الخميس، يناير 29

رب بيتنا بالدف ضارب



أنا رجعت

كتبت حاجات كتير وافكار كتير كانت فى دماغى بس كلها مكتوبه ساخر ماجاليش نفس انزلها لانى غبت فى وقت بيتهيألى انا لو كنت موجوده كنت قلت كلام كتير كنت تعبانه لانى مش قادره افرغه.

غزة ولعت بناسها انا للاسف مقدرتش اعمل اى حاجه غير انى قاطعت
مش عارفه ليه كنت حاسه ان ده مش كفايه رغم انى مكنتش عارفه اصلا مفروض اعمل ايه؟لانى كنت ف دنيا تانيه.انا يمكن فرحت لانى لاول مره بقدر اقوم نفسى واقاطع بجد 


وبقيت عامله فى بيتنا زى عسكرى المرور اللى يجيب حاجه اقوله اه دخلها او لا مش تدخلها ولما كانت الذاكره مش بتسعفنى كنت ببص على اسم الشركه المنتجه وبرضو اقرر بس فى حاجه بقى لفتت انتباهى
فى مره كنت بقرا بوست فى مدونه من المدونات المحترمه اللى بحبها فى وسط الزحمه وكانت منزله ملف وورد عباره عن تلات صفحات علشان يتطبعوا ويتوزعوا علشان تشجيع الناس وتوعيتهم للمقاطعه وكانت الورقه فيها كل الشركات والمنتجات اللى مفروض نقاطعهم عاليمين وعالشمال قايمه بالبدائل اللى مفروض نستخدمها


واذا بى بأنادى على اخويا بقوله تعالى شوف المنتجات اللى مفروض تقاطعها وانا قبلها كنت لسه مدياله درس فى المقاطعه وفايدتها واقنعته انه يعمل كده ويشجع اصحابه كمان 

قام لقيته بيسألنى سؤال محرج قالى"هو ليه كل اللى الناحيه دى نعرفه -وشاور على اليمين- وكل اللى الناحيه دى مش سمعنا عنه؟-وشاور عالشمال-؟؟"

طبعا أنا اتكسفت جدا ومابقتش عارفه ارد وبعدين ربنا عارف نيتى البمبى مقلم بتركواز والهمنى الاجابه قلتله"ياحبيبى بص الناس اللى عملت الورق ده غالبا كانوا من بتوع السعوديه ودول الخليج لانهم بيتكلموا فى منتجات احنا عمرنا مش سمعنا عنها فى السوق المصرى بدليل انهم هنا حتى بيقولوا فى البدايل منتجات صافولا السعوديه مع ان فى توكيل لصافولا هنا فى مصر "


طبعا الواد اصلا مش حب يحرجنى الحجه كانت واهيه وهو حس بس قال اختى الكبيره ومحترمه وعيب عليا اكسفها
ده من ضمن خيبه الامل اديت للواد اخويا ربع جنيه بحاله علشان يجيبلى اى حاجه اكلها قالى لسته الحاجات اللى هو عارف انى بحبها اصلا 

اجيبلك شيبسى؟... قلتله لأااااااا مقاطعه
طيب دوريتوس؟ ... نووووووو مقاطعه
طيب هوهوز او هوستس؟ ... لالالالالالا ابوس ايدك مقاطعه
قام رد عليا رد بليغ جدا "امال اجيبلك ايه يانيله انتى؟"

بصراحه اتلخمت وبعدين قلتله اى حاجه من منتجات ايجيبت فودز يابنى -اللى هى يعنى بتتاكل عافيه-ا

طيب الواحد يقنع العيال الصغيره ازاى اذا كان كل المنتجات اللى بيحبوها واللى بتتاكل اساسا مقاطعه
طيب الكبار -ومش كلهم يعنى-بيقدروا يمسكوا نفسهم ويقولوا نسلك بأى حاجه


بس اصل الموضوع خلانى اسال ازاى البلد ممكن تستقل وهى مش عارفه تنتج حتى اللى بتاكله بس؟!


اذا كان عمنا رشيد وزير الصناعه واخد توكيل شركه يونيليفر
ودى اللى هى يعنى منتجاتها غازيه بيوتنا يعنى بسلامتك انت وهى كل واحد فيكوا الصبح اول مايصحى من النوم بيحط فى جيب عمنا رشيد اتنين تلاته جنيه صابون بقى ولا شامبوا ولا ولا...
طيب اذا كان رب البيت بالدف ضارب!!!!!

ده الراجل اللى هو بتاع الصناعه كلها مش فى ايده ومش قادر يخطط لصناعه تطلع منتجات بديله!!!

عموما يلا الحمد لله وده مش اعتراض منى لاسمح الله على شغل عمنا الوزير

طب ده حتى بالمناسبه عمنا منصور وزير النقل واخد توكيل جينرال موتورزاللى بتصنع شيفروليه اولى الشركات الموضوعه فى قايمه الممنوعات طيب ياربى اعمل ايه أنا دلوقت؟
كنت ناويه عالاوبترا وبعدين تراجعت علشان المقاطعه 
خلاص بقى مش مهم:)
الكلام مش مرتب حبتين لانى بكتبه اصلا وانا بنام على نفسى
بس كنت هطق لو مش كتبته  


الجمعة، يناير 16

كلام مش لينا ياشباب


ملكنا هذه الدنيا القرونـــا
وأخضعها جدود خالدونــــا
وسطرنا صحائف من ضياء 
فما نسى الزمان وما نسينـا

وكنا حين يأخدنا ولى 
بطغيان ندوس له الجبينــا
تفيض قلوبنا بالهدى بأســا
فما نغضى عن الظلم الجفونــا

بنينا حقبة فى الارض ملكا
يدعمه شباب طامحونــــا
شباب ذللوا سبل المعالى 
وماعرفوا سوى الاسلام دينـا

تعهدهم فأنبتهم نباتــا
كريما طاب فى الدنيا غصونا
اذا شهدوا الوغى كانوا حماة
يدكون المعاقل والحصونا

شباب لم تحطمه الليالى
ولم يسلم إلى الخصم العرينـا
 وإن جن المساء فلا تراهم
من الاشفاق الا ساجدينـــا

كذلك أخرج الاسلام قومى
شبابا مخلصا حرا أمينا
وعلمه الكرامة كيف تبنى

فيأبى أن يقيد أو يهونــا
فيأبى أن يقيد أو يهونــا
فيأبى أن يقيد أو يهونــا
 .
.
.
وما فتئ الزمان يدور حتى
مضى بالمجد قوم آخرونا
وأصبح لا يرى فى الركب قومى
وقد عاشوا أئمته سنينــا
وآلمنى وآلم كل حــر 
سؤال الدهر
أيــــــــــــن المسلمونـــــــــــا ؟
 !!!!!!! 

ترى هل يرجع الماضى فإنى
أذوب لذلك الماضى حنينا؟

دعونى من أمان كاذبات
فلم أجد المنى إلا ظنونـــا


"ملكنـــا هذه الدنيــــا"