الخميس، مايو 1

كلمة شرف

فى اول مدوناتى قررت...انى اكتب عن موضوع هو اللى شجعنى اساسا على انى لنشر مدونات. ولقيت انسب عنوان للموضوع هو "كلمة شرف" مش علشان اللى يقراه كده من اولها يقول عنى شخصيه مثاليه لكن علشان الموضوع استفزنى قوى كواحده عايشه فى مجتمع طول عمر اهله معروفين بالطيبه والامانه وحب الخير ده غير انه مجتمع اسلامى اساسا . ونبدأ من البدايه........لما اتكلمت مع شخصيه عزيزة عليا جدا شاب طموح بيشتغل مشرف مبيعات فى واحده من اكبر شركات المنتجات الغذائيه فى مصر ولقيته على غيرالعاده مكتئب وقرفان وشايل هم الدنيا على دماغه فى حين انه دايما كنت بحس انه زى الفراشه فى خفته ونشاطه ومرحه المهم......ولما سألته ..مالك يابنى؟؟معقدها كده ليه وبقالك فترة مختفى قاللى :اصل الدنيا سودة فى وشى وهظهر ليه ؟ انا اصلا كاره الدنيا ومش عايز اشوف حد. ياخبر ليه كده بس ؟ وفين عربيتك؟!! وأخبار شغلك ايه؟؟ ضحك ضحكة سخريه وقاللى : هاها أنا فى اجازة مفتوحه اصلى شبه اترفدت من الشغل ..الله الله وليه كده؟؟!!!!ووقع الكلام عليه بتأثير صدمه غير متوقعه ازاى بس حد مجتهد فى شغله زى ده ويترفد؟؟!! وحكالى.....انه باع لواحد من العملاءالموثوق فيهم جدا بضاعه تقدر بحوالى 80 الف جنيه والمقابل " كلمة شرف" ابعتلى البضاعه كالمعتاد وأنا هبعتلك الفلوس وانتظر ....فين الفلوس ؟؟؟؟؟؟؟؟؟؟؟ اكتشف ان العميل المحترم طمع فى المبلغ وسافر بيه بره وطبعا ... دمر المبلغ نفسيته . كان خاطب اتفلكشت الخطوبه علشان فلوس الجواز سددها للشركه وياكده يالحبس وبقى فى لحظه فى الشارع من غير شغل بسبب كلمه شرف كان صاحبها مش قدها. وحياته الخاصه كمان اتاثرت ده غير نفسيته اللى بقت تحت الصفر من غير احساس الفراغ بعد ماكان مشغول بالعشرين ساعه فى اليوم . طيب سألت نفسى سؤال ...ليه كده؟؟؟؟!!! وفين اخلاقنا احنا كمسلمين وفين ضميرنا كبنى ادمين ..ليه ندمر شاب زى ده كان مثال ناجح لشباب جيله ياترى حد فينا عنده تفسير ليه ده يحصل ؟ ومين المسئول عن حاجه زى دى ؟ ياترى الضمير اللى انعدم ؟ ولا الاخلاق والفيم اللى ضاعت ؟ ولا ظروف مجتمعنا اللى زى الزفت ؟ والحاله الاقتصاديه المعدمه اللى احنا عايشينها ؟؟؟؟ ولا حاجه تانيه؟؟ ياترى اييييييييييه؟؟؟؟؟؟؟؟؟؟؟!!!!!!!!!!!!!

هناك 12 تعليقًا:

Miss. Sosa يقول...

السلام عليكم

مبروك عليكي المدونة واول تدوينه.

اتضايقت اوي من قصة الشاب اللي بتحكي عنه
ربنا يعوضه خير بكرمه وفضله

وربنا يهدي العميل اللي طمع في البضاعه ويرد للشاب فلوسه

ربنا يهدي الجميع يارب

تحيـــاتى

نـــــور يقول...

متشكرة ليكى يا miss.sosa فرحنى انك اهتميتى تعلقى واتمنى اشوف تعليقاتك على مدوناتى الجايه باذن الله

Unknown يقول...

السلام عليكم
الموضوع هايل جدا وده بفيد انه الانسان لازم يكون على قدر الثقة اللي ممنوحة اله ولازم يكون الانسان يتقي ربنا في الناس و ما يظلم الاخرين لانه الدنيا يوم لك ويوم عليك و كما تدين تدان.
في الاخر انا بشكرك يا حبيبة على هذه الفكرة الطيبة و اتمنى لك المزيد من التقدم بإذن الله تعالى

نـــــور يقول...

متشكرة قوى ياعبدالله بجد اسعدتنى مشاركتك ورايك واتمنى انى اشوف تعليقاتك على مدوناتى الجايه وان شاء الله معايا دايما وبتوجهنى

Unknown يقول...

حلو الموضوع منك ياحبيبه كانت مفاجأه حلوة بالنسبالى. اتمنى ليكى المزيدمن النجاح

أحمـــــد علـــــــى يقول...

مبروك المدونة يا حبيبة (الصح لغويا نقول مبارك بس بصراحة مش طالبة.. كفاية كدة)
الموضوع ليه زاويتين .. خيانة الأمانة من ناحية .. وأعتقد إنت اتكلمت بما فيه الكفاية فى الناحية دى
الناحية التانية هى أطول آية فى القرآن .. آية الدين فى سورة البقرة .. لازم كتابة العقود .. مهما كانت القيمة صغيرة .. وراجعوا الآية .. ماشى فى ثقة .. بس فى حدود .. وخصوصا لو المبلغ أكتر من طاقتى فى السداد ..
الزاويتين مكملين لبعض .. لا التاجر إلتزم بالأمانة .. وهو واجب دينى .. ولا المندوب إلتزم بالكتابة .. وهى واجب دينى برضه
حاجة تانى .. فشكلة الخطوبة كانت منه نتيجة الاحباط .. ولا الخطيبة المحترمة باعته على أول ناصية؟

نـــــور يقول...

