الاثنين، ديسمبر 28

!!






واحد داخل مدونتى من سيرش ياهو بالكى وورد دى
طيب هاتى بوسة بقى :-*:-*:-*:D@};-
و بت مزه



ومصر فى ظل احتفالها بالذكرى الاولى لللعدوان على غزة فى يناير اللى فات اقامت جدار عازل بينا وبينهم


وفى ظل احتفالات مصر بقدوم عشين عشه نغصت حكومتنا المبجله على الشعب حتى شويه الشاى اللى بيشربوهم تعويضا عن كيلو الموز ابو سته جنيه وغلت  الشاى والسكر والزيت 


وفى محاولات ناجحه جدا من ميلودى للتخفيف عن المصريين خرجت لينا اعلانين ناجحين جدا فى رحلة تشويهها وهما الحقيقه وراء بريف هارت والخطايا السبع


عجبـت لـك يازمـن


كل سنة وانتوا طيبين 
ولسه عندى شويه امل خايبين انه ان شاء الله 2010 هتكون احسن

 بذمتكوا مش انا طيبه :)


الاثنين، ديسمبر 21

أم سيد الرايقة





فى عز ماانا غرقانه وسط مذاكرة بعض الحاجات اللى اخدتها فى الكورسات الفتره اللى فاتت ومندمجة اوى 

واذا بصوت مجلجل ومصهلل جاى من بعيد بيدندن "انساك ازاى.. ازاى انساك ازاى.. ده انا لو قلبى ينساك العين مابتخبيش وعنيا لو تنساك الفكر مايسيبنيش" نفضت تمام للسلايدس اللى قدامى وفضلت اسمع فى الاغنيه اللى بتغنيها أم سيد الرايقه جارتنا واهو ساعة الحظ ماتتعوضش برضه



وللى مايعرفش ام سيد دى تبقى جارتنا من 20سنه ومابنكلمهاش بقالنا يجى 15سنه؛هى ساكنه فى بيت صغير هى وابنها ومراته ورا بيتنا.. البيت سقفه واطى لدرجه اللى قاعد فى الاوضه عندنا بيبقى شايف كل حركه بتعملها

سرحت معاها شويه وفضلت اراقبها من ورا الشباك وهى بتأكل الفراخ بتاعتها وبتغنى انساك ازاى لفايزة احمد
الفكره بقى مش فى انها بتغنى ولا بتدندن

الفكره كلها فى انها بتغنى بمزاج عالى اوى وروقان وراحه بال ملهاش مثيل وعلى فكره صوتها حلو جدا واحلى مافيه انك تحسها بتغنى من قلبها حقيقى


اللى لفت نظرى للموضوع ده بقى ايه؟
لما ست عندها حوالى 60سنه بتغنى بالروقان ده فى السن ده وهى تقريبا مافيش فى بقها 3او 4سنات

ممكن انا او حد من جيلى او حد اكبر منى بخمس عشر سنين لما يبقى عنده 60سنه يقدر يقف على سطوح بيتهم ساعة عصارى ويغنى اغنيه عاطفيه بالدرجه الاولى وهو باله رايق اوى كده؟

ولا الناس دى زمانها غير زماننا واحنا بتوع زمن الضغط والجرى ورا الدنيا وفيها جرى الوحوش؟
!!

الثلاثاء، ديسمبر 15

رجع الشتـا يدق البيبـان





ورجع الشتا يدق البيبان
 :)


بس بحس بدفا قلبى يدفينى

رجعت استنى المطر 
ابص من شباكى..احب جو اول النهار وابتسم للشمس وهى طالعه بتصبح  بشعاع يادوب واصل..اصالحها والدنيا بابتسامة قلبى


رجعت حساسية البرد تتعبلى صوابع ايديا ورجليا ورغم ده مابكرهوش 




رجعت احب اغنيه أواخر الشتا ببردها ومطرها ولون تلجها الابيض 

رجع مودى يتغير بإشراقه الدنيا 


رجعت استخبى فى هدوم الشتا التقيله 
وحبايبى يقولولى انى ببقى زى العيال الصغيره وانا متقله هدومى وبعمل حركات الخوف من احساس البرد

رجعت استخبى فى البطانيه وماما واخواتى يتريقوا عليا عشان ببقى شكل حرف دبليو وانا نايمه من الحضن اللى حاضنه البطانيه بيه :)



رجعت البس البالطو الاسود الطويل حبيبى


رجعت اسمع اغنيه على الحجار لما الشتا يدق البيبان
"لما الشتا يدق البيبان
لما تناديني الذكريات
لما المطر يغسل شوارعنا القديمة والحارات
ألقاني جايلك فوق شفايفي بسمتي
كل الدروب التايهة تنده خطوتي
كل الليالي اللي فقمرها قلبي بات
مش جاي ألومك عاللي فات
ولاجاي أصحي الذكريات
لكني بحتاجلك ساعات
لما الشتا يدق البيبان"



وأقول بحتاجلك دايما مش ساعات لما الشتا يدق البيبان




رجعت احس بطعم حلو للأكل واشتاق للمحشى :)

رجعت افرح لما اشوف الضباب الصباح كاسى كل الحاجات 

رجعت اشوف الخيوط اللى بيعملها نفسى الدافى فى عز البرد



رجعت احس بنشوة البرد وامانيا بإن الصيف مايجيش والشمس تبطل تظهر 



الشتا جميل:)


انا عايزة مطر :(
وعايزة الدنيا تبرد كمان شويه 
ومش عايزة الصيف يجى ابدا


أنا مجنونه صح؟ 
:)


الاثنين، نوفمبر 30

هنـا...وهنــاك!



