الاثنين، ديسمبر 21

أم سيد الرايقة





فى عز ماانا غرقانه وسط مذاكرة بعض الحاجات اللى اخدتها فى الكورسات الفتره اللى فاتت ومندمجة اوى 

واذا بصوت مجلجل ومصهلل جاى من بعيد بيدندن "انساك ازاى.. ازاى انساك ازاى.. ده انا لو قلبى ينساك العين مابتخبيش وعنيا لو تنساك الفكر مايسيبنيش" نفضت تمام للسلايدس اللى قدامى وفضلت اسمع فى الاغنيه اللى بتغنيها أم سيد الرايقه جارتنا واهو ساعة الحظ ماتتعوضش برضه



وللى مايعرفش ام سيد دى تبقى جارتنا من 20سنه ومابنكلمهاش بقالنا يجى 15سنه؛هى ساكنه فى بيت صغير هى وابنها ومراته ورا بيتنا.. البيت سقفه واطى لدرجه اللى قاعد فى الاوضه عندنا بيبقى شايف كل حركه بتعملها

سرحت معاها شويه وفضلت اراقبها من ورا الشباك وهى بتأكل الفراخ بتاعتها وبتغنى انساك ازاى لفايزة احمد
الفكره بقى مش فى انها بتغنى ولا بتدندن

الفكره كلها فى انها بتغنى بمزاج عالى اوى وروقان وراحه بال ملهاش مثيل وعلى فكره صوتها حلو جدا واحلى مافيه انك تحسها بتغنى من قلبها حقيقى


اللى لفت نظرى للموضوع ده بقى ايه؟
لما ست عندها حوالى 60سنه بتغنى بالروقان ده فى السن ده وهى تقريبا مافيش فى بقها 3او 4سنات

ممكن انا او حد من جيلى او حد اكبر منى بخمس عشر سنين لما يبقى عنده 60سنه يقدر يقف على سطوح بيتهم ساعة عصارى ويغنى اغنيه عاطفيه بالدرجه الاولى وهو باله رايق اوى كده؟

ولا الناس دى زمانها غير زماننا واحنا بتوع زمن الضغط والجرى ورا الدنيا وفيها جرى الوحوش؟
!!

هناك 32 تعليقًا:

Meme يقول...

ههه ده انا لو شفت حد بيعمل كده و في السن ده حفكر ان مخها اضرب و جالها الزهايمر و ده كله عشان زي ماقلتي دلوقتي صعب تشوفي حد رايق و مش عندو هموم..الحمد لله على كل حال

سمكه واحده يقول...

انا ممكن اغني ياتري ياوحشني بتفكر في مين؟
للست ام كلثوم

اولا: تعالي هنا ايون تعالي لا قربي اكتر اديني ودنك بقي ايوون اقرصك فيها تعالي هنا بتتصنتي علي الجيران يابت؟؟؟؟؟ لا انا كنت اسمعهم من المناور بس غصب عني حد ينادي علي حد واحده تنادي علي ابنها بنت تنادي علي مامتها راجل بيتخانق مع مراته
اقوم ارد انا بدلهم كنوع من الرخامه والتهريج ايام ما البال كان رايق

افرضي الست بتفكر في حاجه كده ولا كده ومش عاوزه حد يشفوها هه هه؟
ينفع كده لالالا عيب يامضروبه

نيجي بقي للموضوع
والله يابيبه حسب النفسيه وحسب حجات كتير بس عمتا والجيل بتعنا والضغط اللي احنا فيه والامراض المتشره والمشاكل والمساله الماديه اللي في الحضيض ومستوي المعيشه معتقدش
بس بقلك هو ممكن يكون سلوك فردي
انا مثلا في عز الزهق ولو في مشكله في الشغل والناس شايطه وعاوزه اهدي الموقف تلاقيني اقول كلمه او اعمل حركه كله يقولي والله انك رايقه ياختي
اغمز ابتسم مش عاوزه اقلك بصراحه بعمل ايه ههههههههه عيب بس تكون واحده بس اللي شيفاني وتكون في المشكله نفسها وفي وسط الزحمه تبقي مش عارفه تعلق ولا تقول ايه غير تقولي مسيرك هتتعلقي من افاكي ولا حد يشوفك وتبقي مسخره ياست المحترمه انتي

سيبك انتي يا حبيبه ربنا يروق بالنا
محدش واخد منها حاجه
ومن هنا احب اسمع اغنيه
وبحب الناس الريقه اللي بتضحك علي طول
امال الناس المضايقه انا لاء مليش في دول
خااااالص يابيبه
(:

وردشان smilyrose يقول...

