يااجمل قلب كلك زوق وربنا ما يحرمنى منك ولا من تعليقاتك
دمت بخير
ليكوريكا
*********
منورنى ياابن بلدى
هى والله مش مشكله الجميل فيها انها بتقربنا من بعض اكتر وتزيد الترابط بيننا هى بجد فكرة ظريفه
ومالها امبراطوريه ميم ياسى ليكو ان شاء الله؟ مش عاجباك؟
ربنا يحققلك كل احلامك انت كمان وتبقى مع التنفيذ مش مع ايقافه
دمت بخير
ازيك يا حبيبه . انا جيلك ملثم قصدي متخفي ,ده توب سكريت متقوليش لحد ممممممممممممممممممم
اجاباتك لذيذه اوي وانتي حقيقي شخصيه جميله ..
ليا بقي بعض الملاحظات ..
عادة بيقولك البنات بتحب اباهتهم اكتر واكيد انتي مفتقداه بشده لرحيله وانا يمكن اشبهلك ان والدي كان اعز الناس لقلبي ربنا يتغمد والدي ووالدك برحمته
جميله اوي المقوله اللي اخترتيها الخاصه بالرضا وياريت الناس كلها تستوعب معناها ..
بالنسبه لحكاية امبراطوريه ميم دي ولاد اخويا كلهم اسمائهم بتبتدي بحرف الميم واخر العنقود منهم اسمه مهند كمان هههههه ...
بالنسبه لحكاية الصفات دي انا استغربت ان صحبتك مقلتش صفة الجنان دي ههههههههههههههه صعب الانسان يكون عاقل طول الوقت مممممممم
انا قريت البوست الجديد بتاعك وابقي ارد عليه بعدين , بس اقولك ان المشاعر والاحاسيس اللي فيه لمستني اوي ,فصعب اوي انك تحس بحد اوي وتحمله مشاعر جميله ومتقدر تقولها عشان متتفهمش غلط او هو ميقدرش زي ماقلتي..
وكمان احيانا السبب ان الحب بيكون ليه تابو محرم كجزء من قدره
انا رغيت كتير بقي كفايه
تحياتي دائما
محمد
حلوة اجاباتك
حلوة اوى
الفارس
*********
اهلا يامحمد متشكرة انك جايلى كده وانت منقطع والله فرحت قوى
وبعدين كويس التشابه ده ياسيدى يشرفنى والله سوا فى امبراطوريه ميم او غيره وبعدين عندك حق فى اللى انت قلته بخصوص موضع الاباء ده
ربنا يعوضنى ويعوضك ويجعل مثواهم الجنه يارب
نورتنى يامحمد
دمت بكل خير
blue-wave
**********
اهلا يادكتور
منورنى ومتشكرة للكلام ده بس مالك بتقولها كده ليه؟
من غير نفس كده
هههههههه
منورنى يادكتور
إرسال تعليق