مش عارفه ليه دايما بنقول الزمن بقى وحش والحياة بقت صعبة؟؟!!
كنت دايما بسأل نفسى السؤال ده والنهارده سمعت كلمة شدتنى جداا وأنا راكبة العربية من واحد من الركاب فى تعليق ليه على موقف معين من شاب بيقول
"عيشه وزمن زفت ومجتمع زبالة"...واكتر من مرة اسمع نفس الكلمتين دول بيتكرروا وفى مواقف مختلفة.
كل واحد يلعن الزمن ويسب فى المجتمع ويقول "الله يرحم أيام زمان"
"طب ونلعن الزمن ليه؟"
رديت عليه فى نفسى ...هو ايه الفرق بين أيام زمان ودلوقتى؟؟؟..الساعات هى الساعات والدقايق هى الدقايق والثوانى هى الثوانى
وحدات الزمن واحدة لكن لو جينا ندورايه اللى اختلف هنلاقيه
احنا الناس ..البشر .."سكان الزمن".
أيام زمان كانت الناس افقر من دلوقتى بكتير مع كده احنا بنحسدهم....كانت امكانياتهم أضعف بكتير ومع كل امكانياتنا دلوقتى بنحسدهم ..يمكن على راحه بالهم!!؟؟
حد فينا عمره سأل نفسه ليه؟؟
بيحكولى إن أيام زمان الجار كان بيحس بجاره ومكانش بياكل حاجه الا لما يبعتله منها الاول لا وكانوا ممكن ياكلوامع بعض فى طبق واحد. كان لما واحد يتعب جاره اللى
يحس بيه ويجرى يجيبله دكتور ....دلوقتى!!!
الاخ نفسه مابيعملش كده ...ونسب الزمن؟؟!!
والله أنا شايفة المفروض نلعن أنفسنا ونسيب الزمن فى حاله
يمكن متطلبات الحياة كترت اه ومشاكلها زادت لكن لو دورنا هنلاقى برضه احنا السبب ولو ماكناش احنا يبقى احنا اللى مقدرناش نكيف نفسنا ونرضى
افتقدنا فى حياتنا معنى جميل وسلوك دينى أكثر من رائع اسمه "الرضا" الوحيد اللى يقدر يرسم على وش اى واحد فينا البسمة فى عز الازمة . بعدنا قوى عن ديننا أخلاق مجتمعنا اللى اتربينا فيه .ونعيب الزمن!!!
دلوقت بقى كل واحد فينا يشكى مر التعامل مع الناس ولدغات الحبايب والاصحاب والمعارف ويقول على نفسه الملاك الطاهر البرئ
طب لوكلنا ملايكة فين الشياطين بقى؟؟!!
الحكاية كلها إن كلنا بنغلط لكن مفيش حد بيعترف بغلطه ولو اعترف مش بيحاول يصلح الغلط ده فيبقى الموضوع بلا جدوى.
واللى لعن المجتمع ده كنت عايزه اسأله " هو المجتمع ده اصلا يعنى ايه ؟ " ومـتأكده انه هيجاوب غلط لأن المجتمع ده هو أنا وانت وهو ..أهلى واهلك ..جيرانى وجيرانك ...صحابى وصحابك يعنى باختصار هو احنا بحياتنا ومعتقداتنا وموروثاتنا وافكارنا يعنى لما نسبه نبقى بنسب انفسنا وعلشان نصلح المجتمع اللى مش عاجبنا لازم نصلح أنفسنا وكل واحد عليه بنفسه أولا ولو قدر يصلحهاهيتصلح المجتمع كله بكل عيوبه .
"نعيب زماننا والعيب فينا وما لزماننا عيب سوانا
ونهجو ذاالزمان بغير ذنب ولو نطق الزمان لنا هجانا"
انا أؤمن بالكلام ده جدا ااا.
