الاثنين، أكتوبر 6

عدولة دخل سنة اولى


"عدولة دخل سنة اولى....يالا نغنى لعدولة".

جزء من أغنية قديمة من التراث المصرى أنا شخصيا بسمعه كتير لأن أى ولد صغير أو بنت عندنا بيدخل سنة اولى -ابتدائى يعنى- ماما بتقوله ليه. أى حد فينا عنده عدولة وداخل سنه أولى سوا كان عدولة ده ابنه ولا اخوة بيبقى فرحان بيه قوى مايعرفش ياعينى اللى مستنى عدولة لما يدخل سنه أولى ......... وهما بقى ياحول الله بيقولوا بسلامة نيه
" الدكتور عدولة راح .....الدكتور عدولة جه " ربنا أمر بالستر.
التعليم عندنا بيطلع اللى هيبقوا دكاترة -زى الدكتور عدولة كده- من ثانوية عامة مايعرفوش حاجة يعنى كل طالب مهما كان شاطر بيقى كل اللى يعرفه منهج سنته وخلاص وأول ما يخرج منها ؟؟؟؟ يامولاااااى كما خلقتنى !!!!! يمكن ايوة العيب فينا شوية كطلبة بس كمان طريقة التدريس و المناهج اللى بتحطهالنا وزارتنا المبجلة تجيب احباط يعنى .....اه والله. ده اللى خلانا أنا وزمايلى واحنا فى الجامعة وبيقولوا علينا بعد الشر مهندسين المستقبل وقال ايه..!!!! عمار مصر على أيادى جيلنا بنعانى من إننا بنخرج من سنة لسنة أعلى وإحنا محتاجين كل كلمة درسناها , ونكتشف إن احنا علشان نفهم اما الدكتور يشرح المنهج القديم تانى , او نرجع نتطفل على العيال اللى أصغر مننا ونحضر معاهم المحاضرات اللى احنا عايزينها .

*ليه ده بقى ....؟؟؟!!! ............. ليه؟؟؟

علشان مااتعودناش من الاول اننا ناخد طبيعة مناهج بتخاطب الفكر وبتقرب من طبيعة اللى بيدرسوا مش بتاعت كلمتين حفظ وتسميع فى الامتحان ...-وكان الله بالسر عليم- مناهج تعبانة وماشية على عصاية , وسياسة تعليم فى العناية المركزة ،،،،،،، ويا فرحتى
"شالوا سنه ساته .،، جابوا سنه ساته .،، عالم رايقة وفاضية " - كما قالت الحكيمة فرح -
وده علشان قال ايه ؟؟!! يكبروا دماغ العيال سنه ويدوهم فرصة أكبر للفهم .- أصل دى اللى هتعدل المايل !!!! - وآدى أخرتها عايزين الحاجة الوحيدة اللى كانت صح فى الثانوية العامة تبقى غلط وهى ان درجات الطالب كلها على الامتحان وكل واحد وشطارته دلوقتى بقى بقت روح الطلبة فى أيادى المدرسين.....

شفتوا الخيبة ؟؟؟؟؟!!!! ماعلينا ،،،

معتقدش ان فى حد فى مصر دلوقتى مايعرفش إن فى فجوة عندنا فى التعليم بين اللى عايزين نبنى بيه فكر أولادنا وشخصيتهم وبين اللى بندرسه ليهم - ده طبعا فى المراحل اللى قبل ثانوى - وبين اللى هياخدوة فى الجامعة واللى بيدرسوه فى ثانوى اما عن الداهية الكبيرة الا وهى الفجوة بين مناهج الجامعة واللى هيطلعوا الغلابة طلبة الجامعات يطلعوا يشتغلوا فيه فى السوق.

........ويا أسفاااااااااا على الدكتور عدولة ..........

والله من كتر ما أنا شايفة قدامى أزمة فى تعليمنا ..أنا حاسة إنى لما ابقى أم عدولة مش هبقى ادخلة سنه أولى ...........

"ويالا نغنى لعدولة ............-lol-"

هناك 95 تعليقًا:

blue-wave يقول...

اول تعليق بقى
بقالى كتيييير

blue-wave يقول...

ههههههههههههههههههههههه
والله معاكى حق يا بيبه
بقى فعلا عندنا ازمه مالهاش لازمه فى التعليم
ولا اللى بيعلم فاهم ولا اللى بيتعلم عايز يتعلم
المناهج كلها حشو وطريقة التعليم حفظ وصم وخلاص
وتقريبا على ماتبقى ام عدوله هايكونوا لغوا سنه اولى:))
تحياتى يا قمر

الميكروباص يقول...

هما بيقولوا ان الطفل المصري ازكي اطفال العالم
بس اعتقد انه مش بيكمل على كده لأنه بيدخل المدرسه ويشوف الكوارث اللي في المناهج
عندك مثلا- العيال دلوقت بتتفرج على سوبر مان وسبايدر مان وافلام الاكشن الهندي
الواديدخل المدرسه يلائي اسد مرسوم في الكتاب وبيكلم القطه والقطه بترد عليه والدبه بتسمع وبتضحك
حاجات فضايح

romansy يقول...

حبيبيه
انتى غنيتى معانا لعدوله ولا لا
بجد بوست دمه خفيف فيه نقض اه
بس تحفه
بس ياريت بقى المسئولين يعملوا حاجه
اى حاجه
حتى لو يلغوا التعليم
ههههههههههه

الفارس الملثم يقول...

هو مين اصلا عدوله ده هههههههههه

عارفه يا حبيبه احنا نظام التعليم عندنا بيتبعوا فيه نظام فيران التجارب , طبعا احنا الفيران دول ممممممممممم

انا كنت تاني دفعه اتبقي عليها عملية دمج خامسه وسته , احنا طبعا مكناش فهمين ايه العبقريه اللي لسعت في دماغ وزير التعليم وقتها عشان بتخذ القرار ده بس كنا مبسوطين اوي عشان انختصر سنه

وبرده كنت الدفعه التانيه اللي اطبق عليها نظام التحسين , يبدو اني كنت من الموعدين انهم يجربوا فيهم

من الاخر يا حبيبه نظام التعليم عندنا علي طريقة سمك لبن تمر هندي , والطلبه بتطلع منه وهم ناسيين اللي تعلموه , وعلي راي الاغنيه هي دي مصر يا عزيزه , الحاجه الوحيده اللي بتفرق طالب الجامعه عن اللي طلع سباك وريح دماغه ان معاه شهاده يتعامل معاملة المتعلمين عشان لما يتلسع في دماغه ويتقدم لواحده وتقوله شهادتك ايه , اهي بتنفع برده هههههههه

كل سنه وانتي طيبه وعقبالك لما تدخلي المدرسه زي عدوله

سلامممممممممممممم

prince4ever يقول...

