كتير بتحصل حاجات فى حياتى بتزعلنى
حساسيتى الزيادة بتكبر الصغيرة فى عنيا واقل حاجه ممكن تخلينى متنكدة وزعلانه وقرفانه ومش طايقة حد
ولما يجى حد يقولى ماتزعليش على حاجه
اقوله انا مؤمنة وراضيه وعندى قناعة ان اللى ربنا بيعمله خير حتى لو ضد ارادتى واللى بيضيع منى مش خير حتى لو انا عايزاه ونفسى فيه
وفعلا والله ببقى راضيه وقانعة يعنى مش كلام ومش فض مجالس
وكتير القناعة دى بتخلى مفيش حاجه غالية عليا ومش بزعل من ولا على حاجه
لكن غصب عنى بلاقينى اوقات زعلانة ومخنوقه
والدنيا بمعنى الكلمة سودا فى وشى وملهاش لا لون ولا طعم ولا ريحة
او ليها بس كلهم وحشين
واستغرب نفسى ازاى ابقى مؤمنة بقضاء الله وقدره
ودايما راضيه بربنا وعن اللى بيحصل فى حياتى حتى لو حاجه وحشه
وبرضو يجيلى وقت وازعل
رغم حالة الرضا الشديده اللى جوايا بربنا دى
؟؟؟!!!!!!
من شويه بشوف جيفت عالفيس بوك لقيتها من صديق وبتقول كيف تحزن والله ربك والاسلام دينك؟؟
حسيت انى مكسوفة من نفسى اوى وعايزة اعتذر لربنا انى زعلانة من حاجه
احساس الرضا بجد احساس جميل
زمان سمعت حديث شريف بيقول فيما معناه ان اللى يصحى الصبح يقول "رضيت بالله ربا وبالاسلام دينا وبمحمد صلى الله عليه وسلم نبيا ورسولا" ويقولها فى المسا كمان وجب على الله ان يرضيه فى ذلك اليوم
ولانى بحب الاستغفار واالاذكار بقيت اقولها
مره انسى ومره لا ...يوم انسى ويوم لا
لحد ماخلاص بقت عادة برددها كل اليوم الصبح والمغرب 3مرات وكمان مع سماع كل اذان مره
وشويه بشويه لما بدأت مش انساهم احس بقيمتهم الحقيقه
احساس الرضا
اجمل احاسيس الكون
والله ياربنا راضية
راضيه بيك وعنك وراضيه بكل حاجه فى دنيتى
بس يارب محتاجالك
زيل مقتك وغضبك عنى ورضنى بقضائك يارب
هناك 34 تعليقًا:
حبيبة اللبيبة
تتخيلي اني اول حد
هعلق تاني
بصي يا حبيبة
كلامك طيب اوي
و مش هنكر ان الرضا شىءرائع و هو سر السعادة في الحيا
بس احيانا كده بيكون الابتلاء فوق طاقتنا
فبنرضا و لكن بنكون تعبانين
و التعب ده هو البلاء
و هو اللى المفروض نصطبر عليه
انتي طبعا عارفه ان الشوكة يشاكها العبد المسلم بتحط عنه خطيئة و ترفعه درجة
الاهم نشوف الاتبلاء ده ليه اسباب ف ايدنا نقدر نسعى لعلاجها
اصل اي مشكلة و ليها اسباب
اما اسباب خارجة عن ارادتنا
او اسباب في ايدنا حلها
استعيني بالله
و الصلاه
حضري نفسك عشان بعد ساعة كمان على الساعة 1 او اتنين كده هيكون الناس ناموا و العالم فضي عليكي وتبقي انتي وربنا بس تناجيه
تقفي علي المصلية وتصلي بسور كبيرة
وتدعي ربنا
تدعيه بشده
تبكي اوي
اوي
و تشكي همك ليه وانتي علي يقين انه هيرضيكي
ربنا هيرضيكي
بس خليكي حريصة علي ارضاءه
ارضيه فيرضيكي
ربنا يسعدك يا حبيبة يا صغننة
من قال ان السعادة في الرضا لم يخطيء
لكننا لم نصل لدرجة الايمان القويه التي تجعلنا نشعر بالرضا بنسبة 100%
ممكن يكون 50% - وممكن يكون 70%
لكن الوصول لنسبة 100% من أن ترضى محتاج شغل كتير - ديني وغير ديني
الموضوع نفسي بالدرجه الأولى
والنفس تحتاج لإستقرار
وبدون استقرار سيزيد الشعور بالخنقه والسواد بالحياه - طبعا انا فاهم ان ده مش بيكون طول النهار والليل لكنها حالات بتعدي علينا احيانا
والاستقرار انواع - فيه استقرار مادي واستقرار في العمل واستقرار في الزواج وغيره
كل ده بيؤثر
لازم نرضى
واللي ميرضاش ينقي أكبر حيطه ويخبط فيها دماغه
اللي ميرضاش يشوفله أرض تانيه وملك تاني
اللي ميرضاش اسر نفسه انه يبقى عبد لاحزانه
صباحك سكر يا نور
اخبارك ايه ؟!
