ورجع الشتا يدق البيبان
:)
بس بحس بدفا قلبى يدفينى
رجعت استنى المطر
ابص من شباكى..احب جو اول النهار وابتسم للشمس وهى طالعه بتصبح بشعاع يادوب واصل..اصالحها والدنيا بابتسامة قلبى
ابص من شباكى..احب جو اول النهار وابتسم للشمس وهى طالعه بتصبح بشعاع يادوب واصل..اصالحها والدنيا بابتسامة قلبى
رجعت حساسية البرد تتعبلى صوابع ايديا ورجليا ورغم ده مابكرهوش
رجعت احب اغنيه أواخر الشتا ببردها ومطرها ولون تلجها الابيض
رجع مودى يتغير بإشراقه الدنيا
رجعت استخبى فى هدوم الشتا التقيله
وحبايبى يقولولى انى ببقى زى العيال الصغيره وانا متقله هدومى وبعمل حركات الخوف من احساس البرد
رجعت استخبى فى البطانيه وماما واخواتى يتريقوا عليا عشان ببقى شكل حرف دبليو وانا نايمه من الحضن اللى حاضنه البطانيه بيه :)
رجعت البس البالطو الاسود الطويل حبيبى
رجعت اسمع اغنيه على الحجار لما الشتا يدق البيبان
"لما الشتا يدق البيبان
لما تناديني الذكريات
لما المطر يغسل شوارعنا القديمة والحارات
ألقاني جايلك فوق شفايفي بسمتي
كل الدروب التايهة تنده خطوتي
كل الليالي اللي فقمرها قلبي بات
مش جاي ألومك عاللي فات
ولاجاي أصحي الذكريات
لكني بحتاجلك ساعات
لما الشتا يدق البيبان"
لما تناديني الذكريات
لما المطر يغسل شوارعنا القديمة والحارات
ألقاني جايلك فوق شفايفي بسمتي
كل الدروب التايهة تنده خطوتي
كل الليالي اللي فقمرها قلبي بات
مش جاي ألومك عاللي فات
ولاجاي أصحي الذكريات
لكني بحتاجلك ساعات
لما الشتا يدق البيبان"
وأقول بحتاجلك دايما مش ساعات لما الشتا يدق البيبان
رجعت احس بطعم حلو للأكل واشتاق للمحشى :)
رجعت افرح لما اشوف الضباب الصباح كاسى كل الحاجات
رجعت اشوف الخيوط اللى بيعملها نفسى الدافى فى عز البرد
رجعت احس بنشوة البرد وامانيا بإن الصيف مايجيش والشمس تبطل تظهر
الشتا جميل:)
انا عايزة مطر :(
وعايزة الدنيا تبرد كمان شويه
ومش عايزة الصيف يجى ابدا
أنا مجنونه صح؟
:)
هناك 33 تعليقًا:
لأ مش صح
أنا أجن منك
وبحب الشتا جدااااااااااااااا
وبحب الدنيا تمطر عليا
ولو انا فى البيت وهيا بتمطر بخرج البلكونه او أطلع على السطح هههههه
فعلا الشتا جميل
بس بعد ما ننسى حلاوة دفئ الصيف :)
انا كمان بحب الشتا
واواخر الشتا
(وش بيغمز)
انا كمان مجنونة شتا وخاصة فى الاسكندريه
واعشق منظر المطر
على فكره انا حالى من حالك فى موضوع صوابع الايادى وده بيكون الشعيرات الدمويه ضعيفه
يلا مافيش مشاكل كله يهون فى سبيل منظر الشتا التحفه بجد
تقبلى ارق التحايا
زهراء
انا مش احب بروة الشتا بس اعشق المطر
شوفتى فى مجانين زى حالك
لولا
ورجعنا نشوف البوستات العسل
طبعا اكيد مش مجنونه عشان لو انتي مجنونه حطلع مجنونه انا كمان عشان انا برضو بعشق الشتاء و مش عايزاه يخلص
ومجنونه ليه
ده الشتاء جميل
كفايه ان الدنيا فيه بتبقى هاديه
انا كنت زمان بنزل انا واصحابي وقت المطر وكنا بنشوط في المايه في الشارع ونرجع البيت متبهدلين
أهو جنان بجنان
بس ده كان زمان - الله يرحمها ايام
دلوقتي الواحد عجز خلاص ربنا يديكي طول العمر
بالعكس
دانتى تحفه:))
وياريت بقى السنه كلها تفضل شتى علشان المحشى:))
ههههههههههههه
لا مش أوى
ربنا يسعدك دايما
لا مش جنون
دة اشتياق للذكريات
ابنتى نور
مش عارف ليه الدور ده ركزت فى كلامك وحبيت انى اقرأه بمفهومك انت .. وشفت فيه وبين ثناياه مفاتيح شخصيتك واحلامك الوردية البسيطة الطيبة .. شفت بنت مصرية لسة الشتاء بيخليها طفلة صغيرة .. وشابة حالمة .. عايشة فى دفء الشتاء واغانيه وطقسة بأستمتاع غريب ...!!
