السبت، يونيو 14

فلسفتى .....فى الحزن و الفرح



وسط كم كبييير من الحزن....... حسيت انى بتخنق،

وكالعادة الحل الوحيد هو البلكونة مع منظر الغروب و وحدتى اللى بحبها فيه ،

ساعتها قررت إنى آخد معايا حاجة واحدة تؤنس وحدتى وفى نفس الوقت لا اسمع صوتها ولا يزعجنى الحاحها بسؤالى مالك ؟؟؟

الحاجة دى كانت الفايل اللى فيه الورق اللى بسجل فيه مدوناتى وقلمى الرصاص واستيكتى ,,,,,,,


حسيت يمكن شويه إن الهوا البارد بيغسل همومى لكنى مش لاقيه حاجه اكتبها وفى نفس الوقت حاسة انى محتاجة اكتب .....واكتب ......واكتب........

سرحت فى كل همومى وفى وسطها افتكرت رأى ممثل شفته فى التليفزيون بيقول للمذيعة " أنا لما بحس باكتآب بلبس لبس خفيف ممكن يبقى شورت وكات لونه ابيض أو اى لون مبهج فاتح واحط برفان لطيف واقعد اسمع مزيكا كويسه تريح اعصابى وافكر نفسى بذكريات حلوة ودمها خفيف ......"


أنا دايما كنت بعمل كده خصوصا فى ايام الامتحانات وجوها الكئيب .

لكنى اكتشفت إنى كنت غلط خااااالص ... كنت دايما لما بحزن بضحك ولما بفرح بضحك ،،،،،

فحسيت خلاص إن الضحكة فقدت معناها....مابقاش ليها وقت ولا ملامح ومابقتش دلالة على أى حاجة .


ظهرتلى فلسفة جديدة ......... فلسفة فى الحزن والفرح..... وهى ,,,,,


إنى لازم احزن لما احس انى حزينة ولازم اضحك لما أكون فرحانة لانى لما بوهم نفسى إنى مش زعلانة ومش حزينة و بضحك ..يمكن الكل بيصدقنى بس الحقيقة إنى بكون كدابة كبيرة لدرجة انى بصدق نفسى .


لأنى بيجيلى وقت وببقى زى البالونة اللى معبية هوا وإما إنى بنفجر لوحدى أو انى بستنى أى شكة دبوس بسيطة قوى تخلصنى من كل الهوا أقصد الحزن اللى جوايا .

طب وليه ؟؟ وايه المشكلة إنى لما أشوف اللى يحزنى احزن ولما اشوف الى يفرحنى اضحك و افرح واغنى وارقص كمان ..؟؟؟!!


كده ابقى بلون كل حاجة بلونها الحقيقى... الابيض أبيض ....الاسود اسود .

أما اللى انا كنت فيه ده كان كله رمادى فى رمادى كان كله زيف تحت مسمى لازم أكون مرحة وما اشيلش هم حاجة ...

واهى كلها أيام وبتعدى وماتستاهلش اننا نزعل عليها .


بجد الدموع بتريح وبتغسل هموم واللى بيكابر فيها ربنا بيحرمه من نعمتها .


دى مش دعوة للتشاؤم لا سمح الله ولا نقص إيمان بالله وبالقدر فى قلبى ,,,,,,,

لكن الحكاية كلها شوية صدق مع النفس وكلام طالع من قلب حزين وكله أنات وآآآآهات


هناك 40 تعليقًا:

Unknown يقول...

يسعدني دائما اني اكون اول من يرد على مدوناتك يا حبيبة و اتمنى من الله لكي كل التوفيق.

انتي ابدعتي في المدونة و اتا عارف مدى الاحساس اللي نابع من جواكي انتي كلامك مزبوط كل حاجة لازم يكون ليها لونها الحقيقي بس كمان احنا ما نخلي لونها غامق كثير يعني ما نزيد اللون فيها كثير اي مشكلة ممكن تمر على الانسان ما هي الا سحابة و بتعدي كل مشكلة او كل مصيبة بتمر على الانسان ليها عمر محدد بتنتهي لما يخلص عمرها لكن هي بتمر و احنا بدورنا نتوجه الى الله عز وجل انه يخففها علينا بالدعاء و التضرع الى الله.

كل ما استطيع ان اقوله يا حبيبة هو الدعاء الى الله تعالى لنا و لكي و لجميع المسلمين ان يفك كربنا و مصائبنا و ان يهونها علينا و ان يكفينا شرها.

