الجمعة، مايو 1

بـيـتـى وبـنـتـى


كلكوا عارفين انى مش متجوزه يعنى ماينفعش يكون عندى بنت وبالتالى مش
عندى بيت برضو-غير بيت ابويا طبعا مش اطفال شوارع يعنى-

بس زى النهارده(1/5) من سنه بنيتلى بيت وفضلت كل يوم ازين فيه شويه لحد مابقى شكله مسخره كده
شويه ورد مش عارفه باين دول فى قاع بحر ولا ايه؟ وشويه عرايس صغيره زى الفراشات وشكلهم امور وبيعمى العين

بيتى الجميل ده هو مدونتى الصغنطوطه اللى بحسها كتير بنتى معرفش ازاى
وكمان اقرب اصحابى ليا وكفايه انها قدرت تدخلنى عالم مكنتش اعرف انه موجود
فيه ناس كتير حمدت ربنا انها لسه موجوده فى دنيتنا
وناس مكنتش اعرف ان الدنيا فيها اشكال ضاله زيها كده

عرفت اصحاب من عالم افتراضى بقوا اقرب ليا من اصحاب العالم الحقيقى
وناس بقالها مكان فى قلبى مكنتش اعرف ان فى حد ممكن يوصله

لحد النهارده كل مابتوه بحس انى عايزة ارجعلها
وكل مابحس انى عايزة الاقى نفسى واستردها برجعلها
انا بجد بحبها اوى وبحسها جزء منى وصعب عليا اوى اتخيل انى فى يوم سبتها او هى ضاعت منى

زى النهارده من سنه
عملت مدونتى بعد الحاح من شريف زميلى العزيز صاحب
مدونة اختلاف انى لازم يكون عندى بلوج
لحد النهارده حاسه انى مدينه لشريف بأنه دخلنى العالم ده وندمانه انى ماعملتهاش من اول مابدأت اتابعه أو سمعت عن التدوين قبلها بشهووور
نفسى حتى هو يرجع يدون تانى لانه عقليه وشخصيه محترمه اوى وللاسف يمكن بعد عن التدوين من وقت ماانا دخلته

لما عملتها زمان كده
كان علشان انا من النوع الغلباوى اللى مابيعرفش يسكت عن حاجه غلط يشوفها او يخبى حاجه يحس بيها وتأثر فيه

ولانى مكنتش اعرف هكتب فى ايه بالظبط قررت اسميها قصاقيص ونسبتها لإسم حبيبة لانه الاسم اللى ماما ونينا بينادونى بيه من وصفى بالحنيه وانا كمان بعشقه بس مكنتش اعرف ان اسمى الحقيقى هيضيع تحت شهرة اسم حبيبه اللى انا ماتوقعتش انه فى يوم
يتعرف كده!

انا قصرت فى مدونتى كتير وسبتها اكتر ماكتبت فيها لظروف خارجه عن ارادتى بس كنت فى كل مره بشتاق انى
ارجع اشوفها بس وابص لشكلها شويه واقفلها
وكانت بتبقى اسعد لحظاتى وانا غايبه لما الاقى حد سأل عنى

ودلوقت للمره اللى مش عارفه كام هضطر انى ابعد حو
الى شهر ونص
بسبب امتحاناتى ومشروعاتى وافلاماناتى
ياريت تدعولى تكون دى اخر مره ابعد عنها فيها:(

محتاجة الدعاء وابقوا اسألوا عليا ياعيال بلاش قلة اصل
والله انا بفرح زى العيال الصغيره لما حد بيعبرنى :)

انا رغيت كتير أوى بس انا مكنتش محضره أى كلام
انا قلت اللى هتكتبه صوابعينى عالكى بورد هنشره وده احساساتى دلوقت

لكل اللى شايلين ليا شويه معزة فى قلوبهم
يارب تفضلوا تحبونى دايما يارب
ولكل اللى ماحبونيش عندكوا حق انا نفسى مش بحب نفسى

أما عن بيتى وبنتى فمش بتمنى غير إنى افضل الاقى نفسى فيكى
بس مين يعرف بكره فيه ايه؟
اشوفكوا بخير واسفه للتطويل

وهختم بصورة اطفالى زى العادة بس حاساها أوى

هناك 36 تعليقًا:

أبو العريف يقول...

احجز اول تعلييييييييييييييييييييق

وبعدين اجي تاني يا جودعااااااان

أبو العريف يقول...

