فى حاجات كتير عماله تصول وتجول فى دماغى لحد ماخوتتنى عماله تتخانق معايا اتكلم عن ايه الاول
قلت بس مش هزعل حد وهنزلهم كلهم فى بوست واحد طويل عشان محدش خالص يجيله صبر يقراه
أول حاجه
هو لما أكون انا حديثة تخرج وبعرف انجليزى وكمبيوتر كويس ورابع دفعة ومرتبة شرف وعندى كورسات مااخدهاش مديرين ادارات فى تخصص نادر فى مصر ومااشتغلش عشان كله عايز خبره ومش أى خبره دى احيانا بتوصل ل10سنين فى التخصص يبقى فى حاجة غلط ولا لأ؟
طيب يااولاد الجزم لما تطلبوا من الكل خبره دلوقت هتجيبوا ناس عندها خبره منين بعد 10سنين؟
سؤال يطرح نفسه ويحتاج لاجابه
انتظرونا فى حديث المدينه!!
تانى حاجه
لما لحد النهارده اشوف التليفزيون بيعمل تقارير اخباريه عن جدو اللى اصبح حديث الساعه وعن فوز المنتخب ومعرفش ان زويل فى مصر وكان هيعمل ندوة هو وفاروق جويده فى دار الاوبرا غير بالصدفه وكمان تتلغى لاسباب متخلفه وكمان اعرف بالصدفه عن دكتور مصرى فى حامعة المنصورة هو اللى علم الاجانب ازاى يعملوا زرع مثانه يبقى فى حاجه غلط ولا لأ؟
على عينى وراسى المجهود اللى عملوه الشباب بتوع المنتخب عشان يفرحوا الشعب الغلبان الحزين ده اللى مابيفرحش واللى انا طبعا وقطعا واحده منه والشهادة لله انا واحده من الناس عيطت لما كسبنا بس يعنى من غير قر ولا حقد ولا حسد
الريس يطلع يقابلهم فى المطار ويسلمهم اوسمه وياخدوا ملايين من البلد من جهات مختلفه ده غير اللى اخدوه من دبى وغيرها ليــــــــه يعنى؟!!
طب بالذمه مين أولى بالملايين والاوسمه دى
البحث العلمى والغلابه والمتفوقين فى البلد ولا اللى هما اساسا عندهم فلوس مش عارفين عددها؟!
والريس يقابلهم ليه اذا كان مابيستقبلش العلماء بتوعنا وهما جايين من بره
سؤال اخر يبحث عن أجابه
وانتظرونا المرادى فى حديث المدينه برضه
تالت حاجه
عيد الحب جاى والدباديب والفيونكات الحمرا والورد الاحمر وكل حاجه حمرا رايجه وجايه حتى الحصبه
بيتهيألى مش شرط ابدا نربط نفسنا باليوم ده عشان نقدر اللى بنحبهم
ممكن نقدرهم لو بمسج على فترات او مكالمه هبله ملهاش لازمه
ومش شرط اللى مرتبطين بيه بس
ليه مايكونش اى حد بنحبه؟ هما ملهمش نصيب ولا ايه؟
انا شخصيا ناوية قطعا احب نفسى -وحبايبى طبعا ;) - فى اليوم ده وهجيب لنفسى هديه كبيره كمان عشان افرح بيها اومال ايه هو انا ماليش نفس ؟
وأخيرا
حد يشوف دوا مضاد للاكتئاب عشان انا تعبت ومش لاقيه حل فلازم حد يدورلى على حل ولا انتوا كده شاطرين تقروا وخلاص؟
ولو حد عرف الحل وحلول الاسئله السابقه يتصل بيا على رقمى الموبينيل عشان هو اللى شغال دلوقت
وكل سنة وانتوا طيبين يارجاله وعيد الحب الجاى اكون اشتغلت فى شغل محترم وفى بيت جوزى حبيبى يارب
قولوا امين
ومحدش يسألنى ايه علاقة الصورة بالبوست عشان معرفش
هناك 33 تعليقًا:
يا نور عايزك تكتئب يا نور ... بتبتسم ليه يا نور
مساء الفل الاول يا هندزة
شوفى موضوع التوظف ده من اصعب المواضيع ف الوقت الحالى ...وده على حظ سيادتك اللامع فى سماء الحظوظ ... وده بسبب الازمة المالية العالمية