أسأل الله العزيز القدير ان يبارك لنا في اعمارنا و اوقاتنا و ان يجعلها في طاعته و اسأل الله ان يجعل ايامنا كلها افراح و سعادة و ان يبعدنا عن المصائب و ان يكفينا شرها انه على كل شيء قدير.

ahmedmarvel يقول...

ده اول تعليق ليا فى مدوناتك يابشمهندسة حبيبه بس كنت اتمنى ارد على المدونات الباقيه بس انتى عارفه الوقت مايسمحش . بس بجد مدوناتك حلوه اوى والمدونة دى بالذات اعجبتنى كتير اوى لان الموضوع ده بيحصل كتير اوى معايا بس انا بئى احسن حاجه بالنسبالى انى اروح اقعد شوية على البحر وممكن اروح اقعد مع صديقي الانتيم اشكيله همومى لان الواحد لو فضل شايل الهموم دى جواه هيتعب كتير اوى فطبعا لازم نحكيها لاى حد قريب مننا . وبعدين انا شايف اننا مش لازم نزعل كتير لان مفيش حاجه فى الدنيا تستاهل , فيها ايه يعني لو نزعل فى وقتها وخلاص يعني بالكتير اوى الواحد يزعل يوم او يومين مش اكتر من كده لان الفرح لما بيجيلنا برده بيجيلنا فى وقت صغير اوى برده بالكتير ممكن يوم او يومين فليه بئى نزعل اكتر من كده . انا عن نفسي مااحبش ازعل نفسي على اى حاجه لان الدنيا مش مستاهله واحسن حاجه ان الواحد يكون مبسوط بس برده مش لدرجة الجنون يعني . وشكرا ليكي جدا واتمنى من الله ان يوفقك.

Tamer Nabil Moussa يقول...

الانسان عايش فى الدنيا وطول ما هو عايش فيها مرة يحزن او يفرح او يكتئب معرض لااى مود يكون علية


جميل انك كتبتى عن مود انتى موجودة علية دة فى حد زاتة راحة نفسية كبيرة وبعدين عمر الدموع ما كانت عيبة ولا حرام بالعكس

تعرفى مرة قريت بحث كان بيقول ان الدموع التى تنزل من العيون فى وقت الافراح والمناسبات السعيدة ليست دموع فرح

بل دموع احزان متخزنة من اوقات ماضية وعند تفاعل الانسان مع موقف سعيد يبكى وتنزل الدموع من الخزانة

ودة صحيح يعنى مثال الام والاب يبكون وقت فرح الابن او الابنة مع انة حدث سعيد

ربنا يوفقك ويكرمك

تحياتى

نـــــور يقول...

اللهم تقبل ياعبدالله وبكون سعيدة والله لما انت بتكون اول معلق على اى مدونة من مدوناتى واتمنى تفضلى كده على طول .

نـــــور يقول...

يا 100 اهلا وسهلا بيك يااحمد والله ياراجل فرحت لما زرتنى وطبعا متشكرة على زوقك وكلامك الحلو وطبعا مقدرة مشاغلك يااحمد بيه ربنا يقويك عليها.

اما بالنسبة للحزن ووقته فاللى انت قلته بالظبط هو اللى انا اقصده اننا لازم نحزن ونفرح اول باول يعنى لو حزنا نحزن يوم ولا اتنين ويروح الحزن لحاله علشان بعدها نقدر نفرح وصدرنا نضيف ..انما لما بنخبيه ونكابر فيه ممكن بجد يمثلنا مشكلة ويعملنا بالونة احزان..مااختلفناش يامارفل وكويس انك بتعرف تطلع نفسك من المود .
اتمنى تتكرر الزيارة اللى اتاخرت عليا دى.

نـــــور يقول...

تامر
يارب دايما منور مدوناتى ويارب تفضل تنورنى على طول. مصدقه جدا حكاية ان دموع الفرح دى مش حقيقية لانها بتكون تخليص احزان فى وقت فى فرح كبير لان الانسان بطبيعته بيسعى ورا راحته ودى بالفطرة حتى لو تبدو التصرفات مش مقصودة لكن " ولقد خلقنا الانسان فى كبد"

وطبعا احلى حاجة فى الدنيا انك تسيب قلمك هو اللى يوصفك لانه دايما مابيكدبش بيتكلم من غير حساب لاى حاجة يعنى كلام صادق ومن القلب.
مزيد من التوفيق ليك ولينا ياتامر ومستنيه اشوفك فى الحلقة الاخيرة زى مااتفقنا.

