فى طريقى للجامعه الصبح وأنا لابسه أبيض -أحب الالوان لقلبى- وحاسة إن روحى صافيه وعندها استعداد تستقبل يوم جميل لكن الله اعلم هيبقى جميل ولاااااااا...؟؟
فى واحد من منعطفات الطريق وعلى أول درجات سلم كوبرى قابلت راجل من الكنيسة كدت اصطدم بيه. لابس الزى الاسود بتاعهم وعلى صدره السلسلة الكبيرة اللى بتحمل الصليب
ماشية قدامى بنت صغيرة عمرها حوالى 10-12 سنة تبدو عليها علامات الشقاوة واللباقة وأول ماعدى الراجل وفاتها لقيتها بتقول -عفوا فى اللفظ- "اتفوا عليكوا" وفعلا مالت وراه ونفذت الحركة
وهى بتميل لمحتنى جاية وراها ... ابتسمتلى بعيون بتلمع دليل على الرضا عن نفسها والفخر بحاجه صح جدا -من وجهة نظرها- هى عملتها دليل على حبها الشديد لدينها.وبسرعه طمنتها ليا بابتسامه رديتها ليها دليل على رضايا عن اللى هى عملته وقلتلها "ليه كده بس؟!" وأنا قلبى بيدق من الخوف بعدين مش تهتم بكلامى او تحرجنى بكلمة ممكن أموت فيها.
ودار الحوار ده بيننا وأنا محافظة طول كلامى معاها على هدوء كلامى وابتسامة خفيفة طمنتها ليا.
أنا: ليه كده بس؟!!
هى: مش بحبهم
أنا: ماشى...بس هو ده معناه إنك تعملى كده؟
هى: أصل دول بالذات بكرههم أوى والله
أنا: طيب هسألك سؤال...انتى مسلمة وبتحبى دينك ولا لأ؟
هى: طبعا بحبه أوى والله
أنا: برافو عليكى وأنا مش شاكة فى كده بس انتى مثلا لو شفتى بنت ماشية فى الشارع ولابسه قصير وضيق وبشعرها وعايزاها تلبس محترم هتكلميها تقوليلها ايه؟ -سكتت البنت فى حيرة وكملت أنا-
-ايه القرف اللى انت لابساه ده وربنا يهدك ولا ياخدك وكده؟
-ولا هتقوليلها انتى عسوله وامورة ولو لبستى طرحة ولبستى كذا وكذا أنا شايفة انك هتبقى أجمل فيهم؟
تفتكرى لو قلتيلها الرد الاولانى هتعمل ايه؟
هى: مش عارفه بس أكيد يعنى هتضايق منى وممكن تشتمنى
أنا: طيب لو قلتيلها التانى؟
هى: -سكتت فى حيرة -
أنا: اكيد لو عمرها مافكرت تلبس حجاب لما تروح هتجرب تقف قدام المراية تلبسه وممكن تحب نفسها فيه وتلبسه دايما، انما بالكلام الاولانى حتى لو كانت فكرت فيه بطريقتك دى معاها هترجع ومش ممكن تكمل
هى: اه... صح صح
أنا: طيب لو المسيحى شاف مسلمة عسولة زيك وبتتصرف تصرف زى ده اكيد عمره ماهيفكر يدخل دين اصحابه بيعملوا التصرفات دى ...صح؟
هى: صح
وصلنا لاخر الكوبرى والمفروض كل واحد فينا ينزل من سلم فى ناحية
افترقنا برضه بابتسامه زى مابدأنا لكن المرادى ابتسامتها كانت مع عيون كلها خجل من تصرف غلط عملته ووعد بعدم تكراره -مش فخر زى مابدأنا-
وأنا برضه بابتسامة راسمة على وشى ملامح النشوة والانتصار لانى قدرت أغير من تفكير دماغ لسه بتتشكل -مش زى الابتسامة الاولانيه اللى كانت كلها قلق وخوف-
وعلى أول درجات السلم سلمت عليها بايدى وبوستها وسألتها ...... "اسمك ايه؟"
قالتلى "أنا مها"
هناك 45 تعليقًا:
اوووووووووووووووووول تعليق
عااااااااااااااااااا
تاني تعليق
نفس البوست اللي كاتباه ياحبيبه وكنت هنشره بعد يومين
نفس المضمون
توارد افكار بجد فرحانه بيه