هتقوليلى ليه هقولك ... ان احنا حاليا ... الخليج عمال يحدف علينا المرتجع بتاعه بعد ما خربت هناك
وبالتالى يقدر صاحب العمل انه يستقطب افضل الكفاءات بارخص المرتبات
ليه موضوع فى المدونة ... اسمه ... فلنعيد النظر
ممكن تضفيه لقائمة معلوماتك
فى الجزء بتاع ... معلومات لا تضر ولا تنفع
وبصفة عامة بقى ... يله هنديكوا خبرتنا ببلاش
التعيين فى القطاع العام او الخاص ... خاضع للعلاقات بشكل كبير
" لا أحد يعين الغرباء "
ده بالنسبة للسؤال الأول
بالنسبة للسؤال الثانى ... بخصوص المنتخب القومى
المواضيع ابعادها اكبر من كده بكتير
سياسة يعنى
والسياسة قذارة
واحذرك من مجرد معرفتها ... لا قبل الاكل ولا بعده
بجد مش هزار ... موضوع الكورة ده سياسة
" تعرف ف السياسة ياد يا مزيكا ... السياسة يا معلم انك تدبس الزبون ... وتديله اللحمة الكندوز على انها بتلو "
بالنسبة للفالانطاين داى ... هابى فلانطاين ...وهاتى دباديب وحبيكى اوووى
ده اهم حب فى حياة اى انسان
انه يحب نفسه الاول
" لا اعنى الانانية "
بالنوسبة لأدوية لحالة الأكتئاب
خد شمس ... ف هواء على مايه ... بلا دواء ... بلا عيا ... بلا مر
والسنه الجاية تكونى فى بيت العدل
وخللى بالك انتى كده علقتى الولا ... ومسربعة ع الجواز
يعنى هتصدميه كده فى مقتبل العمر
يله اى خدمة
ازيك يا هندزه
انا معرفش رقم الموبيل لا ام نبيل ولا حودا فون علشان ابعتلك ههه
المهم
موضوع الوظيفه يا هندزه بالنسبه لواحده رابعه دفعه مينفعش عارفه لو كنتى جايبه مقبول ومعاكى مواد زى حضرتى كده كنتى هتلاقى شغل :)))
اما موضوع عيد الحب بقا فعايز حد يعيد عليا السنادى والنبى احسن شكلى هتقلب فيه قلبه سواد هههه
ويارب بقا اشوفك كده فى بيت العدل :))
بلا شغل بلا نيله
يله ... اى خدمة... وكمان مش هتدورى ... بس ابقوا افتكروها ...دستة جاتوه ... حاجة ساقعة ... لما تتعينى
بالمناسبة انتى تخصصك ايه
http://goodpractice-pmp.blogspot.com/2009/07/blog-post.html
ENG./ELSAYED,PMP
******************
:) عايزنى اكتئب؟ ايه النفسنه دى يابشمهندس؟ هو شريف مأثرش فيك ولا ايه؟
انا قريت البوست اللى حضرتك بعتلى اللينك بتاعه وفعلا وجهة نظرك مقنعه جدا بس يابشمهندس واللى معندوش معارف بس عنده قدرات يعمل ايه؟
يطق ولا يفرقع ولا ايه بالظبط!!!!
بخصوص السؤال التانى
ملعون ابو السياسه يابشمهندس ولا ازعل نفسى خالص
بس دايما بسأل نفسى سؤال
هما الوزرا والريس دول بيعرفوا يناموا ازاى؟ اذا كان انا لو اتعرضت عليا حاجه منهم لما اكبر مش هوافق خوف من المسئوليه
اما بالنسبه للاطتئاب هى حالات بتروح وتيجى زى الشعره كده :)
ولو جت زى دلوقت حالات قبل مااكتب الكومنت بدقيقتين مش بتروح ولا بضرب لجزم غير لما ربنا يبعت الفرج
اما بخصوص الفالانطاين
انا مش متسربعه عالجواز خالص ولا عمرى كنت كده بس لانى مكنتش مرتبطه بحد
فكره الارتباط بحد معين بتخلينى اتمنى وبسرعه انى اكون معاه ولو هو مش موجود مش هفكر فى الفكره من الاساس !!