السلام عليكم

يابنوتة مش كدا عيب

يعنى عشان ام سيد صوتها حلو وبتغنى

بمزاج تقعدى تسمعيها وكمان من غير ما

تستاذنى مش المفروض تستاذنيها


بس يا حبيبة قلبى الناس دول عاشو

الحياة ببساطة وحب ووفاء بقى قليل

قوى فى حياتنا لكن اكييد احنا ممكن

نغنى ونعيش لحظات حلوة برده

ربنا يكرمك يارب

وبطلى تسمعى ام سيد من وراها

romansy يقول...

دانتى اللى رايقه يا رايقه
فينك دا كله
ولا خلاص بقى خلصنا ونشغلنا
ماشى يا سيدى حقك بقى

الميكروباص يقول...

من حقها تغني براحتها
خلاص اللي عليها عملته في الدنيا
هاتتعب نفسها ليه
خلاص كل الامور استقرت
اما بالنسبة للسؤال بتاعك لما نيجي لسنها هانغني زيها
فأنا -شخصيا- أشك أني هاوصل لسنها من الأساس

شاب فقرى يقول...

هاتى لى فرخة واحدة

وهتلاقينى بغنى لك من اول حلقاتك برجالاتك مرورا ب هيلا هيلا لسيد درويش وحتى زحمة يادنيا زحمة وإلى بحب الناس الرايقة اللى بتضحك على طول

ربنا يسعد أيامك

طبعا تذكرتى من أنا

أنا الفقرى :P

شاب فقرى

بسمه عبدالباسط يقول...

مش عارفة أحنا ممكن نعمل إيه لو وصلنا لسنها
ولكن فعلا هما زمنهم كان غير زمننا فى حاجات كتيرة قوووووووووووووووووووووووووى ويمكن ده اللى مخليها تغنى وتبقى بالروقان ده

gogo!sf يقول...

صباح الخير يا نور
اخبارك ايه يا قمر وحشتينى جدا جدا

---------

حضرتك بقى قاعده بتذاكرى ولا ملمعه اكر مع الجيران
بطلو الحقد ده بقى مالها ام سيد يعنى عملتلك ايه كل ده عشان قلبها دق شويه وهى لسه فى عز شبابها
وماله لما تغنى وتعبر لحبها الوحيد بأنها متقدرش تنساه خالص ولا تعدى ثانيه غير لما تفكر فيه

ده احنا حقودين بجد


ذاكرى يا نور وبطلى تركيز مع ام سيد

بس بجد الست دى رايقه رايقه

ليكوريكا يقول...

ايه التفاؤل ده بس

ستين سنه مين

طب قولي 40 :)

Butterfly يقول...

فعلا الناس دى زمانهم غير زمانا خالصر

ربنا يروق بالنا جميعا يارب

☼♫♪ عمــاد الدين يــوسف ☼♫♪ يقول...

اختي العزيزة نــــور ( بيبه )

المشكله اننا ( جيلنا يعني ) عجز بدري بدري ، مفيش مفر من الاعتراف بان زمنا غير زمن ست الحجه ام سيد ، على الاقل الواحد مرارته اتفقعت بدري جداا ، بس بجد اللي عايز وصمم انه ينتشل نفسه من القرف اللي احنا فيه بدون ما يعزل نفسه عن الناس ، ممكن جدا يعمل كده ، لانها مسألة رضى بالقسمه والقدر ، هو ده السر الكبير اللي كلنا عاملين عبط ومش عايزين نفهمه ، او بمعنى ادق فاهمينه وعاملين عبط ... بجد الرضى بنصيب الواحد من الدنيا نعمه كبيره وجليله جدا ، لانه لو رضي هيشوف الدنيا فيها شيئ من التفاؤل ، وهيلاقي نفسه بيحاول يساعد ويتساعد وبيضحك وبيخليها على ربنا ، ساعتها ممكن كمان بعد سن ام سيد يغني ويزقطط ويمشي على الحيط كمان (:

وعلى رأي ابن عم محمد هنيدي في فيلم بليه : الوليه ديه صحتها كده ( علامة اوكى بالإبهام )
وربنا يستر صطوحك ويسترك يمو سيد

نـــــور يقول...

Meme
*****

ميمى الشهيره اللى ظهرت عالتليفزيون
يمكن لان الزمن ده ملهياته اكتر؟
نورتينى ياحبيبتى

نـــــور يقول...

سمكه واحده
*********
مش بتصنت يانيله والله انا ماليش فى حشر المناخير ده
الحكايه كلها ان الصوت بيبقى واضح من غير تصنت ولا نيله والصورة كمان بتبقى واضحه من غير بحلقه ولا تلسكوب:))

يعنى احسن من التليفزيون توشيبا العربى او 35بوصه
بطلى الحركات العبيطه اللى بتعمليها بتفضحنا دى
الناس لو تعرف انك مدونه وبتجرسينا فى الشغل كده يقولوا علينا ايه ها؟ ايه؟

بطلى انتى بقى ياشيخه على الاقل انا كنت بتصنت من ورا البتاع مش زيك على عينك ياتاجر كده :)

واحشانى اوى ياسمكه

نـــــور يقول...

وردشان smilyrose
******************

وردتى العسل
ماهو اصل احنا مش بنكلمها من زمان عشان استأذنها فى انى اتصنت عليها وهى بتغنى:)

مش هنعيش اللحظات دى الا لو قربنا من ربنا شويه ورضينا بحالنا

منورانى ياوردتى واحشانى اوى

نـــــور يقول...

romansy
*********

وانت يعنى اللى مش رايق يابشمهندس؟
ربنا يروق بالك انت كمان بس انت بلاش تتصنت عل ام سيد ممكن ابو سيد ماشى :)

نـــــور يقول...

لورنس العرب
***********

:)) بعد الشر ربنا يديك طولة العمر ياعمو
ويسعد ايامك مش بس دلوقت لا وانت عندك 60سنه كمان

نـــــور يقول...

شاب فقرى
**********
عايزة اقولك يافقرى انى مش ممكن اجيبلك الفرخه المزعومه بس ممكن لو لقيت حد يجيببلك واحده تقوله يجيبلى واحده بس مشويه وساعتها هغنيلك حيرت قلبى معاك:))

طبعا افتكرتك
انت الفقرى P:

نورتنى حقيقى

نـــــور يقول...

bos bos بسمه عبدالباسط
***********************

حقيقى هما محظوظين فى زمانهم رغم اننا عندنا رفاهيات اكتر منهم بكتير

نورتينى يابوسبوس :)

نـــــور يقول...

gogo!sf
*********

ازيك ياجوجو انتى اللى فينك يابنتى مدوخه الناس وراكى وهاجره مدونتك والدنيا ضلمه

غير كده انا مش بلمع اكر حد هما اللى بيلمعوها لوحدهم
هى رايقه اه عقبالك ماتبقى زيها وتوصلى سنها

نورتينى ياجوجو وابقى تعالى على طول ماتقلقنيش عليكى كده

نـــــور يقول...

ليكوريكا
*********

تفائل يالخير تجده
ربنا يمدك بالعمر السعيد :)

نـــــور يقول...

Butterfly
*********

امين يارب ياعسل:)
بس نحن من يصنع الزمن

نـــــور يقول...

☼♫♪ عمــاد الدين يــوسف ☼♫♪
****************************

عما الدين باشا يوسف
فينك ياعم حضرتك غطسان
ماصدقتش عونيا لما قريت تعليقك

اتفق معك قلبا وقالبا
وعايزة اقولك لو محمد هنيدى قر عالوليه بلاش انت تعمل زيه
اعمل باصلك:)

نورتنى ياعماد

shoshta_ joker يقول...

