الثلاثاء، أكتوبر 14

فارس...نسوانجى


أفادت آخر الاخبار التى تصدر عن المجلات العلمية إن دلوقت الضغط على زرار الباور بتاع التليفزيون ضار جدا بالصحة-زى التدخين كده-بس ده على اقوى شويه وبيسبب التهييس بالاضافة الى بعض انواع من الشلل بكل اشكاله الهندسية النصفى والرباعى والخماسى وشبه المنحرف أحيانا وهثبتلكوا صحة كلامى

أنا حكيت قبل كده اللى حصلى من التليفزيون فى فكريرات -جمع فكرة- سابقة

المرادى فتحت التليفزيون وانا بتغدى اهو يبلع الاكل شويه وفتح برضه على واحده من قنوات الاغانى دقيقة وجت اغنية للمغنى اللبنانى فارس كرم -الواد الوسيم ده اللى كان بيغنى صلينى وقولى لابوكى- برضه مش عارفينه ؟ مش مهم

المهم اشتهر من البداية فى اغانية بخفة الدم لكن المرادى بصراحه مش عارفه قلة ...من الاخر

بدأت الأغنيه بمزيكا جباره حبيتها جداا ولقيته بيقول فى مطلعها

"عم تطلع للنسوان شو بدك منهن قلى"

ياااااااااسلام ياعم فارس قدوة حسنه ومش عايز الشباب يبص عالبنات تمام محترررررررررررم بس هو كان لازم تقول نسوان يعنى؟ ايه المصطلحات الحقيرة دى؟!!

ماعلينا كمل عليا وقال

"لك ياللى مايحب النسوان الله يبعتله علة"

اخخخخخخخخخخ ان شالله انت اللى يبعتلك علة يابعيد ده انا كنت بحبك يخرب بيت سنينك

وشوية لقيته بيقول

"مين بيسترجى يبعد عن حوا درجة انا شخصيا نسوانجى ..نسوانجى بقولها وبصوتى على"

لا وبيقولها بطريقة يعنى مفخرة عالاخر كأنه حرر فلسطين مثلا :)

طب والنبى مجاهرة بالسوء طب ده كلام ؟!

يعنى لما الشركات بتحب تعمل اعلانات للمنتجات بتاعتها بتجيب الفنانين المحبوبين علشان كل اللى بيحب فنان يعمل زيه وياكل اللى بياكله او يشرب اللى بيشربه طب ده واحد طالع فى كليب وهو الراجل الوحيد فيه والباقيين كلهم بنات انما اييييييه...وااااااو حاجة مسخرة عالاخر استغفر الله العظيم يبقى بيقول ايه لشباب الجيل اللى مش ناقصين بوظان اصلا ؟!

هو سؤال واحد بيتنطط فى دماغى..
هو مفيش رقابة على كلمات الاغانى ولا ايه ؟

انا يمكن ربنا كارمنى ومش بقعد قدام تليفزيون كتير علشان مش اسمع الكلام اللى بينقض الوضوء ده باسم الفن

طب بالله عليكوا ده فن ده؟!

الا بجد بجد بقى هو فيه رقابة على كلام الاغانى ولا لا؟

طب تفتكروا لو كان فيه رقابة كانت هتسيب الكلام ده ينزل؟

افيدونا افادكم الله

والله جيت احملكوا الاغنية بس مش رضيت تنزل تقريبا خافت عليكوا من الاعراض اللى بتحصل نتيجة سماعها عموما اللى يحب يسمعها يعنى وهيدور عليها مفيش مانع بس للى عندهم حساسية زيى قبل الضغط على زر "بلاى" اطلبوا 122 وده رقم الاسعاااااااف :))

هناك 29 تعليقًا:

كـــيــــــــارا يقول...

اووووووووول تعليق

الفارس الملثم يقول...

هههههههههههه

ايه يا بنتي ده ونعم الطرب اللي بيحض علي الاخلاق الحميده

علي فكره هو تعبير النسوان متهيالي عند بعض الدول العربيه بيعتبر لفظ عادي , يمكن هنا بس ليه دلاله مش مريحه

رقابة ايه يا حبيبه , يعني بعد المطربه المحترمه بتاعت السطوع تفتكري في رقابه ..

ربنا ستر برده ان الراجل مكنش شارب حاجه وخرف اكتر من كده ههههههههه

دايما بحب خفة الدم العاليه اللي ملهاش حل في بوستاتك يا حبيبه ...

