بيقولوا النهارده عيد الحب
والله عمرى ماعرفت تاريخ عيد الحب ده الا السنه اللى فاتت
كنت اصلا بعرفه بالصدفه لما الاقى اف ام شايطه وعماله تطلع حاجات حمرا وانا بذاكر من أيام ثانوى
ومكنتش اعرف تاريخه ايه الا لما حفظته السنه اللى فاتت
قلت يابت عيب انتى كبرتى ولازم تبقى مثقفه وتعرفى تاريخ عيد الحب
اومال ايه !
الظريف بقى انى المره الوحيده اللى حضرت فيها عيد الحب فى الجامعه جالى احباط
ابص الناحيه دى الاقى صندوق احمر رايح
والناحيه دى كيس هدايا احمر جاى
وهنا بوكيه ورد احمر ماشى
وهناك ورده حمرا بتتحرك
والجامعه كلها مسكتها الحصبه
لحد ما شفت بوكيه ورد ماقدرتش اقاوم جماله
قلت لااااااا لازم اشوف بنت المحظوظه اللى البوكيه ده رايح لها
انا همشى ورا الواد لحد مايقابلها واشوفها
شويه وهى اللى جت واشوف بت اكلتها البرومه
هو اى نعم الواد كمان كان الصدا واكله بس البوكيه كان حلو
انا فضلت اقول ياعينى ناس ليها ورد وناس ليها بهيه على رأى صلاح ذو الفقار فى فيلم رد كلبى
الصراحه بيقولوا حرام البتاع ده
يعنى مش مفروض نحتفل بيه خصوصا ان الحب مش لازم يبقى فى يوم بعينه
بس يلا خلى العالم بتوع الهدايا يسترزقوا
الظريف بقى انى كنت قاعده بشيت مع واحده صحبتى امبارح الساعه 12
لقيتها بتقولى
"ها هتقضى الفالتنين مع مين السنادى؟"
"ها هتقضى الفالتنين مع مين السنادى؟"
انا برضو رديت عليها برد اظرف "يعنى هو انا يختى كنت قضيته مع مين قبل كده علشان اقضيه مع حد السنادى؟..اللى يسمعك بتقولى كده يقول البت يعنى اشطه وآخر تمام وكل عيد حب مظبطه نفسها!
ده انا حتى ناقص ابوس على ايد الموبايل علشان حد يعبرنى ويقولى كل سنه وانتى اى حاجه
شكلى والله انا اللى هبعت مسج لنفسى علشان اهنى نفسى بعيد الحب
اه
وكمان وانا راجعه من الجامعه بكره هروح اشترى لنفسى قلب احمر
واحطه فى اوضتى واكتب عليه
love
عاتى عاتى
هو اى نعم محمد الفارس مات وسايب فى روحى جرح باتساع السما
واى نعم برضو قرفانه وكارهه الدنيا وقلوب الناس اللى حواليا خصوصا اللى بحبهم ومش بيحسوا
واى نعم برضو مرضانه وعيانه وزهقانه
بس برضو
هى دى مناسبه حد يفوتها؟
!!!
