أنا عارفه انى قلت انى هغيب علشان الامتحانات
وانا لسه عند كلمتى لانى مش بعمل حاجه دلوقت غير انى بذاكر
لكن بتحصلى حاجات صعبة اوى عملتلى وقفه مع نفسى
من فترة مات محمد الفارس الملثم اقرب اصدقاء بلوجر لقلبى
ومن كام اسبوع حكتلى صحبتى عن صحبتها اللى ماتت قبل فرحها بيوم
ومن كام يوم عرفت ان محمد فارس صاحب مدونة الحياة امل مات فجأه
وامبارح عرفت ان صحبتى خبطتها عربيه واتكسرت واتعورت واتخيطت دماغها
وفى كل مرة كنت بحس ان فى حاجه بتدينى مؤشر ان هاجس الموت اللى بيطاردنى ممكن اوى يكون حقيقه بعد وقت قريب
وانى مش لسه فى عز شبابى زى ماانا بقول ولسه بدرى عليا
لان اللى بتحصلهم المصايب دول كلهم شباب
لكن النهارده كانت اعظم المصايب
عرفت ان بنت صاحبة ماما عملت حادثة وهى راجعه من امتحانها والبنت دى فى اولى ثانوى
عنيا دمعت على البنت لانى بحبها جدا وفضلت ادعى ربنا يخفف عنها
عرفت ان الحادثة مش عاديه وانها حادثة قطر
اترعبت والدموع فضلت ملازمانى
شويه وقالوا اتنقلت المستشفى فى حاله صعبه وغالبا رجلها اتقطعت
خلاص فضلت اقول يارب نجيها
دى لسه صغيره ومامتها محتاجالها
مفيش ربع ساعه وجه الخبر انها ماتت اول ماوصلت المستشفى
خلاص مها ماتت
مها اللى عندها 15 سنه ماتت
وانا بقول على نفسى لسه صغيره والموت بعيد عنى شويه
حسيت ان الوقفه اللى عماله ااجلها مع نفسى جه معادها
لا انا مش صغيره عالموت
لا انا لازم اتغير
لازم ابطل اغلط
عايزة ابقى صح بقى
كان لازم ابدأ بأى رقم مالوش لزوم على موبايلى وامسحه غير الارقام اللى لازم تكون معايا علشان علاقات شغلى
واى ميل ملوش لزوم على ميلى امسحه
ولازم اعمل فورمات للايبود بتاعى من كل الاغانى اللى عليه
كان لازم امسح اى اغنيه على جهازى
ولازم احافظ على ورد القرآن اليومى اكتر من كده
ولازم احافظ على الاذكار اكتر من كده
ولازم اقرب من ربنا اكتر واسجد اكتر
لازم يكون فيا خير اكتر
عايزة اتغير
يارب اتغير يارب
انا خلاص مش صغيره وممكن اموت قريب
اللى عندها 15 سنه ماتت
واللى عنده 28 سنه مات
وايه يعنى لما اللى عندها 22 سنه تموت هى كمان
ساعتها ايه هتلاقيه فى صحيفتها غير اللى تندم بيه على انها عملته فى حياتها
ادعولى اتغير بجد
وادعوا للى ماتوا ربنا يرحمهم
وادعوا لمها ربنا يغفرلها ويتجاوز عن سيئاتها
وادعوا للفرسان اللى اختارهم ربنا يسكنهم جناته
خلاص جنازة مها صوتها قريب من البيت
يارب الرحمة
هناك 47 تعليقًا:
:(
عارفه الهاجس ده والله مش عندك وحدك
مش عارفه اقولك ايه
بجد ربنا يرحمهم ويثبتهم عند السؤال ويصبر اهلهم
ويااارب يهدينا ويثبتنا ع الهدايه
الموضوع صعب اوي بجد :(
البقاء لله يا نور
وربنا يرحمهم يغفر لهم سيئاتهم
والموت فعلا مش بعيد عن حد
وربنا يهديكي للخير يا نور ديما و يغفرلك ويغفرلنا جميعا ويهدينا للخير
البقاء لله مرة تانيه
ربنا يرحم الاستاذ محمد وكل الناس
وربنا يهدينا جميعا
إن لله وإن إليه راجعون
ولا حول ولا قوة إلا بالله
هذه الدنيا دار متى ما أضحكت في يومها بكت غدا قبحا لها من دار
طبعت على كدر ونحن نريدها صفوا من الأكدار
كلنا يا نور مش عاوزين نتغير علشان خايفين من الموت
الموت نفسه هيموت
احنا بنخشى الله,, ونزعل جداً ان ربنا يشوفنا فى موقف ميحبوش