اولا متشكرة جدا يااحمد على اهتمامك.ثانياانت عندك حق بس الموضوع مكنش امانه وخيانه بقدر ماكان تعود بمعنى ا المدير ده بيبعت البضاعه للعميل مع المدنوب ويبقى يجيب منه هو الفلوس بنفسهفبقت تعود خصوصا مع العملاء الدايمين والكباراما عن ثالثا ففلكشه الخطوبه دى كانت بسبب اهل خطيبته المحترمينوهو كمان لما لقى الحكايه كده هو كمان باع القضيه وساب اى قليل اصل يبعد....بس

Unknown يقول...

بجد شاطره يا حبيبه علي المدونه اكيد زي اللي قبليها انا لسه بجد ما ارتهاش بس اكيد هاراها بس انا واثق فيكي وفي كلماتك

Sherif Mesallam يقول...

الف مبروك على المدونة .. مع انها جايه متأخر

بصي بقى الموضوع ده يمكن يكون رايي في مختلف حبتين .. بس انا شايف ان الشخص اللي بيتعامل مع الناس في شغل مهم من غير اوراق او اي شيء موثق .. يبقى الشخص ده (بغض النظر عن اخلاقه و امانته و و و ) مهمل جدا .. أو على الاقل ممشيها بالبركه .. أنا طبعا ماعرفش تفاصيل الموقف بالظبط عشان احكم بس بتكلم بناء على نظرة عامه .. و كمان طبعا مابقولش ان الانسان التاني اللي خلف كلمته ده صح .. أكيد معروف انه نصاب و حرامي و ربنا ينتقم منه .. لكن ده مش جديد !! من ساعة ما الدنيا اتخلقت و فيها الشر و فيها النصب و الخداع و الحراميه .. الجديد و اللي لازم نتعلمه .. ازاي تاعملتنا مع الناس تبقى صح , بحيث اننا نقدر نكمل وسط الكم الهائل من الزيف و التزوير و الكدب اللي حوالينا ..
أما عن موضوع الخطوبة اللي اتفشكلت فانا متفق جدا أحمد علي .. حاجه غريبة فعلا ..
الجميل في الموضوع ده ان اكيد الشخص ده اتعلم في حياته درس كويس أوي .. يمكن يكون تعبه جدا و لخبط كل حاجه في حياته .. بس اكيد الشخص ده بعد هذا الموقف .. و بعد فترة لا بأس بها من الحزن و الضياع و اللخبطه .. هيكون أحسن بكتييييييير !!
و ربنا يعوضنا كلنا خير ..

موجة يقول...

انتى يابنتى جامدة أوى

بالنسبة لكلمة شرف:/
ماعدش حد ف الدنيا ف الزمن المنيل اللى احنا فيه ده بيتعامل بدون وصولات أمانة وشيكات وخصوصا ف المبالغ الكبيرة دى
صحبك ده عبيط أوى
ويستاهل اللى يجراله

موجة يقول...

بت
انا بحبك موووووووووووووت
ونفسى توصلى للى انتى عاوزاه

نـــــور يقول...

شريييف اخيرا متشكرة ليك اما بالنسبه لرايك يمكن عندك حق جزئياانما هو مش مهمل ولا حاجه هى بس حكاية تعود.
هو اتعود انه يبيع مع المندوبين ويجيب هو الفلوس بنفسه وماشى الحال على كده ماتفهمش بقى ايه اللى حصل المرادى ؟؟!! بس الأكيد فعلا ان مفيش حاجه بتعدى مانتعلمش منها الا اذا كنا مش عايزين نتعلم.ربنا يكرمه يارب ويكون بعد ده احسن كتير ويكرمنى انا وانت كمان فى اللى عندنا ياشريف .متشكرة ليك تانى ومستنيه جديدك.




بيرو متشكرة ليكى بس انا بختلف شويه معاكى فى حكاية وصولات الامانه والشيكات دى اصل دى مبالغة فى الحذر لدرجه ممكن تكون متعبه يعنى ده وسواس.انا طبعا مابقولش مانتعاملش بيها بس كمان بقول اعتقد ويمكن اكون غلطانه احنا مش عايشين فى غابه.اصل المجتمع اللى احنا بنسبه ونلعنه ده هو انا وانتى.. عيلتى وعيلتك ..جيرانى وجيرانك وغيرهم...يعنى احنا فى ايدينا نغيره للاحسن بس احنا اللى مش عايزين وبقى سوء النيه هو الحل الوحيد او المبدأالوحيد المتبع .وكمان الزمن اللى مش عاجبنا ده احنا اللى بنعمله هو ايه الفرق بين الزمن والساعات بتاعت أيام زمان أيام ماكان الجيران كلهم بياكلوا فى طبق واحد وبين وقتنا دلوقتى؟ انا شايفه ان الفرق الوحيد هو احنا ..الناس اللى عايشين الزمن مش الزمن نفسه!!
"نعيب زماننا والعيب فينا وما لزماننا عيب سوانا ونهجو ذا الزمان بغير ذنب ولو نطق الزمان لنا هجانا"أنا مؤمنة بالكلام ده جداااااااااااااا
بس ده مايمنعش انى اقولك يابيرو ربنا مايحرمنيش منك وتفضلى كده على طول زى ماانتى وتعلفى عليا دايما وبرضه اختلف معاكى... LOL...