بوست ظي العسل يا حبيبه و كمان فيه فكرة
اساسا التعليم بايظ بايظ فمعدش فارقه
لا اللي في مدرسه مرتاح ولا الجامعه فيها انفتاح و عمر الهم ما يوم ينزاح
كنت مبسوط جدا باللقاء بتاع امبارح بس للاسف مقدرتش اتعرف على حد اصلي انا في التجمعات ببقى انطوائي وكئيب و مكسوف وصوتي واطي وحالتي بتبقى كرب فإن شاء الله تتعوض في مرات تانيه
تحياتي يا حبيبه

SHAPE YOUR LIFE (ABOALI) يقول...

اه ده عدولة ده هايشوف ايام
ياااااااااااااا ه
اه يا عدولة اه
كان بدرى عليك يا حبيبى بدرى
بدرى بدرى بدرى وليه يا عدوله بتجرى
تعليم ولا معلمين اه يا عدولة يا ابنى
اليك يا ابنى النصائح العشر ما قبل المدرسة

1- انت غبى ومخك تخين ومحتاج درس وتموين
2- خليك بلطجى علشان تكون محترم وامين
3- موسك فى بقك ومطوتك فى جيبك
4- دوس على الكل محدش ليه عندك حاجة
5- ارسم على الحيطة وتطلع مواهبك
6- مافيش كتاب ولا كراريس كفايه نوته
7- المدرس اللى يقدرك بس يكون صاحبك
8- خلى على لسانك دايما تعرفوا انا ابن مين
9- خليك راجل وفى بقك سيجارة الرجوله
10- العلم فى الراس مش على السبورة

والله يا حبيبة مش عارف اعلق على بوستك من اى زوايه
بس انا كان ليا بوست قديم سأضعه
يمكن يفيد كان تحت عنوان التربيه والتعليم وكتبت فيه الاتى

عندما تردد السناتنا كلمة التربيه و التعليم هل هناك مسا فات بينهما هل هناك تربيه ثم ياءتى التعليم ام العكس
المتابع الاءن يجد مسااااااااااافات بين التربيه والتعليم
ان التفوق الذى حدث فى الماضى حينما تفوق العرب وشهد لهم الجميع بالتفوق المبهر هو انهم ادركوا انه لاتوجد مسافات بين التربيه و التعليم بل
هما مثل النقطه التى نضعها بسن القلم على صفحات الورق ليس لها ابعاد ولا نشعر ابدا بوجود المسافات ولما ايقنوا هذا بفكرهم المتطور عرفو ا ان عوامل النجاح
وضوح الهدف
صدق الاهتمام
سلامه القلب
ادراك النجاح ليس صعبا
الصعب هو الا نبدء وضع نقط بدون ابعاد لنعرف حقيقة ما نردده


تحياتى

prince4ever يقول...

زي مش ظي عشان متقوليش الواد ده متخلف ولا ايه
اه بالمناسبه انا اللي كان مميزني اللحيه لو مكنتيش عرفتيني
سلام

حبيبة الروح يقول...

هههههههههههههه
عدوله ماشي يا بيبه كدا بهدلتي عدوله معاكي ومع التعليم طيب انا كمان لما اجيب باذن الله عدوله مش هدخله سنه اولي
هي نقاصه تخلف يا حبيبتي الاطفال يا بنتي بقو مش بيفهمو حاجه من المناهج عندي عينه بوته الصغير
بعيد عنك الدنيا كلها علي ايامنا كانت بتحب الحساب علي ايامهم مش فهمين رقم واحد حتي وطبعا لو مش فهمتي الماده الي بتحتاج الي فهم مش هتفهمي باقي المواد
فا ما شاء الله بياخد هو وزميله درس في كله
اما بقي بالنسبه لمنهج الجامعه فده بجد لا تعليق
لانه ولا بيتفهم ولا هيتفهم ادينا نجحنا اهه والحمد لله وبتقدير جيد جدا كمان بس قوليلي ايه الدائن والمدين انسي ولا كلمه
لانه حشو وخلاص مسافه ما نخلص بح ضاع
ده العادي
بوست يجنن يا بيبه عجبني الاسلوب ده اوي
بس ملكيش دعوه عدوله بدل ما اضيبك
ههههههههههههههههههه

مي

نـــــور يقول...

blue-wave
============
رب صدفه ياعمرو:)

والله ياعمرو الحال سئ بجد ربنا يلطف
وتحياتى بيك

كـــيــــــــارا يقول...

هههههههههههههههههه

ايه ياام عدوله مش هتدخلي عدوله سنه اولي


لالالالالالا بجد التعليم فعلا مش بيخاطب اي عقل اراهن ان الطلبه بتخرج من الامتحان مش فاكره حرف من المنهج

بيتحفظ وقتي عشان الامتحان

وكان الله بالسر عليم

نـــــور يقول...

لورنس العرب
============
ياميت اهلا بيك يالورنس واله وحشتنى تعليقاتك :)

فضايح؟
!!!!!!!!!!
واى فضايح
وبعدين كانوا بيقولوا ف الاحصائيه انه بيبقى اذكى طفل فى العالم قبل مايدخل المدرسه :(
نورتنى

نـــــور يقول...

romansy
=========
لا ياخويا مالحقتش اغنيله انا لسه صغيره :)
وياريت والله يااحمد يلغوه وتبقى كملت ههههههههه
نورتنى

نـــــور يقول...

الفارس الملثم
==============
ومين عزيزه دى كمان؟؟؟ ههههههههههه
والله عندك حق يامحمد
بس بلاش سمك لبن تمر هندى دى علشان مش بحب الفيلم ده:)
نورتنى يامحمد
بس عل فكره
انا خلاص قربت اخلص جامعه :)

نـــــور يقول...

prince4ever
=============
الله يخليك يارامى
انا سالت عليك على فكره قبل ماتيجى
وعلى فكره انا عرفتك وانت بتعرف نفسك من اسم بلوجك
يعنى مش مستنيه تعرفنى بيك باللحيه هههههههه

بس بجد مكنتش فاكراك كده انا افتكرتك هتبقى لمض وواكل الجو لقيت واحد قاعد هادى واكت قلت لاااااااااا مين د مش ممكن ده رامى؟؟؟؟
المهم اا كمان اتبسطت بشوفتكواوان شاء الله تتكرر بس ماتكونش انت زى المرادى:)
نورتنى

mahasen saber يقول...

مهو ده الى بتكلم فيه ان التعليم فى مصر مات بموت على مبارك وانى هقدم لطلب هجره لكينيا اعلم ابنى هناك ولاا انتى ايه رايك بأسسهولك اهه ...
بس ادعى معايا يطلع شاطر فى لعب الكوره اسمع امين وكله يرفع ايده
....

mahasen saber يقول...