تحياتي دائما

كـــيــــــــارا يقول...

هو مفيش رقابة على كلمات الاغانى ولا ايه ؟

ههههههههههههههه طبعا طبعا ده كدا رقابه رقابه يعني مش اب كلام


لا وبيقول الكلام وهو مفتخر

ههههههههههههههههههههه

ناقصه ضغط يعلي ياحبيبه

حرااااااااااام

yoyo يقول...

ههههههههههههه
والله لسه متكلمة عن الاغنية دى مع أخويا لما سمعنها المشكلة انه فرحان اوى يعنى وكان الموضوع عادى

والله كنت بحب فارس دا فعلا دمه خفيف من أول قولى لابوكى وكمان التنورة يعنى اغانيه لذيذة وصوته قوى كمان

عارفة المشكلة ان كلمة (النسوان ) عندنا لها وقع مش لطيف على الاذن يعنى واغلبنا بيعتبرها عيب وكدا فى الدول العربية عادى يعنى بس العملية وسعت اوى من الاخ فارس

رقابة اىه بس يا بيبة والله الفيديو كليب مشاء الله ونعمة الشباب يعنى هههههههههههه اهوا بجملة الاخ نسوانجى كمان

هههههههههههه عسل والله يا بيبة

تحياتى
يويو

محمود حسن العدل يقول...

السلام عليكم ياحبيبة
للاسف الشديد فى رقابة
بس مش الرقبة المحترمة اللى احنا نعرفها .
رقابة بتسال الاغنية دى توزيعها هاجيب كام ولصالح مين الفلوس دى
هيا دى الرقابة بتاعة اليومبن دول
ولما نحب ننقد الاغانى اللى من النوع دة
يرد السيد المبجل وزير الاعلام ويقولك فى زرار فى التليفزيون بيقفل التليفزيون .
والله الراجل دة تعب معنا اوى بصراحة كتر الف خيرة .
يعنى انا هاحكم على اختى وعلى بنتى وابنى واخويا الصغير وامشيهم على عقلية السيد وزير الاعلام المحترم.
ربنا يتولنا برحمتة
تحياتى بوست هايل وهادف
تحياااااااااااااااااااااااااااااااتى

غير معرف يقول...

ههههههههههههه
والله انتي زي العسل يا حبيبه
بس لا لا لا ااااااااااا حبيبه

يا بنتي دا فيه رقابه من زماااااااااااان

من ايام حط النقط ع الحروف
وبوس الواوا
وحاجات تانيه كتييييييييير ع النمط دا بس انا مش فاكره دلوقتي

زعلانه ليه بقي ان الراجل نسوانجي
هههههههههههههههههه

SHAPE YOUR LIFE (ABOALI) يقول...

الله ناظر الى
الله مطلع علي
الله سيحاسبنى
كان هو الدستور
فكانت الجنة الجزاء
وقربهم من الرحمن حبور
فلما تغير الدستور
وبدأنا العزف على القانون
ولم يصبح للكلمات مرور
تحت بند انا حر ومش مسئول
بدء الخراب يعم
وهيفاء ونانسى وسيكا
وشعبولا والقلة
والواد ابو استيكة
هم العنوان والمبتغى
والحلوه قاعده على الكورنيش
مسكه قصب وجنبيها جيش
والسح الدح امبو
وسلامى الى الست منص
والواد كمنص
ودورى يا دنيا على الدوار
وياسلام عليكى وانتى راكبه حمار
واه اه يا غزالى


المهم الطفح الجلدى المسمى الاغانى
ده عنوان
فى قصة لذيذه احكيها وامرنا لله


كان فى قوم عاوزين يغزوا قوم تانين
فبعتوا جواسيس علشان يشوفوا احوالهم علشان يعدوا العده للغزو
المهم راح الجواسيس
فوجدوا طفل يبكى
قالوا بتبكى ليه
قال لهم اصلى كنت بنشن على العصفوره
بسهمى فصيب سهمى العصفوره من مرة واحده
دلوقتى بعد مرتين
الجواسيس قالوا اه يا خربنا
ورجعوا لبلادهم وقالوا الناس دول مش يتم غزوهم حاليا شوفوا الاولاد بيعملوا ايه
ما بالكوا بالكبار
المهم لفت الايام على راى ورده
وجاء الجواسيس تانى
فوجدوا طفل بس من نوع تانى
الطفل يمسك ناى وعمال يزمر
قالوا حان الوقت للغزو
وتم الغزو بنجاح فائق منقطع النظير
ايه ايه اييييييييه

تحياتى

momken يقول...