أنا هـنا
.
.
.
.
وهنــــاك انت



وما بينى وبينك 




شـوق
.

لـهفة
.
حـنين
.
وجنــون



.
.
.



أنـاجيـك

فهل تسمع ندائى ؟!


الأربعاء، نوفمبر 25

عيـدكم سعيــد




بعيدا عن أجواء الحزن والغضب والهم والتعصب والعصبية


بكره وقفة عرفات وبعده عيد الاضحى
أسعد الله أيامكوا وملاها فرح وسرور انتم ومن تحبون


وأعاد الله عليكم وقفة عرفات بكل خير وسعادة


وخروجا عن عقد  الحاجبين
اظرف ماشفت عن خرفان العيد


كل عيد اضحى وانتوا بألف خير 

وكل سنة وانتوا طيبين ياللى انا بحبكوا
;)






:)

الأحد، أكتوبر 18

وزالت الحمـاقـات




آه لقد أصبحت الحياة سيئه للغاية
كدت اسأمها 

أشعر دائما بزحام يتراكم حولى كلما التفت يمينا أو يسارا حتى مع عدم وجود أحد
هل لا خرجت لاتمشى قبيل المغرب؟
لالالالا أشعر بالضيق حتى إنى كرهت رؤية الشارع وكل من يمشى فيه


ليس لى إلا النوم  ولكن فى هذه الساعة المبكره؟
حسنا فماذا أفعل إن لم أخلد للنوم

اف لقد بدأ يوم جديد هل أجهز الافطار؟ لا ومن أين تأتى شهيتى فى كونى الفارغ هذا


آآآآآه حتى جوالى العزيز صرت أقبله صباحا ومساءا وارجوه حتى يعطف على بجرس يشير لأحد يهتم لأمرى ويسأل عنى وأنا امكث فى هذا المنزل الضخم وحدى ليل نهار
 لا أحد يفكر بالاطمئنان على إلا اذا كان يريدنى لخدمة ما أو يطمع بى لاشغل وقته وأسلى فراغه

تبا لهذا العالم الغادر الذى اصبحت تحكمه المصالح والنذوات والشهوات


اه اخيرا موبايلى ينبهنى لأحد يسأل عنى
ياترى من تذكرنى وماذا يريد؟!


-الو
-ازيك 
...هو صوته بعينه بنبراته التى كانت تهز كيانى غريب هذا السؤال ماذا يريد؟!...
-هو انت؟ الحمد لله انا بخير ;وانت؟
-انا بخير لسه فاكرانى وبتعرفى صوتى؟
-طبعا صعب انسى
-يعنى لسه بتحبينى زى الاول؟
-لأ طبعا ;انا مش ناسية لانك اول حب ياخدنى لكن ده مش معناه هفضل احبك طول عمرى
-يعنى خلاص نسيتينى؟! انا بس كنت عايز اتكلم معاكى شويه 
انا مخنوق وعندى مشاكل كتير أوى اصلى خلاص هتجوز الاسبوع الجاى وفى بينى وبين خطيبتى مشاكل كتير وانا بحبها ومش عايز اخسرها
-اسفه مابقاش عندى طاقة اسمع زى زمان
-ليه؟ انتى حتى لسه زى ماانتى ماتغيرتيش 
-يمكن اكون زى ماانا بس لا انت هو انت ولا الزمان هو الزمان
-هقفل حاضر;اسف لو ازعجتك

-فعلا ازعجتنى ياريت ماتحاولش تكرره تانى



آآآآآآه وألف آه حتى هذا من اسميته حبيبى يوما وعشت على أمل لقياه
أصابنى الزمان باليأس منه ومن حياتى

دوما مااحسده على صفاته اللاادميه 
على قوته وصموده معى من زمن بعيد واليوم على جرأته وأنانيته بل وتحجر احساسه
لكن حقا هل أخطأت حينما قسوت عليه؟
لا أظن فهو من فقد قلبه يوما واليوم أيضا فقد عقله
من ذا الذى يمكث طوال عمره فى حب خائن؟!
هو مخطئ بالتأكيد فليس هو والزمان فقط من تغيرا 
أنا ايضا ماعدت أنا ولن اعيش كثيرا فى أوهامى وحماقاتى 

فليذهب إلى حيث يشاء 




ملحوظة:القصة مؤلفة ياجماعة من مواهبى الغريبة اللى انا مش مقتنعه اصلا بوجودها ومالهاش علاقة بشخصيتى الحقيقية فياريت اللى يعلق يعلق على الاسلوب والحالة مش عليا D:


الخميس، أكتوبر 8






  لتتوقف ههنا الحيــاة لحظـات


الاثنين، سبتمبر 28

عنى و الرضا...




