فرحونى يوم عيد العمال وقالولى... "اسكتى مش هدية الريس لينا فى عيد ميلاده 30 % زيادة على كل المرتبات" قلت :لا لا لا أنا المفروض" ازغرت" ......هما اه مش هيعملوا حاجة فى غلا الأسعار ده لكن...
اهه نواية تسند الزير ،، واهو نص العمى ولا العمى كله..!!!
أيوة بس والله أنا نصفتهم لما قلت نص العمى أصل علشان يعدلوها ويخلوها تلبس نضارة بس لازم الرواتب تزيد بنسبة 300% على الأقل !. يعنى هما تقريبا كده نسيوا صفر ع اليمين؟!
* المهم...............
ويافرحة ماتمت ..بعدها بيومين اخدها الغراب وطار،،،،،،،،،،
وانا رايحة الجامعة الصبح لقيت فى الطريق ظباط مرور كتييير!!! ماهتمتش -اصلنا بقينا شبه متعودين على كده من كتر الطوارئ-
بس المرادى بزيادة شوية !!!!! فكرونى بايام الانتخابات ياخبر دلوقتى بفلوس بعد نص ساعة بقى ببلاش ...............
وأنا مسترخية على الكرسى وباصه من الشباك وسرحانه فى الطريق اذا بصوت غليظ وعالى بيفوقنى وبيقول:
"الأجرة غليت ياجماعة وانتوا عارفين الأسعار بقت نااار ده حتى الجاز غلى هو احنا هنجيب منييين ؟...و...و.."
وحسيت انه شوية كده وهيشحت . وقضينا بقية الطريق فى مشاكل وصداع ومشادات بين الركاب والسواق.
- أتاااااااارى المرور صاحى انهاردة والامن مستعد قوى !!!!!!!! -
وعرفت ان بركات ال 30% بدأت تظهر واولها ارتفاع سعر صفيحة الجاز من 15 ل 22 جنيه مرة واحدة ،
وما خفى كان أعظم ...؟؟؟؟ - ربنا يستر -
وعلى اخر اليوم ظهرت صور اعتصامات السواقين فى المواقف ونزل ورق التسعيرة الجديدة فى المواصلات العامة وظهر كمان السخط على وشوش الناس .
والظريف بقى ان المرتبات اللى نازل عليها الزيادة اللى فيها الطمع لسه أصلا مانزلتش !!!!!!!!
والله الهدية دى كانت واجب علينا احنا ...وكان بلاهم ال 30% زيادة دول يمكن كانت الناس فضلت كاتمة وساكتة
وماكنتش الدنيا ولعت زيادة ....
وااااااااااااااه ياخوفى من اللى جاى اااه ياخوفى
الثلاثاء، مايو 13
الاشتراك في:
تعليقات الرسالة (Atom)
هناك 5 تعليقات:
السلام عليكم و رحمة الله و بركاته
بصراحة يا حبيبة انتي مقالاتك كلها عبر و معاني و تأتي على اوجاع الناس يعني في التوقيت المناسب.
هو الزيادة الاخيرة اللي صارت عملت مشاكل من المواطنين بنسبة اكبر من 30% يعني اعطي تعويض بنسبة معينة و بروح بدل منه نسبة قد تفوق اضعاف مضاعفة لكن ما في اليد حيلة احنا نتوجه الى الله بالدعاء و نرجو من الله ان يخرجنا من هذه المحن اللهم امين
وو اخيرا اريد ان اقدم لكي الشكر على هذه المواضيع التي تعبر عن اوجاع الناس و عن الامهم بحس صادق.
و ارجو من الله ان يوفقك لما فيه الخير و ان تكوني لسانا ناطقا بالحق انه على كل شيء قدير
وعليكم السلام. ميرسى قوى ليك ياعبدالله وعلى اهتمامك. لكن انا مع احترامى لرأيك عندى اعتراض على كلمة مافى اليد حيلة لأن فى ايدينا حيل كتير لكن احنا اللى بنستسلم ونسكت ونرضى وعلشان كده المصايب بتكتر لان احنا اللى بنرضى من الاول ده طبعا بالاضافه لاننا ندعى ربنا انه يعينا وينصرنا لكن فى الاول نكون اخدنا بالاسباب وعملنا اللى علينا. صح؟؟؟؟؟
هلا اخت حبيبة
انا المس دائما نزعة السخط علي الواقع والتمرد علي السلطة
ولكن لو نظرتي نظرة ثاقبة للامر فان المشكلة ليست في السلطة بل في الشعب نفسه فاصبح كل فرد في الشعب ناقد للوضع مهما كان سيئ فهو ينتقد الاوضاع من حوله دون ان يكون هو نفذ ذرة من ارائه
وللعلم اخت حبيبة بالرغم من كلامك الجميل واسلوبك المشوق فان الكلام لا يمكن ان يحرك ساكنا فمن استحسن القول عن الفعل ظل طول حياته يتطلع الي سراب
لذا انا شخصيا اكثر مهنة اكرهها هي مهنة الصحفيين
فهم كالعجزة لا يملكون الا السنة ولو انهم تركوا القول المجرد من الفعل لكان حالهم وحال بلدهم افضل بكثير
وجملة القول لقد تحولنا من كثرة كلامنا الي نقد انفسنا دون ان ندري
فمثلا عندما ننقد السلطة فالمفروض اننا مصدر هذه السلطة استنادا الي ان الشعب هو مصدر السلطات واننا من اتي بهذه السلطة وباركنا وجودها بل ونقدر علي الاطاحة بها في اي وقت استنادا الي ان الشعب قوة تجاوز قوة الجيش عبارة قالها عرابي عند مواجهته للخديوي توفيق
وجملة القول ان:لا نفع للقول الا اذا ترجم علي ارض الواقع
اشكرك كثيرا
طااااااااااااااارق
http://wonders-ancient-world.blogspot.com
ياالف اهلا وسهلا بيك ياطارق . اولا احب اشكرك على كلامك الجميل وكمان كده من اولها على التعليق البناء جدااا واختلاف الراى لا يفسد للود قضيه.
اما بخصوص مهنة الصحافة فهى فعلا كلام وبس لكن هى ميزتها انها بتقدر تحرك ساكن بمعنى انها بتفجر قضية وبتسيب الحل للناس والمطلوب ان الناس بقى تكون اكتر ايجابيه وتحرك الساكن اللى لفتت الصحافة الانتباة ليه.
علشان كده انت صح جدا لما قلت ان العيب عيب شعب قبل اى حاجة...
عموما ربنا يهدى المسئولين عننا وويهدى شعبنا لحد مايعرف ويتحرك
وماتنساش ان اكبر اضراب كان فيه تحريك لساكن فى مصر كان اصله مقال على النت بتاع اسراء عبدالفتاح على الفيس بوك لو تعرفه ؟
على اى حال سعيدة بزيارتك واتمنى اشوف تعليقاتك على مدونات تانيه ليا
واتمنى يدوم التواصل.
اشكرك اخت حبيبة علي تقبل الراي
وسعة الصدر
لكني لاحطت الان مصادفة غريبة جدا
انك من الشرقية
وشكلك كمان هندسة الزقازيق
انا بقة من الشرقية وطب الزقازيق
يعني طلعنا جيران
انا coolhead_tnt@yahoo.com
اتشرف بالتواصل معك
شكرا
إرسال تعليق