الاسطى يقول...

ماشاء الله .. كلامك جميل جدااا و قلمه ليه طعم مختلف ..
عايز أقولك إن الحزن أوقات بيبقى ليه طعم اجمل بكتير من طعم الفرحة ..
ليه طعم داخلى خاص .. ما يحسش بيه غير اللى جربه ..
احنا بنقول الحزن .. مش الكآبة .. و الفرق كبييييييييير ..
دى أول زيارة ليا .. عايز أقولك أنا كمان من الزقازيق ..
تحياتى ليكى ...

نـــــور يقول...

الاسطى
سعيدة جدااااا بزيارتك وكلامك الجميل عنى. وفعلا كلامك مظبوط جدا لان الحزن احيانا بيكون له طعم حلو بس لما بيكون عابر لكن مش لما مرارته بتطول.
سعيده باول زيارة ليك واتمنى ماتكونش الاخيرة

blue-wave يقول...

عارفه
انا كمان لما بحزن مش بقدر ابين لأن الناس مالهاش ذنب انكد عليها وبيبقى الحل فى ورقه وقلم
لكن لأمتى؟

Tamer Nabil Moussa يقول...

habiba
ازيك اخبارك اية

انا نزلت الحلقة الثانية من ارض النور

شرفينا

انا ضفتك عندى يعنى خلاص كل شوى هجى عندك نتبادل افكار ومناقشة مش هتخلص

مش عارف بقى عرفت اعمل زى ما قولتى ولا لا اصل بكتب بدون وضع طريق مفين فى الكتابة ولا قواعد ادبية مجرد بكتب عشان اوصل افكار معينة

تحياتى

نـــــور يقول...

د/ عمرو

اهلا بيك والحمد لله ان مدونتى مش بتعمل معاك اللى مدونتك بتعمله معايا ..وانت عارف طبعا هى بتعمل ايه بلاش فضايح ربنا امر بالستر.
بس اللى عايزة اقولهولك ان ايوة الناس مالهاش ذنب انك تنكد عليها بس فى حاجة بتقول ان فى ناس بتبقى اولى بهمك بحكم انك احيانا بيبقى واجب عليك تبقى جمبهم لان الحكاية بتبقى عشم وراحة ..على اى حال ربنا مايجيبش هم .
ولحد امتى دى بقى علمها عند ربنا هو وحده يعرفها ....

قلب ينبض لله يقول...

انا ها اعمل بكلامك يا حبيبه

وفعلا الدموع دي نعمة من عند ربنا هانكابر فيها ليه؟

بتمنالك كل حب وخير

فارس بلا جواد يقول...

حبيبة
آسف اذا كنت اتاخرت في التعليق علي موضوعك
الكلام اللي قولتيه يعتبر دراسة للنفس البشرية
ليه ساعات بنوهم نفسنا بالفرح مع أننا من الداخل بنتألم
صعب أن الانسان يخدع نفسة لأن مهما يهرب هيلاقي نفسه في النهاية في طريق مسدود .. لازم نواجه نفسنا بالحقيقة
موضوع جميل وخلاني أتفاعل معاه بجد
مستني الجديد منك دايما

نـــــور يقول...

اهلا ياقلب ياجميل وكويس قوى انك هتعملى بكلامى بس المهم تكونى فعلا اقتنعتى بيه علشان كده هتعملى بيه ..
ويارب ياحبيبتى مايجيبش هم ولا حزن ابدااا ويقربلك البعيد ااااامييييين

نـــــور يقول...

فارس
ماتتاسفش لان الحكاية تهريج..
اما بخصوص الدراسة النفسية فدى حاجة جت معايا بصراحة صدفة مع انى محللة كويس -بيقولوا يعنى- لان الناس اللى زى حضرتك هما اللى يفكروا فيها بما انك دكتور انما احنا نووووووووووووو

جد مبسوطة بتفاعلك معايا واتمنى دايما افضل عند حسن الظن

ليكوريكا يقول...

انا معاكي

قلبا وقالبا زي مبيقولوا

ويمكن دي افضل فلسفه فعلا ممكن يوصل ليها الواحد

بس دلوقتي كل الناس بتقول اني بقيت كئيب

لانه وللأسف

الحزن اكتر بكتييييييييييييييييير اوي من الفرح في حياتنا اليومين دول

اتمنالك الفرحه والسعاده دايما

وربنا ميجيب احزان ابدا

نـــــور يقول...