كتير بتحصل حاجات فى حياتى بتزعلنى
حساسيتى الزيادة بتكبر الصغيرة فى عنيا واقل حاجه ممكن تخلينى متنكدة وزعلانه وقرفانه ومش طايقة حد


ولما يجى حد يقولى ماتزعليش على حاجه
اقوله انا مؤمنة وراضيه وعندى قناعة ان اللى ربنا بيعمله خير حتى لو ضد ارادتى واللى بيضيع منى مش خير حتى لو انا عايزاه ونفسى  فيه
وفعلا والله ببقى راضيه وقانعة يعنى مش كلام ومش فض مجالس
وكتير القناعة دى بتخلى مفيش حاجه غالية عليا ومش بزعل من ولا على حاجه


لكن غصب عنى بلاقينى اوقات زعلانة ومخنوقه
والدنيا بمعنى الكلمة سودا فى وشى وملهاش لا لون ولا طعم ولا ريحة
او ليها بس كلهم وحشين


واستغرب نفسى ازاى ابقى مؤمنة بقضاء الله وقدره
ودايما راضيه بربنا وعن اللى بيحصل فى حياتى حتى لو حاجه وحشه
وبرضو يجيلى وقت وازعل
رغم حالة الرضا الشديده اللى جوايا بربنا دى
؟؟؟!!!!!!


من شويه بشوف جيفت عالفيس بوك لقيتها من صديق وبتقول كيف تحزن والله ربك والاسلام دينك؟؟
حسيت انى مكسوفة من نفسى اوى وعايزة اعتذر لربنا انى زعلانة من حاجه


احساس الرضا بجد احساس جميل
زمان سمعت حديث شريف بيقول فيما معناه ان اللى يصحى الصبح يقول "رضيت بالله ربا وبالاسلام دينا وبمحمد صلى الله عليه وسلم نبيا ورسولا" ويقولها فى المسا كمان وجب على الله ان يرضيه فى ذلك اليوم
ولانى بحب الاستغفار واالاذكار بقيت اقولها
مره انسى ومره لا ...يوم انسى ويوم لا


لحد ماخلاص بقت عادة برددها كل اليوم الصبح والمغرب 3مرات وكمان مع سماع كل اذان مره
وشويه بشويه لما بدأت مش انساهم احس بقيمتهم الحقيقه
احساس الرضا


اجمل احاسيس الكون
والله ياربنا راضية
راضيه بيك وعنك وراضيه بكل حاجه فى دنيتى
بس يارب محتاجالك
زيل مقتك وغضبك عنى ورضنى بقضائك يارب




السبت، سبتمبر 19

مطر وعيد وجوزونى ونيس :)




أول حاجة
وقبل أى حاجة أنا مبسوطه شويه أكتر من الكام يوم اللى فاتوا
عارفين ليه؟ لا مش عشان العيد بكره 
عشان الدنيا مطرت عندنا النهارده
لقيتنى بجرى واطلع فووووق عالسطوح وبفتح ايديا للسما وكأنى بحضن المطر
بلل شعرى وهدومى :)

اووووو احساس فوق الرائع وغير متوقع انى اقف تحت المطر فى الوقت ده
كانت مفاجأه حلوة بالنسبالى بجد خرجتنى من مودى السئ بنسبة 80%
 بحب المطر اوى
:)


وتانى حاجة
عيدكوا سعيد واسفه انى مش قلت للناس كل سنةوانتوا طيبين فى بلوجاتهم ولا حتى رديت على تعليقات البوست اللى فات بس اعذرونى لانى تعبانه شويه
بس اكيد اكيد همر عليكوا اد مااقدر واهنيكوا بالعيد


وتالت حاجة
ولو انها مكنش مفروض تتهضم كده
اقولكوا امنية ؟
عايزة اتجوز ونيس 
اقصد واحد زى ونيس:)

مسلسل يوميات ونيس واحفاده

تفوق فيه محمد صبحى على نفسه ورجع صلح موقفه بعد الجزء الخامس وقدم اروع اجزاء المسلسل على الاطلاق
المسلسل بيواكب المجتمع ومشاكله بصوره رائعه
ودروس جميلة فى مبادئ كانت قربت تضيع
بيتهيالى المسلسل الوحيد اللى بقعد قدامه واستفيد حاجه
مش بس فى رمضان ده اللى لحد من يومين كنت بكتشف مسلسلات معرفهاش بتتقدم
وكلها اشبه بالدهون الزايده اللى فى الاكل
لا بتفيد ولا بتسيب البنى ادم يستطعم حاجه


وأخيرا

بلاش دوشه بقى
هقولكوا عيد سعيد ياعفاريت مره تانيه
وسلام بقى عندى شويه غسيل دلوقت ياعينى عليا

:(


الجمعة، سبتمبر 4

الحب وحده لا يكفى



عندما تدق قلوبنا بالحب نشعر أن  الحياة الدنيا اوشكت على الانتهاء  بمشاقها ومتاعبها لتتبعها حياة أخرى أبدية نعيشها فى ظلل دقات قلوبنا الفرحة بمن أتى ليوقظها من ثباتهاالعميق.

