"عدولة دخل سنة اولى....يالا نغنى لعدولة". جزء من أغنية قديمة من التراث المصرى أنا شخصيا بسمعه كتير لأن أى ولد صغير أو بنت عندنا بيدخل سنة اولى -ابتدائى يعنى- ماما بتقوله ليه. أى حد فينا عنده عدولة وداخل سنه أولى سوا كان عدولة ده ابنه ولا اخوة بيبقى فرحان بيه قوى مايعرفش ياعينى اللى مستنى عدولة لما يدخل سنه أولى .........
وهما بقى ياحول الله بيقولوا بسلامة نيه " الدكتور عدولة راح .....الدكتور عدولة جه " ربنا أمر بالستر.
التعليم عندنا بيطلع اللى هيبقوا دكاترة -زى الدكتور عدولة كده- من ثانوية عامة مايعرفوش حاجة يعنى كل طالب مهما كان شاطر بيقى كل اللى يعرفه منهج سنته وخلاص وأول ما يخرج منها ؟؟؟؟ يامولاااااى كما خلقتنى !!!!!
يمكن ايوة العيب فينا شوية كطلبة بس كمان طريقة التدريس و المناهج اللى بتحطهالنا وزارتنا المبجلة تجيب احباط يعنى .....اه والله.
ده اللى خلانا أنا وزمايلى واحنا فى الجامعة وبيقولوا علينا بعد الشر مهندسين المستقبل وقال ايه..!!!! عمار مصر على أيادى جيلنا -lol-
بنعانى من إننا بنخرج من سنة لسنة أعلى وإحنا محتاجين كل كلمة درسناها , ونكتشف إن احنا علشان نفهم اما الدكتور يشرح المنهج القديم تانى , او نرجع نتطفل على العيال اللى أصغر مننا ونحضر معاهم المحاضرات اللى احنا عايزينها .
*ليه ده بقى ....؟؟؟!!! ............. ليه؟؟؟
علشان مااتعودناش من الاول اننا ناخد طبيعة مناهج بتخاطب الفكر وبتقرب من طبيعة اللى بيدرسوا مش بتاعت كلمتين حفظ وتسميع فى الامتحان ...-وكان الله بالسر عليم-
مناهج تعبانة وماشية على عصاية , وسياسة تعليم فى العناية المركزة ،،،،،،،
ويا فرحتى "شالوا سنه ساته .،، حطوا سنه ساته .،، عالم رايقة وفاضية " - كما قالت الحكيمة فرح -
وده علشان قال ايه ؟؟!! يكبروا دماغ العيال سنه ويدوهم فرصة أكبر للفهم .- أصل دى اللى هتعدل المايل !!!! -
وآدى أخرتها عايزين الحاجة الوحيدة اللى كانت صح فى الثانوية العامة تبقى غلط وهى ان درجات الطالب كلها على الامتحان وكل واحد وشطارته دلوقتى بقى بقت روح الطلبة فى أيادى المدرسين..... شفتوا الخيبة ؟؟؟؟؟!!!!
ماعلينا ،،، معتقدش ان فى حد فى مصر دلوقتى مايعرفش إن فى فجوة عندنا فى التعليم بين اللى عايزين نبنى بيه فكر أولادنا وشخصيتهم وبين اللى بندرسه ليهم - ده طبعا فى المراحل اللى قبل ثانوى -
وبين اللى هياخدوة فى الجامعة واللى بيدرسوه فى ثانوى
اما عن الداهية الكبيرة الا وهى الفجوة بين مناهج الجامعة واللى هيطلعوا الغلابة طلبة الجامعات يطلعوا يشتغلوا فيه فى السوق.
........ويا أسفاااااااااا على الدكتور عدولة ..........
والله من كتر ما أنا شايفة قدامى أزمة فى تعليمنا ..أنا حاسة إنى لما ابقى أم عدولة مش هبقى ادخلة سنه أولى ...........
