الأحد، ديسمبر 28

حفلة طلاق ...تحديث

 تحديث : انتيمتى اللى هى صاحبة الحفله العجيبه ردت عالتعليقات فى تعليق واحد مسجل بإسمى ياريت تقروه علشان تفهموها
دعوااااااات بقى :((


" باركيلى..اتطلقت"
 
بدأت معايا انتيمتى المكالمة من دقايق معدودة أول مارديت عليها بألو وصوتها باين عليه كل ملامح الفرحة وده بعد أمر منها لاخويا بأنه يصحينى من النوم ضرورى

 "معقوول؟؟...إزاى ده حصل؟"
سالتها وأنا مستغربة  ومبسوطة فى نفس الوقت لان حلم الطلاق بالنسبالها كان صعب تحقيقه إن لم يكن مستحيل خصوصا إنى كنت معاها عالتليفون طول اليوم وعارفه إنه كان يوم مش عادى عندها وكنت قاعده فى بيتنا وهطق علشانها لانها اتبهدلت فى أقسام شرطة ونيابة وماادراك وده كيتر عليها أوى خصوصا فى وقت زى اللى احنا فيه حتى مش فاضيين نكح.
ورغم إنى فعلا مقاطعة الكمبيوتر من امبارح ومش بفتحه الا علشان ابعت ميلات لاصحابى علشان بدأت حملة المذاكرة الا إنى اصريت إنى لازم احكيلكوا الحكاية اللى لولا انها حصلت عن يدى مكنتش اتصور أبدا انها تحصل.
نبدأ من الاخر 
صحبتى بتقولى على فكرة احنا خلصنا كل حاجة فى القسم النهاردة بعد ماعملنا ليه محضر صلح علشان نخرجه من الحجز مقابل إنه يطلقنى ويريحنى منه.
أنا: يالهوى؟ ..انتى دخلتى قسم وكده؟! طب وهو قبل بالطلاق؟
هى: آه ده احنا حتى كنا هندخل المأذون القسم علشان نضمن إنه مش هنعمله الصلح وهو يعند ومش يطلق
أنا: ياخبر وبعدين
هى : مفيش المره اللى فاتت بعد ماقفلت معاكى استدعونى فى القسم وطلبوا إنى اتصالح وأنا طلبت المقابل إنى اتطلق وقد كان وبرضه عملناله تعهد بعدم التعرض. 
كانت هى لسه متصلة بيا قبلها بتلات ساعات بالظبط وقالتى انها لسه راجعه من بره وبتطلب منى ادعيلها علشان تخلص.
دخلت أنام ودعيت لها ربنا يهيأ لها الخير وانا خايفه اوى من اللى ممكن يحصل لها وقضيت النوم كوابيس.
نهت معايا المكالمة بإنها عامله حفلة لطلاقها بكره وإن لولا بعد المسافة وظروف اننا مشغولين كانت امرتنى انى احضرها 
اعتقد أغرب حفلة طلاق ممكن تتعمل وده لأان المذكور يبقى ابن عمها اصلا.
هى وابن عمها دول فضلوا خمس سنين فى نضال علشان بس يقدروا يتخطبوا وده لان اهلها مكانوش موافقين عليه وبدون أسباب غير انهم مش عايزينه وخلاص
وهو فى وقتها كان مش فيه عيب وكان عنده استعداد يجيبلها نجوم السما
وبعد مشاحنات كتيييييير فوق التصور قدروا يتخطبوا فعلا وكمان بعدها بصعوبة قدروا يكتبوا الكتاب فى انتظار انها تخلص دراستها علشان يتجوزا.
وطبعا لحد دلوقت هما لسه مش اتجوزوا فى بيت واحد يعنى الا إن كتابهم مكتوب 
ورغم إنى مكنتش بحترم أبدا تصرفات اهلها معاها ولا معاه لانهم ببساطة مش وقفوا وقفه ناس عاقلة حتى لو ضدها انما اتبسطت انهم وقفوا معاها فى طلاقها وده تصرف كان غير متوقع.
والقصة بدأت لما هى بدأت تيجى على نفسها أوى وتتحمل سخافاته وغباؤه فى التعامل معاها واللى كان تقريبا بشكل حيوانى بعد كتب الكتاب لدرجة إنه احيانا كان بيسبها ويلعنها ومرة مد ايده عليها فى الشارع
دى عينه صغيره أوى من اللى كان بيحصل وما خفى كان أعظم
كان كل حلمها بعدها وبعد ماطاقتها خلصت معاه أنها تخلص منه لما حست كمان إنها مابقتش تحبه 
لكن هو مكنش على لسانه الا مش هطلقك ومش هريحك. 

مش عارفه بقى حكاية حفلة الطلاق دى ايه ظروفها ؟ لانها هتبقى اغرب حفلة اتعملت من وجهة نظرى. 
أنا جيت احكى الكلام ده هنا لسبب واحد 
هو إنى من فتره وبناء على طلب منها كنت هاجى اكتب بوست عن اللى بيحصل واخد أرائكوا تتطلق ولا لأ؟
وكنت هحكى المشاكل لمده خمس سنين بالتفصيل .
فدلوقت بس حسيت إنى لازم احكى اللى حصل عشان يخلص الموقف.
دعواتكوا ليا وليها علشان احنا حالنا مايسرش عدو ولا حبيب.
بجد محتاجينها وعن ظهر الغيب وياريت تبقى فى السجود :). 
 

الثلاثاء، ديسمبر 23

خماسياتى(2).. رمادى وعجبى


سألتنى..تعرفى فى الالوان؟

قلتلها..أبيض واسود وازرق كمان

قالتلى..والرمادى..عندك بيبان؟

 قلتلها..مااعرفوش اصله لون التعبان

قالتلى..ماتعرفيهوش؟! ..أتارى حالك خيبان

  


السبت، ديسمبر 13

تدبيسه جديده لانج


جالى حوالى 15 تاج او اكتر ومكنش ينفع اجاوبهم  لانهم كتروا اوى فمع الاعتذار لاصحابهم انا هجاوب ده وان شاء الله يبقى اخر تاج وده جالى من واحده مكنش ينفع اقولها لا دى حبيبتى آيه صاحبه مدونه يوميات فتاه محتاره