لكنى أرى أن دقات القلب بالحب وحدها لا تكفى إن لم تتوج بالعديد من التصرفات التى نحافظ على من نحب والتى تساعدنا على فهمه,استيعابه,تعلم مايحبه فنقوم به ومايغضبه فنبتعد عنه.
 
فلو أن الحب وحده يكفى لما سمعنا ب"ومن الحب ماقتل" فكم من أحبة تباعدوا بعد المشرق والمغرب وافترقوا وكل منهما يحمل بين ضلوعه حبا لا ينتهى للاخر ولكن لم يصلا سويا لمرحلة التفهم والانسجام التى تتيح لكل منهما وضع نفسه موضع الطرف الاخر فيفعل مابوسعه للحفاظ عليه.
 
وتبقى الفكرة وهى أنه لا يهم لسعادة القلب الوقوع فى الحب بقدر مايهم كيف لنا أن نحافظ على بقائه؟!

الأربعاء، أغسطس 26

مأساة!!


"اللهم لا تؤاخذنا بما فعل السفهاء منا" 

الدعاء اللى نصحنى بيه استاذى فى الكورس لما قلتله ان واحده اتهمتنى انى معقده ومتخلفه لما مارضيتش ارمى علبة الكانز الفاضيه من شباك العربيه بعد ماخلصتها وحطيتها فى شنطتى فى انتظار باسكيت

الدعاء ده بقى الاكثر ترديدا على لسانى فى الفترة الاخيره بسبب مواقف كتير ومشاهد وروايات بشوفها وبسمعها 

منها الحديث عن الجنس والمشاهد الفاضحة وفضائح المشاهير والاحاديث الرخيصه اللى بقت بتلاحقنى كل مااقعد على النت او اسمع برنامج تليفزيونى او اشوف مسلسل او فيلم

ومنها رد لصحفية ومذيعه مشهوره لما سألوها عن رأيها لو بنتها قالتلها انها عايزة تغلط مع حبيبها
وكانت الاجابه "هقولها استنى سنه لما تتأكدى انك بتحبيه وبعدين اعملى اللى انتى عايزاه"

ومنها رد لمخرجه غير محترمة لما سألوها عن ارتداء الحجاب فكانت الاجابةدعاء "ربنا مايكتبه عليها" وكأنه اذى
ولما سألوها لو عرفتى من بنتك انها شاذه جنسيا هتعملى ايه كان ردها "هى عايشه بره والعالم بره اكثر تفتحا وتحضرا وهى حرة تعمل اللى هى عايزاه" 

ومنها رد فنانه مشهوره على سؤال "هل ممكن تكملى قصه حب من غير جواز" والرد الصريح والواضح دون اى تجميل"أيوه"

ومنها اعلان رجل بأنه يمتلك تيس بيجيب لبن بيشفى من الامراض المستعصيه وبيحول الفقراء الى اغنياء

ومنها مجاهرة شاعر مرموق ومشهور وله شعبيته بأنه اختلس اموال واعتراف بتعاطى الحشيش
  
ومنها شكوى توصل للشرطه من بنت عمرها 20سنه بأن ابوها بيتعدى عليها جنسيا بقاله5سنين لدرجة انها خلفت منه ومات المولود ويعجز الكلام عن التعبير

ومنها تخفى رجل غير محترم فى زى منتقبه لقتل دكتوره فى اوضه الكشف فى عيادتها
!!!!!!!!!!!!!!!!!!!!!!!!!!!!

قد يكون رد البعض عليا انه مش دول اللى ممكن الواحد يدور على تصرفاتهم ويقيمها بالصح والغلط لانهم غالبا أو دايما بيكونوا غلط

لكن المشكله مش فى انى بعتبرهم قدوه ومثل اعلى وانهم مش لازم يغلطوا
بالعكس انا بقول ان خرج العيب من اهل العيب مايبقاش عيب
انا بس كل اللى مزعلنى حاجه واحده بس 

انهم وللاسف الشديد كلهم ينتموا للاسلام حتى ولو بشهادات ميلادهم جعلها الله شهادات وفاة عما قريب
بمعنى انى مش زعلانه عليهم لان ان شاء الله حسابهم عند ربهم وقادر يخلص فتنتهم لشباب المسلمين

انما بس كل ضيقى انهم وللاسف مثل سئ وربما يأخذ البعض من اعداء الاسلام الاسلام بذنبهم ووقتها هما هيسيئوا للاسلام 

فى حين ان اللى عايشين زى الحيوانات فى امريكا لما راح طفل عمره 6سنوات يزور المتحف الوطنى للسكك الحديديه واتقدم بطلب انه عايز يمسك منصب ادارى لبوا  رغبته ومسك منصب مدير المرح
!!!!!