صحيح والله وبعدين ربنا عز وجل بيقول
"لا تسبوا الدهر فأنا الدهر"
معلش بقى يمكن يكون كلامى ملخبط شويه بس هو ده حالى مع أحوال الدنيا.... "شوية لخبطة"
هناك 36 تعليقًا:
من اول الموضوع فعلا يا حبيبه وانا بفكر في المقوله
لا تسبو الدهر فأنا الدهر
بنقول زمان وحش واصلا الزمن معملش للانسان شيء لكن يمكن يكون انسان زيه هو اللي مضايقه طيب فين عيب الزمن بقى
اللى اتغير يا حبيبه دلوقتى الأنسان فعلا لكن الزمن كمان بقى اسرع لأن يوم القيامه بقى اقرب
مش اكتئاب للناس اللي هتفهم كلامى صح
اليوم بقى زي ساعه دلوقتى والشهر بقى ولا الاسبوع بيمر بسرعه رهيبه
ولو احنا مش محافظين علي دينا واخلاقنا هنلاقى ان كل شيء بينساب بسهوله من بين صوابعنا كأننا ماسكين شوية رمله او ميه في كفوفنا
وعجبنى جدا كلامك اننا لو صلحنا من نفسنا مش هنعيب في الزمن بعد كدا لو ضمنا اننا كلنا كبنى ادم ملتزمين بالأخلاق والدين , ملتزمين نحافظ علي كل شيء ملكيه عامه كأنه ملكنا شيء خاص بينا مكناش خربنا ,مكناش طلعنا للمترو لقينه شكلو ولا الاتوبيس
كراسى مخربه وكتاباتك علي الجدران
مكناش لقينا زباله في الشارع مهو مين اللي بيرمى غير انا وانت وهو وهى
لو تعبت نفسى شوية وقدمت كل اللي عليا مستنتش النص التانى يعمل اللي عليه الاول مش هيكون في عيوب خالص
بحييكى علي مناقشة العباره دى يا بيبا فعلا مناقشه جميله ورائعه يا ريت كلنا نفكر هو العيب فين
دا حتى كل ما الزمن بيتغير بيتطور الانسان اكتر واكتر وبيلاقى وسائل مساعده ليه اكبر يبقى ازاي يكون عيب زمن يا انسان
اعزرينى لأطالتى بس قولتى شيء كان نفسى فيه من زمان
خالص ودى وتقديرى
مظبوط جدااااااااااااا
بصي يا حبيبه هو حنينا للماضي ليه سببين ..
الاول .. احساسنا مع دوران عجلة الزمن في حاجات كتير بتسرسب من ايدينا ,, ذكرياتنا الحلوه .. ناس الحياه خلتنا نفقدهم او الايام بعدت بينا , فعشان كده بقي الحنين للي كان ...
التاني زي ما اسهبتي انتي , فعلا بقينا بنفتقد معاني انسانيه جميله في حياتنا , الجار مبقاش يهتم بتعب او مشاعر جاره زي زمان , الواحد بدال ما يروح يسال عن اقاربه ويودهم , بقي بيكسل ويكتفي بمكالفة تليفون لان دوامة الحياه خدته جواها
وزي مانتي قلتي كمان كلنا بنشكي من الاخرين وان الناس بقت وحشه , ومحدش فينا بس لنفسه وشاف ايه اخطائه
بوست جميل اوي يا حبيبه , ودايما العمق الانساني ظاهر جدا في موضوعاتك
تحياتي ومودتي
عندك حق يا حبيبة
كل واحد فاكر نفسه مبيغلطش
حتى الي عارف انه غلطان مش بيعترف
انا بحس فعلا ان البرود بقى شعور عادي بين الناس المشاعر النبيلة اختفت من حياتنا
حبيبة
الأول كل سنه وانتى طيبه ورمضان كريم