ده الفالنتين يارجاله
وسمعنى احلى سلام حيرت قلبى معاك وانا بدارى واخبى
للفنان والمطرب الشعبى العبقرى فريد الاطرش
وكل فالن طين وانتى طيبه يابت يابيبه
ولا تزعلى نفسك خااااااااالص
الصحه بالدنيا
هناك 27 تعليقًا:
هيييييييييييييييه
انا اول واحد يقول ل بيبه هابى فالنتين:))
كل عيد حب و انتى طيبه
و يابيبه ربنا يجعل ايامك كلها حب و سعادة
بلاش يعنى نكتف نفسنا باليوم ده .. و ان شاء الله هيجى الفارس اللى يجبلك هدايا مش كل يوم علشان الواقعيه بس المهم انه يكون كل اسبوع ..لو ماعملش كده يبقى انا مش موافقه بقى و الموضوع مش هيتم يعنى مش هيتم انا بقول اهو ((:
كل سنه و انتى طيبه ياقمر
هابى ظالنتين يا جمييييييييل
و الله أنا برضه معاكى الحب مش محاتج يوم عشان نقعد نعبر عنه و نمشى نسبل على نفسنا
على فكرة انتى وحشانى مووووووت
هههههههههههههههه و الله انتي اللي فهماني يلا نعيد على بعض و خلاص
كل سنه و انت بخير
....جا وقت الترجمه... اكلتها البرومه ... اكلتها ال ايه؟؟؟؟؟؟؟؟ يعني ايه البرومه؟؟؟
وحشتينا يا قمر
نور عينى وحبيبة عمرى
عيب عليكى لما تقولى محدش قالك هابى فالنتين عشان انا قلتهالك امبارح وقلت لك انى مش هقولها لحد غيرك وانتى كمان قلتى مش هتقوليها لغيرى
بس تعرفى عجبتينى فى رمى الكلام ع الناس اللى بتحبيها ومش حاسين دى
كدة الناس تقول ايه يا حبيبتى انك بتحبينى من طرف واحد اخس عليكى
ههههههههههههههههههههه
غمزة بعينى وبوسة على خدك
تعرفى يا نور عينى ان السنة دى احلى سنة فى عمرى عشان انا وانتى مع بعض وبنحب بعض يارب دايما كدة
يلا يا ستى سايبه لك تعليق سخن مولع بمناسبة عيد الحب ولا تزعلى نفسك
انا قاعده اهو بعمل بطاطس مش سامعه صوت الزيت اصلي مش لاقيه حاجه اعملها ومنزلتش انهارده بكسف بكسف قلت اكل شبسي وماما شدتني وقالتلي تعالي بقي منتي فاضيه كنت بروح الجامعه الاقي الدنيا شايله حجات وبلاد تشلني وبلاد تحطني وكل ما واحد يجي يقرب مني افتكره جي وجيبلي معاه الهديه اقوم علي حيلي كده تطلع اوت حتي البنات كنت بفكرهم جيبلني بردو مهو الايام دي توقعي بقي كل حاجه (متخديش في بالك )
ياستي هو متهيقلي حرام الاحتفال بيه
ولا ده قصر ديل ههههه اللله اعلم
ياستي سيبك ربنا يجعل ايامك كلها حب وسعاده وربنا يكرمنا كلنا يارب
بس بالله عليكي متحطيش في دماغك يا حبيبه وفرفشي كده حساكي مخنوقه ومضايقه وانا محبكيش تبقي كده طب تعالي ياستي وانا اجبلك اكبر دبدوب
بس تجبيلي انتي كمان حكم انا بحب اللي يهتم بيا واخده بالك انتي اما اقوم البطاطس هتتحرق والله شكلها هتتحرق عيد حب ايه بس البنات والاواد شكلهم بيبقي يموت من الضحك الا طبعا المخطوبين والمجوزين حكم انا احب الحلال اوي (وش بيغمز)
وحشتيني موت
امووووه
اللهم ارحم عبدك محمد وارتقى به الى اعلى درجات جنانك يا الله يا رحمن يارحيم
حتي مشغلين دلوقيت ورده وبتقول مالي طب وانا مالي وانا مالي بالاحزان وانا مالي
(واحنا ملنا احنا كمان ياست ورده)
اصل ماماتشي بتحب ورده اغنيه جميله
عيد الهب بقي
تعرفي احلي كلمه سمعتها
من الواد مروان كان يقولي ايه
انا بهابك
اصله بينطق الح( ه)
اما اقوم اتصل بيه بالتليفون اسمعها منه والله احلي كلمه منه زي العسل
بهابك ياله بقي
اصلي روحت جبت البطاطس وقلت اعلق تاني
هههههههههههههههههههههه
يخرب عقلك ياحبيبة ولا بلاش يخرب يسلم عقلك:)
ناس ليها فالنتاين وناس ليها محاضرات وسكاشن
فكرتيني بأيام الجامعه
الناس كلها بتحتفل بالقلوب والوردو واحنا عندنا محاضرات وسكاشن:):(
هابي فالنتين دا ياقمروخدي البوسة دي مني:)
دايما نشوفك منوره معانا يا حبيبه
كل يوم يمر علينا بخير لله الحمد عليه
وكل يوم بيمر بينا لازم يكون فى حب وموده وخير ومش شرط يوم واحد فى العالم كله
وبعدين موبايلك ايه اللي هستقبل هنكدب بقى
انا جالى خبر ان اغتيل فى ظروف غامضه
ربنا يعوضك خير حبيبتى
كل يوم وكل ساعه وطول العمر يا رب تكونى طيبه وبخير يا قلبي
هههههههههههههه
هابي فلانتين دي
في اي يوم وفي اي وقت من غير ميعاد محدد
والسنه الي جايه تبقى احلا سنه
happy valentine to u:))
بخصوص المدونة بتاعتى لو فتحتيها بانترنت اكسبلور هتبقى جميلة وحلوة اما الفاير فوكس فتكرهينى وتكرهى حياتك ههههه
تحياتى:))
hhhhhhhhhhhhhhhhh
Happy Valentine day :)
أنا برده زيك كده بس من السنه اللى فاتت وانا قلت ساعت مشوف بتاع الورد قدام الجامعه هشترى واحده لنفسى أمل ايه لازم أدلع نفسى برده
وسبحان الله يا أختى ملقتوش واقف للسنه اللى فاتت ولا السنه دى !!!!
