عم سيد
غفير المنظفة اللى فيها الشركة اللى انا بشتغل فيها
بأى شكل من الأشكال لا يمكن ان حد يصدق بسهوله انه غفير لعدة اسباب اهمها التكوين الجسمانى ليه اللى يبدو ضعيف جدا جدا عن كونه يقدر يحمى نفسه مش يحمى ادارات شركات
الحاجة التانيه شكل عيونه اللى يبدو عليها ضعف نظره
مش ده كله اللى عايزة اتكلم فيه
كل يوم كنت بستغرب ازاى الراجل ده بيجى قبل 8.30 ونمشى الساعه 5وهو موجود وقلت ساعتها اكيد هو ساكن هنا بس فين ممكن يسكن فى منطفة اقل شقه ايجار فيها ب1000جنيه
سماحة وشه وطيبته اللى بتبان فى كلامه وحبه للناس اللى بيشتغلوا فى الشركة عندنا خلتنى بقيت استنى اشوفه كل يوم ولو يوم ماشفتوش بزعل
لحد مافيوم غيرت الشارع اللى بدخل منه للشركه واتفاجئت بعم سيد قاعد على الارض جمب صندوق خشب لا يعدو متر *متر ونص واكتشفت ان هو ده المكان اللى عن سيد عايش فيه!!
الاوفيس بوى
الاوفيس بوى الدائم اللى بيجى الشركه غاب فى يوم فالشركة بتاعت السيرفيس بعتت واحد بديل
اعتقد ان مفيش حد أثر فى نفسيتى اد الولد ده لدرجة انى ناديتله فى المكتب وسألته انت متعلم؟ قالى واخد دبلون -بالنون وليس الميم-
الولد سنه مايعديش 20سنه يملك من الطيبه ماهو ظاهر على ملامحه لدرجه تتعب اعصاب اى حد بيحس
اعتقد انى مااشتغلتش فعليا فى اليوم ده اكتر من 3ساعات وبقيه ال9ساعات سرحانه وبراقبه ومش مستقره نفسيا
معرفش ليه ياسر الاوفيس بوى الدائم عمره مااثر فيا رغم انه راجل كبير وده خطف تفكيرى كده؟؟!!
عم سيد والاوفيس بوى الاتنين استفزوا جوايا نفس التساؤل؟
ليه انا كده وهما كده
!!!!!
لما شفت مسكن عم سيد احتقرت نفسى وسألت نفسى للحظه ليه مااكونش انا واهلى اللى عايشين فى مكان شبيه بده؟
دايما كنت ساخطة على بعد بلدى عن مناطق الشغل الحيوية ويوم ده بس لقيتنى بحمد ربنا عدد خلقه لانى عايشه ان واهلى فى بيت يمثل قصر بالنسبه لسكن عم سيد
والاوفيس بوى خلانى سألت
الولد ده بقى بيقدم سيرفيس للمكاتب اللى فيها مهندسين ومحاسبين ومديرين وسكرتاريه وهو مش معاهم ليه؟؟!!
ربنا وزع الرزق اه بس الفقر اللى مخلاهوش متعلم كفايه ومؤهل كفاية انه يتخدم بدال مايخدم؟؟
طيب مكنش ممكن يبقى اخويا مكانه؟
مفروض نعمل ايه عشان نحمد ربنا على اللى احنا فيه ومش عاجبنا؟
هو ده السؤال اللى مفروض كل واحد فينا يراجع نفسه فيه
ليه ماتكونش مكان عم سيد ولا الاوفيس بوى؟؟!!