حتى اخدت نفس صورتها  
بالمناسبه التاج طويل المستعجل ينفضلى ويمشى :)
لو كان ينفع تختار عصر تعيش فيه هيبقى انهى؟ ومين الحاكم؟
هو طبعا سيدنا عمر ابن الخطاب عصر عز الدوله الاسلاميه وعمرو اين العاص ناس كده تحسس الواحد بالامان
أول اولويه فى حياتى ...عيلتى ..شغلى ...أصحابى؟
كلهم اولويات بس الراجل والعيال طبعا يالهوى هو انا اقدر
إيه اكتر حاجه بتحبها فى رمضان؟
بصراحه وقت المغربيه والشوراع فااااضيااااااااااه والدنيا هاديه ولمتنا عالفطار
اوصف أجمل فطار ممكن تفطره؟
اللى هيجهزهولى جوزى حبيبى طبعا ويجيبهولى لحد السرير والاهم انه ماياكلش معايا علشان انا اشبع :)
لو انت حاكم هتكون عادل ؟ وهتعرف ازاى؟
هو انا هسعى انى اكون عادله بس مش عارفه هقدر اعرف ازاى انما انا اصلا عادتى انى ماشيه بمبدأ عن سيدنا عمر بيقول فيما معناه انه هو دايما  يبقى مع اللى بيحبه طول ماهو مع الحق فإن افترقوا فالحق احق ان يتبع
مين أكتر اعلامى بتحبه؟
والله كان حمدى قنديل الله يرحم ايام القناه التانيه واختفى فى ظروف غامضه وممكن نقول منى الشاذلى بس بحس فى احسن مش عارفه ليه وكمان لو اتكملنا عن الشخصيات الدينيه يبقى دى اللى اكتر من الكل د.نواره هاشم بحبها جدا جدا جدا
لو ممكن شغلانه تانيه تختار ايه؟
صحفيه بما انى بتاعة مشاكل ولو فى طيارين بنات بس بلبس محترم مش مينى جيب :)
تانى بلد تحب تعيش فيه بعد مصر ؟
بلد يكون فيها جليد واللون الابيض غالب على المكان مثلا القاره القطبيه او بلد فيها مراعى خضرا زى نيوزيلندا
اوصف ترتيبات أجمل فرح ممكن تحضره
بتعجبنى اوى افراح الاجانب اللى بتيجى فى التليفزيون بتبقى فى مكان مفتوح وفيه خضره كتير وبتبقى على بحيره كده او بيسين لكن هما بيعملوها بالنهار انا عايزاها تبقى بالليل ويبقى الغالب فى المكان الورد وأغلبه يبقى ابيض واصفر  وطبعا ميوزيك هاديه شغاله طول الوقت وبلاش والنبى اغانى شعبى خالص خالص ونخلى أغانى سريعه ورومانسيه من وقت للتانى تشتغل والعريس والعروسه يمثلوها ويرقصوا عليها زى ياواد ياتقيل مثلا :)
بتراعى كلام الناس والقيل والقال؟ وليه؟
فى حدود جدا بمعنى انى لما بعمل حاجه بكون متأكده ان اخلاقى ودينى مش رافضينها مش بهتم بكلام حد لكن فى نفس الوقت مش بهمله خالص لاننا فى مجتمع مش بيعجبه العجب
صحيت من النوم لا موبايل ولا كمبيوتر ولا كاميرا ديجيتال ورجعنا لعصر الحصنه والحمام الزاجل؟
انا من محبى التكنولوجيا علشان كده هزعل على الموبايل والكمبيوتر انما الكاميرا دى مش حاسه انها بالاهميه اللى تزعلنى يعنى وبعدين مااعتقدش انى هعرف اتعامل بالحمام الزاجل مسجات وميلات اسهل
السعاده هى ؟
رضا ربى ورضايا عن نفسى واحساسى بحب اللى حواليا ليا ومحاوله اسعادهم بأى وسيله
عندك أمل؟ واسبابك
اه الحمد لله حتى ماما بتقولى دايما كتر املك هيرزعك فى حيطه فى الاخر .:) واسبابى تفاءلوا بالخير تجدوه –ده رسولنا(ص)-
لما بتحب تهرب من كل حاجه بتروح فين ؟
بديها نووووووووووووووووم  تلاتاشر ساعه ولا خمستاشر وببقى فل
بس لما ببقى عايزة ارتاح بطلع البلكونه او بشوف مكان مش فيه بشر وهادى علشان اسرح واظبط الامور
امتى أول مره أخدت فيها نفس وقلت ياااااااه أنا كبرت
مش فاكره بالظبط بس تقريبا اول مره قابلت فيها واحده صحبتى وكان معاها ابنها ولما سألتها مين ده وانا معرفش قالت ابنى اتصدمت لانى دايما عندى قناعه انى لسه صغيره اوى وماينفعش ابقى زى الناس المتجوزه ومخلفه دى :)
بتشرب سجاير ولا لا؟ وايه رأيك فى الرجاله والستات اللى بتشرب؟
انا بشرب حشيش على طول ههههههههههه هو صدرى مدمر من شويه ؟
لا طبعا الحمد لله ومش عارفه انا عندى عقده من التدخين اصلا ومش عارفه بيشربوها ازاى بس المشكله انى كنت بقول  ان الراجل المحترم مش ممكن يشرب سجاير ابدا ابدا بس اتصدمت لما لقيت ناس بحترمهم كتير وبيشربوا
أما عن الستات فدول ناقصين ربايه لا مؤاخده
بتعرف ايدك من الشمال ازاى؟
اللى بتقدم تعمل كل حاجه من غير تفكير هى اليمين
اكتر اله موسيقيه بتحبها
بحب العود اوى بحسه رقيق وحزين
ليه قله الذوق والنخوه اتعدموا؟
هما قلوا مش اتعدموا لكن البعد عن الدين واخلاقيات المجتمع يعملوا اكتر من كده
ايه الحاجه اللى لو حصلت هبقى سعيد ؟
اشتغل اول مااتخرج واتجوز حد بحبه واسفر ماما الحج لانها نفسها فيه
 تحب أرض زراعيه ولا اجنس عربيات ولا كام عماره ولا فلوس فى البنك؟
الفلوس بتجيب كل دول بس انا لو هشترى بالفلوس هتبقى بيت صغير فى مكان هادى وليه جنينه وعربيه وكده مش عايزة فلوس تانى
البحر ولا النيل.؟
البحر روح وحركه وحياه مع انى بعشق النيل
مركب ولا طياره؟
الطياره مش جربتها بس اللى اعرفه ان المركب جامد جدا جدا
مجنون ولا عاقل؟
الاتنين بفضل الله يعنى مجنونه بعقل
تقرا كتاب ولا تتفرج على فيلم؟.
مش كل الكتب ومش كل الافلام يعنى المقارنه كده لا تصح بس انا بعشق القرايه
التاج لمين؟
ميمى وقلب ينبض بالحب ومها زين والفارس ورامى وحبيب

الأحد، ديسمبر 7

العيد فرخة ماااااااء


هوووى....ازيكوا يااطفالى 

طبعا الدخلة جامده أنا عارفه بس العيد فرخه دى افتكاسات والمأمأه كانوا بيجيبوا زمان فى التليفزيون فى العيد خروف يقول العيد فرحه ماااااء وكنت بحبه اوى ومن ساعتها معلقه معايا  :)
أما عن أطفالى بقى فدى مش وقاحه انما أنا لما بشوف ناس بحبهم بقولهم ازيكوا يااطفالى يعنى كلكوا زى اولادى بالظبط مع انى اصغر منكوا كلكوا تقريبا :)
ندخل بقى للجد
العيد الكبير جه والنهارده وقفه عرفات وسبحان الله اكتر يوم بحبه فى السنه بحالها لانى بحسه أكتر يوم الدنيا صافيه فيه فضلا عن قيمته كيوم من أيام الله لكن اللى عايزة اقوله ان العيد الصغير اللى فات كان عيد غير سعيد الحمد لله وافتكر انى كنت حاسه باكتآب شنيع انما العيد ده رغم ظروف الهباب وحالتى المتدهوره الا انى حاسه إنى مش جايلى نفس اكتئب مع إن مقومات الاكتآب متوفره جدا والحمد لله
عايزه اسأل كام حاجة حصلت من العيد الصغير لحد دلوقت وكام حاجة اتقلب حالها فى حياتنا وكام حاجه اتغيرت وكام حاجة عدت؟؟
فى كل الاحوال احنا بشر وظروفنا بتتغير وبتغيرنا معاها خصوصا ان احنا عاده بنعشق لذه الحزن والاوضه الضلمه اللى بنقفلها على نفسنا ونقعد نعيط
طيب ده عيد ممكن ياريت بلاش منها؟ 
ممكن اللى زعلان من نفسه يسامحها ؟
واللى زعلان من الدنيا يصالحها حتى لو مؤقتا لحد ماالعيد يخلص ؟
علشان بس نخلى العيد قد مانقدر يعدى علينا واحنا مبسوطين وخلينا نسرق منه لحظات سعاده ممكن مانقدرش نعوضها تانى ؟
مش عارفه ليه كنت طول عمرى بحب العيد الصغير أكتر يمكن لأن العيد الكبير كان بيبقى مشغول بالاضحيه واحنا بنهلك انا واخويا واولاد عمى توزيع فى اللحمه فى بصراحة كنت بحبه علشان بركب العجله طوووول اليوم علشان اوزع عليها لكن خلااااااااااص كان زمان ليت الشباب يعود يوما فأنبئه بأننى هموت واركب عجله ومش قادره  :)
وكنت بحب العيد الكبير لسبب غريب شويه هو ان يوم وقفه عرفات كنت بفضل قاعده طول اليوم قدام التليفزيون علشان اتفرج على شكل الحجاج واسمع ندائهم بلبيك اللهم لبيك اللى بحس ان جسمى بيتنفض لها
وبحب لمتنا على الفطار المغرب اللى نادر مابتحصل وبتفكرنى بأيام رمضان
ياريت انتواكمان تفكرونى بذكرياتكوا مع العيد وتفتكرونى وانتوا بتفطروا النهارده بكام دعوه علشان لو سمعتونى وانا نازله دندنه امبارح ب "هو اليوب اللى احنا حبيبى ..احم احم..باعبلناش حسابه..احم احم"
اكيد هصعب عليكوا وده على فكره مش عبرى ده عربى لكن البرد والكحه مخليين الميم كلها تطلع باء:))
وكمان موسم الامتحانات وجب وكل سنه والامتحانات فى ستين داهيه :)
وماتنسوش برضه تدعوا لبلاد المسلمين المحتله اللى اطفالها ونسائها وشيوخها مش عارفين يفرحوا بالعيد ربنا يفك كربهم ويفرحهم
وماتنسوش تدعوا لمصر ربنا يغني اهلها من فضله ويفك ازماتهم امين
يلا دى هديتى ليكوا علشان تضحكوا فى العيد
وكل سنه وانتوا طيبين وعيد لحمه سعيد ........يااطفالى :)