كل اللى بسأله ومحتاجه اجابه عليه هو سؤال واحد
ليه الناس دى عايشه فى ظلمات ومع كده بيستخدموا ديننا واخلاقنا وتحضر اسلامنا احسن مننا 
واحنا يامعتنقى الاسلام للاسف بنمثل عبء على الاسلام ووصمات عار عليه؟

الاثنين، أغسطس 17

حاجة تغيظ ورمضانكوا كريم




ازيكوا ياعيال ياغريبه انتوا
أنا مش عارفه البلد دى عايزة مننا ايه
أنا متغاظه على فكره بجد وبقرقش فى ضوافرى وشكلى بقى وحش أوى

من شويه كده قلت اخلى عندى دم وامسى عالعيال اصحابى فى بيوتهم قصدى بلوجاتهم قوم ايه رحت امسى على عمو لورنس العرب والاقى فى التوك توك 
 اقروه هناك الاول وكان ده ردى والله مش بجامل يعنى بس من كتر الغيظ بتاعى
"ياخراشى
ليه كده سدمتنى سدمة عمرى ياوحش يااسى
واعمل ايه انا دلوقت فى وكت فراغى بعد ماسحبوا الجولف منى

يااى ياربى عمرى ماتسورت انى اتحت فى الموكف داا

اما ودانى او الجولف
ياربى خبر فزيع بجد هتأ همووووت هيغمن عليا اوووف

X-(X-(  "

بس مش هقول نو كومنت عالخبر 
انا هقول ليه يعنى الناس دى بتعمل كده
طيب ده بدال مايهتموا بتوعيه للشهر الكريم اللى داخل علينا ده
ده بدال مايقولوا ياخير عم وجمعيات الخير اتحدوا واعملوا حاجه للناس الغلبانه رايحين يقولولى الجولف!!

لا اوعى ...آل المصريين لو بطلوا يلعبوا جولف هيموتوا دول الكلاب اخرهم يلعبوا فى ضوافرهم بلاش الكلمه التانيه
ومن هنا من موقعى هذا احب احذر واناشد كل المصريين انهم يقفوا وقفه واحده ويقولوا لا للعصى اللى مصنوعه من خشب معرفش ايه كده الوحش اللى بيأذى الودان ده وياريت يختاروا اى نوع خشب تانى يصنعوا منه العصايه دى عشان بس حفاظا على حاله الاحباط اللى ممكن تصيب المصريين لو بطلوا يلعبوا جولف

سيبكوا انتوا ماتسمعوش كلام الاشكال الغريبه دى  انا كنت بتلكك بس عشان اجى من غير ماتاخدوا بالكوا واقولكوا
 كل سنة وانتوا طيبين ياعيال رمضان هيهل اهو وبطلوا لعب عيال وصوموا لحد المغرب بقى
بلاش حركات الصيام للضهر النص كم دى
واعملوا لنفسكوا خطه كويسه للعباده فى رمضان
ده هو شهر واحد بيجى ويمشى فرصه يالحقته ياملحقتوش 

الحقوه بقى ومحدش يقول ياريت كان السنه كلها رمضان لانه لو كان كده مكنش هيبقى ليه طعم رمضان ده


كل سنة وانتوا طيبين ياعيال
رمضان كريم والسنه الجايه تكونوا هنا برضو
:)

الجمعة، أغسطس 7

مـع مـنــه

وصلت الموقف متأخر..مالحقتش احجز كرسى فى اخر ميعاد للاتوبيس اللى طالع من المدينه رايح القاهره
مكنش قدامى غير الاضطرار للحجز واقف رغم طول المسافه.
ركبت والطرقة كلها شباب ومش عارفه اقف واتحركت على امل الاقى كرسى قاعد على اوله واحده ست اسند ضهرى ليها طول الطريق.

لفت نظرى بنت صغيره محجبة حجاب رقيق اوى ووشها فيه من براءة الدنيا مافيه رحت ناحيتها وسندت على كرسيها وكان جمبها اختها واخوها.

جالى موبايل افقدنى القدره على الاتزان من طول مدة الكلام ودخت استأذنتها انها تدخل جوه الكرسى شويه عشان تاخدنى بجمب جمبها بعيد عن الولاد
 ودار بينى وبينها الحوار ده..
أنا: حبيبتى لو سمحتى مكن تدخلى شويه عالكرسى وتاخدينى جمبك مش عارفه اقف وسط الولاد
هى-بابتسامه هاديه- : طبعا اتفضلى
أنا: ضحكت وطبطبت على كتفها وشكرتها
طول الطريق خلانى غصب عنى بقيت اراقبها خصوصا لما شفت كميه الحنان اللى نيمت بيها اخوها على رجلها والطريقه اللى صحته بيها عشان ياكل
ولما شويه طلبت من اختها تديها جزء من الساندويتش اللى فى ايدها
 لقيتها بتقولى اتفضلى ده ليكى
أنا: شكرا ياحبيبتى مش جعانه كليه انتى
هى: لا انا مش عايزة اكل انا اخدته من اختى عشانك
للمره التانيه طبطبت على كتفها وابتسمت فى وشها
وسألتها: انتى اسمك ايه؟
هى: منــه
أنا: انتى عسوله خالص يامنه وحجابك امور عليكى اوى..انتى عندك كام سنه؟
هى: 12 سنه
انا: وعايزة لما تكبرى تبقى ايه يامنه؟
هى: دكتوره صيدلانيه
انا:ايه ده؟ ومش عايزه تبقى مهندسه؟ مش عيب يعنى؟
هى:لا مهندسه حلو اه بس انا نفسى ابقى دكتوره
انا: ربنا يوفقك للى تحبيه يامنه ياقمر ..اختك اسمها ايه؟
هى: اسمها منار تحبى اصحيهالك تكلميها؟
انا: لا خليها ياحبيبتى شكلها مرتاحه وهى نايمه فى حضنك :)
دلوقت بس اخدت بالى من واحده منتقبه راكبه على الكرسى اللى قدامى
اتلفتت مره واحده وبلهجه شبه حاده قالت
ليه يامنه كده؟ ازاى مقعده طنط -اللى هى انا يعنى-جمبك بالشكل ده؟
كده هى مش مرتاحه فى قعدتها
لو سمحتى هاتى اخوكى معايا هنا ووسعيلها كرسى لوحدها تقعد عليه عيب كده
اذهلنى الموقف وماقدرتش ارد بغير
"متشكره لحضرتك انا مرتاحه كده المهم انى مش واقفه فى النص وسط الناس"
ردت عليا "لا ياحبيبتى ارتاحى"
شكرتها وقلتلها ربنا يبارك فيها ويباركلها فى منه
ووقتها بس عرفت ليه منه جميله كده؟
وان ماينفعش حد غير الست دى يخرج بنت زى منه
!!! 

