أنا والضالين...قولوا آمين

كنت ناويه نية سوده النهارده انى انزل حاجه من تخاريفى اللى تجاوزا الناس بتقول عليها خواطر او حاجه بس بقى ايه لقيت شويه حاجات اصابونى بهستيريا ضحك 

الحاجات دى وانا بشوف زوار مدونتى الاعزاء وخاصة الناس اللى بتيجى عن طريق سيرش جوجل او اى سيرش

انا هقولكوا الحاجات اللى بيبحثوا بيها ودى يمكن اكتر حاجات علقت معايا او اكتر كلمات دخلتهم هنا.

عضة الى ابنتى الحبيبه

طب والنبى اقول ايه فى ده؟ واللى يوم ماربنا يكرمه ويدخل يبحث فى النت عن حاجه يبحث ازاى يعض بنته؟؟طب وهى دى عايزة فكاكه يافكيك؟

لأ وايه كاتبها باللغه العربيه الفصحى مثقف اوى الواد 

منا ديت حوة

ابوس ايديكوا حد يفهمنى اللى داخل يعمل سيرش بالكلمه دى كان عايز ايه اساسا

تقريبا كان بيعلم بنته اللى فى كى جى تو تبحث عن معنى كلمه ماما جت بسرعه او حاجه

أى حاجه جامده

تقريبا الاخ كان ضايع وعامل دماغ وجاى يطلعها فى جوجل قام جوجل حدفه عليا.روح الهى جوجل كان يحدفك بطوبة فى وشك ماهى جامده برضو

عايز مسجات سافلة

البعيد بيطلب من جوجل مسجات سافله ! لا وايه بيقول لجوجل عايز وكأن جوجل هيوصلهم ليه ديليفرى 

آه يانا ياغلبى

بت استوته
هموت واسأل اللى بحث عن الكلمه دى كان متوقع اساسا ان جوجل يطلع ليه حاجه؟

ولو توقع طيب كان فى دماغه ايه؟ ده حتى جوجل بدال ما يبصق فى وجهه قام قاله البت حبيبة عندها سعة صدر تعالى اما ناخدلك شويه صور من عندها وراح مطلعله كام صوره من البلوج.
اه وربنا صحيح

انا شخصيا نسوانجى-فضل شاكر

بصراحه بوست فارس نسوانجى مسيطنى فى جوجل 

اللى انا استغربت ليه بقى ان الكلمه دى تقريبا فى المتوسط بيدخلى كل يوم 3 مثلا نتيجه البحث بيها وانا كنت منزله بوست بحاله بسب فيها وفى اللى عملوها وهى بهذه الاهميه؟؟
وعلى فكره العبيط ده داخل بيدور على اغنيه لفارس كرم بإسم فضل شاكر وبرضو جوجل جابه عندى.لا تعليق

عفوا عم فارس انا غلط والناس الهايفه قصدى الحلوة دى كلها هى اللى صح

عزيز البركانى وحبيبة

الكلمه دى برضو بيجيلى بيها ناس كتير اموت واعرف مين الاخ عزيز اللى كل اللى يدخل بلوجى يجيبه معاه ليا ده؟

يكونش اسمى اتجوز من ورايا اسم عزيز وهيخلفوا اسماء جديده؟؟

أغنيه عدولة دخل سنة أولى 

دى كمان عليها اقبال رهيب من جوجل وكأن الاغانى خلاص خلصت

طب وربنا انا منزله بوست بيها اه وقايله حته منها لكنى مااعرف فيها غير الكلمتين دول ولا عمرى جربت ادور عليها

أغنيه ماشى مقبولة منك طبعا لانك

يوه هو يعنى مش هتتقبل منه الا عندى؟ أما غريبه والله اقول ايه بس؟

الناس دى بتهيس ولا ايــــــــــــــه؟؟

عايزة أخلى خطيبى يتنحرر ويغير عليا

الله الله الله

وحد قالك يابنتى إن هنا خالتك حبيبة الخاطبه؟ وبعدين حد يقول لجوجل يتنحرر؟؟

ايه ياخويا الهطل النصفى ده

بجد انا بقيت حاسه ان كل مايدخل حد هايف ويكتب كلمه هايفه وعم جوجل يحتار يعمله ايه بدال ما يطلع الشبشب ويديله وشين يقوم حادفه عليا.

هو يعنى حد قال لجوجل انى فاتحه عندى كافيه ولا بغدى اللى بيدخل عندى؟

ولا يعنى ماعلشان أنا ساكته وكاتمه ومش عايزة ازعق يسوق فيها؟

الاشكال الضاله كترت أوى بجد والهيافه زادت

 أوقات بضحك عليهم لانى ببقى عايزة اضحك واوقات بضحك من غلبى وحزنى على ناس موجوده كده

اه مش هما بيقولوا فى الامثال 

هم يهأهأ وهم يهئهئ

عجبــــــــــت لـــــــك يازمن

 !!!!!!

سيبكوا انتوا يااطفالى

كل سنه وانتوا طيبين :)