او ربنا ميلاقناش فى موضوع يحبه
احنا عبيد ومهما تطاولنا فى البنيان عبيد
ويجب ان نطيع امر ربنا
ربنا يوفقك فى التغير يانور
وسيبك من هاجس الموت لانه مرحله ش هو النهايه
احنا مسلمين وما بعد الموت افضل بالنسبه لينا ان شاء الله
دعواتى
انتي كلامك انا حساه اوي
انتي خلتيني وانا بقرا عوزة اقولك استني اكمل البوست عنك
عارفة انا زميلي وصديقتي كانوا عزمني من اسبوع علي فرحهم يوم 20 الشهر ده
اتصلت بيا من يومين تقولي ان خطيبها واللى هو معيد عندنا في الكلية وزميلنا من ايام زمان جدا عمل حادثة بعربية مأجرها دخل بيها في كوبري في العباسية وعضم وجهة اتكسر وهيعملوله عملية وشرايح ومسامير وشكله هيتغير
وده كله ليه
لاني قبلها بيوم بقوله حرام شغلك في البنك
انت شغال في الاعمال الربوية
فلوسك حرام
قالي انا مضطر
قلتله لا مش مضطر المضطر هو اللى مش لاقي اما الملأكل او المشرب او المسكن او العلاج او المشرب
المضطر ليه شروط
ولو الشخص وجد عربية فول يقف بيها في الشارع ورفض ده وارتضي لنفسه انه يلبس بدلة ويعد علي مكتب في بنك ربوي يبقه هو اللى اختار الحرام
ده غير اننك اصلا موقف شغلانة المعيد في الكلية وواخد اجازة بدون مرتب وشغال في بنك عشان فلوسه اكتر
اتقي الله
والله انت اعلنت الحرب مع ربنا
فأذنوا بحرب من الله ورسوله
فلوسك هتتصرف علي المرض
تاني يوم عمل الحادثة
واعد اسبوع في مستشفي خاصة في مدينة نصر ودفع مصاريف كتير غير العملية غير 25 الف هيدفعهم تعويض عن العربية اللى كان مأجرها
اقل حرب ربنا يعلملهاله
ربنا مموتوش
اداله فرصه يعيش ويتوب ويرجع عن اللى فيه
اول ما يقوم بالسلامة هبلغ خطيبته تقوله انه يترك الشغل في البنك
كل اللى عمله اتصرف علي المرض رده غير اصلا شكله اللى هيتغير
ربنا كبير اوي وبيمهل عباده لعلهم يتوبوا
بس احنا سايقين العوج
ما كان ممكن ربنا موته ومات علي معصية وساعتها مكنش هينفع الندم
والله حوادث موت الفجاة بقه اكتر من موت كبار السن
والله كل اللى عمالين يموتوا الان هما الشباب ويموتوا فجاة
خلونا نفكر بقه
يا حبيبتي موت مها كان رسالة من الموت ليكي
بيقولك انا قريب
تعبك ومرضك في اي وقت رسالة من الموت
الموت حقيقة
كلنا هنلبس الكفن غصب عننا
كلنا هننزل قبرنا غصب عننا
مها خرجت النهاردة وهي معتقدة انها هترجع تاني
امها مودعتهاش وحضنتها جامد اوي لانها عارفة ان مها راجعة
امها مسجلتش ليها مقطه فديو عشان تتفرج عليها كل شوية وتفتكرها لانه فكراها هترجع تاني
الموت قريب يا حبيبة
انا سعيدة ان ده علم فيكي
انتي ربنا بيحبك
ربنا عاوز يفوقك ويهديكي
امسكي في الفرصة بأيدك وسنانك
متقليش ولا تضعفي
انا لما فكرة النقاب جت في بالي وربنا اوحالي بيها وهداني ليها في نفس اللحظة لقيت الشيطان شغال عليا جامد جدا جدا
بقيت اقاوم
وقررت في لحظة اني هلبسه حالا
ماما بتقولي استني لما تفصلي لبس
قلتلها يا امي والله لو ملبستوش حالا مش هلبسه
يا امي لحظة الهدا بتيجي في لحظة لو ممسكتش فيها بأيدي وسنلاني هضيع فرصتي
امسكي في الفرصة بأيدك وسنانك
بحبك في الله يا حبيبة
ومع بعض هنقوي بعض
وخلينا صحبة صالحة كلنا
الله اكبر عليكي انك مسحتي الاغاني
انتي محسساني بأن كل خطواتك هي كلها الخطوات اللى بدأت بيها