انتى بقه رحتىفين يعنى انا يطلع عينى فى الكونفرس وتبوضيهولى انتى وعلاء
احنا كده نزعل من بعض يا هندسه
بس احناحطينا احتمالات ان الماسينجر عندك يكون اتعدا من الماسينجر اليى عندى او النت عندك يكونفصل او تكونى زهقتى....
لو الماسينجر سمحلنا ااقابلك بكره هههههههه نورنينى يا صاحبة الاسم اليى على مسمى يا اجمل حبايب الدنيا...

وميض ابتسامة يقول...

ابنتى الحبيبة والله انا شايف ان لا عدولة ولا غيره ح ينفع معاه التعليم فى بلادنا..ولاول مرة تفتحى موضوع اساسا بيسبب لى حساسية.. لانى مؤمن تماما ان مفيش عندنا تعليم من اساسه فى مصر....

واولادنا دول فعلا انصاف بل اربعاع متعلمين ..اما عن السادة المعلمين فحدث ولا حرج.. والله حرام عليهم اللى بيعملوه فى اولادنا والوزارة مساعداهم على كدة...

ومش الاولاد بس اللى رقابهم فى ايد المدرسين بل واولياء الامور كذلك
ياشيخة دى حاجة تغم وتحزن ..حسبنا الله ونعم الوكيل فى كل من لايراعى ضميره فى البلد دى

وخصوصا فيما يتعلق بأولادنا والاجيال القادمة.. والكلام فى الموضوع ده كتير جدا .. وكفاية كدة!!

مخنوق كيك يقول...

ربنا يسترها معاكي وان شاء الله يطلع انسان ناجح

مش هتيجي علي التعليم يعني !! كل حاجة بايظة .. حاولي تطلعيه افضل الموجودين في السوق حاليا َ . خليه انسان عنده مبادئ وايمان واخلاق وان شاء الله ربنا هيوفقه ويوفقك ويوفقنا كلنا كلنا كلنا

تقبلي تحياتي

☼♫♪ عمــاد الدين يــوسف ☼♫♪ يقول...

طبعا الي ميشوفش من الغربال يبقى ايه ؟
واعتقد اننا كلنا مش عميان وشايفين المأساه الي جيل بحالو غارق فيها من اخمصيه حتى ودانو
بجد انا بحزن لما بشوف طفل اجنبي ممكن يعمل برنامج كمبيوتر في حين ان طفل مصري في عمره بيكتب اسمو غلط ولا حول ولا قوة إلا بالله
مفيش غير ربنا نشكيلو همنا يرفع البلاء عننا
تحياتي

سمكه واحده يقول...

سلام عليكم يا حبيبه هو عندك حق اهم حاجه التعليم لو عاوزه تعرفي اي بلد متقدمه او متأخره تشوفي التعليم
واحنا بلدنا ايه؟

طبعا زي الفل وتحيا جمهوريه مصر العربيه
كل دلوقت يابنتي بيطلع مش فاهم حاجه في اي حاجه
ربنا يرحمنا ومصر ينصلح حالها في كل حاجه مش التعليم بس
تحياتي
سمكه

Butterfly يقول...

هههههههههههههههههههههههه
جيتى على الجرح :(
بجد دى اكتر حاجه مجتاجه تتظبط فى البلد عشان دى اللى هتبنى المستقبل للجيل اللى جاى .

تحياتى

Mina يقول...

يعني ايه تعليم دي
الكلمة دي مش غريبة عليا بيتهيألي قريتها مرة في قاموس انجليزي عربي كانت معني لكلمة كدة بالانجليزي مش فاكرها
معقولة هم عملوا عندنا حاجة شبهها؟
ممكن برضو الدنيا بتطور مين عارف
تحياتي ياحبيبة

momken يقول...

ياستى الف مبروك لعدوله
احنا كمان هنبصله فى السبوبه الى هياكل منها عيش؟

على رائى المثل سنه اولى فى ايد المصرين عجبه


بالنسبه لسياسه التعليم فى مصر
انا شايف والله اعلم انهم ممكن يمسكوا مانويل جوزيه وزاره التربيه والتعليم
وبما ان الراجل نجح النجاح الباهر ده مع النادى الاهلى يبقى ليه لاء

انا كمان بقترح يكون فى وزراء محترفين نجيبهم من بره
مين قال ان النادى الاهلى اهم من الدوله
لدرجه ان الاهلى يجيب مدرب من بره والدول تستعين بوزراء محلين

احنا نجيب وزراء من اليابان وياخدوا الى ياخدوة معتقدش انهم هياخدوا اد الى بيتسرق فى عهد الوزراء المحلين

وربنا يوفقك يا عدوله
وينجحك فى سنه اولى

تحياتى

كوارث يقول...

ازيك يا حبيبة ؟
متزعليش على الدكتور عدولة
الدكتور عدولة دلوقتي بيكبر وبيفهم بسرعه .. ولو مكانش فاهم الدراسة فهوا فهم الواقع ..
احتمال جيل الدكتور عدولة يطلع مين اللى يكسر القيود ده
ولا اللي يحقق نهضة زي ماليزيا ولا ولا ..
الدكتور عدولة سواء اشتغل دكتور او جزار فرزقه على ربنا .. احنا ما نسيلش هم ده بس نطالب بحقنا احنا وحق عدولة حتى لو مجاش ادينا عملنا اللي علينا
" وما من دابة في الارض إلا على الله رزقها "

kochia يقول...

عزيزتي
ده طبعا موضوع مهم جدا
التعليم بتاعنا اللي مالوش دعوة باي حاجة خارج جدران المدرسة
وكل ما يهمه الولد يحفظ ثم يحفظ ثم يحفظ

بس لو كنا واقعيين هنعرف ان ده مش مشكلة تعليم ولا دكاترة في جامعات ولا مدرسين .. دي مشكلة دولة كاملة
عالم تالت
وزي ما نكون مبسوطين بكدة مش عاوزين نطلع درجة لفوق
ولو حد اتجرا واخترع ولا ابتكر ولا جدد حتي ورقة يبقي السحل والمقصلة هو مصيره
بلدنا كلها احزاب

حزب اعداء النجاح
حزب من فات قديمه تاه
حزب البلدي يوكل
حزب من خرج من داره
حزب الكبير كبير والصغير منعرفوش

بصي لكل حاجة في البلد
بصي لسياسة تعامل مع ازمات
بصي لاي مشكلة من اي نوع بتواجهنا
هتلاقي اننا بنلبس العمامة والطربوش ونتصرف زي الجدود من مئات السنين ..
كلنا في سنة اولي مش عدولة بس
وميزة عدولة انه هيروح سنة تانية حتي لو مش فاهم حاجة

بس احنا كلنا هنفضل في سنة اولي كتير
وارجو لا يكون ذلك للابد

فيه كلام تاني كتير بس كفاية كدة

تحياتي

أسير الجراح يقول...