الخميس، يوليو 30

فضائل ناقصة



فى وسط جو صيف يخنق حقيقى وناس احوالها وهموما مافيش جبال تشيلها تلاقى الناس فى الشوارع حكايات والناس فيها كل واحد بير

فلسفه غريبه معرفش ليه بقولها.يمكن لانى فى سفرياتى الكتير والساعات الطويله اللى بقضيها اليومين دول فى مواصلات خلتنى بقيت مولعه بالاستماع لحكايات الناس فيها

مش فضول منى أو اقتحام لحرمة حد انما بس لانى ببقى حاسة انى عايزة اعيش مع اللى بيتكلم حالته معرفش ليه وازاى
لو كان بيروى حاجة تضحك مش بتكسف اضحك حتى لو هياخد باله 
ولو بيروى حاجه تزعل بلاقى غصب عنى ملامحى قلبت وحزنت ..تقريبا هى حب للافلام العربى باين
ماعلينا ياعيال أنا بقى ايه اللى فكرنى بالكلام ده؟؟!
شويه حاجات كده خلينى ارغى بيها معاكوا

النهارده وانا رايحه الجامعه ركبت مع سواق من المواصلات  ويعرفنى 
هو ولد صغير بس بيحترمنى وانا بستجدعه اوى المهم ركبت معاه لقيته مهموم اوى وسألته بصورة تهريج مالك شكلك مش مجنون زى كل مره
قالى مخنوق بسبب نسايبى-الولد لسه عنده 17 سنه وخاطب يعنى انا عنست خلاص- 

المهم فضلت استدرجه فى الكلام لحد ماحكالى ان اخو خطيبته خنقه وهو رجع مدايق راح فرح ولاقى البنت اللى كان ماشى معاها قبل مايخطب  واتمشى معاها بالليل لوحدهم بس من كتر خنقته ماحسش انه مع بنت ورجع تانى
وسبت انا كل حاجه ومسكت فى دى وخصوصا مع ملاحظتى ان الولد قالى حكايه ماشى معاها دى عادى دون ادنى احساس بالخجل منه
 
-ليه يامحمد تعمل كده؟
-كنت مخنوق وعايز افك عن نفسى
بالغلط يامحمد؟ -
-معرفش انا مش قادر اتكلم مع حد من امبارح وبعدين والله ماعملت حاجه حاجه
 -هو انت كنت عايز تعمل ايه ان شاء الله؟
 -والله انتى مش حاسه بيا ..انا لولا حسيتك اختى دلوقت ماكنت اتكلمت خالص ده حتى ابويا مايعرفش انا مالى؟
- لا حاسه بيك بس لو كنت غلطان هديك على دماغك
-موافق حاضر

وفضلت وراه لحد ما اقنعته ان مش معنى اننا نبقى مدايقين ده يكون مبرر قوى لينا عشان نعمل الغلط بحجه الخنقه ومحاوله التنفيس

ولقيت انه مش لوحده اللى بيعمل كده
كلنا تقريبا كده باختلاف الحاجه اللى بنعملها بنستغل الزعل عشان نغلط ومن غير احساس بالذنب
فكيت عن الواد شويه بهزار ونزلت

 

 جت فى بالى وقتهامعرفش ليه مقدمة واحد من افضل المسلسلات التربوية على الاطلاق من وجهة نظرى وهو "يوميات ونيس"
  
لما  كان بابا ونيس يقول
"اتفقت أنا و زوجتي أن نربي أبناءنا على الأخلاق و القيم الحميدة لنقدم للمجتمع أباً عظيماً و أماً فاضلة لكننا اكتشفنا و نحن نربيهم أننا نربي أنفسنا معهم"

كانت بتعجبنى أوى الجمله دى مع انى كنت صغيره
كنت ومازلت بحترم فيها الايمان بالمبدأ والسعى لتحقيقه وكمان التواضع فى الاعتراف بالغلط احيانا من جانب المربيين