الخميس، ديسمبر 4

هم الاخسرين أعمالا

بقالى فتره مش بتابع مدونات كتير ولما بتابع بتكون الحاجات اللى فى مفضلتى لكن ده مش يمنع إنى لما بشوف عنوان يشدنى فى ريدر
مدونات تانيه بدخل اشوفه وده يمكن هو والصوره بتاعته همااللى اجبرونى ادخل مدونه دخلتها مره واحده بس ومش احترمت الفكر بالمره لانه فكر شعارات بيدافع عن اغراض دفينه

الفكر كله معادى لموضوع النقاب شكلا وموضوعا لنساء المسلمين وخصوصا فى مصر

راعيه الحمله نزلت مقال لاحد الصحفيين فى جريده مشهوره وملخصه بيقول إن المنتقبات بيلبسوه علشان يرتكبوا فواحش وجرائم ومحظورات من غير ماحد يكشفهم وشبهت مرتديات النقاب بأنهم اكياس زباله متحركه والصوره اللى كانت ناشراها يمكن هى اللى استفزتنى اساسا انى ارد وهى اللى فوق دى ومش راضيه تنزل هنا  

الصوره حرقت دمى اوى رغم إنى مش منتقبه ولا حتى بلبس خمار انا بتكلم بلسان مسلمه عاديه بتعرف دينها وبتحبه وبتغير عليه دون الانتماء لاى تيار دينى او فكر معين

الهجوم بشع بمعنى الكلمه على النقاب وصدمنى خبر نشر الدكتور محمود حمدى زقزوق لكتاب يفيد بإن النقاب ليس من الدين فى شئ انا مش مفتى ولا شيخ علشان احلل ولا احرم انا بس بقول ليه نعمل اللى يخلى اصحاب النفوس المريضه تمسك فى حاجه صادره عن شخصيه دينيه لها وزنها زى الدكتور زقزوق وتاخدها سلاح ضد الدين

أنا مش بقول ان الجرايم دى مش بتحصل لأنها فعلا بتحصل وكانت محتاجه حل بجد انما المدونه فى الاول علشان تعلن عن اهدافها النبيله رفعت شعار اننا عايزين حل للجرايم اللى بتحصل ومالناش دعوه بإن النقاب حاجه تخص الدين ومش عايزين نقرب منها احتراما لدينا وتحول الموضوع ببساطه لسب وقصف فى المنتقبات وشويه الى تشريعات وفتاوى عن الدين واتعممت اهانات المنتقبات على الكل بدال من انها لفئه معينه واجب محاربتها

ولانى اول مره دخلت قلتلها فى التعليق وباسلوب محترم جدا انك لو عايزة حلول انا من رأيى كذا وكذا والناس برضه قالت آراء انما بلاش نقرب من النقاب ولا اهانات ليه التعليق اتحجب

ولما دخلت اشوف النقاش اللى بيحصل والاراء والتعليقات والردود لقيت ان النقاش مع صاحبة البوست قضيه خسرانه وما كان الا درب من العبث بدليل انى لما دخلت اقرا التعليقات شدنى كومنت بغير معرف ويبدو ان صاحبه مش مصرى بيقول لما انتوا مسلمين وبتقولوا كده امال خليتوا ايه لاعداء الاسلام؟! \انا بصراحه اتكسفت للمصريين كلهم سلف ورغم كده كان ردها عاااااادى جدا وبرضه
باهانه للمنتقبات
حقيقى ليه مفيش حد شن حمله تدوينيه موسعه ولا حمله على الفيس بوك زى دى علشان تهاجم المتبرجات الكاسيات العاريات اللى
بوظوا شباب مصر؟!

طيب ليه مفيش حد شن حمله تهاجم التدخين والادمان للشباب والبنات؟!

هو معنى ان النقاب استخدوه كوسيله دينيه موثوق فيها وإن مفيش حد بيتعرض للملتزمين فى الدين بحاجه علشان يرتكبوا جرايمهم يبقى ده معناه ان النقاب غلط؟

ولو بعدنا بقى عن التشريعات امال فين الليبراليه اللى بتحكوا عنها؟!

فين حريه الفكر والراى والديموقراطيه يادعاه الليبراليه؟

ليه الكلام بيتقال شعارات بس وبيتقال عكسه؟

هى تقريبا بتبقى عنواين براقه كده ناخد منها اللى يناسب اغراضنا ونفوسنا الضعيفه واللى يتعارض معانا نرميه ورا ضهرنا؟!!!
اكيد هى كده واخيرا ياريت نكون اشجع من كده ونعلن عن أغراضنا بوضوح بدال مانحطها تحت شعارات الخوف على المجتمع

أما عن اكبر الصدمات فحدث ولا حرج عن بعض الاراء والتعليقات اللى صدمتنى فى شباب وبنات كتير ربنا يتولاهم برحمته ويعصمهم من شر افكارهم

الخلاصه

إن دول اللى ربنا قال فيهم
"مثل الذين كفروا اعمالهم كرماد اشتدت به الريح فى يوم عاصف.لايقدرون مما كسبوا على شئ ذلك هو الضلال البعيد"  إبراهبم (18)

"قل هل ننبئكم بالاخسرين اعمالا.الذين ضل سعيهم فى الحياه الدنيا وهم يحسبون انهم يحسنون صنعا اولئك اللذين كفروا بايات ربهم ولقائه فحبطت اعمالهم فلا نقيم لهم يوم القيامه وزنا"  الكهف (103-106)

الثلاثاء، نوفمبر 25

عاصفة ذهن



عصف البرد بجسدها كما عصفت الافكار وتصارعت بذهنها

ارتدت معطفها وحملت كأس شرابها الدافئ
متجهة به ناحية شرفة غرفتها قرب منتصف الليل
لترى منها ضوء البرق وتسمع صوت الرعد

تسرق انفاسا تذيب تنهيدات فكرها الشريد
جسد ساكن ..يدان ترتفعان بالشراب لفاها
وعقل تضربه تقلبات اقسى من صوت الرعد
.
.
.
تذكرتـه

صوته...ابتسامته...هدوء أنفاسه...مرحه
وحزنه الصامت الا من أنين لا يسمعه سواها
حبه وحنانه الذى منحها الدفء فى ليال شتاء كهذه

ثم قسوته وهجره وأنانيته ومكره
وعذابها ودموعها
ثم عودته وعودتها اليه بلهفة أم لولدها الغائب
ثم قسوته وهجره ومكره من جديد
.
.
اهتز رأسها مع صدرها بنفس عميق

سكبت ماتبقى من شرابها الدافئ على زجاج شرفتها

فلم يعد مجديا
لطالما هدأت العاصفة




الثلاثاء، نوفمبر 18

قالى الوداع قلتله قشطه


*بعد ماعرفوا بعض بأسبوعين......