حبيبة


ليكى تاج عندى


اتمنى زيارتك


قبل ابتعادى عن المدونة



كل الود



اسير الجراح

فارس بلا جواد يقول...

"عدولة دخل سنة اولى"؟؟؟؟؟ هي حصلت؟
واضح ان اللينك اللي بعتهولك ليه تأثير جامد ههههههههههههههههه
ندخل في الجد بقي
منظومة التعليم طبعا زي ما انتي عارفه بايظة من زمان .. يمكن احيانا بسبب نظام الامتحانات اللي بيعتمد علي الحفظ والدش .. يعني اللي حافظ بيجيب درجات اكتر من اللي فاهم
انا معاكي في جزئية ان الواحد مرت عليه حاجات زمان ماكنش فاهمها ولما كبر بقي يتمني انه يرجع تاني يسمعها من الاول لان طريقة تفكيره وقراءته للكلام اتغيرت وبقي عنده نضج
انا شايف ان التعليم الحقيقي بيعتمد علي الثقافة الشخصية للفرد و المعلومات اللي بيكتسبها بعد دراسته الاكاديمية

تحياتي

موناليزا يقول...

عدولة غلبااااااان
واهله كمان غلابة اوى من اللى مستنيهم بدخول المحروس سنة اولى
ربنا يكون فى عونهم

Unknown يقول...

التعليم فى بلدنا محتاج الى وقفة اعادة هيكلة وتنظيم ومحاولة لفهم الغرض منه
وللاسف لا حياة لمن تنادى
موضوع حلو
تحياتى

Resala يقول...

تسلم ايدك يا حبيبه عالبوست الجامد ده
رغم انه نقد للوضع فعلا
الا انه دمه خفيف جدا جدا
وده مش غريب عليكى يا بيبه(جامد اوى الدلع ده)
وبجد فعلا التعليم عندنا محتاج تطوير كبير عشان الناس هنا دماغها تنور شويه
بس هنعمل ايه
بقالنا سنين بنتكلم ولا الهوا
تقبلى مرورى
جيمى

prince4ever يقول...

باركيلي...عرفت اعمل قايمة للمدونات اللي بحبها...محسوبك جاااااهل جدا في الحاجات دي...لازم تعرفي انك اول مدونه حطيت اللينك بتاعها عندي...اه والله...
معلش والله عالسكوت اللي كنت فيه بس بجد بجد دي شخصيتي لايف...انا فعلا بكسف جدا في التجمعات ودي مشكلة مش عارف احلها....ربنا يسهل و ان شاء الله يتكرر اللقاء تاني وتالت و عاشر
سلاااااااام

كلام حسام يقول...

عدولة
شفتي ازاي يا حبيبة الدنيا بتتغير
علي ايامي مكانش فيه عدولة
كنا فترتين الصبح والضهر
وكنا بنخرج في اول بتدائي نقول يا بتوع الضهر يا حرامية ياللي سرقتوا الطعمية

ojg يقول...

بحس كده يا أختي انهم بيجربوا فينا
مرة تصيب بقي وألف تخيب
ياللا هما فراق معاهم ايه
:)))

Unknown يقول...

مدونتك جميلة جداً
وبوستات اجمل
سعدت بلقاؤك فى الملتقى
إسلام ديو

الازهرى يقول...

صديقتى العزيزة

اولا انا اول مرة اسمع الغنية دى

ثانيا انا معك فيما تقولين وارى انه لن ينصلح شىء ما لم ينصلح التعليم اولا لانه الدعامة الاساسية لكل شىء

تحياتى على الموضوع الجميل

yoyo يقول...

هههههههههه والله بوست زى العسل يا بيبة برغم ما به من مآسى بس هنعمل ايه بقى هى مشكلة وقائمة ومستمرة بينا كمان

عارفة العيب فين العيب فى النظام على راى الاخ برايز ههههههههه

حتى لو فى ناس بتراعى ضميرها وتتعب ناس وتحاول توصل المعلومة بشكل صحيح ازاى ممكن عقل طفل يستوعب كم هائل من المعلومات بالشكل الرهيب اللى موجود فى المناهج دى ويقولوا ليا تطوير تطوير ايه بس

الاصلاح يكون من تعليم الصغار والا احنا كدا عملين بنى على القش بدون اى اساس

صحيح هى أغنية الاخ عدولة دى من امته ولا الواحد مش منا هنا ولا ايه

تحياتى للاسلوبك الساخر والرائع

يويو

نـــــور يقول...

ABOALI
========
الجزء الاول من تعليقك فظيع ويموت من الضحك حقيقى زى التسميه بتاعتى
هم مايتلم
فكرنى باللمبى

والجزء التانى زاويه تانيه لا تقل اميه عن الى اتكلمت انا فيها
بحييك عليها يابو على
والوصايا العشر بنا يستر على اولادنا منهم يارب :)
منورنى دايما

شهد الكلمات يقول...

ماما كانت برده بتغي الاغنية دي يا بيبو واضح ان دفعة المهماهات دي كان الكاتلوج بتاعها فيه عدولة ههههههههههه

ليكي تاج عندي يا بيبو تعالي خديه من حكاوي القهاوي

تحياتي

نـــــور يقول...

مدينه الملائكه
=============
معلش يامى سامحينى يااختشى غلطه مش مطبعيه وانتى عارفه انها مقصوده :)

الا قوليلى انتى هتجيبى عدوله ازاى ها؟-وش بيغمز-

ده انتى شكلك محروقه اوى من الحكايه دى وكنتى مستنيه حد يفتحها قدامك :)

هقولك ايه ربنا يلطف:)
منورانى يابيبتى

نـــــور يقول...

كيارا
======

انتى يابت بتتريق عليا؟؟؟؟؟؟
شورتك مش ولابد

استنى بس عليا
وبعديين انتى عازه تجيبلى تهمه انا لسه يابت مش بقيت ام عدول اخص عليكى وعليكى اخس:)

كلام جميل بس ايه العمل ؟؟؟؟
منورنى ياعثل

تسنيم محمود حسين يقول...

السلام عليكم

والله لقد أوجعتى بكلماتك قلبى ...فعلا الزمن ده معدش فيه تعليم الطالب يدخل أولى ابتدائى ذكى جداا...وكل ما يطلع من سنه ع التانيه معدل ذكائه بيقل ...طب وده ليه!!!!!!!
لأن طريقة التعليم بقت بتعتمد كل الإعتماد على الحفظ والصم وعدم الفهم ...قولولى بقى تعليم زى ده هيطلع اذكيه ازاى؟..هيطلع حد ينفع البلد ازاى؟

والسلام عليكم

Wish I were a Butterfly ... يقول...