ناس لها حظوظ بقى هههههههههههه
شوفي أنا بصراحة ما كنتش ناوي أكتب عن الموضوع ده .. لكن بالشكل ده هأكتببببب
ياريت تقرأي ردي على نفس الموضوع عند الأخت مفروسة
https://www.blogger.com/comment.g?blogID=3505512870591652302&postID=5566516206639147088
ولا يهمك يا ستى
كل يوم وانتى طيبة
ويا رب عن قريب نسمع ان فى واحد حليوة وزى العسل واخلاقه تمام ومتدين
ويجيبلك كل هدايا الدنيا
ولا تزعلي نفسك
ربنا يرزقك بالرجل الصالح في الوقت المناسب ان شاء الله
وخلي بالك
ايامنا كلها ايام حب
ولا اية
كل عيد حب وانتى طيبه يا حبيبه
هتلاقى ابن الحلال اللى يتصل بيكى ويقولك كلعيد حب وانتى طيبه
ويجيبك جنينه ورد احمر بحالها
مش بوكيه
هههههههههههههههههههههههه
ههههههههههههههههه
عسل و الله يا بيبة
يا ستى ولا تزعلى نفسك نقولها احنا لبعضننا بقى طالما مش فى حد بيقولها لنا يعنى انت تقولى ليا وانا اقولك
""هابى فلانتين دى "
يا حبيبتى كل عيد حب وكل لحظة وانت بالف خير يارب
ويارب دايما معانا ومنورنا
واشوف بت اكلتها البرومه
هو اى نعم الواد كمان كان الصدا واكله بس البوكيه كان حلو
هههههههههههههه حلوة دى والله ناسها لها الورد وناس لها مخطرتش على بالك يوم تسال عنى آآآآه يا قلبى يا ما انت شايل و ساكت
كل سنة وانت طيبة يا بيبة
تحياتى
يويو
جزاكي الله كل خير على ردك على الموضوع عندي .. أنا ما أقصدكيش انتي .. بس بصراحة اتضايقت جدا لأن في مدونات كتير ناس تناولوا الموضوع وكأننا أنهينا كل شئ في حياتنا ولم يبقى إلا الفالنتين .. زي ما قلت أنا بصراحة في الأول ما كنتش حابب أكتب عن الموضوع ده .. لكن تناولته من عدة جوانب بعيدا عن الحرمة والحل .. الموضوع موجود في المدونة تقرأيه إن شاء الله
كمان شئ .. المدونات معمولة علشان نتناقش ونحاول نصحح لبعض الصورة .. وليس معنى اعتراض الانسان على فكرة إنه بيعترض على الشخص نفسه .. إنما على الفكرة نفسها أحيانا من باب التواصي بالخير وتوضيح المعلومة الصحيحة
جزاكي الله خير مرة تانية
هههههههههههههههههههههه
خلاص اوعى تزعلى كل عيد حب وانتى طيبة
ولو تحبى خدى فلوس الهدية اهيه هههههههههههه
دمتى فى سعادة
عارفة انا امبارح شفت عندى فى النتيجة
ما يشير الى عيد الحب هذا!!... وضحكت زيك لانى مش عارف اشمعنى يعنى اليوم ده بالذات!!
.. طيب ليه ميكونش بكرة أو بعد اسبوع أو فى اى وقت !! عموما انا طبعا فى غمار انشغالى واجتماعاتى على مدار اليوم نسيت حكاية الفالنتاين ولكن والحمد الله وعقب انتهاء يوم العمل الطويل .. افتكرت فجأة فأمسكت الموبايل وقلت لزوجتى العزيزة كل عيد حب وانت طيبة .. فقالت ولو انها جاية متأخرة وانت طيب ياراجل ياطيب !!