يارب تكونى بالف خير يارب
بصراحة الرضا دا احساس جميل اوى
لما تحسى انك راضية عن نفسك وعن كل تصرفاتك و قتها هتحسى انك راضية عن نفسك وعن حياتك و عن الدنيا كلها
لو الانسان جواه ايمان و ثقة انه دا قدره و نصيبه ولازم يكون من جواه راضى ومتسامح وقتها هيحس براحة لان ربنا عمره ما بيخلق عبد و ينساه ابدا ودايما ماضاقت الا لما فرجت
بس احنا نقول الحمد لله و نشكر ربنا فى السراء و الضراء
وقت الضيق و الشدة بشتكى و نقول ليه انا يارب وهو انا عملت ايه
الحمد لله على نعمة الرضا
الحمد لله على نعمة الاسلام
ربنا يعفو عنا يارب و يجعلنا من الراضين الشاكرين اللهم امين يارب العالمين
ربنا يجازيكى خير على البوست الجميل دا يارب
تحياتى
يويو
كلنا كده على فكره!!!
رضيت بالله ربا وبالاسلام دينا وبمحمد صلى الله عليه وسلم نبيا ورسولا
سبحان الله الى يدخل المدونة بيحس براحة بكدة
و رضيت بالله ربنا و الاسلام دينا و محمد صلى الله علية و سلم رسولا
علا الرضا حلو اوى بس انا معاكي و حاس بالى بتحسية لانى زيك بكون راضي و بقول الحمد لله
بس ساعات بضعف و اخنق و اتضايق اوى و مش عارف لي
بس نقول الحمد لله
تحياتي
اللهمك ارزقنا الرضا
اللهم ارزقنا رضاك والجنة
الحمدلله على كل حال
اللهم لك الحمد حتى ترضى ولك الحمد إذا رضيت ولك الحمد بعد الرضى
بوست جميل وكلامك بيوصف حال معظمنا مش انتي بس
تحياتي
رادار
طبعا كيف تحزني والله ربك والاسلام دينك .. اي حاجه في حياتنا وحشه بتكون بلاء من ربنا وربنا بس عايز يختبرنا عشان يشوف هنصبر عالبلاء ده ولا لا ..
ربنا يلهمك الصبر يا حبيبه ..
واوعي تتخلي عن الرضا .. الرضا هو مفتاح السسعاده ..
وحشاااااني
:)
اللهم ارحم محمد الفارس الملثم واسكنه الفردوس
بجد كلامك رائع
القضاء واقع واقع لكن الفرق ان اللى هيرضى هياخد ثواب واللى هيسخط السخط عليه
اللهم رضنا وارضى عنا
السلام عليكم
جزاكِ الله خيرا على الكلمات الرقراقه
يسعدنا زيارتكم
عني والرضا
يعني الرضا والنور
والصبايا الحور
واللي مش عارف ايه يدوووور
وممكن تبقي التوحيد والنور
واهو تخفيضات هايله
وكل سنه وانتو طيبين
الرضا مش عند كل الناس ..عشان كدا
لما نرضى لازم نحمدربنا على النعمه الجميله دى
عااااوووو
مش انتي لوحدك يانور اللي عندها حساسية زايدة
بس انتي من الناس القليلين اللي قابلتهم وشوفت في عنيهم رضا وحب وخير ماشفتوش في عيون تانية
ان شاء الله يانور ربنا هاينولك اللي في بالك ويحققلك كل اللي بتحلمي بيه
صدئيني :)
تعرفي انك عن الحاله اللي انا عايشاها حاليا
اقولك ليه بيحصل ده؟ عشان احنا بشر و ده طبيعي
عــــــــدنــــــــا
اختي الغاليه : بيبه ، ليكي واحشه واعذري انقطاعي القهري _ حلوه القهري ديه مهو انا قاهري هق هق هق _
اما بعد ، اكيد طبعاً القناعة كنز لا ينفنى بس برضو احنا بشر وما البشر إلا مشاعر واحاسيس وشوية حجات فوق بعض يعني من المنطقي اننا نزعل على فقد الشئ بسبب طبيعة الانسان اللي ربنا خلقه عليها ( حب التملك ) حتى لو كان في اقل الحدود .
علشان كده ربنا بيكافئ الصابر المحتسب بس المكافأه ديه امتى ؟ اول لما يسمع خبر فقد الشئ او بمعنى ادق اول دقائق الكرب
وهنا طبعا الإيمان بقضاء الله والرضا عليهم العامل الكبير ..