هو: أنا عايز اقولك على سر شلته فى قلبى سنين
هى: قول مالك؟
هو: أنا بحبك وانتى عمرى وبحلم بيكى كل ليلة 7 مرات ونص وبصحى على صوتك ياحياتى
هى: وأنا كمان ياحبيبى بحبك بقالى 3 شهور و5تيام و6ساعات وربع
هو: صحيح؟ يااااااااااه ...ده احلى يوم فى حياتى
هى: وأنا كمان..بس هنعمل ايه؟ واهلى واهلك والدنيا والناس؟
هو: هحبك وتحبينى ياعمرى وكفاية نبقى سوا
هى: طب ياحبيبى أنا بقول كده برضه بس مانطولش فى الحكاية ماشى؟

*فاتت سنة غرام وهيام وأحلى كلام.........

هى: احنا هنفضل كده كتير ياحبيبى واهلينا مايعرفوش؟
هو: ليه ياحبيبتى أنا بسش اظبط نفسى فى الشغل واجى اتقدملك على طوووووووول
هى: امتى بقى يحصل ده؟....يااااه ده أنا هبقى أحلى كركوبة فى الدنيا
هو: قريب ياحبيبتى قريب كلها 12 سنه بالكتير

*فاتت كمان سنة وهو ولا هنا وهى هتطق من الغيظ......

هى: حبيبى الحكاية طولت اوى احنا هنفضل كده كتير؟ -تعبت قلبى الله يحرقك-
هو: كده ازاى ياحبيبتى؟ مااحنا اشطه اهو وآخر تمام
هى: تمام ايه وهمام ايه؟ هو احنا هنفضل تحت شجرة الجرجير ومقضيينها عصير لمون؟
هو: تقصدى ايه ياروحى؟ اصبرى بكره يبقى عندنا بيت وأولاد
هى: ده عند أمه ياادهم ... أنا متقدملى عريس كويس وإذا مالحقتنيش هيخطفونى منك
هو: لاااااااااا ده أنا كنت ارمى نفسى من فوق المكتب الى فى الشغل...ده انا كنت اقطع شرايينى
هى: لأ انا مش عايزاك تعمل كده أنا هكلم بابا وماما وانت تاخد خطوة بقى

*أسبوع...اتنين...تلاته.تليفونه غير متاح...مابيردش ....وأما رد....

هى: انت فين مش لاقياك؟
هو: معلش تليفونى كان فاصل شحن وكنت بشحنه
هى: بقاله شهر فاصل شحن وبتشحنه؟! ليه انت كنت بتشحنه غاز؟
هو: خلصنا بقى..قصرى ..خير؟
هى: وهييجى منين الخير ياروحى وانت مانفذتش اللى اتفقنا عليه؟
هو: هو احنا اتفقنا على حاجه؟!
هى: نعم ياروح أمك؟ امال تقطيع شرايينك واوردتك وشرب مية النار ده كان ليه؟
هو: كنت مجنون وعقلت ياروحى..وخطبت البت ماهيتاب بنت عمى الجمعة اللى فاتت الساعة اتناشر وخمسه الضهر
هى: ياواطى ياندل....ماهيتاب؟!!!! طب وأنا؟
هو: ماتغلطيش بس وانسى الجرجير واللمون...انتى مش فاهمه حاجة
هى: انسى؟ ده اخر كلام عندك؟..اصلى مش ناوية افهم
هو: اه ياروحى...بس صدقينى انتى أكتر حاجة حبيتها فى حياتى حتى اكتر من المكرونه البشاميل...لكن أهلى قالولى إما ماهيتاب أو الطرد من البيت
هى: اوك..اشطه يامان...سى يو...باى

الخلاصة

- مابنى على باطل فهو باطل
- كلمة بحبك بقت اسهل كلمة بتتقال واسهل كلمة بتتنسى

الثلاثاء، نوفمبر 11

احنا جيل هاى تك


من كام يوم حصلت مشكلة مش ظريفة ابدا أبدا

إذ فجأتن وعلى حين غفلة منى أنا وأهالى الحتة كلهم سمعت خبر مشئوم من أخويا. وهو بيصحينى من النوم الصبح لقيته بيقولى "عندى ليكى خبر مش تمام"
قلتله "خير..البلد ولعت؟"
قالى "لا للاسف..بس مفيش نت فى البيت" طبعا مش عارفه اوصفلكوا شكل عنيا وهى 2 متر بره وشى ولا بقى المفتوح على مصراعيه ولا ايدى اللى بقت بقدرة قادر على قمة دماغى.

وإذا بى بقوله"يالهوتى ..لييييييييه؟!!"
قالى "أصل فى عمال بيحفروا مش عارف ليه كده وقطعوا كابل التليفون وبالتالى مفيش حرارة فى تليفون البيت علشان الروتر يشتغل"

طبعا عنيا دلوقت بقت 4 متر بره مش 2وذلك لان القانون بيقول"ان الخضه تتناسب طرديا مع مربع المسافه"

وقلتله" كمااااااااااااان؟..عععععععع..ياربى عالقحط يعنى لا نت ولا تليفون بيت ياصباح الخساير يعنى هنقضيها موبايل؟.طويب"
وقمت وأنا مش متصوره شكلى قدام المعيده اللى مفروض كنت ابعتلها حل الريبورت عالميل فى يومين الاجازة ولا أصلا البرنامج اللى كنت مستنياه عالميل علشان احل الريبورت من اساسه ولا الريبورت التانى اللى مطلوب منى بعد يومين ولسه مش عملت عليه سيرش اصلا وكنت مأجلاه للاجازة ولا..ولا..ولا..والاهم مدونتى اللى بقالى يومين مش شفتها وهتجنن وأشوفها.
رجعت اكلم أخويا وهو اصلا خايف يكلمنى لانه عارفه انا مدايقه قد ايه من الخبر ده وأنا بروح رياضيه تقبلت الموقف

وقلتله "طيب ياض فين موبايلى أتصل بالمقاطيع صحابى علشان اقولهم انى مش هقدر ابعتلهم البريزنتيشن عالميل زى مااتفقنا وإن تليفون البيت تعيشوا انتوا وماتحاولوش تكلمونى"
لقيته بيضحكلى ببلاهه وبيقولى "هئ هئ هئ مفيهوش كريديت"
أنا:"نااااااااعاااااااااام ...ياغلبى انت اخر مره تصحينى وشك اسود عالصبح ..انتوا خلصتوا رصيدى ؟"
هو –يومئ برأسه مجيبا بنعم-ايه رأيكوا مصطلح جبار اهه-
أنا:"وفخور بنفسك ياخويا؟..روح منك للى كلت دراع جوزها..طب ادينى 10 جنيه سلف أشحن احنا اخر الشهر وأنا مفلسة"
هو:"هئ هئ هئ..الواد حبظلم صاحبى اخد منى كل فلوسى اصله مزنوق حبتين"
أنا:"طب وانت رايح للى كلت دراع جوزها ابقى خد حبظلم معاك وقوله انى انا اللى باعتاه هروح معاك على طول...هيا اذهبا للجحيم معا"

أنا خلاص كنت هتجنن وعماله اضحك بتهييس الدنيا اسودت فى وشى وحسيت كأنى محاصره فى بيتنا لا عارفه أوصل لحد ولا حد يوصلى.
بصراحه عشت حياتى تى فى وأفلام كوميدى وأبص عالجهاز من بعيد باحتقار وهو جثة هامده.