طبعا التهنئة دى المفروض انها تكون للجميع فعيد الحب على حد علمى مش مقصور على بنت المحظوظة البت اللى اكلتها البرومة وبوكيه الورد الاحمر!!
لالالالالالالالالا عيد الحب للجميع والورد الاحمر لينا كلنا .. فبلاش الاحباط ده لو سمحتى ياابنتى العزيزة والا سوف اتهمك بأن البرومة قربت من عقلك وهذا ما لم اسمح به ابداااااااااااااااا .
كل عيد حب وانت طيبة
ياستى بكره تتهنى وتزهقى من الورد فى الفلانتين
بس مكنش فى داعى تشهرى بنفسك وتفضحى روحك على المدونه وتقولى انك ( بايره) ومحدش معبرك...مش منظر يعنى
وش مطلع لسانه
وعلى العموم يا ستى كل عام وانتى فى منتهى الحب
والسنه الجايه تطلبى النجده علشان تشيل اكوام الورد الاحمر من بيتكوا ومن على السلم ومدخل العماره
وطبعهاً النجده تيجى ويعملولك محضر نظافه ويشيلوا الورد ده كله
دمه زى السكر البوست ده
تحياتى
عاتي عاتي
زيك زي ناس كتير
تعالي انضمي لشيلتنا تعالي
ههههههههه
عموما
كل سنه وانت طيبه
والناس كلها تحب بعض
عمرى ما قريت ليكى بوست دمه خفيف زى البوست دا ... شدنى بجد من البداية للنهاية رغم إنه انكتب كتير ... لكن أسلوبك ليه طعم تانى ...
تحياااااتىىىىىىى
تصدقى موتينى من الضحك وانا بقرا
اجمل بوست فى عيد الحب مش تقليدى يعنى
على العموم وانا كمان مجاليش وردة
حمرة ولا حد قال لى كل سنة وانتى بحب
بس مش مهم بقى هنعمل اية
كل سنة وانتى فى اجمل حب وسعادة دايما
ومتزعليش خالص ان شاء اللة السنة الجاية يكون معاكى الي يقولك كل سنة وانتى معايا....
والله كبرتى يا حبيبه وبقيتى تعرفى فى عيد الحب والفالنتيات......الاول بس عاوز اطرح تساؤلات ملحه عليه الحاحا....زى ما كلنا عارفين ان اليوم ده ذكرى موت الكونت فالنتين بطريقه مشابهه للشهيد سليمان الحلبى....طب ده ايه علاقته بالحب؟ وهل ده ليه مغزى فى بطن الشاعر يفهمه كل الحبيبه؟ ثانيا اللون الاحمر الدموى الشهير فى اليوم ده هل ليه معنى؟ ولا برضه فى بطن الشاعر ولا ميفهموش الا الحبيبه؟
بعد كده اقولك وعن اقتناع وثقه وتجربه ان 80% من المحبين بيتخانقوا اليوم ده. ويمكن ده نتيجة عيون الحسوديه اللى بيراقبوا بوكيهات الورد اللى رايحه وجايه (ماعدا انتى طبعا). لما تشوفى بوكيه ورد فى اليوم ده افتكرى دايما الخناقه والنكد اللى حيحصلوا بعد تسليمه وتاكدى انك بالتدريج وبعد كام سنه(وعلى فرض انك فضلتى بدون بوكيه كام سنه) حتقولى موش عاوزه هدايا فى اليوم ده. انا شخصيا من وجهة نظرى ان اللى مش بيجيلوا هدايا فى اليوم ده بيستمتع اكتر من الناس كلها لانه بيضخك كتيييييير على اشكال الناس وهى بتشتر الهدايا او وهى بتسلمها او اللى بتستلمها. حقيقى بيكون شكلهم فانى جدا. تسبيلة العيون مع هدوء الصوت والضحكه البلهاء المعبره. كلها اشياء مترابطه تخللى الواحد يموت من الضحك......رأيى تقضيها اليوم ده ضحك وتريقه وشكرا على كده......تحياتى
هابي فلانتين داي
وحشاني ياقمر
إرسال تعليق