سأعود

صحابى البلوجرز وحبايبى

غبت شوية عليكوا ولسه هغيب كتير بس راجعة

استنونى وادعولى

هتوحشونى

اشمعنى انا ؟؟!!.....رحماك ربى

موضوع المرادى غريب شوية ....بكتبه وانا فى قمة الحزن والاسى من سرد أحداث مواقف متفرقة تجمعت كلها وكأن هدفها الاول هو حرق دمى وتعب أعصابى........حاجات بتحصلى وكأنها بتختارنى من وسط كل مسلمين الدنيا !!!!!
.......اشهدوا معايا........

الموقف الاول :
فى اخر أيام الدراسة اكتشفت ان الماسنجر بتاعى بيعمل حاجات غريبة ..ابقى اوف لاين يعملنى اون لاين ويبعت مسجات بلينكات غريبة جدا وكأنها عبرى للناس المضافة عندى. المهم جربت مرة ادخل اللينك العجيب ده بصيت بصه عابره مالقيتش حاجة غلط أتارينى أنا اللى متخلفة ومش عارفه إن الكلام الغريب اللى على صور بتلمع هو مؤشر للغلط بعينه..لحد ما فى يوم لقيت صديق عزيز عليا قوى بيقولى بالحرف الواحد take care habiba ..u have avery bad virus وبعدين قاللى الحقى نفسك البتاع ده هيوديكى فى داهية وهيسوأ صورتك قدام الناس دى لينكات لمواقع مشبوهه ..
وبقيت انا فى ثوانى من دعاة الفساد والمروجين للرزيلة !!!

.................. انا ؟؟!!! يالهوى
المهم شلت الماسنجر ..مانفعش ....شلت الويندوز ....مانفعش ....والموقع فرض نفسه عليا ك home page لحد ما عملت فورمات للهارد خالص.. والله واخرتها غيرت الجهاز كله.

الموقف التانى:
مفيش بعد الاول بكام يوم داخله بفتح الميل لقيت مسج من واحدة رخمة قوى وعلى لينك فتحت اللينك علشان اشوف المسج دخلت سجلت والموقع بصدر رحب جداااا قبل اى ID واى password ودخلت لقيت دى مجرد دعوة بتوصل لكل الناس اللى عندك على الميل بمجرد دخولك للموقع . ومن اول ما دخلت وأنا كل يوم الاقى عشرات المسجات وطلبات الاضافه من اخوانا اللى عليه باءت كلها معايا بالفشل لحد مافى يوم لقيت بنت وحاطة صور بشعة سافلة ..بصراحة غرت قوى على دينى ..
ليه بنت مسلمة وتعمل كده؟ زعلت وكانت دى اول مرة ابعت مسج لحد،، بعت قلت اكلمها يمكن ربنا يهديها وقلتلها..

" ايه يابنتى الصور دى ؟ مفيش صور اسفل من كده شوية ؟! يابنتى ياحبيبتى حرام عليكى امال لو مكنتيش بنت ؟!!! ...اتق الله "

وفى الحال ردت عليا بمسج قلت يمكن ربنا هداها على ايدى وفرحت قوى ودخلت اشوف المسج وياريت ايدى كانت اتقطعت قبل ماافتحها لانها كانت عبارة عن صورة ماشفتش اسفل منها فى حياتى وبدون اى كلام ..اتصدمت وتقريبا تنحت لمدة دقايق مش عارفه اعمل حاجة ورحت رديت عليها بكلمة تانية " تصدقى كان عندى امل انك تكونى بنى ادمة وتخافى ربنا ...ربنا يهديكى " ......والله ياجماعة قد ايه فضلت مصدومة لفترة وحاسة إن الدنيا مش لسه فيها خير ولا حاجة وإن اسلامنا بقى فى مصايب بتهدده والمسلمين بقوا كل واحد بيقول يلا نفسى ....
المهم سيبكوا دلوقتى وتعالوا شوفوا الموقف التالت والانيل ......
أنا تقريبا مش بتابع تليفزيون ولما جيت افتحه مرة الاسبوع اللى فات لقيت القناة الموجودة وآدى المشهد اللى شفته ...المذيعة ومعاها اتنين شباب بنت وولد ....الولد جنتل مان مووووت و بنت انما ايه؟ -مزه مزه يعنى – قلت اشوف هيتكلموا فى ايه ؟
شويه القيت الولد بيتكلم بس استغربت الواد صوته حريمى شويه !!...عديتها ...المهم البنت المزه دى ام عنين زرقه وشعر اسود ليل وميكب رائع لقيت صوتها مسترجل شوية قلت ماهى ليلة باينة من اولها ..وقعدوا يقولوا كلام وأنا بحاول افهم أى حاجة لأنى يومها حسيت بغباء مستحكم وفيييييييييين ...
اكتشفت إن البنت اللى انا اطلقت عليها مصطلح حقير وهو مزه بكل ما يحويه من سفاله طلعت هى الولد ,,,,, والود الجنتل طلع هو البنت وانا متنحة خاااالص ،،،،،،، ولقيتهم عمالين يعيدوا ويزيدوا فى مصطلحين هما " اللازبيان والجايز " وانا وحياة المصحف ماعارفاهم يعنى ايه؟ !! ولما نزلوا الشارع ياخدوا اراء الناس لقيتهم بيفهموا الكلمتين بسرعة قلت لا يبقى الكلمتين دول مشهورين وانا اللى حمارة ...ولما فهمت الحكاية وياريتنى مافهمتها اتصدمت لأنى مكنتش اعرف إن فى ناس كده والله !!! ....
وقلت حسبى الله ونعم الوكيل . بقى فى من امة محمد زى قوم لوط !!! ؟؟ يعنى لعنة ربنا مش بعيدة وغضبه وانتقامه ممكن يبقى قريب ؟؟ رحماك بنا يارب ..