ليكوريكا

فرحتنى اول زيارة ليك ويارب تتكرر
فعلا والله الحزن بقى اكتر بكتيييييييير بس هو ده قانون الكون "ولقد خلقنا الانسان فى كبد" صدق الله العظيم
بس ربنا يهونها علينا ويفرح قلبك وقلبى وقلوب المسلمين يارب

ولــــــــــو يقول...

انا اول ما قريت اول سطر قلت لاااااا
بس والله ماجيت هنا قبل كده ولا حد حكالي واستغربت
قلت يمكن هندسة والدماغ واحدة
او شرقاوية والدم واحد
بس الحمد لله لما كملت لقيت الموضوع ارقي واعلى من ان حد زيي يكتبه
انا اتعقدت خلاص

البوست ده بيحكي عن كوكتيل من مجموعة ناس غالية عليا اوي وانا معاهم
بيفكروا بنفس تفكيرك
تفكير اللون الرمادي ده
بس اهو الواحد بيحاول انه مش يزعل حد كفاية هو يزعل مش اكتر
لكن فعلا احنا بالطريقة دي يبقى بنضحك على نفسنا

مدونتك جميلة جدا وان شاء الله اتمنى الظروف تسمحلي اكون صديق دائم

سلاماتي واحتراماتي
بس والله ما عرفت مدونتك قبل النهادرة
للاسف يعني بس ده معناه اني برئ
انا برئ

نـــــور يقول...

ولو
نورتنى يابن بلادى وسعيدة بزيارتك جدا واتمنى بجد انك تشرفنى كتير بس انا ان شاء الله هضيفك عندى علشان اجى عندك واشوف جديدك على طول ..

وبعدين انت كده فهمتنى غلط خاااالص انا مقصدتش انك نقلت الفكرة او سرقتها ابدا والله .انا لما قلتلك كده كان قصدى ان الاحساس ده بجد حقيقى وسبحان الله حصل فيه توراد افكار على الرغم من ان الفكرة اللى كل واحد فينا بيتكلم فيها غير التانيه.
متشكرة قوى على كلامك الجميل فيا وبعدين بجد مدونتك عجبيتنى جدااا واحنا اللى مش قد اللى انت عامله فيها ياعم وفكر بجد فى موضوع اتحاد مهندسين البلكونات العرب ده......

aya يقول...

حبيبه اول زياره ليا هنا بس بجد حست بكلامك اوي فعلا زي ماقلتي سعات احنا اما بنزعل مش بنحب نبين للناس الي بنحبهم اننا زعلانين يمكن عشان مش عايزينهم يقلقوا علينااو يمكن عشان مش عايزين حد كل شويه من حبه وقلقه عليكي يفضل يقول مالك مالك مالك ؟ لدرجه انه من كتر السؤال بنتخنق زياده فبنفضل نداري الخزن بالفرح والفرح بيبان زي ماهوه فرح فالناس بتفتكرك علي طول فرحانه ومبسوطه ومحدش في الدنيا يقدر يزعلك بس انتي من جواكي بتكون نفسك تصرخي وتقولي بطلوووو تسالوا مالي وانا هبان زعلانه زي البشر الموضوع ده بيحصل معايه كتير اوي بالذات في ايام الامتحانات وطبعا لو بينت اني مخنوقه او اي حاجه من الاحاسيس دي مما هتقلق وانا من قلقها بخاف عليها هيه وبالتالي ممكن اعيط قبل اما انام كده يعني اعيط تحت المكتب اهو اطلع الي جوايا بس مش بالضروري ان الضحكه تفقد معناها لو مثلتي وجودها سعات رغبتك في انك مش تبيني الحزن تخليكي تضحكي من قلبك معرفش ازاي

عموما بجد بوست عجبني وحاسسني بيا
ميرس يا قمر علي زيارتك واتمني دايما

أمل فتحى عزت يقول...

اسعدنى المرور بمدونتك وأتمنى لك التقدم والمزيد من الاهداف النبيلة


كما أدعوك لزيارة مدونتى والتى محتواها


تعالوا نسافر المسافات الى زمن من المحبة لاينتهى


كما أدعوك لقرأة قصتى


(بكل لغات العالم أحبك)

نـــــور يقول...

tota
الصغنطوطة شكرا لزيارتك نورتينى وشكرا على رايك كمان وعلى وجهة نظرك يظهر ان معظم الناس كده بتضحك وهى مجروحة ويمكن اللى حسسك بكلامى زى ما بتقولى هو انى كتبته بجد وانا حاسه بيه قوى لا كنت بصيغه علشان كتابه ولا روايه ولا نشر
ربنا مايجيب حزن يارب ويارب كمان يدوم التواصل

Miss. Sosa يقول...