ولما فقت من الغيبوبه ولقيت نفسى فى عز الازمه بجد لقيتنى بسأل نفسى سؤال غلس .."ليه حياتى وحياة كتير زيى ممكن تقف لما النت والتليفون يتقطعوا؟" وافتكرت ازمة قطع الكابل وازمة الاسبوعين اللى حصلت فى مصر من سنه وحال البلد اللى تقريبا وقف.
طب امال قبل النت والتليفون الناس كانت عايشه ازاى؟
ولا يمكن اللى يجرب التكنولوجيات دى مايعرفش يعيش من غيرها بدليل إن قبلنا مكانوش بيستخدموها وعايشين.
طب تتصوروا شكل حياة حد فينا دلوقت لو جرب ده ومره واحده ركب مع مخموخ وظاظا وجرجير آلة الزمن ورجع 3000 سنة ورا؟؟
تفتكروا وجود التكنولوجى فى دمنا بالشكل ده لدرجة لما حد ينسى موبايله فى البيت يومه بيقف دى ظاهرة صحية ولا ظاهرة ملوخية؟ :)
أنا بصراحة مش عارفة
كانت معكم من امام كمبيوتر الكلية المسروق ...حبيبة :)

الاثنين، نوفمبر 3

خماسياتى..ألم وندم




الأولة آه ياقلب أنا فى الفرح ماليش

والتانية آه ياعقل أنا فى الفكر أعيش

والتالتة آه ياعيون سهرانة ماتناميش

والرابعة آه ياروح أحلامك مفيش فى مفيش

والخامسة آه ياقلم هم يموت ألف هم يعيش


الاثنين، أكتوبر 27

أنا وهى والصليب ثالثنا


فى طريقى للجامعه الصبح وأنا لابسه أبيض -أحب الالوان لقلبى- وحاسة إن روحى صافيه وعندها استعداد تستقبل يوم جميل لكن الله اعلم هيبقى جميل ولاااااااا...؟؟

فى واحد من منعطفات الطريق وعلى أول درجات سلم كوبرى قابلت راجل من الكنيسة كدت اصطدم بيه. لابس الزى الاسود بتاعهم وعلى صدره السلسلة الكبيرة اللى بتحمل الصليب

ماشية قدامى بنت صغيرة عمرها حوالى 10-12 سنة تبدو عليها علامات الشقاوة واللباقة وأول ماعدى الراجل وفاتها لقيتها بتقول -عفوا فى اللفظ- "اتفوا عليكوا" وفعلا مالت وراه ونفذت الحركة

وهى بتميل لمحتنى جاية وراها ... ابتسمتلى بعيون بتلمع دليل على الرضا عن نفسها والفخر بحاجه صح جدا -من وجهة نظرها- هى عملتها دليل على حبها الشديد لدينها.وبسرعه طمنتها ليا بابتسامه رديتها ليها دليل على رضايا عن اللى هى عملته وقلتلها "ليه كده بس؟!" وأنا قلبى بيدق من الخوف بعدين مش تهتم بكلامى او تحرجنى بكلمة ممكن أموت فيها.

ودار الحوار ده بيننا وأنا محافظة طول كلامى معاها على هدوء كلامى وابتسامة خفيفة طمنتها ليا.

أنا: ليه كده بس؟!!

هى: مش بحبهم

أنا: ماشى...بس هو ده معناه إنك تعملى كده؟

هى: أصل دول بالذات بكرههم أوى والله

أنا: طيب هسألك سؤال...انتى مسلمة وبتحبى دينك ولا لأ؟

هى: طبعا بحبه أوى والله

أنا: برافو عليكى وأنا مش شاكة فى كده بس انتى مثلا لو شفتى بنت ماشية فى الشارع ولابسه قصير وضيق وبشعرها وعايزاها تلبس محترم هتكلميها تقوليلها ايه؟ -سكتت البنت فى حيرة وكملت أنا-

-ايه القرف اللى انت لابساه ده وربنا يهدك ولا ياخدك وكده؟

-ولا هتقوليلها انتى عسوله وامورة ولو لبستى طرحة ولبستى كذا وكذا أنا شايفة انك هتبقى أجمل فيهم؟

تفتكرى لو قلتيلها الرد الاولانى هتعمل ايه؟

هى: مش عارفه بس أكيد يعنى هتضايق منى وممكن تشتمنى

أنا: طيب لو قلتيلها التانى؟

هى: -سكتت فى حيرة -

أنا: اكيد لو عمرها مافكرت تلبس حجاب لما تروح هتجرب تقف قدام المراية تلبسه وممكن تحب نفسها فيه وتلبسه دايما، انما بالكلام الاولانى حتى لو كانت فكرت فيه بطريقتك دى معاها هترجع ومش ممكن تكمل

هى: اه... صح صح

أنا: طيب لو المسيحى شاف مسلمة عسولة زيك وبتتصرف تصرف زى ده اكيد عمره ماهيفكر يدخل دين اصحابه بيعملوا التصرفات دى ...صح؟

هى: صح


وصلنا لاخر الكوبرى والمفروض كل واحد فينا ينزل من سلم فى ناحية

افترقنا برضه بابتسامه زى مابدأنا لكن المرادى ابتسامتها كانت مع عيون كلها خجل من تصرف غلط عملته ووعد بعدم تكراره -مش فخر زى مابدأنا-

وأنا برضه بابتسامة راسمة على وشى ملامح النشوة والانتصار لانى قدرت أغير من تفكير دماغ لسه بتتشكل -مش زى الابتسامة الاولانيه اللى كانت كلها قلق وخوف-

وعلى أول درجات السلم سلمت عليها بايدى وبوستها وسألتها ...... "اسمك ايه؟"
قالتلى "أنا مها"

الثلاثاء، أكتوبر 21

عودة..شوية لخبطة..وجواب حب


أنا رجعت تانى بعد فترة من تصفية حسابات نفس . مفيش ازمة بتعدى بالساهل ومن غير مانخرج منها بحاجه تفرق معانا كتير فى حياتنا . وازمتى دى وبدون تفاصيل عرفتنى انا فين من ناس كتير . يمكن أوقات الواقع بيكون أليم لكن لازم منه . صعب أوى لما تستنى حد غالى عليك وانت متخيل أنه اول واحد هتلاقيه جنبك ويخذلك واحساس جميل أنى احس بحب ليا فى قلوب ناس أعرفها ومعرفهاش. يمكن أنا من النوع اللى البسمة فى وشه بتفرق معاه كتير . بس أنا اتعلمت حاجة مهمه أوى ...إن رأى الناس فيا حتى لو قريبين منى مش دليل على كونى كويسة أو وحشة لان ممكن حد يقولى إنى كويسة لغرض فى نفسه وحد تانى يقولى أنى وحشة لغرض تانى وممكن يكونوا الاتنين بعيد عن حقيقتى من جوه. يعنى مابقاش رأى اللى حواليا مقياس لضياع جزء كبير من ثقتى فيهم خصوصا إذا حكمت دايما أخلاقى ودينى.

