"اللهم لا تؤاخذنا بما فعل السفهاء منا"
الدعاء اللى نصحنى بيه استاذى فى الكورس لما قلتله ان واحده اتهمتنى انى معقده ومتخلفه لما مارضيتش ارمى علبة الكانز الفاضيه من شباك العربيه بعد ماخلصتها وحطيتها فى شنطتى فى انتظار باسكيت
الدعاء ده بقى الاكثر ترديدا على لسانى فى الفترة الاخيره بسبب مواقف كتير ومشاهد وروايات بشوفها وبسمعها
منها الحديث عن الجنس والمشاهد الفاضحة وفضائح المشاهير والاحاديث الرخيصه اللى بقت بتلاحقنى كل مااقعد على النت او اسمع برنامج تليفزيونى او اشوف مسلسل او فيلم
ومنها رد لصحفية ومذيعه مشهوره لما سألوها عن رأيها لو بنتها قالتلها انها عايزة تغلط مع حبيبها
وكانت الاجابه "هقولها استنى سنه لما تتأكدى انك بتحبيه وبعدين اعملى اللى انتى عايزاه"
ومنها رد لمخرجه غير محترمة لما سألوها عن ارتداء الحجاب فكانت الاجابةدعاء "ربنا مايكتبه عليها" وكأنه اذى
ولما سألوها لو عرفتى من بنتك انها شاذه جنسيا هتعملى ايه كان ردها "هى عايشه بره والعالم بره اكثر تفتحا وتحضرا وهى حرة تعمل اللى هى عايزاه"
ومنها رد فنانه مشهوره على سؤال "هل ممكن تكملى قصه حب من غير جواز" والرد الصريح والواضح دون اى تجميل"أيوه"
ومنها اعلان رجل بأنه يمتلك تيس بيجيب لبن بيشفى من الامراض المستعصيه وبيحول الفقراء الى اغنياء
ومنها مجاهرة شاعر مرموق ومشهور وله شعبيته بأنه اختلس اموال واعتراف بتعاطى الحشيش
ومنها شكوى توصل للشرطه من بنت عمرها 20سنه بأن ابوها بيتعدى عليها جنسيا بقاله5سنين لدرجة انها خلفت منه ومات المولود ويعجز الكلام عن التعبير
ومنها تخفى رجل غير محترم فى زى منتقبه لقتل دكتوره فى اوضه الكشف فى عيادتها
!!!!!!!!!!!!!!!!!!!!!!!!!!!!
قد يكون رد البعض عليا انه مش دول اللى ممكن الواحد يدور على تصرفاتهم ويقيمها بالصح والغلط لانهم غالبا أو دايما بيكونوا غلط
لكن المشكله مش فى انى بعتبرهم قدوه ومثل اعلى وانهم مش لازم يغلطوا
بالعكس انا بقول ان خرج العيب من اهل العيب مايبقاش عيب
انا بس كل اللى مزعلنى حاجه واحده بس
انهم وللاسف الشديد كلهم ينتموا للاسلام حتى ولو بشهادات ميلادهم جعلها الله شهادات وفاة عما قريب
بمعنى انى مش زعلانه عليهم لان ان شاء الله حسابهم عند ربهم وقادر يخلص فتنتهم لشباب المسلمين
انما بس كل ضيقى انهم وللاسف مثل سئ وربما يأخذ البعض من اعداء الاسلام الاسلام بذنبهم ووقتها هما هيسيئوا للاسلام
فى حين ان اللى عايشين زى الحيوانات فى امريكا لما راح طفل عمره 6سنوات يزور المتحف الوطنى للسكك الحديديه واتقدم بطلب انه عايز يمسك منصب ادارى لبوا رغبته ومسك منصب مدير المرح
!!!!!