نور

اولا احب اشكر شريف انه اهدانا
حبيبه
وقصاقيص حبيبه اللي بجد بحس احساس غريب قوي لما باجي هنا
انا كمان بحس انه بيتي
ويارب ما اكونش ضيف رخم عليكي في تعليقاتي

عامة كل سنه والبلوج طيب
وعقبال يارب لما تكتبي علي البلوج من
بيتك انت بيتك الحقيقي
تمنياتي ليكي بالسعاده

أبو العريف يقول...

نسيت اقولك
هتوحشينا جدا في الشهر ده

romansy يقول...

مين يقدر ينسى
حبيبه ولا نور

مين يقدرر ينسى الحاجات الجميله من حبيبه
ربنا يقويكى يا نور
وتخلصى بقى وتفضى شويه
بندعيلك اهو
علشان تعرفى اننا فاكرينك

أبو العريف يقول...

نسيت اقولك

ربنا يوفقك
في امتحاناتك
ومشروعاتك
وافلاماناتك

شاب كــ طخين ـــــا يقول...

السلام عليكم
عقبال لما يبقى عند المدونه سنين كتير اوى وديما منورة البلوجر كله
وربنا معاكى فى الامتحانات وان شاء الله تخلصى على خير

MaNoOoSh يقول...

ربنا معاكى يا قمر وان شاء الله بالتوفيق فى الامتحانات
ربنا معاااااااااااااااااااااااااكي وهتوحشينا قويييييييييييي

بلاش فضايح يقول...

كل سنة والمدونة بكل الخير وكل سنة وانتى طيبة يارب يا قمر

riyadh يقول...

تغيبي وليك وحشة
بيتك وبنتك أمانة في رقبتنا لعند ماترجعي بالسلامة

yoyo يقول...

صباحك سكر يا نور

كل سنة وانت طيبة
كل سنة ومدونتك جميلة و منورة بين كل المدونات يارب

المدونة بتكون جزء اساسى منا زى ما قولت بنتك
كانها حتة منك وان لم تكن هى انت وانت هى

انا بشكر شريف جدا انه عرفنا على اجمل واحن نور
كل سنة وانتى بالف خير يارب
ربنا يعينك ويوفقك يا هندسة

تحياتى
يويو

الميكروباص يقول...

خير اللهم أجعله خير
قرأت العنوان في الريدر . . . . . وقلت نعم؟؟؟



بلاش افسر بأه


المهم

يا ستي كل عام والمدونه وصاحبة المدونه بخير

tarek alghnam يقول...

الرائعه حبيبه
حد يعمل ف بنته كدة
متعرفيش ان بنتك غاليه عندى جدا
فياريت تهتمى بيها شويه
كل سنه وانتى ومدونتك بالف خير
ويارب دائما بأسلوبك الرئع تسعدينا بكتاباتك
تقبلى تحياتى
ودمتى بود

Sweet Violet يقول...

يعنى افهم من كده انك دخلتى طفشتى الراجل من التدوين ؟؟؟

لالالالا الواحد كده شكله هيعيد النظر تانى فى العلاقه اللى انا مش مرتاحه ليها دى اصلا P:

و كمان مش انا قولتلك انى شريرة اصلا و اعترفت بكده ليه بقى مستغربة ؟؟؟

و ياستى ليكى عندى مش اذكرك فى غروب الشمس .. فى الشروق بس D:

ربنا معاك ياقمر فى الفتره دى و ان شاء الله تعدى بسرعه و تبقى معانا من جديد

بالتوفيق و النجاح ان شاء الله

siraj يقول...

كل سنة وانتى مدونة يا نور
وكل سنة وانتى متألقة يا اختى العزيزة

والله راح نشتاقلك لكن عزائنا الوحيد انك راح اتركزي اكثر فى الدراسة ان شاء الله ربي ايوفك يارب الهم امين

هانى زينهم يقول...

كل سنة وانتى طيبة وعقبال 100 سنة ليكى وللمدونة . وعلى فكرة اسم المدونة لايق عليها وعلى نوع المواضيع بتاعتها . بس هى حبيبة ولا نور ؟

Meme يقول...

ايه ده هو انا ارجع و انتي تختفي؟؟؟؟

طووويب حبقى اغلس عليكي لحد ماترجعي

كل سنه و انتي و مدونتك بألف خير
و ابقي خلينا نشوفك

MǿиY El-Shreef يقول...