سلام عليكم

عارفة إنك مش هتصدقي بس هقول برده و أمري لله... يمكن تقدري تصدقيني
من إمبارح و أنا بفكر فيكي و كنت ناوية النهاردة أول ماأدخل أون لاين أكتبلك تعليق
مش كنت قرأت خالص الموضوع بس شفت العنوان من الريدر بتاع مدونات تانية

و كنت عايزة أقوللك إن "ميمو خلاص.. :( دخلت بيبي كلاس"!! دي بنت أختي يعني. أصلي زعلانة أوي من ساعة ماهي دخلت و نفسي أقول لها بدري عليكي بدري :)
هقرأ البوست في وقت تاني لأن حاليا مش ينفع أفضل كتير خالص.مش عارفة بجد هتصدقيني و لا لأ بس فعلا أنا مش من الناس اللي لقيت عندي تعليق فبروح أكتب تعليق رد عليه وخلاص على كدة. كنت هعملها النهاردة حتى لو مش جيتي :)
و كنت عايزة أقوللك كمان.. ذوقك كان جميل أويييي في اختيار أغنية فيروز على البلوج
بعشقها :)
تحياتي

مـجـنـووون يقول...

ههههههههههههههههه

والله هم يبيكي وهم يضحك

أخر الكلام نظام التعليم في مصر فاشل بكل المقايس ، بيخرج ناس بتحفظ مش بتفهم

ودلوقتي التعليم مصالح يعني الي بيدخل كلية طب علشان الفلوس وإلي بيدخل هندسه علشان الفلوس مش علشان يفيد البلد ويعمل مشروعات أو يطور في مجاله ويبدع ودا طبعا أكبر خطر علي نهضة الأمم

والله يكون في عون أولاياء الأمور

تقبلي مروري
مجنووون

mohamed ghalia يقول...

هو من إمتى وفى تعليم فى مصر
شكلنا هنغنى كتير لعدوله
تقبلى تحياتى وإعجابى بالإسلوب
كل سنة وحضرتك بخير

عالم حبيب يقول...

ربنا يكون في عون عدولة .. مظلوم عدولة في مجتمعنا ده

بالمناسبة .. من شوية بس كنت بأسمع في بي بي سي جايبين ال 200 جامعة الأولى في العالم .. قعدت أسمع وقلت أكيد جامعة الكاهرة ولا عين سمش ولا جامعة حلوات هاتيجي دلوقتي ضمن ال 200 ولو حتى 267 : ) بس للأسف ال 200 جامعة الأولى في العالم ليس بينهم جامعة عربية

سؤال محيرني : ليه اللي بيدخل ثانوية عامة القسم الأدبي .. بيدرس رياضة 1 اجباري مع ان ميوله أدبية وما بيطيقش الرياضة .. حد عنده اجابة !!

قلب ينبض لله يقول...

لا اللي يقرا البوست من اوله يفتكرك هاتتكلمي عن أغاني الأطفال وزكريات زمان أتاريكي بتتكلمي عن حال التعليم في البلد زي ما أنتي مسمياه كدا هم مايتلم
تصدئي فكرتيني بالذي مضي وبدكاترتنا المبجلين وبدماغنا العالية أوي وبهندستنا اللي مالهاش نظيير


يلا شدي حيلك واستحملي العجن اللي انتي فيه علشان تتخرجي وزي ما أتفئنا عاوزين تقدير محترم يانور

سلام ياحبيبي

Bob يقول...

من الاخر انتى بتقولى كلام منطقى مية فى المية
بس
انتى قوليلى نعمل اية
لازم نسايسهم وخلاص
سلاااااام
بهاء

نـــــور يقول...

mahasen saber
===============
اهلااااااااااااااا ازيك ياحبيبى
تقوليلى بتأسسيلى الواد وعايزاه يلعب كوره ويسيب المذاكره ؟ وما اللى بيشبطوا فى الكوره بيفلحوا لا سمح الله؟ ايوة ايوة بوظيلى الواد ياحماتى ولن انسى لك هذا الموقف :)

وثانيا عيب تقولى زت منك دى بجد وادينى شرحتلك اللى حصل وكله تمام ياعيونى
منورانى دايما ياحماتى
وتحياتى تحياتى
ياسلام عاالقوافى :))

prince4ever يقول...

عرفت انك موجوده فقلت امسي
هههههههههه
والله يا حبيبه الخط لما بيكبر شكل البلوج بيبقى وحش بجد..بس انا معاكي انه الواحد عينيه بتتعبه فعلا لما بيقرا عالخط ده..بس ربنا يسهل ان شاء الله واكبره...و متشكرين جدا على عرضك في انك تساعديني في التنسيق..بس هو التنسيق مش عاجبك؟!!.... والله لو مش عاجبك اولع فيه خالص ...يا خبر انتي بتتكلمي ازاي..
اي خدمه
سلااام

prince4ever يقول...

حبيبه
طلب صغير بس
ادخلي على المدونه دي و اقري الواد ده كاتب ايه.. الواد ده صاحبي الانتيم اسمه راجي ..جه الاجتماع هو و معايا في الدفعه...اقري اخر بوست و منه تقدري تعرفي الطب بيعمل ايه في البشر... والله الواد كان زي الفل ..حسرة قلب امه على شبابه اللي راح...
اللينك اهو
http://shahraiar.blogspot.com/
سلاااام تاني

نـــــور يقول...

وميض ابتسامة
===============
اهلا بوالدى العزيز
يانهار ابيض هو حضرتك زى ماتكون ماصدقت حد يكلمك فى الموضوع ده كده ليه؟ وكفايه ليه ماتكمل براحتك والله البلوج بلوجك وحضرتك عارف انك ليك فيها اكتر ماليا انا شخصيا :)
معلش ياوالدى ربنا يبعتلنا اللى يعدلوا المايل
نورتنى ومنورنى دايما

نـــــور يقول...

مخنوق كيك
==========
ربنا يكرمك عالدعوه يارب
وعلى رايك جت على ده؟
بس ياخوفى من الاحباط ياخوفى:(

ربنا يوفقنا واياكم يارب
نورتنى

نـــــور يقول...

☼♫♪ عمــاد الدين يــوسف ☼♫♪
============================
ايوة يبقى اعمى ياعماد
شفت انا عارفه ازاى؟ :)
اه والنبى ماتفكرنيش بالعيال العباقر الاجانب دول اصل بتحسر علينا وعل اولادنا
على رايك لا حول ولا قوة الا بالله
منورنى ياعماد

نـــــور يقول...

سمكه وحده
==========
وتحياتى ليكى كمان ياسمكه واسعدتنى اول زياره بس هو كفايه يعنى الدعاء؟


ربنا يكرمك
اتمنى زيارتك تانى
تحياتى

نـــــور يقول...