عنوان الموضوع مثير .. والحوار بينك وبين " مها " بنت العشر سنين رائع .. والموقف ايضا يثير في النفس الكثير من التساؤلات .. بالرغم من الاقرار بأن تصرفها فيه كثير من الخطأ .. لكن ما الذي يدفع طفلة بنت العشر سنين لمثل هذا .. الفترة الاخيرة شهدت الكثير من الأحداث اللي بدأ فيها نصارى الداخل والخارج يرتفع صوتهم .. بالرغم من أننا نعيش في مصر منذ مئات السنين في أمن وأمان جنباً إلى جنب .. شعارنا " لكم دينكم ولي دين " .. لكن تعمد الكثير منهم لأحداث مفتعلة .. وكلما دخل الإسلام منهم شخص يخرجوا في مظاهرات منادين بطلب العون من أمريكا .. إلى جانب ما يصبونه في عقول ابناؤهم في مدارس الأحد فيخرج هؤلاء الأبناء ليتعاملوا مع زملاؤهم في المدارس وغيرها بهذه الأفكار
لكن نبقى نحن المسلمين يميزنا ديننا .. يرفعنا ويرقينا .. ويبقى حسن الخلق للمسلمين وغير المسلمين
تحياتي لكي .............. ولمها
بوست جميل جدا ياحبيبة وبيناقش قضية هامة جدا
بالفعل يا بيبه
فيه ناس بتفكر انها كدا صح
وانها كدا بتدافع عن دينها
مع ان دا ابعد ما يكون عن ديننا الحنيف
ربنا يعف عنا
بجد موضوع جميل جدا
ياريت الناس كلها تتصرف كده
لأن الأسلوب التانى ده مضر جدا ز
تحياتى
جميل قوى طريقة نصيحتك للبنت
ذكرتينى بقصة ذكرها الشيخ محمد العريفى فى كتابه استمتع بحياتك(
كان عبد الله رجلاً متحمساً .. لكنه تنقصه بعض المهارات .. خرج يوماً من بيته إلى المسجد ليصلي الظهر .. يسوقه الحرص على الصلاة ويدفعه تعظيمه للدين ..
كان يحث خطاه خوفاً من أن تقام الصلاة قبل وصوله على المسجد ..
مر أثناء الطريق بنخلة في أعلاها رجل بلباس مهنته يشتغل بإصلاح التمر ..
عجب عبد الله من هذا الذي ما اهتم بالصلاة .. وكأنه ما سمع إذاناً ولا ينتظر إقامة ..!!
فصاح به غاضباً : انزل للصلاة ..
فقال الرجل بكل برود : طيب .. طيب ..
فقال : عجل .. صل يا حمار !!
فصرخ الرجل : أنا حمار ..!! ثم انتزع عسيباً من النخلة ونزل ليفلق به رأسه !!
غطى عبد الله وجهه بطرف غترته لئلا يعرفه .. وانطلق يعدو إلى المسجد ..
نزل الرجل من النخلة غاضباً .. ومضى إلى بيته وصلى وارتاح قليلاً .. ثم خرج إلى نخلته ليكمل عمله ..
دخل وقت العصر وخرج عبد الله إلى المسجد ..
مرّ بالنخلة فإذا الرجل فوقها ..
فقال : السلام عليكم .. كيف الحال ..
قال : الحمد لله بخير ..
قال : بشر !! كيف الثمر هذه السنة ..
قال : الحمد لله ..
قال عبد الله : الله يوفقك ويرزقك .. ويوسع عليك .. ولا يحرمك أجر عملك وكدك لأولادك ..
ابتهج الرجل لهذا الدعاء .. فأمن على الدعاء وشكر ..
فقال عبد الله : لكن يبدو أنك لشدة انشغالك لم تنتبه إلى أذان العصر !! قد أذن العصر .. والإقامة قريبة .. فلعلك تنزل لترتاح وتدرك الصلاة .. وبعد الصلاة أكمل عملك .. الله يحفظ عليك صحتك ..
فقال الرجل : إن شاء الله .. إن شاء الله ..
وبدأ ينزل برفق .. ثم أقبل على عبد الله وصافحه بحرارة .. وقال : أشكرك على هذه الأخلاق الرائعة .. أما الذي مر بي الظهر فيا ليتني أراه لأعلمه من الحمار !!
جزاكى الله خيرا
تحياتى
فعلا تصرفك رائع يا حبيبه , هو مش سهل حد يتصرف التصرف ده ’ لكن ده هو الصح..