ازيك يا حبيبه
يا ستى كل سنه وانتى طيبه وتقبل الله منك الطاعات ووفقك الى الدوام على الطاعه

شوفى ياستى
قيل فى اثر ان لم تستحى فافعل ماشئت

الكليبات والاغانى اغلبها لا تعلم شىء عن الحياء او الادب فى اللفظ والمعنى
الاقصى من كده ان الكليبات لا تعلم اى شىء عن الحب اصلا
كلها كلمات جنسيه مثيره للغرائز والشهوات

لكن بالنسبه لكلمه النسوان دى كلمه عربيه فسحه ومافيهاش حاجه
لكنها عندنا فى مصر حساسه شويه
كمان كلمه (مره) للتعبير عن السيده برضه كلمه فصيحه ومافيهاش حاجه

لكن كلمه نسونجى طبعا منتهى السفاله
وقله الادب ولازم يتوب منها

مع انى معرفش المطرب والحقيقه معرفش اغلب المطربين لانى جاهل شويه

الا انى بحيكى على غيرتك وحيائك
كمان على اسلوبك الى دمه خفيف

تحياتى

Mohamed Dawod يقول...

مبدئيا فعلا اغلب الدول العربيه بتستخدم تعبير نسوان بدون ادنى حرج. بس المشكله فى توظيف التعبير مع حساب المثلثات اللى كان بيحصل فى الأغنيه زى ما فهمتها منك. الحمد لله الذى لم يطلعنى على ما أخفى عنى من ما شابه. بالنسبه للرقابه فاللى انا اعرفه ان قنوات الاغانى الجديده لا تخضع لاى رقابه الا رقابة النايل سات. وحتى رقابة النايل سات رقابه مش فوريه. يعنى ممكن قناه تعمل حاجه ضد كل القيم اللى فى المجتمع بتاخد الاول تحذير بعد ما تكون المصيبه حصلت واذا اتكرر الفعل تانى ساعتها بس بيوقفوا بث القناه. بس مش عارف القناه اللى بتقولى عليها اللى بتعرض الاغنيه دى اخدت جواب تحذير ولا جواب شكر........نصيحتى ليكى لو بتعملى دايت وعاوزه تصدى نفسك عن الاكل انك تستمرى فى فتح مثل هذه القنوات بس تحطى جنبك جهاز قياس ضغط الدم....والله اعلى واعلم.....تحياتى وشكرا

محمد فاروق الشاذلى يقول...

على فكرة كلمة نسوان فى لبنان وبعض الدول العربية كلمة عادية وتعنى الستات ومش كلمة عيب عندهم.

إنما المضمون برضو مش حلو يعنى إيه سيادته يطلع يقول إنه بيحب الستات، مش كفاية بلاوى التحرش اللى كل شوية نسمع عنها.

حبيبة الروح يقول...

هاي يا بيبي
اسيك يا بنوتي
مش انا قولت متفتحيش النون اساسا ماشي لما تيجي بس عشان مش بتسمعي الكلام الي يبع الاكل قال
قصدك يسد النفس ويحرق الدم
يا ريت علي الكلام بس الكلام والبس والي من غير لابس والافعال ويوووووووووووووووووووووة
انا جبت القنوات دي الصبح بتاع نص ساعه يا اختي وعينك ما تشوف الا النور ادي نقل وكل قناة ازفت من الي قبلهامن جو اشقر نيله ده
الي بينتج كلب ايوة كلب ده ميسماش كليب كلب للعري اذا كان هو ولا المودل الي معاه
منهم لله لواحده معرفش اسمها وشغاله قرف بردو يا شيخه بلا هم والله ده القرف شويه عليهم دول عمرهم يا معرفو يعني ايه ربايه ولا ادب دي بالنسبالهم طلاسم
وتخلف وyay Oh my GOD بتعتهم دي
اللهم ما احفظناااااااااااااااااااا
والسلام ختام
بوستاتك بقيت تحفه يا كوكو الله اكبر الله اكبر

مي

عالم حبيب يقول...