انتي فطرتك طيبة اوي اوي انك تتاثري بلي حصل
وربنا يصبر اهلها ويسكنها فسيح جناته
هم السابقون ونحن اللحقون
وذي ما بنكون منتظرين في عيادة طبيب عشان ندخل نكشف
اعتبريها هي دخلت الاول تكشف و انتي لسة هتدخلي في دورك
ويوم ياتى أجلهم لا يستقدمون ساعة ولا يستأخرون و الموت ياتى بغتة
ربنا يصبركم يا رب
ويرحم جميع موتي المسلمين
متشكرة ليكي يانور علي الوقفة دي
صحيح الموت بيخلينا نخاف أنما برده فكرة أن مادايم غير وجه الله الكريم بتدينا أحساس بالأمان
ربنا يرحم أموات المسلمين جميعا ويحسن ختامنا
آمين يارب العالمين
الموت علينا حق و لن يصيبنا اٍلا ما كتب الله لنا ..
لكن ..
التغيير للأفضل مش حيكون بمسح أرقام الموبايلات و لا بمسح الأغانى ..
لأ !!
التغيير للأفضل بيكون نابع من الداخل ..
متجسد فى حسن طاعة رب العالمين كما ينبغى ..
التغيير للأفضل يكون بحسن معاملة الناس و التوافق و المصالحه مع النفس ..
أقصد يعنى بالأمور الجوهريه ..
تقبلى تحياتى و تقديرى ..
ربنا يكرمك ويثبتك
اللهم اغفر لهم واحمهم وادخلنا فسيح جنتك يا ارحم الراحمين
انا لله وانا اليه راجعون
اللهم ارجم موتنا واغفر لهم الله
اللهم آآآآمين يارب العالمين
فضل من الله سبحانه وتعالى ان ينير لنا الطريق وكانها انذرات لكى نعدل من حياتنا قبل فوات الاوان
المفروض ندعى لهم بالرحمة يا نور
ربنا يرحمهم يارب
ركزى فى مذاكرتك ربنا يعينك و يوفقك
تحياتى
يويو
والله يا نور التغير فى حد ذاته كويس جدا ربنا يهديكى يارب ويبعد عنك الشر ومش عيزاكى تفكرى كتير سبيها على ربنا
وفعلا الموت قريب جدا مننا كلنا مافيش حاجه اسمها صغير ولا كبير
انا عن نفسى منتظرة
ربنا يحسن ختامنا على خير
ربنا يرحمهم ويصبر اهلهم يارب
ويرحم امواتنا جميعا
ابقى طمنينى عليك وركزى فى المذاكرة واشغلى بالك بيها
جوجو
نور
انا مش عارفة اقول حاجة
الموضوع بتاعك ده بيلح عليا من فترة
ربنا يتجاوز عننا
احنا كلنا مقصرين في حقة
رنا
الموت الفجأه من علامات الساعه
وعمر ما الموت ما كان بالسن
قد رحل من اصدقائي عدد غير قليل
منهم من كان بالمرض ومنهم بدون مرض وفجأه
لكن هذا لم يمنع ان تسير الحياه
التفكير في الموت شيء كويس ولكن ليس بالصوره التي تجعلك غير قادره على الحياه
التفكير في الموت يكون للعظه والعبره والحذر من الله في جميع التصرفات والتي نهمل فيها مراقبة الله عز وجل
لا تجعلي من مصاب غيرك يؤثر عليكي وخاصة في فترة الامتحانات
واتركي الأمور لمن يدبرها فهو اعلم بكل شيء
اللهم ارحم محمد واغفر له وتجاوز عن سيئاته
اللهم وسع له قبرة وانرة واجعله روضه من رياض الجنه
اللهم امين
**********
حبيبتى
انا لسه خارجه من حالة اكتئاب بسبب الموضوع ده
الهاجس ده اكتشفت انه مش عمندى انا بس
لقيتك انتى كمان زىّ
صاحب جوزى نام مصحيش
جارتى لسه متجوزة ماتت هى وجنينها
وحالات كتير
لا نملك سوى الدعاء ورحمة ربنا اكبر منى ومنك ومن الدنيا كلها
اللهملا تقبضنا الا وانت راض عنا
اللهم انى اسالك حسن الخاتمه
الموضوع ده عندى أنا كمان كل شويه أسمع ان فى حد مات أعرفه أو معرفوش مش مشكله
وشكله عند ناس تانيه كمان
أكيد كلنا بنعمل حاجات غلط بس بنحاول على قد مانقدر نبطلها
وربنا معانا ان شاء الله هيقدرنا اننا نبقى أحسن كفايه نيتنا ...!