ماعلينا

خلينى احكيلكوا بقى عن جواب الحب اللى لقيته فى ذكرياتى ورجعلى جزء كبير كان قرب يضيع من صفاء قلبى..
أخيرا قررت أقعد على مكتبى حبيبى اللى وحشنى يمكن لأنى كنت بذاكر بقالى فتره عالسرير على غير عادتى ويمكن لأنه بجد من اغلى حاجاتى عليا. ونزلت على ادراج المكتب انفض عنها تراب شهور لقيت حاجات كتير اشكال والوان ولفت نظرى فى وسط البراجل والاساتيك والسيديهات ظرف صغير رقيق وعليه اهداء فتحته وانا ناسيه ايه ده لحد مالقيت أرق كلام اتكتبلى فى حياتى لأنه خارج من قلب نضيف لسه مش اتلوث بهموم الدنيا ومشاكلها
.......كان من "مى"

دى بنت عمى وعندها 10 سنين هى عندى اختى وبتنى وصحبتى وأنا عندها اقرب واغلى الناس وصيغه الجواب بالنص ومن غير ضحك هى دى

" اهداء الى اختى الحبيبة "نور".....-ايوة اللى هو اسمى الحقيقى-
اشرقت الشمس ضياءا وازداد القمر نورا بنورك يانور عينى
ضمينى على صدرك أشعر بالحب والحنان وأنا بحبك وبموت فيكى ومش قادره ابعد عنك-أيوة لانهم كانوا عايزين يسفروها بره غصب وتسيبنى-
لو كنتى بتحبينى صحيح ابعتيلى جواب او رساله وأنا بدعيلك يارب تنجحى وتصبحى مهندسة كبيرة وبدعى لرونى يكبر ويصبح صينيا-تقصد صيدلانيا بس مش عرفت تكتبها-
ويارب محمد يكبر ويدخل 3 اعدادى وسلميلى على ماما اللى هى مامتى حبيبتى وشكرا"
"مى"

وعلى فكره هى ساكنه فى البيت اللى ملزوق فينا على طول يعنى جت سلمتهولى بايديها
طبعا البت اروبة وكاتبه كلام أنا معرفش اكتبه بس كويس اهو قدر يخلينى أحمد ربنا على انى لو خسرت حبى فى قلوب كل الدنيا كفاية عليا حب قلب صغير لسه نضيف ضحكته عندى بالدنيا ومافيها.

ويمكن ده علمنى إنى لازم اهتم بالحاجة اللى ليها قيمة عندى حتى لو كانت صغيرة وأرمى الحاجة اللى ماتلزمنيش ورا ضهرى مهما كان حجمها .


أخيرا
اهتمام الناس اللى علقت على البوست الاخير التشاؤمى ده كان ليه دفعه معنوية جامدة عندى وربنا مايحرمنى منهم ابدا يارب كلهم.
لكن فى ناس بقى وقفت جنبى بجد فيها اللى سأل عليا وقلق قبل ماانزل البوست اصلا وفيها اللى ساندنى وفيها اللى دور عليا برغم هروبى من الدنيا كلها لحد مااطمن عليا واقنعنى بالثبات والرجوع وكان كفاية عليا سؤالهم واسمحولى هقول اسمائهم عرفانا منى بجميلهم عليا وبدون ترتيب هما

مى حبيبتى "مدينة الملائكة" ونور شاهين الجميلة ومحاسن حماتى وأسماء بنت الشمس وبنت بلدى برضه
محمود العدل ومحمد" الفارس الملثم" والمهندس محمد داوود"دبابيس" وحبيب "عالم حبيب" قريبين اوى من قلبى وربنا يعلم
الاب الروحى ليا الجميل "وميض ابتسامة" والرقيق حسام "كلام حسام"
وأخيرا عماد الدين يوسف وأحمد حمزة اللى بحسهم اخواتى بجد


الناس دى مفيش معرفة شخصية بينى وبينها إلا انى وربنا يعلم بحبهم فى الله وبتمنى هما كمان يفضلوا يحبونى وربنا يزيدهم طيبة وجمال روح

ملحوظه: استحملوا غرابنى وغلاستى احيانا وتقلباتى كمان وغيابى الفتره الجايه أحيانا ومش لاى سبب غير الدراسة ودعواتكوا بقى

الثلاثاء، أكتوبر 14

إلى أن يقضى الله أمرا



انا تعبت خلاص الضغط بيزيد من كل ناحية ولا حد بيفهم ولا بيقدر ولا بيحس
كل ما اقول هضحك وانسى الهم الاقيه بيجرى ورايا
كل ماتخرج الضحكة الاقيها مش بتخرج من قلبى ..

كل مااقول واللى حواليا ذنبهم ايه واقول هضحكهم ومش مهم المى الاقى الابتسامة مش قادرة تخرج
الالم أخد منى كفايته لدرجة انى حاسة انى مابقتش اشوف غير ضباب قدام
عنيا تعبت وروحى اتخنقت والدنيا غامت حواليا حتى مش لاقيه اى حاجة تغسل لونها فى عنيا
ضغط ضغط ضغط ..

كل امل ليك فى الدنيا بيضيع وكل ضحكة مابتقدرش توصل حتى شفايفك ولو وصلت لونها بيبقى مغشوش
والقلب اللى مفروض يبقى حنين عليك فيه اللى مكفيه
ولحد مايقضى الله امرا كان مفعولا أنا هبعد وهبعد عن الكل يمكن اقدر ارتاح ..

عندى كلام كتير اوى لكن مش خارج تقريبا هو اتعود يبقى جوه جوه وبس

فارس...نسوانجى


أفادت آخر الاخبار التى تصدر عن المجلات العلمية إن دلوقت الضغط على زرار الباور بتاع التليفزيون ضار جدا بالصحة-زى التدخين كده-بس ده على اقوى شويه وبيسبب التهييس بالاضافة الى بعض انواع من الشلل بكل اشكاله الهندسية النصفى والرباعى والخماسى وشبه المنحرف أحيانا وهثبتلكوا صحة كلامى

أنا حكيت قبل كده اللى حصلى من التليفزيون فى فكريرات -جمع فكرة- سابقة

المرادى فتحت التليفزيون وانا بتغدى اهو يبلع الاكل شويه وفتح برضه على واحده من قنوات الاغانى دقيقة وجت اغنية للمغنى اللبنانى فارس كرم -الواد الوسيم ده اللى كان بيغنى صلينى وقولى لابوكى- برضه مش عارفينه ؟ مش مهم

المهم اشتهر من البداية فى اغانية بخفة الدم لكن المرادى بصراحه مش عارفه قلة ...من الاخر

بدأت الأغنيه بمزيكا جباره حبيتها جداا ولقيته بيقول فى مطلعها

"عم تطلع للنسوان شو بدك منهن قلى"

ياااااااااسلام ياعم فارس قدوة حسنه ومش عايز الشباب يبص عالبنات تمام محترررررررررررم بس هو كان لازم تقول نسوان يعنى؟ ايه المصطلحات الحقيرة دى؟!!

ماعلينا كمل عليا وقال

"لك ياللى مايحب النسوان الله يبعتله علة"

اخخخخخخخخخخ ان شالله انت اللى يبعتلك علة يابعيد ده انا كنت بحبك يخرب بيت سنينك

وشوية لقيته بيقول

"مين بيسترجى يبعد عن حوا درجة انا شخصيا نسوانجى ..نسوانجى بقولها وبصوتى على"

لا وبيقولها بطريقة يعنى مفخرة عالاخر كأنه حرر فلسطين مثلا :)

طب والنبى مجاهرة بالسوء طب ده كلام ؟!

يعنى لما الشركات بتحب تعمل اعلانات للمنتجات بتاعتها بتجيب الفنانين المحبوبين علشان كل اللى بيحب فنان يعمل زيه وياكل اللى بياكله او يشرب اللى بيشربه طب ده واحد طالع فى كليب وهو الراجل الوحيد فيه والباقيين كلهم بنات انما اييييييه...وااااااو حاجة مسخرة عالاخر استغفر الله العظيم يبقى بيقول ايه لشباب الجيل اللى مش ناقصين بوظان اصلا ؟!

هو سؤال واحد بيتنطط فى دماغى..
هو مفيش رقابة على كلمات الاغانى ولا ايه ؟

انا يمكن ربنا كارمنى ومش بقعد قدام تليفزيون كتير علشان مش اسمع الكلام اللى بينقض الوضوء ده باسم الفن

طب بالله عليكوا ده فن ده؟!

