فردت ضهرها عالسرير وهى بتاخد نفس عميق بعناء
رفعت راسها فوق المخدة ونادتله"بموت ياحبيبى"
حط ايده ورا ضهرها
رفع راسها وضمها لصدره وحضنها
"راسك ورجليكى زى النار"
عنيها دمعت
قومها من على صدره,قعدها, نزل رجليها من عالسرير
وسابها وخرج
.
.
.
رجع بعد دقيقتين بطبق بلاستيك صغير وطرحة قطن
وخرج تانى ورجع بطبق بلاستيك كبير فيه ميه
قعد على ركبتيه كأنه لسه قايم من سجدة
رفع رجليها من عالارض وحطهم فى الطبق الكبير
رفع قميصها وفضل يغسل رجليها لحد مااطمن ان حرارتهم نزلت
قام قعد جمبها وسند ضهرها على صدره
بلل الطرحة القطن بميه من الطبق الصغير وفضل يعملها كمادات
.
.
حرارتها نزلت
باس جبينها
حضن راسها
طبطب على كتفها
ميل على ودنها وقالها "بحبـك"
.
طبعت بوسه حنينة على كف ايده وحضنتها
دفنت راسها بين ضلوعه..ونــــامـت
:)
* العنوان جزء من أغنية "ممكن" غناها كل من "وجيه عزيز ومحمد منير"
هناك 14 تعليقًا:
جميل المعنى جميل وصف الحرف له جميل سريان الكلمات لتشكل نهرا يغتسل فيه المحب والمحبة
مانثرتيه مميز يا ست نور
ربنا يهبك كل الخير
انا عنيا دمعت الحنية مع الحب جميلة اووووووي
يا ستى كان اداها وحده نوفالجين بدال وجع القلب ده ؟؟
ده انا قلبى وجعنى من كتر الحقد قصدى من كتر الحب هههههههه
بجد وصفك حقيقى لحياه زوجيه مستقرة
الحب بين الزوجين يجعلهم اكثر حناناً وخوفاً على بعض
اما الاغنيه فهى رائعه ومنير اروع طبعا
تسلم ايدك يا نور
الحب الحقيقى دواء عظيم لأمراض كثيرة فى حياتنا، ياريت نشوف كتير من العلاقات بين الأزواج زى العلاقة اللى فى القصة دى.
أبدعتى
ازيك يانور غياب طويل عن مدونتك
بس هاتفضل مكان جميل زى ما سبته
بجد التدوينة رائعة برغم بساطتها كلها معانى
البوست ده فكرنى باغنيه محمد عدويه حكاية روح بسيط وفيه معانى كتير
------------
http://madoegy.blogspot.com/
حلوة
:)
الإبداع مش جديد عليكي يا باشمهندسه
خالص تحياتي وعميق تقديري واحترامي
اختي الغاليه بيبه .. وحشني الرغي في مدونتك .. مع انك مش بتسألي على اخوكي بس يلا مش مشكله ...
المشهد الاكتر من ممتع اللي انتي كتبتي تفاصيله في البوست بتاعك ، ما هو إلا تجسيد عملي للرحمة والمودة المطلوبة بين الزوج وزوجته .. ووالله مش شرط انهم يكونو واخدين بعض عن حب ، لكن بمجرد انهم حنــّـو على بعض ورحمو بعض ربنا بيقذف الحب والحنية في قلوبهم ..
نفسي كل زوج يعامل زوجته بما يرضي ربنا ، نفسي كل زوجه تتقي الله في زوجها
نفسي كل اتنين يعتبروا معاملتهم لبعض جزء من معاملتهم لربهم عز وجل
لو ده حصل هتختفي نسب الطلاق اللي في زيادة كارثية ، وهتختفي كل مشاكل المجتمع لانها في الأصل مشكله اسريه تفاقمت في الانسان حولته لمجرم
تحياتي لقلم بييبه المتــّاع
سلام عليكم علي اجمل بشمهندسة في مصر عاملة اية يانور اخبارك اية كل سنة وانتي طيبة ياقمر وحشتني ياوحشة بطلتي تسالي ولا حتى تسيبي رسالة علي الياهو دا بلاش يابت بس ماشي انا برضوا الكبيرة رمضان كريم اتمني تكوني بخير انا عايزة اتكلم معاكي كتير طمنيني عليكي اختك ريمو لاالة الا الله
انا جيييييت من تانى عاملة ايه بجد واحشنى كلامك ان شاء الله هابقى موجود على طووول بقى
حبيبة
ازيك
أغيب أغيب وأرجع ألاقيكي زي ما انتي صاحبه أخف دم وأحلى أسلوب في البلوجر
تحياتي ليكي
وحشتني زيارتك
عارفه انا لو مكانه كنت عملت ايه
اقلك ولا بلاش عشان محدش يحدفني بحاجه مش لازم ابوخ اي حاجه حلوه
المهم فينك انتي ياستو هانم
حمدالله علي سلمتك
ياله رمضان كريم
كل سنه وانتي بخير
اه ياستي كان زمان باباها مسميها ملك شوفتي بقي
ازيك يا ست الكل؟ على فكرة انا احيانا بسأل العصفورة عليكي :)
كل سنة و انتي طيبه
إرسال تعليق