كل اللى بسأله ومحتاجه اجابه عليه هو سؤال واحد
ليه الناس دى عايشه فى ظلمات ومع كده بيستخدموا ديننا واخلاقنا وتحضر اسلامنا احسن مننا
واحنا يامعتنقى الاسلام للاسف بنمثل عبء على الاسلام ووصمات عار عليه؟
هناك 43 تعليقًا:
حبيبتشى يا ختشى
لحقتى تكتبى عن ابلتنا
اللى هتقول لبنتها استنى سنه
واللى غايظنى انها هتقول لابنها شوف اهل البنت اللى ماشى معاها قبل ما تغلط معاها
لو كانت بنت ناس محترمين وملتزمين دينيا بلاش عشان بدال الغلط بتاعكم ده ما هياخدكم لطريق كويس هياخدكم لطريق وجع الضمير والخوف والذنب ههههههههههههه
يا حبيبتى
انتى بتتكلمى عن حاجه مفروغ منها المجتمع بقا اللى بيعدوا فيه للفضيله
العريانين
اتعرى وقولى مش عايزه تحرش
اجهلى بالدين وبحريته وقولى عايزين علمانيه
ما هى دى العلمانيه
ما هم دول لو عليهم رقابه لو حتى ذاتيه ما كانوش وصلوا للقذاره اللى هما فيها
مفيش وعى دينى
اذا كان شيخ الازهر احل كشف الشعر عشان يرضى فرنسا
يبقى الجهله بالدين مش هيفتوا بكل القاذورات اللى بتكنها صدورهم
احنا عايزين
هداه للأمه هما اللى يمسكوا الاعلام المصرى
مش اقذر خلق ربنا
ربنا يعافينا ويرحم شبابنا من امثال هؤلاء الشواذ عقليا
وارحمى نفسك يا بنتى متعمليش زيي
اعصابك يا اوختشى
بجد بجد انا اعصابى شايطه اكتر منك ربنا يعافينا
لا حول ولا قوة إلا بالله أشياء تقشعر منها الأبدان
...........مشكورة أختي على هذا الطرح.....
حاجات غريبة فعلا
بس مقلتيش الاسامي ليه بتاعة الناس اللي قالوا كدة ؟
بس الدنيا فيها كتير
وربنا بيحاسب كل واحد علي تصرفاته مش علي تصرفات الاخر
عشان بجد سبنا كتير من قيمنا واخلاقنا فبقى حالنا كده
اولا بحييكى على اسم المقاله
........لانها فعلا مأساه
فى حاجات كتيرة من اللى انتى ذكرتيها لفتت انتباهى الفترة الى فاتت لأ دى اثارت فزعى والباقى مفتكرش لأنى معرفتوش او بمعنى اصح ربنا رحمنى من سماعه ومعرفته
فعلا دى حاجه تحزن
بس احب اقولك ان القيامه قربت والفساد خلاص طغى وانتشر
والفجر والفسوق بقى عينى عينك لأ ده بقى مصدر فخر وبيسموه ....جرأه وحريه
تعليقى هيكون فى كلمات بسيطه
وهى بسم لله الرحمن الرحيم
لا يغرنك تقلب الذين كفروا في البلاد ( 196 ) متاع قليل ثم مأواهم جهنم وبئس المهاد ( 197 ) لكن الذين اتقوا ربهم لهم جنات تجري من تحتها الأنهار خالدين فيها نزلا من عند الله وما عند الله خير للأبرار ( 198 ) )
بسم الله الرحمن الرحيم
ولا يحسبن الذين كفروا أنما نملي لهم خير لأنفسهم إنما نملي لهم ليزدادوا إثما ولهم عذاب مهين ) [ آل عمران : 178 ] .
ولله انا من حوالي اسبوعين كنت راكب الميكروباص راجع من الهرم للمعادي
كان في ايدي علبة كانز - فضلت ماسكها طول السكه
واحد كان جنبي حب يعمل فيا معروف راح قايل لي -يا شيخ هات العلبه دي- وراح ماسكها من ايدي ورماها من الشباك
طبعا من المفترض اني اقول له كتر خيرك با حاج على اللي انت عملته
لكن طبعا نتيجه لإختلاف الثقافات انا ابتسمت وسكت ولم يكن بإستطاعتي اني اقوله اي حاجه
فمن الصعب توجيه النصح لأحد وسط الناس
ومن الصعب اني اقوله انت غلطان في مكان زي ده
بس ارجع واقولك على حاجه
من كثرة الامور الصعبه اللي الناس تعرضت لها البلد محدش بقى خايف عليها
انا معاكي ان الموضوع ديني في المقام الأول
لكن فيه حالة قرف عامه موجوده عند الجميع والمثقفين منهم قبل الناس العاديه
فيه كذا صوره هانزلها على موضوع رمي الزباله في التوك توك بس بعد رمضان ان شاء الله
الصور صورتها في المعادي عندي- كانت عباره عن متوسيكل بتاع لحمه- مش عارف انتي عرفاه ولا لأ- بس هو متوسيكل فيه صندوق كبير في ظهره- المهم صاحبه كان راكنه امام الحاره
والناس كانت بتكسل ترمي الزباله في صندوق الزباله لأنه بعيد عن الحاره بحوالي 50 متر وكانوا بيرموا اكياس الزباله داخل المتوسيكل توفيرا للوقت!!!