فلسفتك صح جدا انا اضم صوتى لصوتك فيها لان الاشياء تعرف بالتضاد
فلولا المر ماكنش الحلو هيتعرف انه حلو

نفس الشيء بنعمله في المذاكرة واللعب
يعني لو كنا طول التيرم نذاكر بما يرضي الله تقوم لما تيجي الاجازة نفرح بيها ونستمتع بيها
لكن لما نكون بنلعب في وقت المذاكرة لما تيجي الاجازة تبقى ماسخة ومالهاش طعم

لازم ندى كل شيء حقه الحزن حقه والفرح حقه واللعب حقه والمذاكرة حقها
بكدا حياتنا هيبقى لها طعم مش كله زي بعضه.

نـــــور يقول...

انا اسعد وشرفتنى زيارتك ليا وطبعا يشرفنى زيارة مدونتك
تشرفنى متابعتك ليا ويارب دوام التواصل

نـــــور يقول...

miss.sasa
نورتينى ومبسوطة بمرورك متشكرة على كلامك وطبعا اضافة كويسة منك للمثل اللى ضربتيه للمتناقضات الكتيرة
يارب يتكرر المرور

ahmed saker يقول...

فعلا الواحد لازم يفضل علي طبيعته

علي الاقل لما اصحابه يشفوه يعرفوا ان هو متضايق فيحاولوا يخففوا عنه

و بجد احسن حاجة في البنت ان دمعتها بتنزل بسهوله عكس الولاد و دي طبعا فطرة ربنا

دمت بخير

Tamer Nabil Moussa يقول...

ازيك يا
habiba

اخبارك اية

انا نزلت الحلقة الثالثة من ارض النور

تحياتى

أمل فتحى عزت يقول...

عزيزتى الصادقة
أجل انت محقة فى ان وقت الحزن يجب ان نحزن ووقت الفرح يجب ان نفرح ولا يجب المضى على وتيرة واحدة وهى الضحكات حتى ولو كنا نعتصر بداخلنا والمصارحة مع النفس شىء مهم جدا لكى يعيش الانسان مرتاحاً مع نفسه ومع الاخرين والتصنع رياء على النفس و يجعل النفس فى حالة عدم استقرار وهناك علاج أجمل فى كلتا الحالتين الحزن و الفرح وهو كلمات الله فكنت مثلا عند شعورى بالحزن أقرأ سورة يوسف وأتأمل مدى المعناة التى عناها نبى مثل يوسف عليه السلام من طفولته وفى شبابه وصبر حتى نال رضى الله فعلى شأنه وأزال همه وكيف نتعلم الصبر الجميل على الشدائد والمحن ولا ننسى وقت الحزن ووقت الفرح نخص لنا وقتاً للتأمل
لنفرغ شحناتنا ..
وفقك الله
أختى حبيبة لك رد فى مدونتى على تعليقك بخصوص القصة أرجو العودة اليه
وشكرأ

نـــــور يقول...
أزال المؤلف هذا التعليق.
نـــــور يقول...

أمل فتحى عزت
************

متشكرة قوى على الصفات الجميلة اللى قرنتى اسمى بيها وانا سعيدة لانها خارجة من شخصية جميلة زى شخصية حضرتك

الحاجة التانية شكرا على اتفاقك معايا فى الرأى وده شرف كبير. واحب اقولك ان فعلا القران ليه سحر خاص وراحة غريبة اعجز عن وصفها لكن اكيد كل مسلم جربها من دون كلامى

الحاجة التالتة متشكرة قوى على سعة صدرك لتعليقى ويسعدنى التواصل مع حضرتك ونورت عدالة المحكمة يافندم
تقبلى سلامى وتحياتى ليكى ودعواتى بالتوفيق

نـــــور يقول...

ahmed saker
***********
اهلا بزيارتك الاولى ليا اسعدتنى جدا
وفعلا يااحمد والله فى ناس بيبقى ليك فيهم عشم وليهم عشم فيك علشان كدا بيكونوا اولى الناس بهمك فلازم تظهرلهم لما تكون تعبان علشان يخففوا المك لكن كمان احيانا بنحتاج للوحدة لانها بتريح

وفعلا دموع البنت اسهل من دموع الولد لكن الدموع دايما لا عيب ولا حرام وانا بحترم جدااا الراجل اللى يبكى لكنننننننننننننن مش اى بكى... على الحاجة العالية بس مع الحفاظ على كرامته وعزة نفسه ....ليك تحياتى

Blue Nile يقول...