الله المستعان

صدقيني ما عارف أقول ايه .. اصلا عنوان الموضوع أذهلني .. لا تعليق على الكلمات لأن الإنسان لما بيكون تافه لا تنتظرين منه إلا كل تفاهة

ربنا يارب يهدي الشباب .. والله الأغاني ما منها فايدة إلا إنها تكسر المشاعر و تدغدغ العواطف .. الحمد لله الذي عافانا مما ابتلى به غيرنا وفضلنا على كثير ممن خلق تفضيلا

اسمحيلي اني أضع رابط هذا الموقع

حياتي بلا أغاني

http://www.no4songs.ws/

prince4ever يقول...

قلت اعلق فالسريع كده عشان مستعجل
امسي الاول
ومعنديش تعليق غير...
اسفااااااااااااااااااااااااااااااف

الحمد لله اللي تاب عليا من سماع الكلام ده لا في البيت ولا في العربيه

كان رامي ده يلف الزقازيق معلى الكاسيت على اخره و اغاني من كل شكل ولون
لكن الحمدلله الذي هدانا لهذا و ماكنا لنهتدي لولا ان هدانا الله
سلام يا حبيبه

غلبان ... وليا لسان .... DeXTeR! يقول...

خلللي الشعب يعيش


كل واحد بيعبر عن رأييه باسلوبه

وادا اسلوب الراجل


انا موش بدافع عنه

بس بدافع عن اي اسلوب

وميض ابتسامة يقول...

انا احترت والله من مدعين الفن سواء كانوا مؤلفين او مغنيين ..مش بقولك ان الدش ده سبب بلاوى كتير ..محدش بيصدقنى ..ده بلوة بتتسلل جوة البيوت وتدخل بدون احم ولا دستور عشان تلوث سمع ابنائنا وشبابنا وحتى احنا الكبار ..بصراحة حاجة تقرف ..
والمصيبة ان لها مريدين ومشجعين واغلبهم من الشباب ..
ح اقول ايه منهم لله
ويارب ولادنا يكون عندهم ذوق رفيع يقدروا يميزوا به الكلام اللى يدخل القلب والعقل معا مش الهيافة والتلوث السمعى ده..
وبعدين خلى السنة دى تعدى على خير

ويارب اسمع عنك كل خير

Sweet Violet يقول...

كلمه نسوان زى ماقال بعض المدونين انها عادى فى معظم الدول العربيه و فى كلمه تانيه برضه عاديه جدااا عن المرأة فى بعض الدول العربيه يعنى هى اختلاف ثقافات بس D:

اما بقى عن سؤالك اكيد طبعا فى رقابه و دا من زمان
من ايام نجلا و حصانها
و هيفاء و واوتها
و بوسى و نقطها
و مروة و صرحتها

و ..و ...و ألخ

يعنى مش فارس بس

هو الفن كدا بقى شويه حروف بتتلزق فى بعض بتعمل كلمه بتتلحن وبتتغنى و خلاص

سيبك انتى بجد انتى دمك شرباااااااااااات موت

☼♫♪ عمــاد الدين يــوسف ☼♫♪ يقول...

اختي الغاليه اللي مخصمان انا ومدونتي مش عارف ليه
البوست جامد واللي يقلب القنوات ياما يشوف
الكليبات بقت مليانه بلاوي كده عيني عينك
ربنا يتوب علينا
تحياتي

mahasen saber يقول...

حبيبتى الجميله مينفعش حد يعمل رقيب عليكى او على التليفزيون او او
انا رايى اليى يتعرض يتعرض وده الاختبار الحقيقى لمدى قوة ومتانة اخلاق المتلقى اما لو اطفال فاعتقد كل اسره تقدر تتحكم فى اليى اولادها بيشوفوه لو صغيرين....
بس لفظ نسوان ده اليبنانيين بيقولوه عادى على الستات ..ده يمكن كلمة الستات دى عندهم شتيمه..

mahasen saber يقول...

اه حبيبتى بلغى ادهم انا بدخل مدونته عشان البوست الاخير ومش بيظهر معايا الا بوست الاحكام العرفيه
حتى جربت ادخلها من كذا مدونه منهم مدونتك وبرضه بيظهرلى نفس البوست مع ان عندى فى الريدر كاتب اسم اخر بوست بس مش بيفتحه
شكله مصرى بالغربه كان عينه فيه وهو بيعمله
ماشى يا قمر بلغيه عشان ميفتكرش انى متاخره عليه
والف الف شكر يا حبيبتى...
وخلى بالك من نفسك وذاكرى كويس...