في ناس امخاخها في كعب جزمتها , قال ده دليل انهم بيحبوا دينهم , مع انهم كده بيقدموا اسوأ صوره للانسان المسلم اللي مفروض انه متسامح كما يوصيه دينه
بجد تصرفك عجبني لاقصي درجه
تحياتي
حبيبه
حمد الله على سلامتك
وعامله ايه فى الدراسه
موضوعك جميل
وكمان شخصيتك اجمل
انتى دبلوماسيه قوى
وسياسيه قوى
احنا كده هنخاف منك
بجد اسلوبك جميل فى المعامله
ياريت نقدر نحاول نعالج مشاكلنا كده
اجمل حاجة انك تقبلتيها وعرفتى تحوللى سلوكها السيئ لسلوك جيد ياريت تبقى وزيرة الاعلام
اهه يا بيبه دى بئه المفروض ثقفة التسامح اليى بنغرسها فى اولادنا ... الناس نسيت ان الرسول الكريم قبل السيده ماريا كهديه من المقوقس وهيا على غير دينه ودعوته يعنى وهيا مسيحيه لا وكمان قبل الهديه من المقوقس وهو مسيحى
........
اعتقد المفروض نقرا فى سيرة اشرف الخلق اكترمن كده ونتدبر فى ايات التسامح فى القران
.....
بس وحشتتتتتتتتتتتتتتتنى يا وحشه ..الا قوليلى انتى مسمعتيش عن اختراع الاوف لاين ماسيج قبل كده
بسال بس
وحشتتتتتتتتتتنى برضه ومش هجوزك ابنى وده قرار نهائى بعد مااخدت راى الجمهور
في أحد المرات كنت في مستشفى إسلامي وكان يجلس أمامي سيده نصرانيه وابنتها كبيره وابنها الصغير
المهم كان بجانبي واحده ست منقبه
راح قال لها " ماما ماما ، عو أهو" وفضل يضحك!!!
وبعدها بشويه أتت واحده منقبه اخرى انتظارا للكشف
فما كان الولد إلا أن صاح وقال " ألحقي يا ماما، عو تاني أهو"
.........
قصر الكلام
الاحتقان موجود بين الطرفين لا نستطيع ان ننكره
هم يسخرون نحن نسخر
ولا أعتقد ان هذا الأمر له حل !
قال احمدا
لن نأسر الناس الا باءخلاقنا
نسيج واحد موجود
حب ورحمه لسبب موجود
استوصوا بأهل الكتاب خيرا
ادب وخلق لخير نبى فى الوجود
ياسلام لو نعمل نوبة صحيان
ونصحى فينا حاجات وصفات
كنا ارتحنا من الراحة
صفاء وجمال ونهار بدون الوان
يا صاحب احمد
انظر لمصعب
كيف كان سفير من غير سفارة
يا صاحب احمد
انظر الى عثمان
كيف لا يضاريه ملاك فى الحياء
يا صاحب احمد
انظر للفاروق
اعطى للجميع كل الحقوق
يا صاحب احمد
انظر الى نفسك
واستعيد رونقها
فاءنت تنتسب لمن
الى احمدا والاسلام دينا
ورب رحيم جعلك شاهدا
على كل المخلوقينا
بحبة روح
بحبه التزام
بحبة تركيز
هاتكون فى وئام
وترفع دينك لفووق
وربك يجود عليك
يتمتعك برؤيته
وهو ده نهاية الكلام
احييك على الموقف الايجابى
الذى ينم عن ان المؤمن
كيس فطن
مش كيس قطن
سلامى مع احترامى
حمد لله على سلامتك يا حبيبة ويارب تكونى بالف خير وتكون الدراسة ماشية تمام ان شاء الله
شوفى يا قمر البوست معالجة حلوة اوى لفكرة التطرف الدينى والتعصب بالشكل اللى يشوه دينا وكمان عجبنى نصيحتك وطريقتك الحلوة فى الاقناع عارفة فيها سياسة كدا مش مباشرة كانها اوامر او حتى نصايح لا فيها حميمية و تلقائية
تحياتى
يويو
جزاك الله خيرا
تصرفك كان مؤثرا
أسأل الله أن يتقبل منك ويجعل مها في ميزان حسناتك بتعلمها هذا الأسلوب الطيب
الاحتقان فى التعامل بين المسلمين والمسيحين بدأ فى التزايد بشكل ملحوظ، نتمنى أن نتكاتف لإزالة هذا الاحتقان فيما بيننا.