البقاء لله يا نور
لمها و لكل اللي ربنا رد وديعته فيهم ويا رب ان شاء الله يكون شملهم برحمته و بفضله و بكرمه الواسع و تكون الجنة مثواهم و مثوانا يوم ما نروح لهم..
بصي يا ستي...انا مقدر جدا الحزن اللي انتي فيه..ده طبيعي و حقك لا جدال...لكن انك تعيشي في جو كافكاوي فلسفي يتمثل في ان حياتك متكونش إلا محطة لانتظار الموت فده محدش يوافق عليه ابدا...
مينفعش اقول انا الموت بيطاردني و الدور عليا...اه كده كده هنموت محدش هيخلل...بس ربنا مامرناش بكده..قل من حرم زينة الله التي اخرج لعباده... يا نور ربنا خلقنا لتلات حاجات...عبادة الله و عمارة الأرض و تزكية النفس...ازاي ممكن اعمر مكان انا اصلا مستني اني اسيبه في اي لحظة بخوف و بشغف و بوسواس انا عايش فيه في كل لحظة...انتي لو مأجره بيت ايجار جديد مؤقت مش ممكن تفرشيه على زوق اخر حاجه لانك هتقولي لنفسك كل شويه ما انا سايباه قريب اظبطه ليه بقى...بالمثل حياتك...مينفعش تتعاملي معاها من نفس المنطلق...مينفعش اقول هقطع علاقتي بالناس و هغير نفسي و حياتي تبقى صلاه و صلاه بس...مبقولكيش متصليش..انتي عارفه اني اول حاجه قلتهالك قبل كده اني مستريحتش نفسيا غير مع قيام الليل و ورد القرآن...بس في نفس الوقت الحياة مستمرة نورمال جدا...و صدقيني انا عشت كتير لحظات موت ناس قريبين مني و منهم شباب زي الفل في مقتبل العمر بس الدنيا بتمر...يمكن انا مش عاطفي و مبتأثرش بسهوله بس مرت عليا لحظات اني بقى لازم اتدين ع الاخر ما انا دوري جاي..زيك تمام كده...بس صدقيني الدنيا متتاخدش كده...ربنا خلقنا امة وسطا...يعني الاعتدال هو الاساس في كل حاجه يا نور...يعني مع الصلاه و صيام النوافل اللي ربنا من عليا بيه و ان شاء الله يكون من عليكي بيه مع القران و قيام الليل الجميل المريح مع الذكر ثم الذكر ثم الذكر مع ده كله الاعتدال في معاملة الناس مش مقاطعتهم..يعني لو مثلا تقصدي بالموبايلات و الميلات اللي ملهاش لازمه دي تخص ولاد..ممكن التعامل معاها بسهولة تامه و بمبدأ قراني جليل امتثالا لقوله تعالى " فلا يخصعن بالقول فيطمع الذي في قلبه مرض"...يعني التعامل يبقى بحدود مش اكتر و بكلام رسمي..لكن مش قطيعه و امتناع...
انا طولت اوي مع اني حاسس اني لسه مخلصتش كلامي بس ده لاني مقدر ظروفك و اللي انتي فيه و كمان مدايقني جدا حالتك النفسيه الحزينه اللي واضحه في كلامك..و انا اللي كنت جاي اقول لمدونتك كل سنه وانتي طيبه متأخره شويه عشان كان ورايا طول الاسبوع امتحانات...معلش بقى
ارمي كله ورا ضهرك و اهم حاجه دلوقتي المذاكره عشان الامتحانات تعدي على خير و تتخرجي و تخلصي...
و اخيرا البقاء لله كمان مره
سلااااااااام من اخوكي الحزين بجد رامي...