الا بجد بجد بقى هو فيه رقابة على كلام الاغانى ولا لا؟

طب تفتكروا لو كان فيه رقابة كانت هتسيب الكلام ده ينزل؟

افيدونا افادكم الله

والله جيت احملكوا الاغنية بس مش رضيت تنزل تقريبا خافت عليكوا من الاعراض اللى بتحصل نتيجة سماعها عموما اللى يحب يسمعها يعنى وهيدور عليها مفيش مانع بس للى عندهم حساسية زيى قبل الضغط على زر "بلاى" اطلبوا 122 وده رقم الاسعاااااااف :))

الاثنين، أكتوبر 6

عدولة دخل سنة اولى


"عدولة دخل سنة اولى....يالا نغنى لعدولة".

جزء من أغنية قديمة من التراث المصرى أنا شخصيا بسمعه كتير لأن أى ولد صغير أو بنت عندنا بيدخل سنة اولى -ابتدائى يعنى- ماما بتقوله ليه. أى حد فينا عنده عدولة وداخل سنه أولى سوا كان عدولة ده ابنه ولا اخوة بيبقى فرحان بيه قوى مايعرفش ياعينى اللى مستنى عدولة لما يدخل سنه أولى ......... وهما بقى ياحول الله بيقولوا بسلامة نيه
" الدكتور عدولة راح .....الدكتور عدولة جه " ربنا أمر بالستر.
التعليم عندنا بيطلع اللى هيبقوا دكاترة -زى الدكتور عدولة كده- من ثانوية عامة مايعرفوش حاجة يعنى كل طالب مهما كان شاطر بيقى كل اللى يعرفه منهج سنته وخلاص وأول ما يخرج منها ؟؟؟؟ يامولاااااى كما خلقتنى !!!!! يمكن ايوة العيب فينا شوية كطلبة بس كمان طريقة التدريس و المناهج اللى بتحطهالنا وزارتنا المبجلة تجيب احباط يعنى .....اه والله. ده اللى خلانا أنا وزمايلى واحنا فى الجامعة وبيقولوا علينا بعد الشر مهندسين المستقبل وقال ايه..!!!! عمار مصر على أيادى جيلنا بنعانى من إننا بنخرج من سنة لسنة أعلى وإحنا محتاجين كل كلمة درسناها , ونكتشف إن احنا علشان نفهم اما الدكتور يشرح المنهج القديم تانى , او نرجع نتطفل على العيال اللى أصغر مننا ونحضر معاهم المحاضرات اللى احنا عايزينها .

*ليه ده بقى ....؟؟؟!!! ............. ليه؟؟؟

علشان مااتعودناش من الاول اننا ناخد طبيعة مناهج بتخاطب الفكر وبتقرب من طبيعة اللى بيدرسوا مش بتاعت كلمتين حفظ وتسميع فى الامتحان ...-وكان الله بالسر عليم- مناهج تعبانة وماشية على عصاية , وسياسة تعليم فى العناية المركزة ،،،،،،، ويا فرحتى
"شالوا سنه ساته .،، جابوا سنه ساته .،، عالم رايقة وفاضية " - كما قالت الحكيمة فرح -
وده علشان قال ايه ؟؟!! يكبروا دماغ العيال سنه ويدوهم فرصة أكبر للفهم .- أصل دى اللى هتعدل المايل !!!! - وآدى أخرتها عايزين الحاجة الوحيدة اللى كانت صح فى الثانوية العامة تبقى غلط وهى ان درجات الطالب كلها على الامتحان وكل واحد وشطارته دلوقتى بقى بقت روح الطلبة فى أيادى المدرسين.....

شفتوا الخيبة ؟؟؟؟؟!!!! ماعلينا ،،،

معتقدش ان فى حد فى مصر دلوقتى مايعرفش إن فى فجوة عندنا فى التعليم بين اللى عايزين نبنى بيه فكر أولادنا وشخصيتهم وبين اللى بندرسه ليهم - ده طبعا فى المراحل اللى قبل ثانوى - وبين اللى هياخدوة فى الجامعة واللى بيدرسوه فى ثانوى اما عن الداهية الكبيرة الا وهى الفجوة بين مناهج الجامعة واللى هيطلعوا الغلابة طلبة الجامعات يطلعوا يشتغلوا فيه فى السوق.

........ويا أسفاااااااااا على الدكتور عدولة ..........

والله من كتر ما أنا شايفة قدامى أزمة فى تعليمنا ..أنا حاسة إنى لما ابقى أم عدولة مش هبقى ادخلة سنه أولى ...........

"ويالا نغنى لعدولة ............-lol-"

الجمعة، أكتوبر 3

إنها هى


إنها هى...

من حطمت قلوب الرجال

وأذلت غرور الابطال

وغزت مشاعر شيوخ..نساء.. وأطفال


إنها هى....


من إن رأيتها تمنيتها

إما حبيبة احببتها

زوجة عاشرتها

أما شعرت بدفئها

اختا التمست عطفها

ابنه رجوت حنانها

أو صديقة طلبت ودها


فكيف لها أن تبكى على اللبن المسكوب ؟؟!!

وترتجى آمال ماض مسلوب ؟؟!!

وتدمع على أطلال باتت تذوب ؟؟!!


إنها هى ..

إنها أنا


فإذا علمت بأن الركب آت

وشعرت بحنين للذكريات

فأعلم إنى كالمعجزات

قائمة احمل راية الثبات


بلى بلى سأبقى أنا هى أنا ما إن كتب لى ربى الحياة

الاثنين، سبتمبر 29

أول مرة عيد


هو أنا عملت الركن اللى فى الجنب فوووووق خالص ده .............أيوة اللى فيه صورة العيد ده مخصوص علشان اهنيكم بأى مناسبة أو اقولكم حاجة ع الهامش

إنما العيد يمكن غير

من زمان مش حسيت بطعم العيد
يمكن لأنى كبرت شويه وبقيت احس بالمسؤليه واشيل هموم زى الناس العادية

يعنى لا بقيت اشترى لبس جديد ولا اخرج واتفسح زى وأنا طفلة صغنطوطه ولا حتى حد بيدينى عيديه
أو يمكن لأن بابا خلاص مش موجود وأنا اتعودت انى اول حاجه بعملها فى العيد انى ابوسه واعيد عليه :(


ويمكن بيمنعنى الخجل دايما إنى اخرج اول يوم عيد حتى علشان اعيد على قرايبى وبكتفى بمكالمة تليفون أو مسج موبايل
لحد مااخرج تانى يوم فى طريقى لبيت جدو
واشوف العيال الصغيرين وامشى سرحانه

يابختهم كنت وأنا فى سنهم دايما اقول امتى اكبر بقى ؟
ودلوقتى أقول ياريتنى فضلت صغيره وماكبرت ابدا
على الاقل كانت دماغى فاضية

يمكن اتعودت انى ف طريقى أبتسم فى وش اللى يقابلنى حتى لو مش اعرفه واقوله كل سنة وحضرتك طيب
يمكن الناس بترد باستغراب بس انا ببقى مبسوطه لانى قدرت اخلى اللى قدامى يبتسم او حتى يفكر فى ابتسامتى ولو للحظات


والسنة دى فى عالم جديد انضميت ليه
فى ناس كتير حبيتهم واتمنيت اشوفهم
وناس علمونى دروس كتير فى الدنيا

وناس حبونى

وناس ماحبونيش

بس للكل حبونى او لا

كل سنة وانتوا طيبين

وبالعيد فرحانين

وقلوبكوا سعيده يارب

وماتنسوش تفتكرونى بدعوه كمان :)
معلش دوشتكوا بكلام كتير مالوش لزوم

بس بما إنى بحبكوا حقى عليكوا تتحملونى :)
عيد كحك سعيد يارب عليكوا وعقبال عيد اللحمة :)