موضوعك حلو جدا بس صدقينى مش احنا بس الى غلط والله الزمن غير الزمن والواحدات اللى اتكلمتى عنها اتغيرت دلوقتى ليها تمن كل ثانيه بتفوت على الانسان ليها ثمن وندم عليها
والزمن دا غير الزمن اللى فات يا حبيبة العيب مش فينا احنا بس العيب فى اللى ممشينا
بس مش معنى كده اننا ملايكه فعلا لا احنا فعلا ما بنعترفش بغلطنا ويمكن دا اللى خلانا نغلط اكتر من بتوع زمان
وبعدين بلاش سب الدهر دا اصلا حرام
انا عايزاكى تقارنى الزمن دا بالزمن القديم مش وحدات الزمن بس او بالناس شوفى الاساس شوفى كام شاب قاعد على القهوة شوفى كام واحد نفسه يتجوز مش لاقى شقه ولا اصلا الفلوس اللى تجبله الشقه وكام واحد اتعذب فى الثانويه اعامة سنتين يذاكر ومتبهدل ليه يعنى هو ذل الطالب يفضل سنتين فى شد عصبى علشان فى الاخر يدخل كليه هما بيقولى عليها اى كلام ويطلع يشحت وكام وكام وكام هتعرفى الفرق وعايزه الناس ما تكرهش حياتها
وبرده اقولك اهى عيشه والسلام
.........................
سندريلا
لا انا بغلط بس اللى زى فين مش كتير اصل انا مميز طبعا وقليل اللى زى؟؟
بصى انا بخاف من المأقلمين عامة لكن انتى ويويو بتحاولو تغيرو الفكرة دى عندى
انا مش شايفة لخبطة ولا حاجة
بالعكس انتي اتكلمتي في موضوع متكرر جدا
اننا بنشتكي من كل حاجة الا نفسنا
شايفين كل العيوب الا عيبنا
بننقد كل الناس وبنعترض عليهم وبرفض اي راي لينا او فينا
مش عارفة ليه
يمكن عشان عالم تالت ؟؟؟؟؟
كل سنة وانتي طيبة
تحياتي
فعلا والله
نعيب زماننا والعيب فينا
وما لزماننا عيب سوانا
بوست جميل ومتميز
تقبل مرورى
مش حتصدقى لو قلت لك ان هناك علاقة عكسية بين التطور التكنولوجى فى حياتنا والعلاقات الاجتماعية بصفة عامة ..فزيادة الاول تعنى نقص الثانى!!
على سبيل المثال كان زمان اى اسرة فى اى بيت لها لقاء يومى يتجاذب اعضائها فيه اطراف الحديث ..يمكن مش فى كل البيوت ولكن ده كان موجود ....
وكانت الزيارات بين الاقارب والجيران من أحلى اللقاءات للكبار قبل الصغار ..
تعالى دلوقت دورى على افراد الاسرة .. حتلاقى اللى معسكر قدام التليفزيون والدش ولايتحرك الا بطلوع الروح ..
واللى قاعد على النت فى عزلة مع نفسه بعيدا عن الآخرين ...واللى ماسك الموبايل ولاتحيد عينه عنه قيد انملة ..
طيب قوليلى بالشكل ده فين بقى الاسرة والدفء العائلى حيجى منين ..!!
حتى الجيران توحشوا ومحدش بقى فاضى يفكر مجرد تفكير فى اقامة علاقات طيبة مع جيرانه ..بالرغم من ان ديننا يحثنا على ود الجار وحبه !!
انا مش عايزك تعيشى فى حيرة ..بصى للموضوع من جوانبه الخفية ..احنا بقينا شعب ملهى بحياته ..بأولاده ..
بمدارسهم ..بمستقبلهم .. واستسهلنا تضييع وقتنا مع ادوات واختراعات المدنية الحديثة ..بدلا من اى محاولة منا لبناء اسرة اساسها الحب والتقارب فى المشاعر والابتسامة التى اصبحت باهتة وبلا معنى!!