أكيد انت عارفة كويس إن موت الشباب الكتير من علامات الساعة
واحنا فعلا المفروض نفكر أكتر في إن يوم القيامة كله قرب أوي مش بالضرورة موتنا إحنا
ربنا يهديكي و ينورلك طريقك إن شاء الله يا نور. بس ياريت مش تخلي هاجس الموت يؤثر في حياتك زيادة. أيوة افتكري الموت و افتكري إن مش عايزين نغضب ربنا. بس أتمنى تقدري مش تزودي الموضوع عن حده
أكيد خطوات صح اللي فكرتي فيها... ربنا يهدينا جميعا ويبعدنا عن الطريق الغلط
حاولي تذاكري كويس بأة
البقاء لله
ربنا يقويكي على طاعته
و يقوينا كلنا يارب
و يرحم موتى المسلمين و يسكنهم فسيح جناته
السلام عليكم ورحمة الله وبركاتة
لا اله الا الله محمد رسول الله
ان لله وان الية راجعون
لله ما اخذ ولله ما اعطي ولا نقول الا ما يرضي ربنا
عظم الله لك الاجر يا نور فى من فقدتى
وجميل ان يتعظ المرء بالموت فكفي بة موعضة اسال الله لى ولك السلامة من كل اثم والمغفرة من كل ذنب وتوبة قبل الموت وشهادة عند الموت واسال الله ان يحسن خواتم اعمالنا انة ولي ذلك والقادر علية
استعيني بالله وتوكلي على الله نسال الله لنا ولك الهداية وجميع شباب المسلمين
دمتى يا اختى
حبيبتى ما تحزنيش وهونى على نفسك بقرآة القرآن كلنا عارفين ان الموت قريب جدا من اى حد والموت ما بيعرف صغير ولا كبير ولا يعرف مريض ولا سليم وربنا يرحمنا دنيا وآخرة ويرحم اموات المسلمين جميعا
اللهم آمين
لا اله الا الله
محدش بعيد عن الموت
صغير كبير كله هيموت
دي اشارات من ربنا بيفكرنا بحقيقة الدنيا
اتمنالك ربنا يعينك علي القرار ده
ولو كل واحد فينا راعى ربنا في كل شيء بيعمله عمره مهيجيله يوم ويندم علي الحاجه الي عملها دي ...
ربنا يصبر اهلهم ويرحمهم ويجمعنا بيهم في الجنه .
ربنا يرحم موتانا جميعا ويغفر لهم ويصبر اهلهم.
وربنا يعينك توصلى للطريق الصح ويلهمك الصواب.. وقرأى قرآن كتير لعلك تجدى فيه راحة البال والطمأنينة من هموم الدنيا ومغرياتها
ربنا يرحمنا كلنا احياء واموات.......ربنا يهديكى يا حبيبه لطريق الخير اللى يرضيه ويرضى بيه عليكى.....ربنا يثبتك على الطريق اللى تختاريه بالاسلوب اللى تختاريه ويكتبلنا كلنا السلامه
بعد الشر عليكي
السلام عليكم
الموت لا يفرق بين كبير وصغير
بس بجد الواحد فعلا محتاج يستعد له كويس لانه بيجي من غير استذان
عامله ايه دلوقتي يانور
يارب تكوني احسن وبخير
قربي من ربنا كتير كلنا محتجين لكده وربنا يوفقك يارب
ويرحمنا ويغفرلنا
وربنا يرحمها ويرحم كل اموات المسلمين ويحسن ختامنا يارب
ركزي في الامتحانات وحاولي تهدي وتفكريش في اي حاجه تانيه
وربنا يكرمك يارب ويبعد عنك كل شر
خالي بالك من نفسك
وارجعلنا بسرعه
كل نفس ذائقة الموت
الله يرحمهم
ادام الله عليكي الثبات
مبسوط ليكي
ربنا يوفقك وتذاكري وتنجحي
ادام الله عليكي الثبات
مبسوط ليكي
ربنا يوفقك وتذاكري وتنجحي
ربنا يرحم كل اموات المسلمين ويجعل مثواهم الجنة
اعمل لدنياك كانك تعيش ابدا ولاخرتك كانك تموت غدا
هونى على نفسك حبيبتى
ان الله ولو لم نكن نخطى لا ستبدلنا بقوم اخرين يخطئون فيستغفرون
فالله يحب عباده المستغفرون ويبدل السيئات حسنات
ربنا يهدي لك طريقك يا رب انا وانت وكل امة المسلمين
ان شاء ترجعى ببوست سعيد وبيضحك عن نتيجة الامتحانات :)
ارق تحياتى لكى
نور
نحن لا نملك من امرنا شئ .. فالحياه تجرفنا فى منعطفات لا نملك الا ان نسايرها احيانا ونقاومها دوما..