كل سنه وانتي طيبه
نسيت حاجه
بالنسبة لموضوع انك معقده
الكلام ده فيه كتير بيسمعوه من الناس
اصل عشان متبقيش معقده لازم تبقي فوضويه وتعملي زي باقي الناس
بس صدقيني هما عندهم مشكله وبيتضايقوا لما يشوفوا حد -معقد- وبيبقوا معقدين منه
لأن بيكون نفسهم يعملوا زيه بس مش عارفين
فابيطلعوا غيظهم في شكل سخريه
لكن جواهم بيكون شيء تاني
أختى الصغيره باشمهندسه نور.....على فكره كل اللى انتى قلتيه ده مالوش علاقه بثقافة الاسلام قد ما له علاقه بانهيار القيم فى المجتمع....المواضيع كلها اللى انتى اتكلمتى عنها كانت بتمثل قيم المجتمع فى مصر. بيجتمع عليها المسلم والمسيحى. اللى حاصل دلوقتى ان فى مشكلة انهيار فى المجتمع المصرى. حاجه لازم نعترف بيها ومش نهرب منها. نتيجة الانهيار ده ظهرت النماذج اللى انتى بتقولى عليها دى واتكلمت وباحت بالديدان الموجوده فى نفسيتها. قبل كده كانت النماذج دى قله فى المجتمع فكانت بتلم حالها ومش بتفتح بقها. دلوقتى حسوا انهم بقوا كثره وبقيت الغلبه ليهم....فتحوا بقهم وخرج منها القرف.....ربنا يستر على اولادنا
تحياتى وشكرا
حسبنا الله ونعم الوكيل . انتى جمعتى الحاجات دى منين ؟
جميل ماكتبتى
صبرا جميل واللة المستعان
كل سنه وانتى طيبه يا نور
السلام عليكم نور
تحياتى
كل سنه وانت طيبه وبخير ورمضان كريم
المنبار جاهز وممكن ابعته لك وما فيش حاجه تغلى عليكى وخصوصا بعد ما قريت البوست الاخير بتاعك عن الجماعه اللى ضاربين الدنيا والدين عرض الحائط
ما نقدرش يا بنتى نقول حاجه الا ان ربنا يهديهم ولو ما هداهمش هو اللى حيحاسبهم
اما المخرجه اللى بتقولى عليها فيظهر انها زى بنتها وانها زى ما بتشوفيها فرررى خالص ومتحرره خالص ومش دى ناخدها قدوه ولا ممثله للاسلام والاسلام اكبر من هؤلاء وياما ناس كتير فى الاسلام وفى المسيحيه كمان واخدين المواضيع دى فرررررى وحسابهم عند ربهم سواء كانوا مسلمين او مسيحيين مع العلم ان المسيحيه تحض على الفضيله ومكارم الاخلاق وكل الاديان
ربنا يهدى الجميع
رمضان كريم وكل عام وانت بخير
عشرة على عشرة
موضوع ممتاز
السلام عليكم اولا
كل سنه وحضرتك طيبه
ثانيا ربنا يرحم محمد رحمه واسعه
ثالثا دى اول مره ليا هنا في مدونتك
وده طبعا شرف ليا بالذات بعد البوست ده
الناس الى انتى بتتكلمى عليهم دول خنازير والعياذ بالله
فيه ناس كده
بس بجد كله كوم والبنت الى ابوها بيتعدى عليها دى كوم تانى
ازاى غريزه الابوه تتقلب بالطريقه دى لكده
ده يتعدم في ميدان عام
وزانا الى اعدمه
ربنا يستر على الاجيال الى جايه والفساد الى موجود
عموما القران اتكلم عن الفساد من زمان
كثر الفساد في البر والبحر الكلام ده من 1400 سنه
كل سنه وحضرتك طيبه
وجارى اضافه المدونه
