أول مرة اخرج فى رحله وأنا فى الجامعه مع اصحابى وزمايلى قد ايه كان وقت جميل قضيناه فى القاهرة وأجمل ماكان فيه كان النيل الله عليه وعلى هواه
وفى ليل مصر الساحر السهران ...وزى وقعت عنيه على حاجات كتيييير جميله وقعت عنيه على حاجات تانيه مقدرتش امنع نفسى من التفكير فيها....
يااااه على شباب مصر ...!!!
مصر فيها شباب زى الورد زى مابيقولوا واللى ممكن يكون كلام الرسول عليه الصلاة والسلام"خير أجناد الأرض" اتقال فيه مش فى الحرب بس ،انما فى أى مجال عمل.قد ايه هما رجاله. لكن..........
ده مايمنعش انى شفت أشكال لشباب تانى يااااسلام عليه!!!حاجه كده كنت فاكرة انى ممكن اشوفها فى المسلسلات والأفلام وبس،انما للاسف طلعت حقيقه مش خيال وشغل افلام..شباب ماشى مسطول...وشباب واقف فى وسط الشارع مجموعات بتشرب سجاير وتطلع الدخان فى وش بعضها....وشباب واقف على النواصى بس علشان يتفرج على اللبس الخليع اللى البنات لابساه،ولا بقى منظر بنت وولد قاعدين فى وضع لايليق بمجتمعنا الشرقى ولا باخلاقنا وديننا!!!
وقعدت أفكر ....................
ليه الشباب بقى بيلبس كده؟؟؟!!! -لبس عبدة الشيطان اللى بنشوفه فى الافلام والعياذ بالله-!!!
وياترى ليه بقت البنت دلوقتى بترضى تتجوز الولد أبو سلسلة وحظاظه؟؟؟!!!-اسفه على المصطلحات-
هل هى دى الشياكه من وجهة نظر شبابنا؟
ولا السيجارة اللى معبيه حاجات اعوذ بالله هى اللى بترمز للرجولة؟
أنا والله بستغرب.........!!!!!!!!
امتى بقى اللى ضايع من شبابنا هيفوق ويقتدى باللى ملتزم وعارف شغله ومتحمل مسئولية؟
امتى هيعرف ان البنطلون اللى وسطه ساقط وشعرة الواقف والسلسلة والسيجارة والسهر فى الكافيهات والشوارع لحد الفجر مش هما اللى هيملوه بنى ادم؟
ومقدرش أختم كلامى من غير ماأضرب تعظيم سلام لشباب عارف يعنى ايه وقت ومسئولية وشغل هما اللى عملوه رااجل بمعنى الكلمة...
وفى مصر برضه....!!!!!
الأربعاء، مايو 7
الاشتراك في:
تعليقات الرسالة (Atom)
هناك 5 تعليقات:
بسم الله الرحمن الرحيم
احيكي بتحية الاسلام و اقول السلام عليكم و رحمة الله و بركاته
انا اشكرك يا حبيبة على هالحس العظيم بالمسؤولية
الان اصبح الدين الاسلامي يئن بسبب بعد المسلمين عن الدين و ايضا شباب المسلمين الذين يقع على عاتقهم الشيء الكثير لانهم هم العمود الفقري للمجتمع.
لكن...
هناك الكثير من الشباب و البنات من ترثى لحاله لانه والله نستحي من انفسنا عندما ننظر اليهم و الى لبسهم و الى طريقتهم في الحياه
اما ما ارى في الشباب الذي يعيش بطريقة تنم عن نقص في مقدار وعيه و تدل على ضعف في البيئة التي يعيش فيها حيث هذا النوع كيف يمكن الاعتماد عليه... لا اريد ان اطيل لكن هناك في المقابل شباب مثال للشاب المسلم و فيه عنوان الرجوله بكل معانيها و ايضا الفتيات هناك نسبة منهن نفخر فيهن لما يحملنه من معاني العفة و الاخلاق الاسلاميه الشيء الكثير
اخيرا لا يسعني الا ان اقول اللهم اهديني و اهدي شباب و فتيات الامة الاسلاميه و اسأل الله ان يعزنا بالاسلام و ان يردنا اليه ردا جميلا اللهم امين.
اقول لكي يا حبيبة بارك الله فيكي و اكثر من امثالك و جعلني و اياكي من الدعاة لدين الله عز وجل و اطلب من الله ان يجزيكي خيرا على هذا الموضوع الطيب و اتمنى لكي المزيد من التقدم بإذن الله تعالى.
اللهم امين
بس دى حاجه استفزتنى وكان لازم اقول رأيى حتى لو فيه ناس هتختلف معايا فيه
وأنا مأنكرتش انه فى شباب كويس بنات وولاد وده اللى انا فى الاخر ضربتله تعظيم سلام
شباب مصر ده اتقال فيه كلام يملى كتب !!
طبعا أكيد مصر ( زي اي بلد في الدنيا ) مليانه شباب حلو أوي و في نفس الوقت شباب ضايع .. لكن المشكله هنا و اللي احب اختلف معاكي فيه .. المقياس ..