آسف للاطالة لكن الموضوع يستاهل الرد
أولا: كل سنه وكل اصحبنا وأهلنا وحبيبنا
وآلامه الإسلامية بخير
ورمضان مبارك عليكم
حرام شرعا إن إحنا نسب الزمن
المشكلة مشكله " حب "!!!!!!
هتستغربى ونقول ده كلام فاضي
هي ده ألمشكله الحقيقية
لان إحنا افتقدنا معنى الحب على شان كدا الدنيا أصبحت صعبه جداً علينا
الجار والأهل والأصحاب والصداقة كل ده معاني مجروحة
علميا زمنا أصعب انتى عرفا ليه
لأنهم مسلمنا الراية في الأرض
المجتمعات الغربية ممكن تكون أكثر فساداً أو أخلاقا
بس هما انجح وممكن يكونه بيغلطه اكتر مننا بكبير
ومعندهمش عواطف زينا
بس هما انجح
لأنهم استلمه الرايا من الجيل السابق وهيا في أزى قمتها
الموضوع صعب علينا لأنهم بيطلبه مننا النجاح والصلاح وهما حطنا
وري أوى في مكان محدش شيفنا فيه خالص
محدش سال نفسه هما ليه الغرب انجح مننا
رغم إننا معانا الدين وربنا بيسعدنا عنهم ؟؟؟؟؟؟
ممكن حد يجوبنى على السؤال ده ...........؟؟؟؟؟
بس حد يقلى ليه : فلوس في دول عربيا معاها فلوس اكتر منهم بكثير
علم عندنا علماء
المشكلة هيا مشكله إننا مش عرفين نحب بعض
الأب مش ادر يفهم ابنه وإلام كذلك مبقاش فيه صلت رحم
الحبيب خلاص اى حد دلوقتى بيحب عشرات المرات
البنات مش مستعدين يتنازل على اى حاجا
الشباب محدش عنده هدف ومفيش تحمل مسئولية
بس كلنا معذورين
وأخر الكلام إذا أرت أن تعيش سعيدا في الدنيا فنظر إلى ما ورائها
فأدنيا هي درجه من سلم دنيتك الحقيقية إلى تعيش فيها إلى الأبد
لا تعرف معنى إلى السعادة بعدها اعتقد إنها تسحق المصابره
حبيبه
كل سنة وانتى طيبة ياجميل
كلامك صح جدا
( نعيب زماننا والعيب فينا وليس لزماننا عيب سوانا )
انا ممكن اختزل الاسئله بتاعتك كلها في سؤال واحد :
ليه حالنا بقى بالشكل ده ؟
ويسعدنــي اني عارف الإجابه وبحارب علشان الناس كلها تعرفها قبل فوات الاوان
والله يجماعه الجواب ان احنا بعدنا عن دينا علشان كده ربنا ابتلانا في كل ما نملك ولو كان ربنا رايدلنا الخير مش هيحصل غير بالعوده لدينا
تحياتي
والله زى ما طائر النار قالك
نعيب زماننا والعيب فينا وليس لزماننا عيب سوانا )
العيب فى الناس ومعاملة الناس
لكن لو بصيتى هتلاقى الحكومة والرئيس هما السبب لانهم هما اللى بيحددوا معاملة الناس مش صح ولا ايه
مممممممممممممممم
حبيبه بقت فليسوفه:))
وماله
بصى يا بيبه
المشكله فعلا فينا مش فى الزمن
بس احنا عندنا مشكله
اننا دايما بندور على شماعات نعلق عليها فشلنا
زى فى الكورة لما نتغلب نتهم الأرض والسما والتحكيم والملعب وبياع الجرايد اللى جنب الإستاد
احنا وحشين لكن رافضين نعترف ب دا
وكل واحد فينا مستنى الإصلاح يبدأ من غيرة
بجد ربنا يلطف بينا
حبيبة الغالية
ازيك اخبارك اية
اتمنى زيارتك فى البوست
ما شاء الله عليكى
اسير الجراح