والله عندك حق واعتقد معظمنا سمع المقوله الشهيره ان الدول الاوروبيه فيها اسلام منغير مسلمين
بيلتزموا اكتر مننا فى التعاملات وبعض نواحى الحياه اللي احنا مش قادرين عليها وأحنا مسلمين
عجز الكلام عن التعبير .. الله المستعان
مش عارفه اشكرك علي طرح الموضوع ولا اقولك ليه بتفتحى الجرح اصل فى ناس مهما قولنا هما سادين ودانهم نهائيا
ربنا يرحمنا برحمته
تحياتى ليكى ورمضان كريم والله اكرم
لا حول ولا قوة الا بالله
ايه ده
بجد الناس جرالها ايه
انا برده كانت عدت عليا فتره كنت بقول الدعاء ده على طووول
ربنا يهدينا ويبعد عننا ولاد الحرام !!!
ازيك يا نور
كل سنه و انتي طيبه و يا رب رمضان يكون تمام عليكي كده ان شاء الله
قريت الموضوع...انا قريت كتير من الاخبار دي و كتير بيقولوا انها مجرد اشاعات صحف صفرا او تداول منتديات مش اكتر... بس هنقول و نسلم انها حقيقه.. ايه بقى دخل الاسلام في الموضوع..دول يا نور راحوا او جم قلة لا تعبر إلا عن نفسها مش اكتر.. مبيعبروش عن الدين في حاجه.. و بعدين الشر اللي جوا النفوس دي بيبقى حر طليق و الدين جواهم يا ضعيف يا معدوم..و الدين اساسا لجام و حزام المفروض يقيدوا بيه شرهم و يلجموا بيه غرائزهم..و طالما هو مش موجود يبقى مفيش قيود يبقى كل شئ مباح... مفيش استغراب من اي نوع..اما عن الغرب الكافر و تمسكه بتعاليم الدين احسن مننا و بينفذها صح.. فده يا نور كلام اعلامي متداول لا اساس له من الصحه..كل الاخبار اللي عرضتيها اساسا جرائم حاصله تأثرا بالانفتاح الرهيب اللي ف الغرب...كل ده بيحصل عندهم و ابشع بس احنا مبنستغربش منهم و عمرنا ما بنستنكر ده لكن عندنا الحاجات دي بتلاحظ لانها شاذه عن القاعده... يعني لو في فيلم عربي في مشاهد فاضحه الدنيا بتقوم عليه و مبتقعدش..اما لو فيلم اجنبي فيه كده-و ما اكثرهم- بتلاقي بيمر بهدوء لان ده العادي اصلا..يبقى فين بقى تمسكهم بالقيم الاخلاقيه القويمه اللي احنا بننكرها... و لو ع الالتزام و النضافه و الحوارات دي.. ف دي صفات شخصيه مش اجتماعيه.. موجوده هنا و موجوده هنااااك
:)
ربنا معاكي و دعواتك كده لاخوكي دعوات من القلب كده في صلاتك... لاحسن العمليه مزنوقه ع الاخر و الامتحانات بعد العيد يا ستي...
سلااااااام يا برنسيس
:)
أسماء بنت الشمس
***************
شيخ الازهر؟
ده حلل الاافطار للاعبى الكوره
روحى ياشيخه ربنا يهدهم اجمعين قولى امين
انا عن نفسى كنت ومازلت وهفضل انادى بمبدأ "عليك بنفسك" عشان الكل يتغير
نورتينى يااسماء
riyadh
******
عفوا رياض انا بكتب حاجه حاسه بيها
kochia
*******
عايزانى اكتبهم ليه؟ مش هتفرق المهم ان النماذج موجوده
عموما لو عاوزاهم ابعتهملك ميل:)
نورتينى
mohamed ghalia
**************
هما دول بيفرق معاهم؟؟؟!!!!!!!!!