فارس بلا جواد يقول...

فارس نسوانجي
بصراحة كنت مكسوف أدخل أعلق أو قلت أغير أسمي و أكتب أي أسم بعيد عن الفرسان خالص ههههههههههه

الموضوع مش غريب عليه .. مش ده برده بتاع التنورة

وبعدين رقابة ايه بس يا حبيبة .. ده لو فيه رقابة بجد كان المفروض نص الأغاني الموجودة حاليا تتمنع

مع اني شايف يعني ان الراجل لما يبقي نسونجي مفيهاش حاجه (وش شيطان) ههههههههههههههه

الاسطى يقول...

موضوع تحفة بجد و أول مرة و الله أسمع عن الأغنية دى .. انا أساسا مش من متابعى التليفزيون أوى يعنى ..
بس اللى يغنى بالطريقة دى بقى .. يبقى " الله يبعتله علة " فعلا ..
المهم حمد الله عالسلامة .. و نورتى بلوجك تانى ..
و ربنا يقويكى .. سلام

Empress appy يقول...

بس انا بحبه يا حبيبه والله على الرغم من الكلام اللى طالع منه
بس عاوزه اقولك اللغه بتختلف شويه يمكن عندهم حاجات غير عندنا
بس اسلوبك بجد تحفه

romansy يقول...

ههههههههههههههههه
لا طبعا مفيش رقابه على اى حاجه خالص لا اغانى ولا غيره
انتى سمعتى حاجه بسيطه امال بقى لما تسمعى الاغانى الشبعى البذئه الالفاظ
خلاص يا حبيبه اظاهر ان مفيش حد بيغنى كويس اليومين دول الا ناس قليله قوى
موضوعك جميل بس مين بقى الى يسمع

Butterfly يقول...

استغفر الله العظيم
هقول ايه حسبى الله ونعم الوكيل وربنا يهدى .
فى رقابه على فكره زى ما فيه رقابه على المسلسلات والأفلام كده بس طبعا اللى بنعتبره احنا مش كويس عندهم هما كويس !!

kochia يقول...

لا مفيش رقابة علي حاجة اصلا دلوقتي
كلمات الاغاني
بس الاول نراعي فرق اللهجة يمكن الحاجات دي عندهم عادي
اقصد التعبيرات دي
علي العموم انا شخصيا مش بسمع اغاني ولا اعرف المطربين الجداد دول زيد من عبيد

حبيبه يقول...

يابنتي دي احسن حاجة سمعتيها دي فيه اغاني تنكسفي اصلا تسمعيها
رقابه..رقابة ايه هو لو فيه رقابه كان بقي دة حال المغني
انتي عارفة انا عن نفسي مش بقيت اشوف قنوات الاغاني خالص كفايه عليه المسلسلات
تحياتي لكي

كلام حسام يقول...

بصراحة الفضائيات بقت منتهي الاسفاف والتخلف

*الطالبة عفو الله *زوزو يقول...

اقول ايه و لا ايه
اغلب الاغاني بقت حاجة فعلا لا تستحمل
و ناس عمالة ترجع للورى
الناس بتتقدم و احنا قاعدين نتاخر
الله المستعان
انا الحمد لله مبقتش اسمع اغاني
و الله ربنا رحمني بنعمته اني ابطل اسمع اغاني
ربنا يهدينا جميعا
يا بنتي يا حبيبتي مبقتش في حاجة اليومين دول عليها رقابة
هي جات ع الاغاني
ما كل حاجة بقت ...
ربنا يسترها من عنده
ربنا يحفظك و يحميك يا حبوبة
دمتي في حفظ الله

Unknown يقول...

السلام عليكم ورحمة الله تعالى وبركاته
واشمعنى الكلمات اللى حيبقى عليها رقابة ؟هى الالحان النشاز عليها رقابة ؟ولا الاصوات النشاز؟ ولا الاهم(الحركات) والرقصات المصاحبة عليها رقابة؟
رقابة ايه بس ياحبيبة
كده مايبقاش فن!!!!!
ده كلامهم مش كلامى
خلى بالك مش كلامى!!