المشكله بقى ابدا مش فى ان الاب والام مابيعرفوش يربوا اولادهم
لا ..المشكله من وجهة نظرى انهم بيربوا فيهم حاجات غلط من الاساس

يعنى لو ربنا اكرمهم مره وعلموهم حاجه تبقى اساسا غلط
يعنى الفضائل محتاجه تترسخ فى الاباء صح عشان يعرفوا يشربوها لولادهم صح

وعشان كده ومع انه سبب بيضحك ناس كتير عليا  دايما لما بشوف قناة طيور الجنه مثلا بقول مش مفروض الاطفال اللى يسمعوها
لا.... الاباء هما اللى مفروض يسمعوها لعلهم يستفيدوا قيمه وفضيله فى حياتهم يعرفوا يعلموها لولادهم صح


جايز اكون اتكملت فى حاجات كتير ملخبطه 
بس بيتهألى كلها بتنصب  فى اناء واحد وهو الفضائل الناقصه

الأحد، يوليو 19

بقلب واحد ولا أكتر؟!


من عادتى واللى معروف عنى انى بحب القديم فى كل حاجه

عرفت من فتره كده ان مسلسل "من الذى لا يحب فاطمه" بيتعرض على المحور وبما انه كان من احب المسلسلات لقلبى وانا صغيره فبقيت اتابعه تانى واستعيد معاه ذكريات حبى ايام طفولتى لجمال شيرين سيف النصر ورجوله أحمد عبد العزيز ورقة جيهان نصر وطيبة وحنية كريمه مختار

من يجى يومين تلاته كنت بتفرج على الحلقه وزمان كنت بتفرج بعقل طفله مش بتفكر غير فى شكل حاجه بتحبها وخلاص
لكن دلوقت بما انى عقد ومكلكعه وبدق فى كل حاجه بقيت بفكر.....وجه مشهد

صبرى اللى هو احمد عبد العزيز قاعد يرغى مع نينا فضيله اللى هى مامته لما اتكعبل فى مارجريت اللى هى شيرين سيف النصر فى النمسا وحبها واتجوزها وهو سايب الغلبانه ماجده اللى هى جيهان نصر هنا وميته فى دباديبه

قام سأل مامته سؤال شغلنى كتير
قالها " هوممكن الراجل مننا يحب اتنين بنفس الدرجه من الحب ويحس ناحيتهم نفس الاحساس؟؟؟!! "

ردت نينا فضيله بالنفى يعنى ماينفعش

الله يسامحهم خلونى فضلت افكر فى الاجابه وسبت احداث المسلسل

وبعد تفكير عميق منى اختلفت مع نينا فضيله فى اجابتها
لان فعلا الراجل بحس انه كتير ممكن يجمع حب اتنين ستات وتلاته ويمكن اكتر فى قلبه وبدون تعارض
جايز مايكونش الحب بنفس القدر والقوه لكن حقيقى ممكن

والا مكنش ربنا اتاح للراجل انه يتجوز 4 بشرط العدل بينهم فى وقت واحد واعتقد العدل مش ضرورى فيه الحب بنفس المقدار وان كان ممكن تحقيقه -ولو بنسبه- فى حاله الحب
بمعنى ان الراجل ممكن يبقى بيحب تلات اربع ستات فى نفس الوقت ويقولهم كلهم "بحبك" والبعيد صادق مش كداب
طبعا مع التحفظ انه مايكونش اساسا طفس وبتاع بنات

واعتقد برضو ان الحب فى حياة الراجل بيبقى جزء من دنيته حتى لو بيمثله جزء مهم وكبير
يعنى الراجل بيبقى بينام ويصحى ويشتغل وياكل ويحب ويتجوز ويشرب ويتفسح وكل حاجه

لكن العكس تماما بالنسبه للست او البنت لو حبت
الحب بالنسبالها بيبقى هو الدنيا باللى فيها

ممكن تاكل حب وتشرب حب وتنام تحب وتصحى وهى بتحب وتخرج وهى بتحب على نفسها برضو
يعنى اللى بتحبه بيمثلها الميه والهوا وطبعا وبالتأكيد ده عمره ماهيكون الا راجل واحد بس مش اكتر من واحد

الكلام ده افتكر انه كان ثبت فى دراسه اتعملت تقريبا فى المانيا كان قالى عنها محمد الفارس الله يرحمه مره

ان الراجل ممكن فى نفس الوقت يحب اكتر من واحده انما الست ياعينى تحب واحد بس وممكن تفضل المجنونه تحبه طول عمرها ولو مش اتجوزته ممكن تفضل طول عمرها من غير جواز وتموت وهى لسه بتحبه

طب مش الستات مفروض تعقل كده وتعمل زى الرجاله وتضربها صرمه قديمه ولو حبت واحدمش اتجوزته تنفضله وللى خلفوه وتعيش حياتها مع غيره وخلاص؟

ولا هو اتكتب علينا نفضل نحب فيهم وهما منفضين وبيحبوا علينا؟!
يعنى يبقوا هما بقلبين وتلاته واربعه واحنا بقلب واحد
ده ايه الظلم ده

مش كده ولا ايه؟

الخميس، يوليو 9

لعـلـهـا فـرحـه


بقالى كتير اوى مش حسيت بفرحة تخلى عنيا تدمع وتعيط بجد
فرحة غريبه مكنونه جوايا لدرجه مخليانى اسكت مش عارفه ابوح بيها
مش عارفه حد هيحس الاحساس ده ولا لأ؟

بس انا عادتى انى لما بفرح واحس انى طايره بجرى واتنطط واتكلم وابهدل الدنيا
المرادى قالبه معايا بسكوت مش عارفه ليه
!!!!!!