احذرى ياابنتى العزيزة ان تجرفك الحياة واعملى دائما على ما يمليه عليك قلبك وضميرك .. واعلمى ان الله مطلع على قلوبنا وضمائرنا.. وان الموت ليس ببعيد عنا ..فقط فالتكثرى من عمل الخير فهو لك باق
اللهم ارحم موتانا برحمتك الواسعة
اطلبى لها الرحمة
مش انتى بس!
اللى عايزة تتغيرى
كلنا عايزين نتغير للاحسن
ندعيلك وندعى لانفسنا بهذا
يارب يارب يارب يارب يارب
السلام عليكم...
الله يرحم جميع موتى المسلمين...
التغيير ينبع عن إقتناع لا عن خوف ...
....
بالتوفيق بالدراسه..
الله يرحمها ويرحمنا جميعا دنيا وآخره ويصبر اهلها
الله يرحمها ويرحمنا جميعا دنيا وآخره ويصبر اهلها
ربنا يرحمهم جميعا، و إحساسك ده دلوقتى هو نعمة من عند ربنا سبحانه و تعالى، إن ربنا يفتح عينيكى على حقيقة الدنيا و انها مش مستاهلة حاجة، مع ذلك و انت بتقربى من ربنا أكتر ،فالبداية ممكن يظهر إنه تغيير حصل و ممكن تلاقى انك مش متعودة على كده و لكن مع الوقت (حقيقى و الله) هتشعرى براحة و طمأنينة لا تتواجد فى فعل أى شىء آخر، و هتتمكنى من فن الاستمتاع بالحياة فى طاعة لله
ربنا يعينك و يقويكى و يوفقك لخير الدنيا و الآخرة
تحياتى لكِ
انا لله وانا اليه راجعون
ربنا يصبر أهاليهم
ربنا يرحمهم جميعا ويسكنهم فسيح جناته
وياااااااااارب يهدينا جميعا
البقاء لله
فعلا كتير يمكن يوميا بنسمع خبر وفاة ناس شباب كلهم
وكلهم موت الفجأة من غير مرض ولا اي حاجة
وده من علامات القيامة
طبعا كفي بالموت واعظا يعني فعلا الموت لام يهزنا من جوة ولازم نعرف اننا قريبين من الوقوف بين يدي الله جدا
ادعو لك ولنفسي بالتوبة والقرب من الله في الحياة قبل الممات
وادعو الله ان يغفر لامواتنا واموت المسلمين
امين
و مين قال أن الموت بعيد يا حبيبة......ده ربنا بيقول في كتابه العزيز...و نحن أقر اليه من حبل الوريد......
بس أنتي احمدي ربنا أنه خلاكي تشوفي الحاجات ديه كلها عشان تتوبي و ترجعي في الوقت المناسب
خفف الله مصابك و أطال عمرك في طاعته
ازيك يا نور
اخبارك ايه دلوقتى
يارب تكونى بخير وربنا يوفقك
ابقى طمنينى عليكى يا قمر
عاشقه الاحزان
جوجو
حبيبه يا رب كل واحد فى غيبه يحس انه لازمله الوقفه دى
وربنا يحسن ختامنا جميعا يا رب
صديقتى
بجد ربنا يهديكى كمان وكمان وعلى فكرة الوقفة دى انا عملتها من زمان اوى وكنت فى اول ال 15 سنة لانى حسيت بالكلما اللى انتى قلتى دلوقتى وعلى فكرة انا كمان ناس كتيرة جدا اعرفها وشابا وصغيريين بيموتوا وحاس ان ده تنبيه ليا اكتر.ربنا يرحم الاموات جميعا
تحياتى عل البوست الرائع وربنا معاكى فى امتحناتك
تحياتى
سلام
عامل ايه يابطل ؟
شد حيلك
ربنا ينجحك
وينجح الجميع يارب
شدى حيلك كمان وكمان
وربنا يطمنا عليكِ
ربنا يوفقك في دراستك يا حبيبة
وان شاء الله نسمع عنك اخبار حلوة
مخنوق جدا كيك اخر حاجة
يارب تكوني بخير :)
إرسال تعليق