dr.w.krm
*********
الله
الايات اللى انتى كتبتيها جميله اوى
نورتينى بجد وارجو تتكرر زيارتك
وهقولك زى مابقول كتير
"عليك بنفسك"
المبدأ الاقوى للاصلاح
الحمد لله رب العالمين..أنزل كتابا كالشمس وضحاها..وأتبعه بسنة كالقمر إذا تلاها..من عاش على نهجهما..عاش فى نور كالنهار إذا جلاها..ومن لم يتبعهما عاش فى ظلام كالليل إذا يغشاها
والصلاة والسلام على محمد خير من ربى نفسه وزكها..وبالتقوى والصلاح ألزمها وسماها
سيدتى الفاضله انا معك فيما قلت ولكن المشكله ان أمثال هاؤلاء لا يعرفون الدين الا عند موت أحدهم بلبس الاسود فقط هاؤلاء ممن قال الله فيهم (ولاتتبع اهوائهم واحذرهم ان يفتنوك عن بعض ماانزل الله اليك)
دول مغيبين بالشهرة والنفوز وغيرها من زينه الحياة الدنيا ومصيبتهم ان من حولهم من اسماك الريمورا التى تعيش على الفتات الذى يقع منهم يحضونهم على المسير فى هذه الخطوات بنفاق ما بعده نفاق
إذا كنت فى عالم النفاق
فأعدل بساق ومل بساق
ولا تشاحن ولا تغاضب
وأقبل الكل بالعناق
وقل كلاما بغير معنى
وأحلف على الإفك بالطلاق
فكل شىء كككل شىء
بلا إختلاف ولا إتفاق
وأى شأى كأى شىء
مادمت فى عالم النفاق
عافانا الله من أن نضل او نضل وأن نزل وأن نزل اللهم يا مقلب القلوب ثبت قلوبنا على دينك
جزاك الله خيرا
تقبلى مرورى
بكل بساطه كل الحاجات هادي (دي) مش غريبه لما يولي (يبقى) الاسلام بس وراثه و مجرد حبر على ورق في البطاقه
ربنا يهدي
هو انتى مش بتشوفى غير الحاجات الوحشه بس؟؟؟؟
غلبتينا معاكى والله
صديقتى الجميلة
اشتقتلك كتير
الموضوع كتير مؤثر وبجد عجبتنى انوى الoutlines اللى انتى حطاها
بجد ربنا يرحمنا وفعلا سوالك مقنع
لية دول موجوديين بنا
يا رب ابعدنا عن شرهم بكل انواعة
Always Ameen
كل سنة وانتى بخير
تحياتى صديقتى
لا حول ولا قوة الا بالله
all of that coz we leave our Customs and traditions
thax 4 ur bost
تقبلي مروري ولكي مني وافر الاحترام والتقدير
لورنس العرب
************
ياخبر اسود ومنيل؟!!!!!!!!!!!!!!!1
الزباله فى صندوق اللحمه؟
طيب الغريبه سيبك من انهم بيرموا الزباله فى صندوق اللحمه
الغريب بقى هما بيرجعوا يشتروا اللحمه من نفس الصندوق اللى هما بيرموا فيه؟!!!!!!!!!!!!
سيبك انت اللى يقول يقول كفايه انك تبقى مقتنع باللى بتعمله
نورتنى ياعمو واسفه على تاخير الرد ظروفى كانت ملخبطه شويه:(
نورتنى جدا
غير معرف
*********
لا يابشمهندس ازاى بس مالوش علاقه بالاسلام
القيم دى اللى عملها ووضع اسسها هو الاسلام ولو دورت على كل حاجه حرام هى حاجه من الحاجات اللى بتقول عليها الاخلاق عيب ولو دورت على الفضيله هى الحاجات اللى الاخلاق بتقول عليها زينة للفرد الصالح
اما عن ربنا يستر على اولادنا هتصدقنى لو قلتلك انى فعلا من قبل مااخلف اولاد ولا اتجوز حتى خايفه عليهم من المجتمع
نورتنى جدا:)
هانى زينهم
*********
المصايب كتير يامستر ربنا يعافينا
نورتنى
angel
*****
الجميل هو وجودك يابشمهندس
نورتنى
gogo!sf
********
وانتى طيبه ياجوجو انتى فين؟!!