Butterfly
===========
امر الله والله يافراشه
ويبقى ايه بعد العلم بقى؟!!!!!

ربنا يتولانا ويهدى القائمين علينا
نورتنى

نـــــور يقول...

Manamino
==========
اه بيتهيالى كده برضه
بس مش متأكده
منورنى جدا
ويارب دايما

نـــــور يقول...

momken
=========
ياخبر ممكن للمر التانيه على التوازى :)
يالهوى ايه الشرف ده!!!!!!!

ههههههههه ياعينى ياممكن شكلك كده هيست من كتر ماجرح الموضوع عميييق
شكلك اتأزيت اوى
ياحول الله
معلش ياممكن بكره يتصلح حالنا احنا وعدوله :)
منورنى وربنا جدا

نـــــور يقول...

كوارث
=======
اهلا اهلا
ازيك ياطارق انا تمام والحمد لله
بس يابنى انت بتتكلم كده ليه؟
انت حسستنى ان الواد بيجرى على امه واخواته السبعه بعد مامات ابوه هههههههههه لا هو حالته مش متهوره كده هو هيبقى عنده فقر فى دماغه مش فى جببه :)

منورنى ياطارق

نـــــور يقول...

kochia
========
وليه كفايه كده؟
كملى عادى والله البلوج بلوجك :)
واله ياكوشيا هقولك انا سمعت مره حاجه ذهلتنى بمعنى الكلمه
مدرس الرياضه بتاعى فى ثانوى قالى اللى بيغير ان شاء الله عنوان فى كتاب الوزاره اقل حاجه بياخدها عشر تلاف جنيه
قلت ياحلااااوه والله وظيفه كويسه
قال اه دلوقت كل واحد بيسعى لغلطه فى المنهج ويشرك اى جزء ويعدل فيه علشان يقبض يعنى المناج بقت سوق سودا مش مستقبل اولاد شفتى الخيبه؟

يلا حسبنا الله
تحياتى

نـــــور يقول...

أسير الجراح
=========
تسلم يااحمد يارب
ربنا يرجعك بالسلامه وتتم العمليه عل خير
تحياتى

نـــــور يقول...

فارس بلا جواد
=============
اسكت والنبى يااحمد ده انا لحد دلوقت خايفه افتح اللينك ههههههههههه

والنبى بقى ماتقول فىالفهم ده
انا افتكر انى لحد ماوصلت تانيه ثانوى كنت افضل جيلى فى المعلومات العامه والثقافه وكنت بطلع المسابقات اخد المركز الاول بجداره تعالى شوف دلوقت والله ميح عالاخر ولا حتى اعرف ايه بيحصل فى الدنيا ياراجل بلا خيبه
شى لله ياثانويه ياعامه ولا ياتعلبم اصلا
منورنى سيبك انت:)

نـــــور يقول...

موناليزا
===========
يبقوا يقابلونى لو نابهم حاجه من سى عدوله :)
نورتين فى اول زياراتك وان شاالله مش الاخيره

نـــــور يقول...

نهر الحب
=======
تسلمى
ولا حياة لمن تنادى فعلا
بس هل ده معناه اننا بلاش ننادى احسن؟
نورتينى

نـــــور يقول...

Gemy
=====
اهلا اهلا بخفه الدم كلها
ازيك ياجيمى وازى العيال وامهم ههههههه
عادى اوى ماكل الناس بتقولى يابيبه هى جت عليك يعنى؟:)
مش عارفه امتى هننادى ويبقى فى الهوا والله ياجيمى ربنا يكرمنا بهوا سريع :)
تحياتى

Beram ElMasry يقول...

الاخوة الاعزاء
السلام عليكم ورحمة الله
بناء على رغبة الكثير من الاصدقاء المدونين ، وفى مقدمتهم الاخ الدكتور توكل مسعود ، فى تغير اصم مدونتى من ( المدهول ) الى اسم اخر يليق بمحتوى المدونة ، وانطلاقا من طبيعتة الغيورة على اصدقائه ، ومن الاسماء المعروضة ( كرباج سودانى ) وقد وقع عليه اختياؤى ، وصار هذا اسم المدونة الجديد
لااختلاف فىالمحتوى ولا تغير فى موعد كل جديد وهو يوم الثلاثاء
لكم كل الحب والاحترام

نـــــور يقول...

prince4ever
============
الف مبروك للمره التانيه يابرنس
بس هو انا استاهل ان اللينك بتاع يتضاف اول واحد ؟ !!!!!!!!!
ربنا يكرمك يارامى يارب وان شالله تسلم ياخويا
عقبل ماتكمل بقيه اكسسوار المدونه
تحياتى جدا

نـــــور يقول...

كلام حسام
=========
هههههههههههه يخرب بيت عقلك ياحسام
تعليقك فطسنى من الضحك بجد
اصل كت بجد بسمع عيال يقولوا كده بس بصراحع عمرى ماقلتها تنكه من يومى ههههههههه

وبعدين هو ده اللى ربنا قدرك عليه؟
مش تساعد عدوله بكلمتين؟ !!!
منورن ياحسام اوى وماتغيبش عليا كده

نـــــور يقول...

ojg
=====
ماهى المشكل ياوزة انها مش روشته دكتور وياصابت ياخابت دى دماغ بشر مستقبل البلد فى ايديها
منورانى جدا ويارب دايما

نـــــور يقول...

اصحى يا مصر : اسلام ديو
=======================
يادى النور يادى النور
ازيك يااسلام
وانا كنت اسعد
تحيات ليك جدا ومستقبل هايل لبلوجك ان شاء الله
تحياتى

نـــــور يقول...

الازهرى
========
وتحياتى ليك كمان جدا
لكن الاغنيه دى من التراث يعنى جيلنا مش يعرفها اوى الناس الكبيره يعرفوها اوى انا لولا ماما مكنتش عرفتها برضه :)

دمت بكل خير

نـــــور يقول...

yoyo
======
ازيك يا يويو
واحشانى يابنوته

كلامك صح وزياده للمآسى وحياتك

اغنيه الاخ عدوله من التراث المصرى القديم يعنى ايام امى وامك مش انا وانتى :)

منورانى دايما

نـــــور يقول...

شهد الكلمات
============
ياسلام ياهاجر الله يكرمك جيتى شاهد عدل علشان تثبتيلهم انى مش بألف ههههههههه اصل مفيش حد مصدق ان فى اغينه اسمها كده :)

ميرسى اوى عالتاج ياقمرى
وربنا يكرمك بتدبيسات دائمه بإذن الله

تحياتى

نـــــور يقول...

تسنيم حسين
============
وعليكم السلام ورحمه الله وبركاته

اهلا ياتسنيم بزيارتك الاولى
لا ماهو مش بيطلع ماتحمليش هم خالص

انتى يعنى شايفه العباقره مقطعين البلد؟!!!!!!!
نورتنيى ويارب دايما

نـــــور يقول...