كلام صح جدا
كل سنة وانتى طيبة
والله عندك حق في كل كلامك ، بس علي فكرةألناس بتشتم الزمان مش علشان عيب فيه ، الناس بتشتم الزمان علشان تداري خبيتها ، كل واحد عنده خيبه عايز حد يلذقهاله ، وطبعا مش حيلاقي حد أحسن من الزمن يرمي عليه خيبته وميتكلمش
والله أنا أعرف ناس بسيطه قوي وحلتهم علي قدهم خالص ، بس والله مرتحين البال قوي وتلاقي أمنياته حاجات بسيطه قوي
لكن إلي بيشتم في الزمان تلاقيه عايز عربيه وفيلا وفلوس كتيرة و .... ألخ
والله أكبر نعمه في الدنيا دي راحت البال ، وراحت البال متجيش غير لما نقرب من ربنا زي الناس بتاعت زمان
وكل سنه وانتي بالف خير
تقبلي مروري
مجنووون
قسم ياعمدة قسم بس من غير صداااع
سمعنا ياسيدى وربنا يستر
******
حادر حادر هسمعك بس مش تشخطي فيا كدا بخاف :(
******
نيجي للبوست
عارفه من اجمل المواضيع اللي قرتها فعلا
والمقوله اللي قولتيها بالفعل مقوله بتيجي لزهني كتير
من يهجو الزمن فقد هجي الله فالزمن هو الله
قال رسول الله صلي الله عليه وسلم((لاتسبوا الدهر فإن الله هو الدهر))
خير كلام انهي به
تحياتي اختي الغاليه
كيارا
كلامك مش ملخبط ولا حاجة ياحبيبة
بالعكس دا مقنع جدا
انا ردي علي موضوعك وكلامك دا بمقولة بتقول"ليكن أنت التغيير الذي تريده في هذا العالم"
لو الناس والدنيا والزمن مش عاجبينك ومابئوش زي الأول وأخلاقهم بقت في الارض
والحال مش عاجبك أتغير وخليك أنت أحسن وأفضل بدل ماتفضل تسب وتلعن في الزمن
سلام ياقمر
أنا كمان من أول ما بدات قراءة الموضوع تذكرت حديث : لا تسبوا الدهر فأنا الدهر .. وكمان تذكرت بيت الشعر الجميل .. نعيب زماننا
الله المستعان .. فعلا المشكلة مش في الزمان ولا في المكان .. المشكلة فينا احنا .. ايوة كل الناس بتغلط وكل بني آدم خطاء .. لكن المشكلة ان بني ادم ده بيتكبر انه يعترف بغلطه .. علشان كده بيدور على أي شماعة يعلق فيها الأخطاء ويطلع برئ
موضوع اكثر من رائع .. ربي يوفقك لكل خير ورمضان كريم
فعلا
العيب مش عالزمن.. العيب عالبشر
احنا اللي بنتغير والزمن ثابت زي ماهو
مبيتغيرش
مقالك عجبني جدا
من احسن المقالات اللي قرتها في الفتره اللي فاتت
ومدنتك جميله اوي
استمري
وبدعوكي لزيارة مدونتي
تحياتي لكي
هاجر زعبل
المولى عز وجل بيقول ..لا تسبوا الزمن فانه منى..فلو كل واحد قبل ما يقول اليى هيقوله فى الزمن كعتقدش حد كان هيقدر يقول الكلام اليى بنسمعه ده..وبعدين الانسان المصرى بيحب يرمى كل حاجه على غيره حتى ولو غيره ده شئ غير ملموس زى الزمن وعلى رايك يا حبيبه ما الزمن ده دقايق وساعات وان العامل على البشر ..الله ينور عليكى البوست جميل وسردك ليه حلو قوى..وكل رمضان وانتى بالفالف خير ..وسامحينى لو اتاخرت يعنى التعليق ال21 فسامحينى وكل شهر كريم وانتى بالف خير يا حبيبتى..