الثلاثاء، سبتمبر 23

نهاية الحياة


الصدفة وحدها هى من قادته اليها وقادتها اليه



دعا الله أن يبعثها القدر اليه ليهبها حياته
ودعت الله أن يبعثه القدر اليها لتهبه حياتها



رأت فى ملامحة معالم الحياة
وأحب فى ملامحها الوان الحياة



أرادت أن تلتقيا عيونهما وأبى الا تلقاه والا يلقاها
ضاقت بالبعد ذرعا .....وثارت.... وثارت
.
.
.
سألها اللقاء
تهللت اساريرها
وأتته مهرولة



رأته مستلقيا على فراشه وقد شحبت ملامحه
اقتربت منه ...واقتربت.... واقتربت
وبعيون زائغة همست قائلة ...هاأنا ذا وقد تحقق الحلم


ارتاحت على صدره
حملت يده إلى وجهها وقالت..المسنى لتدب فى ملامحى الحياة
سمعت همسه فى أذنها يقول ..أحبك حتى آخر أنفاسى


اهتز قلبها طربا
رفعت عيناها لوجهه بابتسامة حانية
لترى أجفانه تتراخى

"معلنة نهاية الحياة "



الخميس، سبتمبر 18

تدبيسات عفا عليها الزمن


من زمان قوى عندى تاجات مهداه والله كتير قوى وقبل مااجاوب اى واحد منها لازم اقدم اعتذار رسمى لحبيبتى وبنت بلادى -وحماتى- اللى عايزة تطلق و .. لانها اهديتلى تاج بس انا جاوبته
وكمان بعتذر لصديقى الجميل afew good men لانى برضه جاوبت التاج اللى اهداهولى سنه الف تسعميه وخشبه

ندخل لتاج صديقتى الجميله
blue nile مع الاعتذار عن التأخير -سامحينى ياحبييبتى-

س1-اذكر 6 اسرار قد لا يكتشفها من يقابلك لاول مرة
جاوبتم قبل كده ومش هقولهم تانى بلاش فضايح بفى :):)

س2-اذكر 16صفة عن نفسك
والله مش عارفه ليه 16 بالذات . ده كتير قوى قوى بس انا جايبه معظمها من كلام شخصيات تعرفنى جدا وده رايها فيها ولانى عارفه نفسى اقتنعت بكلامهم ونشرته

فى ملحوظه الاول انا شخصيه فيها من متناقضات الدنيا مافيها يعنى فيا صفات كتير وعكسها لكن كل واحده بتخرج فى وقتها واحكموا


1-جدعة جدا والحمد لله وبفرح قوى بالمساعده لاى حد يعشم فيا سوا اعرفه او لا

2-أصيله ومخلصة لكن ببيع اللى يبيعنى ويدوس عليا مهما كان غالى

3-حنونه لكنى احيانا بكون قاسيه جدا على نفسى واحيانا على حد احبه ويحبنى من غير سبب لما اكون تعبانه او مدايقه بحكم العشم

4-طيبة وأحيانا ساذجة لدرجة الغباء لكن فى نفس الوقت ماكره جدا وذكية دماغ لا يستهان بيها

5-عاقلة والحمد لله وقرارتى حكيمه

6- مجنونه لدرجه اللسعان لما بحب اعمل حاجه ومش هتأذينى ولا تأذى حد لازومااااان اعملها واللى يحصل يحصل

7- رومانسيه جدا وحالمه قوى لكنى واقعيه ومنطقيه

8-عصبية وعجولة

9-صريحة وعنيدة وصداميه ومش ممكن اهرب من مشكلة واجهتنى لكنى ممكن مش اهتم بيها

10-جادة ويعتمد عليا وبتحمل المسؤليه جدا

11- زوق ومرحة جدا وخفيفة الظل لكنى احيانا بكون نكديه قوى

12-كبريائى وعزة نفسى اهم مافى حياتى ومش ممكن افرط فيهم وواثقة فى نفسى جدا الى حد بيشوفه بعض الناس غرور

13-جريئة ومش بسيب حقى لكنى خجولة الى حد وحش لكن لما بتحط فى وموقف محرج اوقات كتير بخرج منه بالهزار نوع من الهروب

14-فية ناس بتقول رقيقة بس مش مصدقاهم :)

15- اجتماعيه بحب الحركه والحياة لكن احيانا بعشق الوحده وبدون اسباب

16-بحب الخير جدا جدا وبراعى ربنا فى كل تصرفاتى ولو يوم نفسى امرتنى بالسوء او لقيت نفسى شرانيه رد فعل موقف معين باجرى واكون لوحدى لحد مانفسيتى تهدى بحيث مش ااذى حد

وفى شخصية عزيزة عليا جدا وتعرفنى قوى قالتلى مرة " انتى كل حاجه جواكي جنون حبك حنانك مشاعرك كتله من الجنون والاحساس" وهى اللى طلبت منى اقول كده على لسانها

طبعا اكتر شخصيه ف الدنيا تحمل متناقضات لكنى بحب صفاتى الحلوة وبتعامل بيها الا اذا اقتضت الضرورة بقلب ع الوش التانى :D


ده بقى تاج د/عمرو اللى هو blue wave وبرضه جالى من رومانسى من قريب

س1-بدأت تدون من امتي ؟ و دخلت العالم ده ازاي ؟
بدأت 1/5/2008 لسه بيبى يعنى

لما كنت بتكلم فى شهر 4 مع شريف زميلى صاحب مدونة اختلاف وبيقولى انتى مش بتذاكرى ليه؟ لاننا كان عندنا امتحانات الميد تيرم بعيد عن السامعين قلتله قرفانه قاللى طب اقرى تدويانتى ..ايه ده ياشريف انت بتكتب قالى اه شوفى البلاوى !!! :)

المهم لازم تعملى واحده قلتله والله ياريت بس ماليش نفس وفضل ورايا لحد ماحصل الموقف اللى نزلت بسببه اول بوستاتى "كلمة شرف" فى عز زنقة الامتحانات الشفوى والعملى


س2-ايه كان انطباعك في البداية ؟
بداية بسبب زنقتى مكنتش بتابع حد ومكنش عندى شغف انى اشوف ردود افعال الناس لانى مكنتش بزور حد ولا بعلق عند حد خالص لحد مابدأت شويه بشويه الجألها وانا مهمومة من الامتحانات اصبح وامسى عليها وافرح قوى لما يجيلى تعليق جديد من حد مااعرفوش كانت بتخفف عنى ومن هنا بدأت احبها وبعدين ادمنتها


س3-مين اكتر واحد بتهتم بتعليقه علي بوستك الجديد ؟
مش هكون دبلوماسيه واقول الكل وبس.. طبعا الكل لكن الاكتر الناس اللى فى لستتى اللى ع اليمين دى لانهم بيتفاعلوا معايا بجد وبيناقشونى مش بيرموا تعليقات اعلانات وخلاص وكمان اى تعليق لحد بيزورنى لاول مره لكن بيناقشنى فى كلامى سواء بيأيدنى او بيعارضنى


س4-ايه أهم حاجة اتعلمتها من عالم التدوين ؟
الايجابية والمشاركه والاستجابة لفكر الغير


س5-ايه أكتر حاجة كرهتها ؟
الغباء والتفاهه ..شفت ناس همها تأذى وتفضح الناس وشفت ناس بتجاهر بالسوء وبتفضح نفسها وربنا ساترها ولا تستحى من الله
بكره برضه شغل الاعلانات وتعالى شوف مدونتى بين طيات كلمتين ونص فى تعليق


س6-حاسس ان التدوين له تأثير ؟
طبعا احسن اجازة صيف مرت عليا استثمرت فيها وقتى ومش حسيت بالملل مع ان قصاقيصى سببتلى مشاكل كتير مع ماما :)


س7-تهدى التاج لمين؟
و الاجنحة المكسورة و احلى قلب ينبض



ياربى البوست طويل جدا بس الواجب بقى :)