Wish I were a Butterfly
========================
ازيك ياهبه
خلينى اقولك الاول تعليقك فرحنى جدا لانك بتقولى انى على بالك من امبارح ودى لوحدها كفايه اوى
وثانيا ليه بتفرضى سوء النيه انى مش هصدقك والل مصدقاكى جدا لسبب بسيط انك مش مضطره تكدبى اصلا

وثالثا ربنا يهديلك النت بتاعك علشان اشوفك دايما
ورابعا ولا عزاء لمراره ايمو اللى تتفقع من بدرى طبعا بعد الشر عليها
ربنا يوفقها وتبقى اشطر من عدوله:)

نورتينى اوى ياهبه ويارب دايما

نـــــور يقول...

مـجـنـووون
===========
اه تصدق بجد الفلوس بقت بتحكم التعليم بجد مابقاش فى حاجه اسمها هدف وطموح علمى لكن هدف وطموح مالى :(

يااسفا بجد
منورنى جدا واضحك عالهم ولا تبكيش

نـــــور يقول...

البرنامج الأذاعى انت تسال والكمبيوتر يجيب
=======================
شكرا على الدعوه ياافندم
نورتووونى

نـــــور يقول...

mohamed ghalia
================
هما كانوا بيقولوا زمان بس جبر
نورتنى جدا
وكل سنه وحضرتك طيب

نـــــور يقول...

عالم حبيب
==========
ازيك ياحبيب والف حمد الله على سلامتك
انت جاى تقولى الاحصائيه دى ياحبيب علشان تعقدنى زياده؟

بخصوص الرياضه اللى بتقول عليها دى انا هسألك سؤال احسن لو عرفت تجاوبن عليه هجاوبك على ده

تقدر تقولى ليه الجيولوجيا بيدرسها طلبه ادبى فى ثانوي عام ويتعقدوا منها وبتوع علمى مش مقرره عليهم ولما يجى طالب شعبة رياضه2 فى ثانوى يدخل كليه علوم ماتبقاش متاح عليه قسم الجيولوجيا فى حين انه متاح لشعبة العلوم ؟؟؟؟!!!!!!!!!!!

طب هو اولى ولا ادبى؟؟؟؟
جاوبنى وهجاوبك
وبكده انا هربت من السؤال هيييييييييييييييه
هههههههههههه
نورتنى ياحبيب وماتسالش كتير

نـــــور يقول...

قلب ينبض لله
============
يلا اى خدمه مش حارماكى من حاجه اهه ياقمر :)

حاضر يارودى ادعيل انتى بس ربنا يكرمنى ويهدى الدكاتره انتى عارفه صحبتك بقى :)

نـــــور يقول...

Bob
====
اااااه من السلبيه الجبريه يابهاء
ربنا يتوب علينا بقى
سلااااام

نـــــور يقول...

prince4ever
=============
ههههههههههه والله ؟
ماشى ياسى رامى
ادينى رديت عندك ومش هرد هنا تانى غلاسه بقى:)
تسلم يارب بكلمتين البكش بتوعك دول
وماتنساش تنصح صاحبك والنبى ماتسيبوش يغرق كده :))
سلااااااااااااام

نـــــور يقول...

Beram ElMasry
===============
علم استاذ بيرم
مبروك الاسم الجديد
نورتنى جدا

Mohamed Dawod يقول...

سلام عليكم يا حبيبه ازيك....معلش بقى بقالى كتير متشرفتش بالتعليق عندك.
انا بس عاوز اقول حاجه عن موضوع البوست....التعليم الحديث فى الدنيا كلها دلوقتى بيعتمد على نقطه واحده اساسيه . ازاى تدور على المعلومه اللى انت عاوزها وتجيبها بشكل سليم وتحل بيها مشاكلك. الناس كلها اقتنعت ان التعليم مش ممكن حيقدم كل المعلومات المطلوبه مثلا علشان تبقى مهندس كويس او دكتور شاطر. التعليم فى الجامعات بيقدم اساسيات اساسيات المهنه. اللى بيحصل بعد كده ان المهندس او الدكتور بيتعرض فى شغله لمشاكل وبيبدا يبحث عن حلول ليها.....مع الاسف تعليمنا لغاية دلوقتى بعيد قووووى عن الموضوع ده. والطلبه بيتخيلوا انهم المفروض يحفظوا كل كلمه بياخدوها فى الكتب علشان لما يخلصوا دراسه ميفتحوش الكتب تانى. طبعا دماغ غلط والنتيجه عايشه معانا......خالص تحياتى ليكى وشكرا

Maha Shahen يقول...

يخليكى لينا يا أم عدوله يا رب هههههههههههههههههه انا لو من عدوله هتبرى منك كرهتينا في التعليم يا بنتى ما احنا عارفين الكوارث دى

التعليم فى بلادنا شر لابد منه

التعليم فاشل جدا وزي ما ناقشت جزء منه المدونه حنين وبتتكلم عن تعليم باطل وانت بتشركيها في نفس الفكره لكن بأسلوب مناقشه مختلف طبعا ومميز
واتكلمتى عن اوجه اخرى للتعليم الفاشل

لكن تعددت الاساليب والتعليم لسه فاشل هههههههههه اه والله هم يضحك وهم يبكى

هم يضحك لما تلاقى سنه المفروض يكون في طلاب هيدخلوا مرحلة الاعداديه والفصول فاضيه لان اللي كانوا في سنه اولى اعدادى طلعوا تانيه واللى كانوا في خمسه طلعوا سنه سته
هموت واعرف السنه دي لسه فاضيه لحد دلوقتى ولا عملوا فيها ايه ولا سقطوا ناس علشان يملوا المرحله اللي وقعت منهم دي والله يبقى تشريد عالى لو اللي حضروا السنه دي اللي جلت منهم وعادوا السنه تانى هههههههههههه
مش كفايا الفشل الذريع كمان تشريد يا ربى
والكارثه اللي انفرجت ولسه هتنفجر حشو دماغ الطلبه بالكلام واحفظ يا عدوله لما تنسى أسمك واسم اللي جابوك وتفتكر مين موحد القطرين
والاجمل بقى لما تيجى كارثه اخرى ان في مناهج بتتكتب فيها غلطات والتلاميذ تحفظ
يا رب ميجيش علينا يوم ونلاقى ان موحد القطرين صلاح الدين الأيوبى ههههههههههههههه

هنقول ايه ولا ايه خليها في القلب تدبح ولا تخرج بره تفضح هههههههههههههههه
تقمصتى شخصية ام عدوله وانا قلبت معايا خالتى فوزيه ما بلاش تحطينى في مناقشات حاميه كدا علشان خالتى فوزيه متطلعش

بعتذر انى اتاخرت في الرد لما بقيت الحد المليون اللهم لا حسد انا عينى مش بترشق يعنى هههههههههههه
لكن دايما بقول انى اجى متأخره احسن من انى مجيش خالص
وبرضوا حقك عليا يا بيبا ومليون بوسه منى ليكى علي الموضوع والمناقشه الجميله دى
دومتى مش الجبنه لا انتى دومتى موفقه

غير معرف يقول...

