زى تمام إيمانى بأمى وأبويا وزى ما انا عارفه عدد أخواتى وهويات أصحابى الأقرب لقلبى،
زى إيمانى بفصل الشتا وقدسية نسمة ليل الصيف،
وزى ما بعرف أحب وبتقن كره النفاق،
زى ما انا مصدقة أوى إنى بعشق الوقوف على عتبات شهر رمضان.
رمضان يعنى شكل الشوارع ومحلات الفوانيس وأطباق السلطة وكوباية التمر باللبن
رمضان يعنى الفانوس القديم لا بشكل الجديد ولا بلعبة على شكل المفتش كرومبو ولا بوجى وطمطم بداله
رمضان يعنى لمتنا فى بيت جدى على سفرة طويلة مجمعانا كلنا وصوت ضحكنا جايب آخر الشارع
وهيفضل رمضان فى بالى هو الصحبة الحلوة ولمة صلاة التراويح ومسكة المصحف وانتظار الآذان
كل رمضان وانتوا واللى بتحبوهم وبيحبوكوا طيبين ياناس ياللى انا بحبهم
وكل سنة وانتوا محققين كل اللى تتمنوه واكتر واكتر
رمضان كريم سعيد :)
هناك 6 تعليقات:
كل سنة و انت طيبة يا بيبا :)و ربنا يتقبل منك صالح الأعمال إن شاء الله
بس فعلا فعلا.. أموت و اعرف إيه موضوع طبق السلاطة دة عشان مش أول مرة تقولي عليه
وكمان بتعترفي إنك مش بتمسكي المصحف غير في رمضان؟؟
Too baaaaad :p
جميل بجد وصفك لرمضان. حسيت بالدفا فيه. ربنا يسعدك و يتقبل مننا كلنا
:)
ماشى يابوبه مارسى طقوس التغليس براحتك ياافندم :)
بصى موضوع طبق السلطة ده هو ببساطه انى من عشاق السلطة بس فى الغالب احنا فى بيتنا مش ملتزمين بتقديمه الا فى رمضان بس بتلاقيه مش بيفارق الفطار ولا السحور وعشان كده بقى مرتبط عندى برمضان
جايز مايكونش عند كل الناس مرتبط برمضان بس هو من طقوسى الخاصه :)
انا مش بمسك المصحف غير فى رمضان؟ :(
والله انا بقرا قرآن عادى بس هو فى رمضان عشان بقراه كل يوم ومواظبه عليه مش اكتر
متشكره بجد يابوبه على كلامك العسول اللى فى الاخر وشكرا كمان انك اول كومنت :)
على الهامش
انا فعلا مش غايبه عن بلوجك انا بس بقرا من بعيد لبعيد مش بكومنت كتير الا انى لما بغيب بغيب عن الكل لاى سبب قهرى
كل سنة وانتى وكل اللى بتحبيهم بخير :)
مازالت كلماتك لها طابعها الخاص
يا باشمهندسه
كل عام وانتى بخير
كل رمضان وانتي طيبه
في السعوديه هنا مفيش اي مظاهر او روح
بس للامانه هنا العبادات بتاخد حقها اوي
ومفيش عمل يشغل عن صلاه حتي ولو كانت نوافل .
كل سنه وانتو طيبين يارب .
رمضان كريم
كل سنه وانتى طيبه يارب
فعلا رجعتيلى جو رمضان الرائع بكلماتك الرائعه
كل سنة وانتي طيبة
إرسال تعليق