برافو عليكي يحبيبه
للاسف انا بتعب جدا لما الاقي حد مختلف مع حد ناهيك عن اختلاف الدين ويكون دفاع كل طرف عن نفسه بكل عدوانيه وهجوم من باب الهجوم خير وسيله للدفاع .
فين رحمة الناس ببعضيها ، فين اخلاق رسولنا الكريم اللي كلنا بنتشدق بحبه بس من غير تطبيق هديه ، حب ايه اللي يكون بالطريقه ديه .
وبعدين المسيحي ده مهو انسان زينا زيو واخ وجار وفي كتير من الحالات بيكون قريب دم ، يبقى ازاي نضطهد اخواننا في الوطن الواحد ، بالطريقه ديه ينهدي اعدائنا رقابنا على طبق من ذهب
تحياتي
بسم الله
تصرفك جميل جدا ، وهو عين العقل
الرسول الكريم - صلى الله عليه وسلم - يقول
من آذى ذميا .. فقد آذاني
او كما قال عليه الصلاة والسلام
دمتم بخير
ماشاء الله
برافو عليكى يا حبيبه
قال تعالى
بسم الله الرحمن الرحيم
(فبما رحمه من الله لنت لهم ولو كنت فظاًغليظ القلب لانفضوا من حولك فاعف عنهم واستغفر لهم وشاورهم فى الامر فاذا عزمت فتوكل على الله ان الله يحب المتوكلين)
صدق الله العظيم
البوست حلو اوى
تسلم ايدك
تحياتى
احسنت عملا يا حبيبة
في ناس كثيرة بتفكر بالطريقة الي فكرت بيها البنوتة و بيتصرفوا زي تصرفها على اساس انهم كدة بينتصر لدينهم الاسلام و ما علموا انهم بالطريقة دي يسؤون له
طريقة نصحك للبنوتة كانت جميلة فعلا
ربنا يثبتك على الحق
بارك الله فيك حبوبتي
الاخت الغالية جدا
اللى مزعلانى منها اوى حبيبة
او طمنينى عليكى اتمنى تكونى بخير انشاء الله
ثانيا موضوع جميل جدا
والاجمل انك اتنقشتى فى ببساطة شديدة
بس فعلا كل انسان بيعصب لدينة
بس مها رغم سنها الصغنن عقلها كبير
يعنى ممكن لو حد فى مكانها فعلا
ما كنش اتناقش بالسهولة دى
بصراحة عجبنى اسلوب مهما معاكى جدا
حبيبة اتمنى تطمنينى عليكى
كل التقدير والاحترام
اسير الجراح
صعب اللي عملتيه مش أي حد يقدر يعمله لكنه جميل!
جزاكي الله عنه خيرا
كدت أقلق ان مفيش نهاية للتعليقات
ههههههههههههه ما شاء الله يعنى مش بنق
العنوان فعلا هايل ويمكن يكون هو اكتر شيء جزب الناس
اسمحيلى احييكى اولا علي العنوان وطريقة الجذب
وثانيا علي الموضوع نفسه وما يحتويه
قبل ما ادخل في تفاصيل الموضوع
احب اعرف فعلا دى فكره نفذتيها بالكتابه بس ولا حصلت فعلا
فهى لو كتابه هتكون أبداع بلا شك كعادتك
اما لو حصلت فعلا , تبقى جرأه جميله لشيء بجد كتير مننا لازم يفهموه
ان كل مسلم هو عنوان لدينه
لازم يراقب تصرفاته ويرشدها ويكون عنوان للخير والسماحه والأخلاق عنوان لدينه
خالص تحياتى لصديقتى المفكره المخضرمه
وصباحك سكر ويارب دايما تكونى أجمل شيء أصحى وأقابله
تصرفك حلو اوي
ساعات الناس مش بتبقي فاهمة
وبتتصرف غلط
وانا بحييك علي فكرك وتصرفك جدا
هو ده الصح من غير تشدد ولا تعصب
تحياتي
حبيبة الحبيبة
هو فيه سؤال محيرني من اول ما بدأت اكتب في المدونة
يعني ايه هيييه اول تعليق حقيقي مش فاهم
انا ممكن اشوف البوست يوم واتنين وما احطش تعليق الا لما يكون مزاجي صافي ويسمح لي بالرد ولو مش عاجبني مش هرد خالص
نيجي للبوست بتاعك