السلام عليكم.....
حلوة الحكاية الرايقة دى
انا اول مرة اجى عندك هنا
شدنى العنوان ومش حتبقى اخر مرة باذن الله ....فعلا سؤال حلو بس اتهيئلى حسب طبيعة شخصي كل واحد فينا اكيد زمانه غير زمانهم خاااااااااالص
معنهم اسوا كتير ومكنتش متوفرلهم حجات كتير من الى متوفرلنا ....بس كانوا سعداء ومرتاح بالهم اوى ......دومتى بخير ...فى رعاية الله .
shemo

MaNoOoSh يقول...

دحنا صبرنا بيطلع فى الروح واحنا في عز شبابنا

ربنا يبعتلنا روقان البال من عنده


(وحشتيني يا عسل)

kochia يقول...

هلا نــور
ازيك
يارب تكوني بخير دايما

الحقيقة بقي ام سيد دي فعلا رايقة
بس ايه المانع من الروقان
مهما كان ورغم كل حاجة لازم هتلاقي نفسك رايقة في لحظة ما .. مش معناه ان معندكيش مشاكل .. لكن رحمة ربنا بتخليكي تزيحي من ذهنك شوية من المشاكل دي للحظات

تحياتي

حنين الذكريات يقول...

السلام عليكم
هى أكيد افتكرت ابو سيد وبتغنى له
اللى زايها بتكون عايشه على الذكريات لما تكون مضايقه بترجع بالذاكره وتنسى همومها الحاليه
مش ممكن تكون عايشه مع ابنها ومراته وهى بروقان ده
دى كده بتهرب شويه من همومها
وأكيد هى عاشت زمن غير اللى بنعيش فيه كان احسن شويه

Wish I were a Butterfly ... يقول...

:)
هي فعلا رايقة

هو أكيد الجيل اللي فات مخهموبالهم أحسن مننا بكتيــــر، بس مش دة السبب الوحيد

ممكن فينا ناس هتلاقيها بالها رايق و بتعرف تضحك من قلبها كتير مهما كان حال الدنيا حواليها

هي أم سيد الراضية كمان :) مش بس رايقة
ربنا يروق بالك يا بيبة ودايما نلاقيكي بتضحكي كدة :). خدي بالك من نفسك يا بنوتة

نـــــور يقول...

shemo
******

اهلا بيكى ياشيمو واسعدنى تعليقك
هما فعلا زمانهم غير زماننا بس العيب فينا مش فى الزمن
لو ممكن ترجعى للهيستورى بتاعى واقرى موضوع اسمه نعيب زماننا

نورتينى واتمنى ماتكونش الاخيره فعلا

نـــــور يقول...

MaNoOoSh
********

معلش يامنوش لا الايام الوحشه بتفضل ولا الحلوة
ومسير الحلو جاى

انتى وحشتينى اكتر
فينك؟:(

نـــــور يقول...

Wish I were a Butterfly ...
****************************

فراشتنا الحلوة هنا؟ اهلا وسهلا :)

عندك حق واعتقد احنا الشعب الوحيد اللى معروف عنه انه بيسخر من حاله

ربنا يرضينا ويرضيكى يافراشتى
وحقيقى نورتينى
خدى بالك من نفسك انتى كمان يابنوته:)

المتبهدلون في الأرض يقول...

اه ممكن عند الستين نغني ..وفي العصاري بس مش حيكون لفايزة محمد دي ..حيكون للشاعر الرومانسي الكبير صاحب الأغنية

( أركب الحنطوور ..تربي تربيء ..
وأتحنطر
تربتيءتربء

نـــــور يقول...

المتبهدلون فى الارض
****************

:)) فاتتنى دى
على فكره ممكن صحيح وذلك لان زمن ثومه وحليم وفايزة هيكون كده قدم اوى اوى اوى ومابقاش فى مكان ليهم

نورتنى ياافندم
:)