يارب يديم علينا الرضا والقناعه
اللهم ارحمه واغفر له ,,
أما هذا الذي تشعرين به فقد يكون من الإبتلاء , فالله يحب أن يبتلي المؤمنين لينظر من يصدقه .
نقطة أخرى , الدعاء يكون بالقلب لا باللسان , فإننا كثيرا ما نظم أن مجرد قول الدعاء أو الذكر الذي ثبت فضله لإننا بذلك حصلنا الأثر , وننسى أن للقلب دور في تحصيل أثر الدعاء , وينبغي في الدعاء أن يكون خالصا لوجه الله أولا أي لا يكون ذكرنا سعيا لتحصيل الأثر قبل التعبد لله , لذا قالوا " اعبد الله على مراده منك , لا على مرادك منه "
هداك الله والمسلمين
اذيك ياسكره
من اجمل نعم ربنا علينا في الحياه هي نعمه الرضا وده بيبقي رزق ربنا بيرزقه للناس الطيبه الكويسه بنت الحلال واخده بالك؟
يعني بجد دي نعمه كبيره اوي يمكن من اهم النعم
لان الانسان لما بيرضي بحاله او باي ابتلاء اصابه او اي شئ في الحياه ويرضي بيعيش مرتاح البال
ودي فيها كلام كتييييييير جدا لو قعدنا هنا هنكلم للصبح
وفعلا اوقات كتير كلنا بنشعر بنفس اللي بتشعري بيه ده غصب عن الانسان لان مهما كان احنا مش ملايكه
بس هو الواحد يقول ايه
اللهم ارزقني نعمه الرضا
وديما تدعي بيها
ربنا يرضي عنك يابيبه ياختي يارب
سلام بقي
السلام عليكم
اولا
الرضا دا شيىء جميل مش علشان احنا بنقول كده لا علشان دا كلام دينا الكريم
ثانيا:احنا بشر وسعات يعنى بتهون علينا انفسنا ويضحك الشيطن علينا لاننا مش ملايكه
منكرش انى بقول واه يعنى الغيب احسن بس سعات بقول ياريت
بس بجد من جياتى وتجاربى ربنا مش بيجيب اى حاجه وحشه على الرغم اننا فى هذا الوقت نحس انها شيىء مفجع دمر حياتنا
بس لو بصينا للموقف من بعيد وصبرنا ورضينا هانلاقى الخير كله وساعتها هانقول
سبحان الله والحمد لله
كفايه وقول سلام
السلام عليكم
عشان اول مرة ادخل كدونتك يبقي
هايكون تعليقي خفيف
يلا مدونتك جميله بجد
سلام
الجزااااااار عودة اللقب للاسم
FATHY
قال أبن القيم : الرضا باب الله الأعظم ومستراح العابدين ، وجنة الدنيا ، من لم يدخله في الدنيا لم يتذوقه في الآخرة
يارب يرزقنا رضاه
حبيبة قلبى وحشانى جدا والله
بجد اسف عل التقصير
بس بجد البوست قلقنى عليكىوصدقينى مهما حصل وطلو منتى راضية بالطريقة اللى انتى قلتى عليها فى البوست ان شاء الله ربنا هتلاقى جنبك دلوقتى اصلا
طمننيى عليكى حبيبتى
تحياتى
مفيش نور للحظات ليه؟؟
اخبارك ايه يا خطيبة ابنى
كويسه
طمنينى عليكى
انا قريت فى الاول وما حبيتش اعلق الا لما اشوف الناس هتقول ايه بس بصى يا حبيبة احنا بشر وطبيعى زى ما بنفرح اوى نزعل و نضايق اوى برضه بس فى كل الاحوال لازم نحمد ربنا على كل حاجة وندعى ربنا انه يزيل الهم والغم عننا . ربنا يزيل عنك كل الهموم والضيق يا رب
لسه النور قاطع . . .
نووووووووووور اللي واحشاني موت و اللي مشفتش منها سؤال من تلات سنين و لا حتى عملت ايه ف امتحاناتك و لا النظري كان جاي صعب و زي الزفت و لا ايه النظام و هتنجح و لا ايه...مفيش سؤال خالص كده
طيب :(
انا قلت اطلع اجدع منك و اجي اسلم و اسأل و اشوف ايه حكاية الpause ده
اخبارك ايه يا عسل و يا رب تكوني تمام
دعوااااااااااااااااااتك بجد
سلام يا جميل
ألم يقل المولى عز وجل
وعسى أن تكرهو شيئاً وهو خير لكم
وعسى أن تحبوا شيئاً وهو شر لكم
صدق الله العظيم
ولو علمنا الغيب لاخترنا الواقع
فالموضوع بالطبع كله إيماني بكل ما قد كتبه الله لنا وعلينا
تحياتي
حسن أرابيسك
بس انتي كده اتاخرتي اوي يا نور ..
يارب تكوني بخير
إرسال تعليق