طبعا نتفقين ان اي حد ماشي في الشارع مسطول و مدمن و حالته هباب أو واقف يتحرش بالبنات أو بيعمل اي فعل بيسبب الضرر لغيره و للطريق اللي هو فيه.. دي حاجه غلط و لازم يتعاقب و يتمنع من كده ..
أما بقى عن الشكل ..
انت بتقولي ليه الشباب بيلبس كده ؟؟.
طب و فيها ايه ؟؟؟ مايلبس اللي هو عايزه !! مشكلة كتير مننا اننا بنسمع جمل رنانه و بنصدقها من غير ما نفكر فيها .. ديما نسمع ان اللبس يدل على شخصية البني ادم .. ايوه هو بيدل عليها بس بيدل على نقط صغيرة اوي منها .. مستحيل احكم على انسان من خلال لبسه .. أنا كده ابقى بدعي حكمه أنا و اي حد مش قريب اوي من الشخص ده بيفتقدها ..
ايه المشكله لما الشباب يلبس حظاظه و سلسلة و و و و ؟؟
هل معنى كده انه لا يتحمل المسؤلية او انه مش راجل ؟؟ اطلاقا
أنا اعرف رجاله بشنبات و لبس محترم جدا .. و بيخاف يطالب بحقه ادام عسكري مرور لا طلع و لا نزل .. في حين اني اعرف واحد صحبي ( روش جدا ) و ماشيو السلاسل و الحظاظات بتقع منه .. لكن بيقدر يقول لأ .. و بيقدر يدافع عن حقه و مابيخفش .. و لما بتطلبيه يقف جمبك موقف رجوله ما بيتأخرش .. كل ما فيها انه حابب شكله كده !! بس !!
لازم تفصلي ما بين الأفعال الغلط اللي كلنا متفقين انها غلط و وباء لازم نخلص منه .. و بين أشكال .. مش من حقك و لا حق اي حد يكم على انسان من شكله !!
و ده زي ما هو في مصلحة غيرك في مصلحتك انت كمان .. لأن بنفس المنطق ,ممكن جدا يكون حد تاني شايف ان انت لبسك متخلف جدا و قديم جدا و مش عالموضه .. هو شايف كده و جهة نظره كده .. هل ساعتها لو حكم عليك بالتالي انك انسانه قديمة و متخلفة و عفى عليها الزمن انت هتكوني مبسوطة ؟؟ أكيد لأ .. و أكيد هو كمان هيكون غلط .. لأن غاية ما في الموضوع انك ممكن تكوني حابة شكلك كده و ده من حقك و محدش يقدر يسلبك الحق ده !!
سلامات !!
معلش نسيت اقول حاجه ..
لفظ عبدة الشيطان ده اتفهم عندنا غلط و بقى اي حد بيلبس لبس الـ Metal Bands يبقى من عبدة الشيطان ..
الــMetal نوع من الموسيقى .. بغض النظر انه ممكن يكون بالنسبة لناس مزعج .. الا انه يبقى نوع من الموسيقى ( أنا شخصيا بحب اسمعه احيانا )
اساسا لو عايزه تبحثي أكتر في موضوع عبدة الشيطان ده أدامك النت .. و منه هتكتشفي ان اعتقادات عبدة الشيطان لا تتضمن السماع لاي نوع من انواع الموسيقى او الالتزام بلبس معين ..
ده معناه ان موسيقى الميتال و لبس فرق الميتال اللي في ناس بيحبوا يلبسوه لانهم شايفينه حلو ( و ده من حقهم ) .. مالوش اي علاقه بعبدة الشيطان ..
تقبلي تحياتي
اولا متشكرة على تعليقك اللى استنيته كتير ياشريف....ثانياانت عندك حق فعلا اللبس مؤشر بيعبر عن جزء من الشخصيه بس مش كلها ومش من حقى انى امنع حد من انه يعمل اللى هو شايف نفسه فيه لكن ده مايمنعش برضه ياشريف ان فى بعض اشكال مستفزة للبس زى البنطلون اللى البعض بيلبسه وببقى انا واصحابى يعنى صعبان علينا عايزين نروح نقوله والنبى يابنى ارفعه ده هيقع منك من غير ماتحس.بس ده اللى انا اقصده ان الشياكه ممكن تظهر فى اشكال كتير غير الحاجات اللى كتير قوى بتبان قبيحة المنظر .
أما بالنسبه للفظ عبدة الشيطان فأنا تعمدت اقوله زى ماهو لأن الناس عارفاه كده زى ماهو مش بتصحيحه..وطبعا فى النهايه متقبله تحياتك ياشريف واحب اقولك "اختلاف الرأى لايفسد للود قضيه" وهستنى تعليقاتك على مدوناتى الجايه كمان علشان تختلف معايا برضه وربنا ياسيدى مايحرمناش من اختلافاتك
إرسال تعليق