كل سنه وانتي طيبة يا نور

والله بنتك ف عنينا :D

بس ترجعي بقى بعد الاكزامات ع طول

وميرسي اوي لشريف عشان عرفك ع المدونات وبقيتي واحده مننا

ربنا معاكي ياقمره

مستنيينك

gogo!sf يقول...

يا حبيبت قلبى كل سنه وانتى ومدونتك الرائعه بخير دايما

وبجد انتى فعلا دخلتى قلبى وبحبك كده زى ما بحب النسكافيه بجد والله زى اختى واكتر رغم انى مش اعرفك شخصيا بس اكيد هنعرف بعض شخصيا بأذن الله

وان شاء الله بالنجاح والتوفيق
بس ركزى شويه فى المذاكرة بجد

ربنا معاكى يا قمر

تمنياتى لكى بالنجاح والتوفيق يا رب

بس ابقى طمنينى عليكى بأستمرار

الا انتى بتصورى فيلم ايه دلوقتى

اه نــــســـيــــتـــ

راح الــــــدورى فى شـــربــه ميه

جــــــوجـــــو فى الــــجــــون

عالم ماريونت يقول...

نوووووووووووووووووور

ازيك يا حبيبة قلبي؟
انا لما شفت التعليق عندي مش عارفة لية معرفتكيش
بس بجد اسمك ولقبك كمان حلوين اوي

ربنا يوفقك في الامتحانات
وترجعي تاني عشان هتوحشيني موت
وربنا يخليلك المدونة بتاعتك

اختك رنا

mm يقول...

اولا اكيد هاتوحشينا ...على فكرة انا لسة قريالك بوستاتك قريب وعجبتنى اوى لانها خفيفة بجد زى دمك اكيد خفيف اوى وروحك كمان حلوة اوى انتى بعدتى زى ما قلتى كتير قبل كدة لظروف خارجة عن ارادتك وزعلتى بس المرة دى لازم ما تزعليش خالص ... عارفة لية علشان الامتحانات ودى مستقبلك وحياتك اللى هاتبنى منها بيت وهاتجيبى بعدها بنت اكيد هاتبقى حلوة زيك صح ولا انا غلطانة بالتوفيق والنجاح ان شاء اللة

قلب ينبض لله يقول...

فعلا يانور ولا اقولك ياحبيبة:))
التدوين عالم سحري جميل بيعرفنا بناس أكثر من رائعين زيك كدا دا غير جوانب الحياة اللي بيتناولها بعض المدونين بطريقة مختلفة وجميله

هتوحشينا ياقمر وبجد أحنا بنشكر الظروف اللي خلتك تبئي واحدة مننا
وأنتي روحك الحلوة وخفة دمك وبساطتك في التعامل خلت كل الناس تحبك زيي كدا:)

بقولك هاتكوني في الكلية يوم الأحد؟
لو كدا أنا ها أبئي موجوده برده وها أكلمك أعرف منك ظروفك أيه

يلا سلام ياقمر

Ahmed يقول...

يادي موسم الامتحانات اللي عمال يسحب الناس واحد ورا التاني ده

ياستي ربنا يوفقك ان شاء الله ويعديلك الامتحانات ديه على أحسن خير ان شاء الله

البيت بتاعك ده بيت ظريف وجميل جدا

كفايه انك استضفتينا فيه (اينعم من غير ولا شاي ولا حتى كوباية ميه) بس برضه البيت ده جميل جدا

ويارب دايما يفضل مفتوح

mohamed ghalia يقول...

يارب دايما كده بينا يانور
ربنا يكرمك ويسعدك وبالتوفيق دايما

ليكوريكا يقول...

ربنا يوفقك يا حبيبه

مستنيين "نور" دايما ...

دمتي بخير .

وميض ابتسامة يقول...

شئ جميل ان الانسان يكون عنده مساحة من الزمان والمكان مفضلة بيعيش فيها مع نفسه وامانيه واحبابه وذكرياته

اتمنى من الله ان تنولى كل ما حلمت به مساحة من المكان (عش الزوجية) وابنة جميلة وحنينة زى امها .. وزوج يعرف ربنا ومحترم

وقبل كل ده الحصول على شهادتك بتفوق اللهم تقبل آمين ...

MOHAMMED ELBANNA يقول...

الله يقويكي على الامتحانات ، شدي حيلك .
بالنجاح والتوفيق .
محمــــد
طريق النجاح

فتاه حالمه يقول...