فشكووول
********
وعليكم السلام استاذى
وحضرتك طيب وبكل خير
المنبار بالهنا والشفا يارب ومتشكره لذوقك
انا مش اخدتها مثل ابدا انا بس مش عايزة حد من الناس اللى بيستنوا للمسلمين على غلطه ياخدوها انها مسلمه وتتمسك علينا غلط
نورتنى جدا ورمضانك كريم
بنوته مصرية
**********
متشكره لذوقك ووجودك
نورتينى
لا تشتاق
********
وحضرتك طيب
متشكره لذوقك والحمد لله ان المدونه والبوست عجبوك
اتمنى اول زياره ماتبقاش الاخيره
رمضانك كريم
نورتنى
nour shahen
************
لا يانور هما عندهم الاخلاقيات اللى هما بيتعاملوا بيها دى هى اساس التحضر والاتيكيت وان اللى مش يعمل كده همضى رغم انها كلها اخلاقيات وقيم الاسلام لانه هو الاقدم يعنى مغشوش منه مش غشاش
نورتينى يانور وجودك بجد بيسعدنى
Butterfly
***********
:) دعوه ماما
ربنا يوقفلك ولاد الحلال ويبعد عنك ولاد الحرام:)
نورتينى ياجميله ورمضانك كريم
prince4ever
************
ازيك يارامى
منور
ايه يابنى التعليق الكبير اوى ده انت مش بتلاقى حته ترغى فيها غير هنا ولا ايه؟
p:
بص يارامى انا مقلتش دول مسلمين على حق ولازم يبقوا قدوه وكده بس انا بقول ان فى ناس بتستنى للاسلام على غلطه ودول هما الذنب اللى بيخادونا بيه وبيقولوا ادى المسلمين بيعملوا وبيعملوا
بمعنى انى مقلتش انهم قدوه انا بس شايفاهم منسوبين للاسلام غلط
اما عن ان الغرب بيطبقوا الاسلام فده اصلا مكنش كلام جرايد ولا وسايل اعلام ده كان كلامى انا
سيبك من انحلالهم الدينى انا بتكلم فى عاداتهم اللى هما بيسموها تحضر وهنا بيقولوا عليها اتيكيت فى العائلات بتاعت الطبقه الغنيه غنى فاحش "اتيكيت" ماهو لو جيت تبص على كل الحاجات اللى بيعملوها على انها كده هى اصلا قيم الاسلام وحاجات الاسلام حث عليها من اكتر من1400سنه
بلاش تبقى تدخل سخن كده ومشمر دراعاتك تانى مره
وعامل ايه فى امتحاناتك بقى طمنى عنك
يارب يكون كله ماشى تمام
كل سنه وانت بكل خير ياروميو
ورمضانك دايما اسعد:)
ابو كريم
*********
لا تعليق:)
بجد تعليق حضرتك تحفه
نورتنى جدا وياريت تتكرر تانى
رمضانك كريم
Meme
****
ازيك ياقمر
واحشانى ياندله
انتى صح
ربنا مايجعلنا منهم ايدا
اظهرى بقى
blue-wave
**********
اه يااخى شفت؟
ورغم انها مش بتقع الا على الحاجات الوحشه لحد دلوقت لسه مش طالتك
!!!!!!
انا للاسف مش باخد غياب زى مدرسين الابتدائى للاطفال وحسب مين جه وقرا وعلق ومين مجاش
لو مجتش تشيل الهم معايا وتاخد شحنه الاكتئاب بتاعتى مش هزعل يادكتور
بالعكس هفرح جدااا لانك ريحت اعصابك من شحنه الهم دى
رمضانك كريم
Hossam
*******
متشكره اوى ياحسام
الف مبروك نجاحك وكل سنه وانت بكل خير
نورتنى
eyad
*****
ووافر الاحترام لوجودك كمان
اما عن ترك العادات والتقاليد فاعتقد الكلتين دول مابقوش موجودين الا ما رحم ربى
نورتنى جدا
إرسال تعليق