انا جيت اهو مفيش اي حاجة بسكوت حليب كيك اي حاجة فكي الكيس ربنا يكرمك
خلاص خلاص بلاش حاجة ساقعةاحناداخلين علي الشتا وسامع ان في مصر مطر ومظاهرات بتطالب اني امسك رئيس الجمهورية
ما علينا
هو بصي
التسامح مطلوب وما ينفعش نزرع البغض في نفوس اطفال هو فيه حاجات كتير داخلة في بعض مكلعكة الدنيا اقباط مهجر علي تبشير علي غرف بال تاك علي منتديات بتسب المسلمين
لكن برضه مش هنعمم الموضوع وفيهم ناس كتير جدا كويسة وناس مش كويسة زي اي مجتمع في الدنيا وربنا يهدي الجميع
احنا كمان عندنا شوية تعصب اعمي مش بيقدر يفرق
لكن الغالب دايما هو الصحيح في النهاية
طالما مفيش ضرر ليه احنا ندور علي الضرر
والأسلام معروف أنه دين السلام
يايلا يا حبيبة هيصي يا ستي 3 تعليقات من سيادتي في بوست واحد حاجة كده احسن من الشامبو اتنين في واحد
نبقي نتحاسب اخر السنة بقي
موضوع جميل للغاية ويدل على عقلية محترمة ومنظمة
وللاسف يا ريت كل واحد يشوف غلط يحاول يتدخل ويغيره
ولكن البعض يكتفى بمصمصة الشفاه فقط
وهنا يكون مكمن الخطر لان الداء يستفحل وينتشر
تحياتى
بصراحة اكتر حاجة ممكن تسبب الاذى لبلدنا التعصب من الطرفين
تحياتي
هيييييييه
التعليق الواحد و تلاتين
مش ممكن عالفرحه اللي انا فيها
اشمعنى يعني يفرحوا باول تعليق... انا بتاع الجديد
جدعه يا حبيبه... التصرف بالحكمه هو الاحسن..و عندك حق في خوفك محدش عارف رد الانسان اللي ادامه هيبقى ايه..
بس كويس انك عرضتي قضيه مهمه زي دي بالشكل السلس ده ولموقف شخصي كويس في حياتك
برافو
سلام و طمنينا عليكي
بوست جميل اوي ياحبيبة
وانتي فعلا قدرتي تتصرفي صح
لانها طفله لسه شخصيتها بتتكون ولو كبرت وهي فاهمة ان اللي بتعمله صح اكيد هتعمل اكتر من كدة
جزاكي الله كل خير
جزاكى الله خيرا على تعليم هذه الصغيرة
لديك حكمة كبيرة فى ذلك
ياريت الكبار كمان يتعلموا كده بدل من التشدد فى الدعوة الذى ينفر الناس
مرة تانية جزاكى الله خيرا
بجد احييكِ على تصرفك بايجابيه
و ياريت فعلا لو نقدر نغيير فى تفكير الجيل الناشئ و نعلمهم ازاى يتعملوا مع الاخر المختلف معه فى العقيده او الرأى ..اكيد حاجات كتير هاتتغير و هانقدر نعيش فى سلام
بوست جميل يابيبه و تصرفك اجمل
حبيبه ماما
هههههههههههه
ماما هنا هنا اهه ههههههههه
فرح بقي وحشتيني موووووووووووووت
ايه يا عم الجامد ده ايه المواضيع الجامده دي
والدماغ الي الله اكبر 555555555555
بجد شطورة يا بنوتي وما شاء الله يعني شخصيه قويه محببه بتناقش مش بتهاجم وساعدتيها بجد انها تفهم صح
بس تعرفي الله اكبر يعني ماماتك الي هي انا يعني مكنتش هعمل كدا
بس بنوتي ما شاء الله شجاعه سطوله يا نوني فتليني ادبلت مساسه
امواااااااااااااااااااة بوسه تبيله
سلام يا بنوتي
بوست رائع
وتصرف تستحقى عليه خالص التهنئة
اقولك على سر .. انا اعرف اصدقاء مسيحين وجيران غاية فى الذوق والاخلاص والادب ودخلت بيوتهم وعشت معهم افراحهم واحزانهم ومازلنا اصدقاء ..
فالدين لله والوطن للجميع.. ونحن لسنا على خلاف فلهم دينهم ولنا دين ..