أما عن الرابع فهو لسه طازة خالص ..
من كام يوم لقيت ايكونة عجيبة على الديسك توب مااهتميتش وافتكرتها بتاعت جيم من بتوع اخويا .وشوية لقيت رسايل خطأ عماله تظهرلى والويب بيج فيها مشاكل رحت مغيره الويندوز و 3 مرات اشيله وانزله وتحصل نفس المشكلة لحد ما امبارح اخدت بالى ان الايكونة الغريبة ظهرت تانى ومعاها شوية شبهها قلت افتح اشوف ايه دول ؟ وافتح الايكونة من هنا .....
وياريتنى مافتحتها كانت هتبقى اخر فتحة فى عمرى.... والله لو كانت راسى هى اللى اتفتحت كان اهون . شفت صورة معروضة واجهة لفيديو وجنبها شوية شبهها فضلت مصدومة ومتنحة فترة طويلة مش حسيت بيها كانت قد ايه ؟ بس بعد مافقت لقيت ايديا متلجة ورجليا كذلك وفى حالة شبه شلل عن التفكير والحراك كمان اقوم الاقى تعليقات على الفيديوهات وياريتنى ما كنت قريتها ..كنت متوقعة انى هشوف ناس بتقول ليه كدا ؟ !! ....و ده حرام والله !!... وكده يعنى !!
لكن للاسف لقيت رسايل شكر وامتنان ومدح ......
ساعتها لقيت عنيا دمعت وانا بقول كلمتين اتنين " استغفرك ربى واتوب اليك " و " حسبى الله ونعم الوكيل "....
رحت صليت وفضلت استغفر ربنا على اللى شفته . اصبت بحالة شبه اغماء ووقعت من طولى فقت منها وأنا حزينة قوى على ديننا اللى تدهور حالة ......... على لسان الباطل اللى على صوته ومابقاش لاقى للحق لسان اصلا .
ولقيتنى بسأل نفسى سؤال " ليه دعاة الباطل واعداء الدين بيدافعوا عن اهدافهم وبيسعوا لتحققيها ؟؟ واحنا ..؟؟!!! ياأسفا ...آآآه والف اه ....كل واحد بيفكر فى نفسه وبس وأمر دينه عنده فى قايمة اهتماماته عن طريق الصلاة والصوم وبس ؟ !! – ده لو حافظ عليهم اصلا –
ليه عمرى ما شفت موقع اسلامى بيفرض نفسه على اللى قاعد على النت ؟ !!
ليه عمرى ماشفت منتدى محترم أو موقع نضيف بيحمل نفسه هوم بيج بالغصب ؟؟!!
ليه ديننا قوى ومش لاقى لسان قوى وايد قويه تدافع عنه ؟؟!!
ومين اللى ممكن يصلح غلط زى ده ؟ .. ولو فرضنا إن اخويا الصغير اللى لسه عمره 14 سنه فتح اللينكات دى وشاف المناظر دى ..ايه اللى ممكن يحصل ؟
مين يضمن إنه كان هيفقلها وايه اللى يضمن إنه بعد كده مش هو اللى هيدور عليها إذا كانت متاحة كده ويبقى شاب فى أول عمره ويروح فى طريق الضياع ..؟؟

الف علامة استفهام والف علامة تعجب ......
حسبى الله ونعم الوكيل ....اللهم انى استغفرك لكل ذنب .وتذكروا .......
" ذلك بأن الله لم يك مغيرا نعمة انعمها على قوم حتى يغيروا ما بأنفسهم " .. و
" قاتلوهم يعذبهم الله بايديكم وينصركم عليهم ويشف صدور قوم مؤمنين " صدق الله العظيم