"ويالا نغنى لعدولة ............-lol-"
الثلاثاء، مايو 20
الاشتراك في:
تعليقات الرسالة (Atom)
هناك 6 تعليقات:
السلام عليكم
اول شي الله يعطيكيالعافية على المقالات الممتعة اللي كل فترة بتزودينا فيها و اللي هي بتناقش قضايا مهمة و واقعية
انتي معك حق انه هناك فجوة كبيرة في المواد اللي تدرس في الجامعات واللي من المفروض تكون في اطار افضل من كده لكن كمان احنا الطلاب علينا جزء كبير من الحمل لانه احنا في هاي المرحلة احنا اللي مسؤولين عن انفسنا و عن تطور عقولنا و كمان ما نترك الموضوع للمناهج التدريسية لانه في الغالب ممكن يكون اللي بدرسية ما له دخل كثير في الواقع العملي لكن احنا لازم نحاول نقلل الفجوة لينا احنا كطلاب
اما بفى الحج عدوله ده سيبية ربنا يكون في عونة
حبيبة ربنا يعطيكي العافية على المقالات الممتعة و اتمنى لك المزيد من التقدم و النجاح ان شاء الله
ربنا يكون فى عوننا احنا والحج عدولة بس هو يابخته زمانه خلص امتحانات. انما احنا غلبانين ربنا معانا.
والله ياعبدالله انا مانسبتش العيب كله للمناهج والمواد وطريقة التدريس انا كمان قلت ان احنا كطلبة علينا دور كبير بس كل دور لا يتجزا عن التانى علشان الاتنين مع بعض يكملوا منظومة مثالية اسمها طالب ناجح ينفع يشتغل صح. شكراياعبدالله على اهتمامك.
والله يا حبيبه انك عندك حق العيب مش في المناهج العيب في الناس المسؤله عن المناهج اما بالنسبه للكليه فدي موضوع تاني خالص انا والله في كليه عمليه جدابندرس فيها مواد هيا مش بس مالهاش علاقه بالحياه العمليه للكليه هيا اساسا مالهاش علاقه بالكليه نفسيها وبلاش نذكر اسماء ليقرا الموضوع دكتور في كليتنا ولا حاجه يعقدنا اكتر من التعقيد اللي الكليه نفسيها مسبباه لينا والله يكون في عونا جميعا وكلنا لازم برضوا نقول اننا لازم نعمل اللي عليناوالباقي علي الله حتي لو قالولنا لازم ندخل ثانويه صناعيه علشان ندخل كليه الطب اوالصيدله اوالهندسه او اي كليه ما دام ان الواحد ما شايفشي اي نتيجه في الجماعه القائمي علينا وربنا هو الستير
عدولة
كلمة من العادات والتقاليد وتقدرى تقولى عليها من التراث
بجد فى اشياء لازم ندرسها ونجح فيها بس لو قررنا نفهم زى ما بنحفظ ونتطور من نفسنا من مكاتب ومراجع خارجية الوضع هيكون مختلف
تحياتى
ليه كده بس يارونى
خاف لحد يعرف من ادارة كليتك او من الحكومة والشاويش يجى يقبض عليك ...
عموما دى وجهات نظر وهما شايفين انهم كده صح واحنا شايفين غير كده...خلاص خلى كل واحد مقتنع بوجهة نظرة وتبقى الفجوة..تحياتى يارونى
تامر
الكل شايف اللى انت بتقوله ده صح
بس لما بيجى يتطبق الناس بتتعب منه لانهم بيبقوا شايفين انه طريقة جديدة واحنا ماتعودناش عليها من صغرنا. وفعلا هى طريقة شاقة جداااااا للى مخدش عليها واسألنى انا لانى مجربة علشان كده محتاجين اننا نعملها ستراتيجية وندرسها كويس بحيث اننا ننشئ فكر اولادنا عليها من صغرهم.
شكرا ليك وتحياتى ليك
إرسال تعليق