ولن نعوم على عوم المتشددين الذين يريدونها خرابا علينا نحن المصريون
والسلام عليك ياابنتى الطيبة
والله تصرف البنت ده تصرف غريب قوي ولو دل علي شئ فإنما يدل علي أن أهلها بيعملوا كده وبينصحوها بكده وده طبعا تصرف مش سليم لأن دينا بيأمرنا بأن احنا نعمل اهل الدينات الأخرة بالحسنة
وبالنسبة لموقفك في التعامل مع الموقف فبجد الله ينور عليكي وصلت مفهوم للبنت بأسلوب كويس وبعتقد أنها عمرها ما حتنساه
تقبلي مروري
مجنووون
حبيبه
ازيك
موضوع جميل بجد وبيناقش قضيه مهمه
وكمان عرفتي تحتوي البنت الصغيره وتعرفيه بأسلوب جميل ان دين الاسلام هو دين الاخلاق الحميده
وكمان في حاجه انا عايز أقولها
ربنا قال في كتابه الكريم
بسم الله الرحمن الرحيم
ان الدين عند الله الاسلام
جميع الرسالات التي أنزلها الله تدعو الي الاسلام
وجميع الانبياء الذين أنزلهم الله يدعو الي الاسلام
حبيبه
بجد موضوع جميل
حياتي ليكي
ازيك يا بيبه
تعرفى اكتر حاجه عجبتنى ايه
انك مسكتيش وحاولتى تعرفيها الصح
وقدرتى تفنعيها
ربنا يبارك فيكى
ازيك يا حبيبة
بوست جميل
واحلى حاجة فيه ايجابيتك الرائعة
ربنا يحفظك
دمتي بخير
عجبني قوي حوارك معاها
على فكرة
حصل موقف بجد بجد خنقني بشكل مش ممكن
هحكيلك عليه مع اني من كتر ما أثر فيا كنت هنزله في بوست عندي
أخويا الكبير كان واخد بنته يوصلها البيت من المدرسة وكان بيوصل ولدين وبنت تانيه أولاد جيرانه معاه
منهم ولد مسيحي
اخويا بيحب الأطفال اوي وبيحب يرغي معاهم
وكان بيحكيلهم حكايه عن ولد كذاب ووحش
وفي آخر الحكايه قالهم ها يا ولاد
واحنا كده كلنا مش بنحب مين؟؟؟؟؟
على اساس ان الاولاد كلهم يردوا ويقولوا الكداب
وده فعلا كان ردهم كلهم
ماعدا الولد المسيحي
رد وبصوت عالي ومليان فخر على سؤال أخويا بكلمة واحده: المسلم
الغلطة مش غلطته
الغلطة غلطة اللي رباه اننا نحكم على الناس من خلال دينهم
وللأسف ده بيحصل مع كتير مسلمين مش بس مسيحيين
مش عارفه امتى الناس هتفهم بقى
ان الدين لله
:((
السلام عليكم
فعلا قصة معبرة عن التسامح الديني
لو اظهرنا تسامحنا مع غيرنا واظهرنا محاسن الاسلام في تعاملتنا كلها
اكيد حاجات كتير حتتغير
الله يا بيبه عليكي والله عثل
فكرتني في مره وانا قاعده انا وصحابي ولقينا بنوته كده لبسه مش لبسه كنت مكسوفلها وروحنا عليها بخفه دم وهزار وبزوق البنت اتكسفت جدا ومكنتش عارفه تقعد حبتين علي بعض وانا صعبت عليا ابتسمتلها عشان متتكسفش وروحت عليها بوستها وقلتلها انتي ماشاء الله عليكي زي القمر لازم تخبي نفسك وانتي حاجه غاليه اوي لازم متظهريش نفسك لان مش اي حد يستاهل انه يشوفك لانك غاليه اوي وجميله وبصراحه البنت كانت بتقول ياراض انشقي وابلعيني
في ناس بالاسلوب تتكسف وفي ناس تقول اييييه وانتي مالك كده يعني وربنا يجزينا خير ياقمر
بس لو كانت اتنفست معايا كنت عضتها من دماغها وخبطها في جمبها هههههه
تحياتي
سمكمك
الله عليكي
هوا دا التفكير المتفتح الواعي
تسلمي والله يا نور
عامله ايه صحيح اخبارك مع التعليم والحياة وكدا
تقبلي مروري
حبيبة
ليكى تاج عندى ياريت تقبليه وتجاوبى عليه
تحياتى
فى إنتظار إجاباتك
إرسال تعليق