ههههههههههههههههههه
والله انتي زي العسل
:)
بقولك ايه
سيبيكي من ازمة التعليم وتعالي معايا نغني لعدوله
:D :D

saragebaly يقول...

حبيبة

اول زيارة لي لمدونتك ارجو ان اكون ضيفة خفيفة عليكي وعلى مدونتك الجميلة

موضوعك يا حبيبة غاااااية في الأهمية
الطالب يفضل يدرس ويحشي دماغه ولا هو فاهم حاجة في اي حاجة
بس انا دايما بعذر الطالب لان الافاضل القائمين على وضع نظم التعليم بيعتبرو ان الطالب عبارة عن جهاز كمبيوتر لوضع المعلومات

الطالب بيذاكر من غير ما يفهم ايه اللي بيذاكره وبما انه مش فاهم فبيلجأ للحفظ والدش وبرضو مش فاهم

للاسف اسلوب التعليم غلط في غلط
تخيلي ان الطالب من ابتدائي للثانوي بيدرس انجليزي ويطلع من الثانوي مش بيعرف يتكلم جملتين انجليزي على بعض ؟؟!!

ولحد ما الطالب يدخل للجامعة وهو برضو مش فاهم حاجة

اصلا في كليات بتدرس حاجات ملغية

زي فيه كلية الحقوق بيدرسوا فيها قوانين اتلغت بقالها كام سنة والقوانين الجديدة كأنها في التراوة

الدكتور يشرح ويقول للطلبة هو القانون دة اتلغي وفيه مكانه قانون كذا ومخالفته عقوبتها كذا بس انتو ذاكروا القانون اللي في الكتاب علشان هو اللي هيجي في الامتحان !!!!!
يعني الطالب لما يتخرج مفروض يروح يدور على القوانين الجديدة اللي حلت محل القديمة بدل ما يدور على شغل وازاي هيكمل حياته !!!!

كذلك كلية الطب الاساليب الحديثة في الكشف عن العلاج مش بتدرس والقديم هو اللي شغال

هنقول ايه ولا ايه ولا ايييييه؟؟

ولا هنتكلم عن قتل المواهب
المدرس او المدرسة لما تكتشف موهبة في الطالب ولا هما هنا ولا كمان بيحثوا الاهل ليتهموا بيها وينموها

بس مهما اتكلمنا وعلينا صوتنا للاسف محدش بيسمع

المهم بقى دلوقتي ان عدولة يطلع من سنة اولى

الله اعلم عدولة بتاعنا هيكون ايامه اييييييييييه ؟؟؟!!

انا اسفة على الاطالة والرغي الكتير دة
اصل بصراحة الموضوع دة مضايقني وما بصدق حد ينكش فيه علشان اطلع اللي جوايه

دمتي بكل الخير

سارة

*الطالبة عفو الله *زوزو يقول...

قريت البوست من زمان و كنت فاكرة اني ريت عليه بس اكتشف خبتي المهمببة اننا مردتش
ربنا يكون في عون عدولة
هو التعليم يعني فاشل فاشل
بس مش لازم تحبط عدولة دة لسة في سنة اولى
الله المستعان
بارك الله فيك حبيبتي

عالم حبيب يقول...

:)


طيب

صم بكم عمي

أنا اصلا دخت من سؤالك

شعارنا

بلاش تسأل علشان ما تتعبش

نـــــور يقول...

Mohamed Dawod
==============
ازيك يابشمهندس وعليكم السلام ورحمه الله وبركاته

طبعا ولا يهمك المهم انك رجعت تنور البلوج تانى بالسلامه:)

وبخصوص ردك عالموضوع انا متفق مع حرتك جدا بس عايزة اقولك ان المشى على نظام تعليم اميريكان بيبق غريب فى بلدنا ومش سهل التعايش والاتأفلم معاه بدليل ان القسم بتاعنا لسه جديد واللايحه بتاعته لسه جديد وبيطبقوا فيها النظام ده وتاعبنا لاقصى درجه التعليم كل دور الدكاتره فيه داتا شو وكلمتين والسلام وانتوا ادخلوا هاتوا المقررات من النت وذاكروها وكل حاجه على دماغنا من اول المنهج لحد المشاريع والفهم والحل
لما الناس بتعرف كده بستغرب بس الدكاتره بيقولولنا هدفهم يعلمونا ازاى نعرف نوصل لمشكله وندور على حلا بنفسنا ود ينفعنا قدام:)

تحياتى جدا يابشمهندس
وربنا يرجعك لبلوجك بالسلامه:)

نـــــور يقول...

nour shahen
=============
ازيك ياخالتى فوزيه ههههههههههه
ومليون بوسه ليكى انتى كمان
وعيد على كلامك اقول ايه ماهو هم يهأهأ وهم يهئهئ يعنى هم يضحك وهم يبكى هههههههههههه

معنديش رد والله يانور
منورانى دايما
ودومتى اللى هى الجبنه موفقه :)

نـــــور يقول...

hager za3bal
==============
والله انتى اللى عثل هههههههههه
ويالا نغنى لعدوله:)
منورنى ياقمر

نـــــور يقول...

saragebaly
===========
اهلا اهلا بيكى ياساره
طبعا ضيف خفيف جدا جدا وتعال انتى بس عل كل موضوع اعملى التحليل ده وملكيش دعوه على قلبى زى العسل
والله انت لفتى نظرى لحكايه القديم دى لانى مكنتش واخد بال منها وطبعا مصيبه جدبده بتقول ان الدكاتره بتدور على نجاح وسقوط للناس وخلاص ومش مهم الشهاده اتاخدت على اساس ايه؟
حاجه تحزن

نورتينى جدا
وتحياتى جدا لرأيك

نـــــور يقول...

الطالبة عفو الله
===============
ولا يهمك يازيزى ياجميله
اهو كويس علشان ترجعى تانى ليا برضه :)

ربنا يتوب علينا بقى منه
تحياتى ليكي ياقمر
منوران دايما

نـــــور يقول...

عالم حبيب
==========

:))
انا مت من الضحك على تعليقك
سلامتك من الدوخ ياحبيب واهو علشان تتعلم مش تسألنى فى حاجه تانى :)

وماتنساش
شعارنا
"بلاش تسأل علشان ما تتعبش"

تحيااااااااااااانى ومنورنى دايما