ولكنى دائما استمتع بكلامك واحاسيسك المرهفة واحيانا لادعائك الجنون وانت لست كذلك
مجنونه ولا حاجه
اصل لو انتى مجنونه يبقى انا منخوليا
انا كمان بحب الشتا جداً
وبحب احساس البرد جداً
احساس البرد بيخلى الناس محتاجه بعض
بيخلى الجميع محتاج حضن
وكف دافى يدفى كفه
الشتا يعنى كوباي نسكافيه مولعه نار وتتشرب فى البلكونه والدنيا برد جداً والمطره شغاله على اخرها
الشتا يعنى الكتب والقرايه بعيد عن خنقه الصيف وقرف التكيفات
الشتا يعنى تسمع مزيكا او تشوف فيلم بحاله من غير ما تقوم من قدامه
الشتا عيبه الوحيد شده البرد فى صلاه الفجر والميه الى بتنزل زى الحتت من الحنفيه
الشتا جمييييل جداً
تتصورى لا عمرى هقدر عالفراق
ولا انتى عمرك تقدرى
تتصورى لسه حنينى بينهدك قبل البعاد
ولسه زهره حبنا بتطرح معاد
لكن مش عارف ايه مسكتها السكات
مش جاى الومك عالى فات
ولا جاى اصحى الذكريات
لكنى بشتاقلك سعات
لما الشتا يدق البيبان
تحياتى
اولا كلمة الشتا لوحدها بتركبنى 100 عفريت كلهم سقعانين وبيتكتكوا . ثانيا الشتا من الفصول اللى عندها شخصية قوية يعنى بتجبر الواحد يكون وجهة نظر عنها يا اما بيحبها موووت يا اما بيكرهها مووووووووووووووووووووت زي حالاتى كدة . وفى النهاية ما فيش اجمل من الصيف ودفاه وسهره .
شاركونا الراي والخبره في جمعية مقاومة الطلاق
لا يا نور
انتي مش مجنونه ..
انا كمان بحب الشتا اووووي
وحبيت وصفك اوي عشان في حاجات كتير من كلامك انا بحبها :)
وحشااااني اوي علي فكره :)
يارب تكوني بخير
عاااااااااااوووووو
Butterfly
**********
خلاص ولا تزعلى اسيبك اجن منى المرادى بس على فكره انا بعمل كده برضه
لكن برضه عشان ماازعلكيش هسيبك بس اوعى تاخدى على كده
نورتينى ياقمر :)
اقصوصه
******
اقولك حاجه
دايما اقول لحد بحبه جدا وهو برضه بيحب البرد انى بحب احساس الدفا
يستغرب ويقولى بتحبى احساس البرد لا الدفا ؟
اقوله بحب احساس الدفا فى عز البرد وانا مستخبيه فى هدومى :)
نورتينى ياجميله:)
سمكه واحده
*********
ياواد انت يابتاع اواخر الشتا ;)
سمكه واحده
*********
ياواد انت يابتاع اواخر الشتا ;)
زهراء
*****
الف سلامه على ايديكى من البرد بس حقيقى رغم المه الصعب اوى بحبه برضه :)
نورتينى ياجميله وليكى تحياتى كمان
لولا
****
مجانين بس على قلبى زى العسل ماداموا زيى :)
نورتينى ياجميله
Meme
*****
والله انا اللى مبسوطه لانى رجعت اشوف اسم ميمى هنا تانى
وماله لما تطلعى مجنونه هو عيب ؟:)
لورنس العرب
***********
ليه بس ياعمو ده انت لسه فى ريعان شبابك احنا بس اللى غاويين نكبر نفسنا كأننا بنبقى مبسوطين بكتر شيل الهموم
منورنى ياعمو
blue-wave
**********
:) ده بس اللى اخدت بالك منه يادكتور؟
المحشى؟!
طيب اتفضل والله عندنا
نورتنى
mohamed ghalia
***************
ويسعدك كمان يامحمد
منورنى:)
كيكى عوووووو
**************
اممممممممممممم جايز
نورتينى بكل الاحوال :)
وميض ابتسامه
************
والدى الجميل
اول ماقريت تعليقك حاولت ادور على كلام ارد بيه يكون مناسب مالقيتش حاجه ممكن تعبر اكتر من تعبير وشى وقتها اللى كان كده ":)"
حقيقى متشكره ليك اوى عشان الضحكه اللى خرجت من قلبى دى :)
منورنى دايما
momken
******
كلامك جميل ياممكن
واحلى كلمتين "بيخلى الجميع محتاج حضن
وكف دافى يدفى كفه" لان دول حقيقى دنيا تانيه انا مجبتش سيرتهم بس ماانكرش انى بحس بيهم :)
وعلى فكره حقيقى اوحش حاجه فى الشتا هى بروده الميه خصوصا مع الناس اللى عندها حساسيه من البرد زى حالاتى
نورتنى حقيقى ياممكن
هانى زينهم
**********
اختلاف الرأى لا يفسد للود قضيه يامستر بس عجبنى 100عفريت بيتكتكوا دى :))
متفقه معاك ان احلى حاجه فى الصيف هى نسمه هواه بالليل وسهره واضيف كمان البحر والمصايف
بس حقيقى مش شايفه فيه اى حاجه حلوة تانى
نورتنى فى كل الاحوال
قيس ابن الملووووح
*****************
مش عارفه اقول ايه بصراحه اصلى معنديش خبره :)
Hager Za3bal
*************
:) انا بخير ياحبيبتى والحمد لله
انتى اللى اخبارك ايه
هحاول ادخل واطمنك عليا واطمن عليكى
انتى اخبارك ايه بقى؟:)
لورنس العرب
************
خضتنى :)
إرسال تعليق