بصي يا حبيبة .. على فكرة انا معاك في فكرة ان الواحد مفروض ما يلعنش الزمن و المجتمع لأن في النهاية اللي بيلعن ده هو احد مكونات احداث الزمن و احد مكونات المجتمع .. لكن الفكرة ان احنا لما بنقارن ما بين زمان و دلوقتي لازم زمان يكسب .. عشان كده غصب عننا بنشتم دلوقتي , و بنشتم مجتمع دلوقتي .. و على فكرة يا حبيبة لو كنا عملنا تبديل ما بين ناس دلوقتي و ناس النهارده ( يعني كل واحد عاش زمن التاني ) ما ظنش كان هيحصل اي فرق .. احنا مش وحشين .. و لا ناس زمان حلوين و احلى مننا .. لأ اطلاقا .. الفكرة كلها ان العالم ده بتحكمة ظروف اقوى مننا احنا كبني ادمين .. احنا كلنا دلوقتي مثلا تحت حكم نظام رأس مالي بشع بيهدف للربح و الربح فقط بدون اي اعتبارات اخرى .. عشان كده تلاقي البني ادم بقى وحش عايز هو يكسب و بس و غيره يتحرق .. زمان مكنش النظام الرأسمالي متحكم أوي و كانت الناس محتفظة بادميتها شوية بس في نفس الوقت مكنش في التقدم التكنولوجي الرهيب الي اظن انها احد مميزات النظام الرأسمالي .. يعني من الاخر كده البشر هما هما .. و الزمن هو هو .. المشكلة كلها في الظروف و الانظمة اللتي بتحكم العالم كلة , و اللي بيتحكم فيها قوى عظمى احنا مش قدها خالص .. الموضوع كبير يعني
انا اسف على الاطاله و اللت و العجن الكتير ده !
متخافيش يا حبيببة من غير صداع
كلامك صح
دايما الجيل القديم يلعن اللي بعده مع ان اهلة برضة كانو بيلعنوة
ودايما الكلمة المأثورة:جيل مهبب الله يرحم ايام زمان
قال يعني كانت ايام زي الفل
انا شايفة ان ايامنا برضة حلوة
وفيها حاجات كويسة
وان دي حجج غير منطقية
تحياتي وكل سنةوانتي طيبة
اه اه عارف الابيات دي
قالها الشفنكحي ف ذم مصر سنة 147 ق الميلاد وكان بيقول بقى الابيات الاصلية اسمعي اسمعي
نعيب زماننا والعيب فينا
وما لزماننا عيب سوانا
ولو أنّا ذهبنا للمدينة
لما طقنا الرجوع لبتسوانا
فيا أرض الفراعنة اللعينة
بقالنا كتير بنستنا عشانا
فما جئتي ببيض أو بخبز
ولا حتى عزمتي ببرتقانة
شفتي بقى
وبيعيبو ع الزمن
عندك حق كتير والله .... اصلي ياما قلت الكلمة دي .. واقول للناس طب هوه الناس زمان كانت بتشتكي وتقول فين أيام زمان ليه؟؟
ومين أول واحد قال فين أيام زمان ومشتمش الزمن؟؟؟
بس هي فعلا مشكلة ناس مش مشكلة زمن
تحياتي على الكلام الجميل
على فكرةفرحت من ردك عليا بكلمة يا اخويا اصلي بعتبر المدونين فعلا اسرة واحدة
تحياتي
الاول كل سنه وانتى طيبه
بالنسبة للزمن
يمكن بس دلوقتى النفوس اتغيرت شويه
لكن الزمن مالوش دعوة
لان الزمن واحد فى القديم والجديد واحد
المشكله فى البشر
ربنا يرحمنا برحمته ويخرجنا منها على خير باذن الله
موضوعك جميل
تقبلى تحياتى بكل ود