انا جه متاخره بس انا جه بردو
وش مكسوف واحمر ومش عارف يتكلم
مبروك علي مرور سنه علي المدونه
والعمر كله ليكي يا قمر وتصدعينا قصدي وتسعدينا ببوستاتك
كل سنه انتي وبيتك وبنتك بخير يا نور النوري كاونوري

امواااااااااااااااااااااااااة
سلام يا لوزة
ومش هفجرك المره دي

غير معرف يقول...

على فكره واحد مايو ده مليان مناسبات فبالأضافه انه عيد العمال وكمان الذكرى السنويه لكتب كتابى كمان اهو اكتشفت انه عيد ميلاد بلوج عزيز علينا كلنا.....واضح انه يوم مفترج.......ربنا يوفقك يا حبيبه فى الشهرين الجايين دول وانشاء الله نعملك هنا احتفال كبييييييييييير بنجاحك والبلوج حيضلم لحد ما ترجعى تنوريه تانى

سمكه واحده يقول...

كل سنه وانتي طيبه يا جميل
وديما معانا
ياله شدي حيلك الشهرين دول وربنا يوفقك ومستنيك اهو
ربنا معاكي
هتوحشينا بس يعني ابقي طلي طله كده لما تستريحي شويه من المذاكره يعني
سلام يا قمر
ونلتقي بعد الفاصل
ابقي طمنينا

Hossam يقول...

حبيبة قلبى حبيبة او نور الاتنين اصلا احلى من بعض
بجد البسوست رائع خلانى احس بشعور غريب تجاة مدونتى
خلتينى احس ان مدونتى فعلا شىء غالى عليا
شكرا ليكى وربنا يخليكى ليها بجد مش بهرج
تحياتى

Kiara يقول...

كوووووووووول سنة وانتي والمدونه طيبين مش ملاحظه اني لما بغيب برجع بلاقي عيد ميلاد يااما عيد ميلادك ياما عيد ميلاد مدونتك :)

موجة يقول...

بسم الله الرحمن الرحيم
وبعد ذكر الله
نبدا بالسلامو عليكو ورحمة الله
بعد السلام
بصى بقى
اما بالنسبة لعيد ميلاد مدونتك فدة كل سنة وانتى طيبة يامدونتها
اما بالنسبة لقصة حيات مدونتك
فبطلى رغى ياختى وروحى شوفى حاجة تنفعك فى الربلاسمنت
ولا فى السيكس سيجما ومش هتكسف اقول عليها سيكس سيجما
لان اللى سماها كدة كان فاهم اللى فيها
عارف فعلا انها حقيرة وتستاهل الاسم ده
اما بالنسبة للاعتزال
فدعوة ممتازة تدعونى ليها
وانا قبلت الدعوة
وهيا بنا نتشرنق وزى كل سنة
نعلن عن الشرنقة اللى احنا هندخل فيها حتى يريد الله بالخروج الى النور
مش انتى
نور عكس ضلمة يعنى
سلاموزى ياقمرى

القمر الساهر يقول...

اول زيارة لي في مدونتك

وواضح انك طيوبة ورقيقة جدا

ان شاء الله يكون بيننا تواصل

تحياتي

..... يقول...

بصراحة اختي الكريمة ادميتي فؤادي برحيل الفارس الملثم رغم اني لا اعرفه لكن دخولي مدونته وقراءتي لبعض حروفه اوجع قلبي
رحمه الله واسكنه فسيح جناته
بالنسبة لبيتك وبنتك الله يبلغك ويكون لك البيت والبنت والولد
والله يخلي لي بيتك الحالي ويجعله عامر ان شاء الله
تحياتي لك

هديل احمد يقول...

بصراحة احب اشكر الي عمل منتدي قصاقيص حبيبة واكيد طبعا الي عمل المنتدي اكيد اكيد حبيبةههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه وانا علي فكرة اول مرة احط تعليق وانا من مصر واسمي هديل احمد وعندي 20 سنة وفي كلية طب وبحب المنتدي ده وشكرا

نـــــور يقول...

هديل
******


انا نور ودى مدونتى
على فكره دى اسمها مدونه او بلوج مش منتدى
متشكره جدا لانه عجبك ولانك بتحبيه
بس خلاص صاحبته تقريبا هجرته ادعيلها بقى ترجع تانى

منوره واتمنى تكونى موجوده دايما

على فكره اسم هديل غالى عليا جدا :)