من كام يوم حصلت مشكلة مش ظريفة ابدا أبدا
إذ فجأتن وعلى حين غفلة منى أنا وأهالى الحتة كلهم سمعت خبر مشئوم من أخويا. وهو بيصحينى من النوم الصبح لقيته بيقولى "عندى ليكى خبر مش تمام"
قلتله "خير..البلد ولعت؟"
قالى "لا للاسف..بس مفيش نت فى البيت" طبعا مش عارفه اوصفلكوا شكل عنيا وهى 2 متر بره وشى ولا بقى المفتوح على مصراعيه ولا ايدى اللى بقت بقدرة قادر على قمة دماغى.
وإذا بى بقوله"يالهوتى ..لييييييييه؟!!"
قالى "أصل فى عمال بيحفروا مش عارف ليه كده وقطعوا كابل التليفون وبالتالى مفيش حرارة فى تليفون البيت علشان الروتر يشتغل"
طبعا عنيا دلوقت بقت 4 متر بره مش 2وذلك لان القانون بيقول"ان الخضه تتناسب طرديا مع مربع المسافه"
وقلتله" كمااااااااااااان؟..عععععععع..ياربى عالقحط يعنى لا نت ولا تليفون بيت ياصباح الخساير يعنى هنقضيها موبايل؟.طويب"
وقمت وأنا مش متصوره شكلى قدام المعيده اللى مفروض كنت ابعتلها حل الريبورت عالميل فى يومين الاجازة ولا أصلا البرنامج اللى كنت مستنياه عالميل علشان احل الريبورت من اساسه ولا الريبورت التانى اللى مطلوب منى بعد يومين ولسه مش عملت عليه سيرش اصلا وكنت مأجلاه للاجازة ولا..ولا..ولا..والاهم مدونتى اللى بقالى يومين مش شفتها وهتجنن وأشوفها.
رجعت اكلم أخويا وهو اصلا خايف يكلمنى لانه عارفه انا مدايقه قد ايه من الخبر ده وأنا بروح رياضيه تقبلت الموقف
وقلتله "طيب ياض فين موبايلى أتصل بالمقاطيع صحابى علشان اقولهم انى مش هقدر ابعتلهم البريزنتيشن عالميل زى مااتفقنا وإن تليفون البيت تعيشوا انتوا وماتحاولوش تكلمونى"
لقيته بيضحكلى ببلاهه وبيقولى "هئ هئ هئ مفيهوش كريديت"
أنا:"نااااااااعاااااااااام ...ياغلبى انت اخر مره تصحينى وشك اسود عالصبح ..انتوا خلصتوا رصيدى ؟"
هو –يومئ برأسه مجيبا بنعم-ايه رأيكوا مصطلح جبار اهه-
أنا:"وفخور بنفسك ياخويا؟..روح منك للى كلت دراع جوزها..طب ادينى 10 جنيه سلف أشحن احنا اخر الشهر وأنا مفلسة"
هو:"هئ هئ هئ..الواد حبظلم صاحبى اخد منى كل فلوسى اصله مزنوق حبتين"
أنا:"طب وانت رايح للى كلت دراع جوزها ابقى خد حبظلم معاك وقوله انى انا اللى باعتاه هروح معاك على طول...هيا اذهبا للجحيم معا"
أنا خلاص كنت هتجنن وعماله اضحك بتهييس الدنيا اسودت فى وشى وحسيت كأنى محاصره فى بيتنا لا عارفه أوصل لحد ولا حد يوصلى.
بصراحه عشت حياتى تى فى وأفلام كوميدى وأبص عالجهاز من بعيد باحتقار وهو جثة هامده.
ولما فقت من الغيبوبه ولقيت نفسى فى عز الازمه بجد لقيتنى بسأل نفسى سؤال غلس .."ليه حياتى وحياة كتير زيى ممكن تقف لما النت والتليفون يتقطعوا؟" وافتكرت ازمة قطع الكابل وازمة الاسبوعين اللى حصلت فى مصر من سنه وحال البلد اللى تقريبا وقف.
طب امال قبل النت والتليفون الناس كانت عايشه ازاى؟
ولا يمكن اللى يجرب التكنولوجيات دى مايعرفش يعيش من غيرها بدليل إن قبلنا مكانوش بيستخدموها وعايشين.
طب تتصوروا شكل حياة حد فينا دلوقت لو جرب ده ومره واحده ركب مع مخموخ وظاظا وجرجير آلة الزمن ورجع 3000 سنة ورا؟؟
تفتكروا وجود التكنولوجى فى دمنا بالشكل ده لدرجة لما حد ينسى موبايله فى البيت يومه بيقف دى ظاهرة صحية ولا ظاهرة ملوخية؟ :)
أنا بصراحة مش عارفة
كانت معكم من امام كمبيوتر الكلية المسروق ...حبيبة :)