ادعوكم لزيارة مدونة اجمل قلب
http://agml-qlb.blogspot.com/
السلام عليكم
رمضان كريم يا حبيبة و كل سنة و أنت بألف خير و صحة
موضوعك غاية في الروعة و بجد شائك لأن الإنسان بيحاول بكل ما يستطيع من قوة أن يسقط عن نفسه التهم و يرميها عالزمن و المكان كمان
زي اللي عاوز يسيب البلد و يسافر عشان البلد حالها مش عاجبه
بس بالنسبة لموضوعك أنا معاك مية بالمية لأن العيب فينا إحنا لأننا نسينا أو مش عارفين نحب بعض أو نخاف علي بعض زي زمان (الماضي) و بدأت الأنا تنتشر كالوباء بدون علاج كل واحد بيقول يلا نفسي و مبقاش فيه إنسانية و كل واحد بيعمل حاجة لازم يكون ادامها مقابل و إلا ميعملهاش
أكيد أكيد العيب فينا
بس برده أكيد في حل
مع تحياتي و رمضان كريم
شكرا لك على مرورك و تعليقك على مدوتنى
و كل عام و انتى بخير
و اللهم بلغنا رمضان
رمضان كريم و تحيااتى
nour shahen
============
ياحبيبتى هو انتى كنتى ماصدقتى حد يفتحك ولا ايه فتحتى عالبحرى ؟؟؟؟ههههههههه
عموما البلوج بلوجك يافمر
ماهى اساسات المدونه خلاص هتقع
يانور حضارة ومدنيه ايه اللى بتتكلمى عنهم
ياحبيبتى انا لما كنت اكل شيبسى اشيل الكيس ف شنطتى لحد مااقابل اى باسكت كانوا بيقولول بلاش تخلف
شفتى الصح بقى تخلف؟؟؟!!!!!!! وعجبى
يانور الموضوع بقى ثقافه عامه
ثقافه شعب محتاجه تغيير من جذورها
كل سنه وانت طيبه ورمضان كريم
afew good men
=============
الله يكرمككككككككك
الفارس الملثم
============
تحياتى ومودتى ليك انت يامحمد ياجميل
الله ياعم على التحاليل الفلسفيه الميتافيزيقيه الملوخيه دى
والله عندك حق يامحمد
او يمكن احنا بنغبطهم انهم عاشوا فى ظروف غير ظروفنا ؟؟؟ الله اعلم
متشكرة على زوقك يامحمد
كل سنه وات بكل خير ويارب دايما منورنى
Blue Nile
==========
ربنا يكرمك ياجميل سعيده باتفاقك معايا بس كنت عاوزه تغيير جذرى
حاجه زى حمله لتغيير طباعنا الغلط وتقرب من ديننا اكتر
على فكره لسه ف الدنيا ناس كويسه
منورانى
sendrlla
=========
اهلا اهلا بنت بلادى
كل سنه وانتى بكل خير
مرورك اسعدنى جدا ويارب دايما
شوفى انتى معاكى حق
بس اللى عايزة اوصلهلولك صح انى اقصد ان الغلط مردود للعامل البشرى ايا كان سوا حكومه او شعب
هو العامل البشرى
مش الزمن
يارب تكونى فهمتى قصدى
نورتينى ورمضان كريم
عتبة واحد
==========
والله نورتنى بس وغلاتك مافهمتش حاجه
ههههههههههه
ممكن تفهمنى؟؟
ايه اللى انا ويويو بنحاول نغيره؟
ياريت افهم بجد
kochia
=======
ماانا بقول برضه يمكن علشان ثقافه الشعب تعبانه
والله قلتها بس مش عارفه ايه السبب برضه؟
كل سنه انتى طيبه
حبيبتى شجعتينى ونفذت طلبك وكتبت بوست جديد مبسوطه بقه ..رمضان كريم..
إرسال تعليق