هبطل رغى فارغ وملوش لزوم وهدخل فى المضمون
الفرحة اللى بتكلم عنها ابتدت من اسبوع فات لما ناقشت مشروع التخرج وعديت بإمتياز
وكملت امبارح لما نتيجتى ظهرت كامله

والمرادى مش أى نتيجه دى نتيجه البكالوريوس والتراكمى كله
يعنى نتيجة تخرجى اللى دوشتكوا بطلب الدعوات ليه والتوفيق فى اللى يعمله

النتيجه ظهرت وحسيت انى زى ماجالى وقت وغلست واختفيت وقصرت فى حق الناس وحق البلوج حبيبتى دى انى اقول للناس دى
يمكن حد فيهم يفرحلى واحس بفرحته فى كلمه حلوه يسيبهالى فى تعليق
او حتى علشان لو فى حد دعالى يعرف انه بركه ودعوته استجابت :)

باركولى بقى ولو حد بيعرف يزغرت خليه يسمعنى زغروته حلوه فى الكومنتات اصل مامامابتعرفش :)

انا ياعيال اخييييرا اتخرجت وبقيت مهندسة
بتقدير عام جيد جدا مع مرتبه الشرف
وترتيب رابع دفعتى
:)
باركولى بقى :)

السبت، يونيو 27

البعض نحبهم...

البعض نحبهم
لكن لا نقترب منهم ........ فهم في البعد أحلى
وهم في البعد أرقى .... وهم في البعد أغلى


والبعض نحبهم
ونسعى كي نقترب منهم
ونتقاسم تفاصيل الحياة معهم
ويؤلمنا الابتعاد عنهم
ويصعب علينا تصور الحياة حين تخلو منهم.


والبعض نحبهم
ونتمنى أن نعيش حكاية جميله معهم
ونفتعل الصدف لكي نلتقي بهم

ونختلق الأسباب كي نراهم
ونعيش في الخيال أكثر من الواقع معهم


والبعض نحبهم
لكن بيننا وبين أنفسنا فقط
فنصمت برغم الم الصمت
فلا نجاهر بحبهم حتى لهم لان العوائق كثيرة
والعواقب مخيفه ومن الأفضل لنا ولهم أن تبقى
الأبواب بيننا وبينهم مغلقه


والبعض نحبهم
فنملأ الأرض بحبهم ونحدث الدنيا عنهم
ونثرثر بهم في كل الأوقات

ونحتاج إلى وجودهم .....كالماء ..والهواء
ونختنق في غيابهم أو الابتعاد عنهم


والبعض نحبهم
لأننا لا نجد سواهم
وحاجتنا إلى الحب تدفعنا نحوهم
فالأيام تمضي
والعمر ينقضي
والزمن لا يقف
ويرعبنا بأن نبقى بلا رفيق


والبعض نحبهم
لان مثلهم لا يستحق سوى الحب
ولا نملك أمامهم سوى أن نحب
فنتعلم منهم أشياء جميله
ونرمم معهم أشياء كثيرة
ونعيد طلاء الحياة من جديد
ونسعى صادقين كي نمنحهم بعض السعادة


والبعض نحبهم
لكننا لا نجد صدى لهذا الحب في
قلوبهــم
فننهار و ننكسر
و نتخبط في حكايات فاشلة
فلا نكرههم
ولا ننساهم
ولا نحب سواهم
ونعود نبكيهم بعد كل محاوله فاشلة


والبعض نحبهم 

 
ويبقى فقط أن يحبوننا..
 
مثلما نحبهم
 
جبران خليل جبران

الجمعة، يونيو 5

وأد قـلـب




لعله القرار الصائب الذى يتحتم علينا اتخاذه أحيانا بوأد قلوبنا وهى فى ريعان الشباب 

حينما تكن للبعض الكثير من المشاعر الفياضه وهم لا يبالون بها بل ولا يتوانون عن جرحها حتى حد النزف من دون رحمة أو عطف, 
ليس تجاهنا نحن ولكن تجاه قلوبنا التى تفيض لهم حبا وحنانا 


ولما لم نستطع وأد مشاعرنا الفياضه تجاههم 
ولما كان غلائهم فى قلوبنا أكبر من أن نخرجهم منها حينما يتسببون فى نزفها

كان أكثر القرارات صوابا هو وأد القلب بكل ما يحمل من معان جميله 

لا لنتخلص من حبهم فحسب 
بل ولنفقد القدرة على اكتساب ألم جديد نعانيه 
إذا ماتسلل البعض الاخر بحبه لقلوبنا 

فيتكرر الالم ويتكرر نزف القلب