ميرسي يا حبيبة على تشريفك ليا
موضوعك جميل جدا وبيلمس داخل اي واحد فينا
كلنا بنتعرض لمواقف حزن لكن كتير مننا لايجيدالتعامل معاها
بس فعلا الدموع نعمة كبيرةمن ربنا
لانها بالنسبالي اول خطواتي في التخلص من الحزن اللي جوايا.
موضوعك جميل واسلوبك كمان

نـــــور يقول...

blue nile
**********
اهلا بيكى وبأول تعليق ليكى على مدوناتى سعيدة لاتفاقك معايا فى الرأى
وعايزة اقولك مش انتى لوحدك اللى بتحبى الدموع ناس كتيرة كدا خصوصا من البنات ومن الولاد احيانا بس اللى بيبكوا جوه اوضتهم علشان دموعهم ماتبانش
على اى حال ربنا يفرح قلبى وقلبك وكل المسلمين يارب
نورتينى وياريت يتكر مرورك

just me يقول...

كلامك بجد فى كتير من اللى انا بحسه
انا فعلا يمكن بعمل زيك فى حاجات كتيره
وانا معاكى طبعا فى اننا لازم ندى الاشياء الوانها الحقيقيه
ومش معنى ده ان الحزن وحش
بالعكس لما نحزن ونبكى كمان ده بيحسسنا بطعم الفرح لما نيجى نفرح
فبنفرح بجد

نـــــور يقول...

لست ادرى
********
برافو كده انتى فهمتى اللى عايزة اوصلة بالظبط
سعيدة بمرورك واتمنى انه يتكرر

نورألآيمان يقول...

السلام عليكم

التامل راحة والقرب من الله والصلاة افضل واقيم وراحة للنفس


السلام عليكم

نـــــور يقول...

نور الايمان
********
طبعا لا خلاف على اللى بتقوليه بس احنا بنتكلم فى اللى بيحصل وبعدين ندورله على سبب لراحة
دمت بكل خير

الفارس الملثم يقول...

اكيد من طبيعة الاشياء ان الانسان لا يكبت مشاعره فعندما يشعر بالفرح يضحك وعندما يشعر بالحزن يبكي , فالدموع ضروره لاعادة التوازن النفسي للانسان ... لكن

ما قصدته في بوست محبش اشكي في ناس حياتهم تفيض بالحزن والذي قد يكون اشبه بالقدر فهم لم يختاروا الحزن فان تركوا ما يشعرونه من حزن يظهر دائما علي وجوهم سيكونوا اشخاص منعزلين عن العالم لذا يتظاهروا بضحك مصطنع حتي لا يكون حزنهم سبب في ايلام الناس المقربين منهم ...

كما ربما تبدو مشكلتهم ليس انهم لا يبكون فلا يوجد انسان طبيعي لا يبكي لكن لا يحبوا ان يري دموعم وضعفهم احد لان العطف من عيون الاخرين يكون موجع لهم لاقص درجه..

طبعا انا قصدت نمط معين من الناس وليس تعميم اقصد به الجميع

معلش هي مدونة ثرثره مع نفسي يغلب عليها الاكتئاب شويه يعني بنكد علي اللي يدخلها هههههه

سعدت جدا بالمرور هنا

تحياتي
محمد

نـــــور يقول...

الفارس الملثم
*************
انا اسعد بمرورك ويارب يدوم
اما بخصوص اللى انت قلته فهى فعلا حالات مش معممة ومش معنى انى قلت وجهة نظر او انت قلت وجهة نظر ان دى حالة للكل .....
اما بخصوص مدونتك الكئيبة فانا بصراحة مادخلتش غيرها عندك لان اقرب وسيله تعرف بيها اللى قدامك هى كلامه وياسلام بقى لما يبقى بينه وبين نفسه تبقى حاجة عظمة خالص
نورتنى جدااااا دمت بكل خير

فارس بلا جواد يقول...

حبيبة
انتي ليه لاغية التعليق في البوست الجديد؟
يا ريت تفتحية عشان عايز اعلق عليه