حوار ظريف جدااا

شوفوا انا ملاحظه كده والله اعلم انى بقيت بنكد عليكوا كتير ماشيه معاكوا على سطر وبسيب سطر.السطر اللى فات كان غم من الدرجة الاولى يبقى الدور على الابتسامه بقى اصلكوا صعبتوا عليا :)

بقى ياجماعة من فترة كده كنت غبت عن التدوين واخوانا البلوجارية كانوا نفسهم يعرفوا انا فين ؟؟


أنا بقى كنت فى تدريب فى 6 اكتوبر وكنت ساكنه هناك حيث لا يوجد نت وكان طالع عينى وبصحى بدرى ياعينى على شبابى وبفضل واقفه حوالى 7 ساعات على رجليا اللى قطع غيارها خلاص نفذت من الاسواق :)


المهم فى ذات يوم من الايام كنا قاعدين بنتغدى فى الشركه أنا والعيال صحابى وهم


مونى... الدلوعه الطاءة ودماغها مش فى الشغل خالص بس عثل


روفى...اللى ياميلة بخته اللى تتخنق منه وبتكشر فى وشه تجيب اجله


بيرو...حبيبتى اللى زيى مايعجبهاش الحال المايل ولو حد استعبط توريه كرشته


وأنا...الغلبانة اللى بلسانين ومايعجبهاش الحال المايل ولا المياصه الفارغه



الحوار كان كالتالى



روفى: قوليلى يامونى انتى جيتى من الزقازيق امتى؟؟


مونى: امبارح العصر وبوسى جت معايا اهى تسلينى وبالمرة بتوحشنى قلت اجيبها تقعد معايا الشويه دول


أنا: امممممممم وهتقعد معاكى عند خالتك برضه؟؟


مونى: ااه اصل ميشو كمان هنا عند خالتى


أنا: ميشو مين؟؟ هى بوسى اتخطبت؟؟


مونى: هههههههه لا لسه أما يكبروا شويه هنجوزهم ههههههههه


أنا: نعم !!!! لما يكبروا ؟ دى البت خلاص هتعنس


مونى: بت مين؟؟ ماعلينا ...كلى كلى

بس نسيت احكيلكوا عاللى حصلى وانا جايه فى القطر


بيرو:ايه ده ؟؟!! انتى جايه فى القطر ؟ ...قشطه جداا ياقمر


مونى: اه قلت اسافر فى التكييف علشان بوسى اصلها بتتخنق من الحر


روفى: -نظره غيظ- ياروحى..طيب يااختى امال لما تخش جهنم هتعمل ايه ؟؟


مونى: ههههههههه اه ده انا حتى خبيتها من الكمسرى ولما كانت تحب تشرب كنت بطلعلها اللبن سرقه


أنا: اخس عليكى مش عيب كده ده انتى حتى بنت ناس كده تزوغى من التذكره ؟؟ هههههههه


مونى: هههههههه لا يابت اصلى جايباها فى كرتونه علشان محدش يشوفها اصلها امورة مووت


أنا: كرتونه !!!!!!! هههههههه ليييه ؟؟ ودى علشان تخبيها فى كرتونه جبتيهالها منين؟؟ اكيد دى كرتونة تلاجه ايديال زانوسى 14 قدم علشان تاخد بنت خالك دى كلها


مونى: هههههههههه يخرب عقلك بنت خالى مين ياهبله؟


روفى: بتسمع وهى بتاكل وساكته ..طبعا الساندويتش احلى


بيرو: قاعده مخنوقه لانها لسه دابه خناقه فى التليفون


أنا:امال مين بوسى يابنتى؟؟


مونى: ماهو كان لازم كرتونه اصلهم مانعين اصطحاب الحيوانات


أنا: اخس عليكى ليه بتقولى عليها كده ؟؟ دى بتحبك هههههههه


مونى: ايه هو انا غلطت ؟؟ هى القطط دى مش حيوانات؟


أنا: نااااااااعااااااااااااام ....نهار ابيض .......قطه؟؟


بيرو: رمقتها بنظرة شذرى على رأى الواد المعتصم بتاع طيور الجنة


روفى: نظرة زى بيرو بالظبط ...يالهوتى


مونى: -ببرود شديد- اه دى حبيبتى ياخبر ..تخيلوا دى مابترضاش تاكل غير جبنه نستون ولازم لا فاش كى رى وبتشرب لبن نيدو.اه اصلها بتقرف قوى


أنا: الله يحرقك يابعيده ...انتى يابت عايزة تشلينى؟؟. وهو يعنى ست القطقوطه ماينفعش تاكل غير جبنه البقره اللى بتضحك دى؟


روفى: تصدقى لو مش الموبايل خسارة ؟ انا كنت حدفته فى دماغك واستريحت منك


بيرو:- بتخبط على المكتب جامد- مونى الله يكرمك اعصابى !!


أنا: اه يااختشى وبعدين؟ وبوسى ياحبيبتى عملت ايه فى الحر اصل الجو امبارح كان صعب برضه


مونى: اه ياحبيبتى دى كانت يااااى تعبانه موووت وصعبانة عليا حبستها فى الكرتونه ..ربنا يسامحه عمو الكمسرى


أنا: معلش يااختى دستور بلدنا ظالم .... لاااابود انك ترفعى قضيه تطالبى فيها بالسماح باصطحاب القطط وبقيه الحيوانات فى القطارات والمواصلات


مونى: اه بجد ده حرام ..دى حتى بوسى كتكوته اوى . تصورى انى لما رحت لخالتو زعقتلى لما لقيتها تعبانه من الحر وقاللتى كنتى سافرى بالليل علشان خاطرها.ولما جيت انزل اجيبلها لبن قالتلى سيبيها هنا علشان اديها شاور لحد ماتيجى


أنا: ناااااااااااااعااااااام . ش ايه يااختى؟ ... شاور؟؟!!!.-الله يرحم ستك-.اه وماله برضه ماهو لازم


روفى: بت انتى....انتى عايزة تنقطينى؟؟


بيرو: اصلا انا هقوم قعدتكوا تشل


روفى: خدينى معاكى شوية الدم اللى عندى خلاص اتحرقوا


أنا: ياكلااااااااااب وهتسيبونى اتشل لوحدى؟؟


مونى: ههههههههههههه ليه بس؟؟ طب بصى اوريكى بوسى؟؟ دى سكر صورها عالموبايل معايا


أنا: هاتى هاتى وماله-خلاااااااااااااص هتشل بجد-


مونى: يااااااه تصدقى وحشتنى بجد؟ أنا هتصل بخالتو علشان اطمن عليها




أنا بجد سرحت منها أنا مش ضد الرفاهيه وان الواحد يربى قطط

لكن ان تبقى القطه هى شغله الشاغل ؟؟

اهو هو ده اللى انا ضده جدا وبسميها تفاهه كمان


يعنى تبقى البلد بتولع وفى ناس مش لاقيه حته تؤيها والقطط بنسفرها فى التكييف!!

ويبقى فى ناس مش لاقيه تاكل وناس بتأكل قططها جبن ماركات مستورده!!


ولا لما تبقى صحبتى اللى بحبها جدا منفضه للشغل عالاخر وعماله تفكر فى اكل بوسى وهى فاضلها سنة وتتخرج ؟


والله فى ناس من ده كتير

بس الناس التعبانه اكتر

بذمتكوااتنقط أنا ولا لااااااااااااء؟؟؟