اما عن تخصصى
فأنا القسم بتاعى جديد فى مصر اسمه هندسه صناعيه بيدرس حاجات حلوة جدا زىProduction Planning and scheduling,Six Sigma,Logistics Planning,Quality control,Supply chain management,CAD/CAM,Project management,Forecasting,operation Researches
هو عموما لسه جديد فى مصر انا تالت دفعه فيه وموجود فى هندسه الزقازيق والجامعه الامريكيه وفى مشاريع لاقامته فى جامعات تانيه
بالمناسبه يابمشهندس مش عارفه ليه اللينك بتاع البوست اللى حضرتك لسه باعته لما باجى انسخه بيفتح على موقع وحش اوى اوى اوى وفتح اللينك بمعجزة بصراحه!!!!
عندك تفسير للحكايه دى؟
عايش... ولكن !!!!
******************
ههههههههههههههههه انت بتتريق عليا ياعلاء؟
ماشى ياسيدى هرجع كليه تانى عشان اشيل مواد واشتغل ولا يهمك
لان فعلا فى ولاد من دفعتى كانوا طالعين بمقبول وجيد واشتغلوا !!
اما عن عيد الحب ياسيدى ابقى نام بس مكشوف يومها وان شاء الله يجيلك حلم زى اللى جالك بتاع الانابيب :)
واخيرا متشكره على دعوتك :) ولك مثلها
اى خدمه زأطط :)
نورتنى ياعلاء
ع السريع كده مش البوست اللى بيودى للموقع ده المدونة كلها وانا هتجنن واعرف ازاى
دى اللى بيسموها
الكوكز
بس محتاجة حد بيفهم
يشوفلها صرفة
اكيد حاجة من الجافا اسكربت اللى منزلها عاملة المشكلة دى
اوعدك انى هحاول اتتبع اثرها
ثانكس
تخصصك جميل جدا
:(
زعلتنى على موضوع المدونه ده
ربنا يستر وحاول ماتنزلش بوستات جديده اليومين دول يابشمهندس عشان تقلل عدد زوارك او اقفلها مؤقتا عشان بس محدش بالغلط يدخل على الموقع ده
ربنا يحل المشكله دى يارب
وانا اعرف حد بيفهم فى الحاجات دى هسأله يمكن يفيدنى بمعلومه انقلها لحضرتك
مبسوطه ان تخصصى عجبك :)
ازيك يا قمر
اولا شهادتك ومرتبة الشرف وكل الحاجات اللى انتى ذكرتيها على عينى وراسى
لكنك لم تذكرى اهم حاجة ؟؟؟؟
عارفة اية الواسطة حتى لو انتى مش اخدة ولا حاجة فى دول ومع سيادتك واسطة هتلاقى ابواب السما كلها اتفتحت لك مش بعيد يكرمك الريس برضة
اما عن جدو فيا بنتى دايالريس قال
منتخبنا كويس !!!!
اما عن زويل وفاروق جويدة هم مين دول ولامأخذة
اما عن الدكتور الجليل اللى قالو له تروح غزة وانت ثورة قومية يا دكتور قال طبعا لانها جزء من مصر جزء من العرب
دكتور محمد غنيم ربنا يبارك فى عمره فبرضة ولا مؤأخذة بتتكلمى عن مين ؟؟
انا فكراكى هتقولى مبروك لمصر الانجاز العظيم ووالله وعملوها الرجالة
مش بحث علمى وبحث كراسة ؟؟
كمان مش عايزة الريس يكرم الرجالة دول ؟؟
ويديهم فلوس امال هيدى للعلماء ؟
احنا تخصص عوالم بس
زى العالمة الكبيرة فيفى عبده
دينا
وغيرهم من اللى اثروا على حضارتنا
مش زويل وغنيم وجويدة
اقولك روحى هاتى وسطة من جدو والله تبقى ابواب السما مفتوحة لكى ومش مشكلة ولا شهادة ولا حتى شهادة ميلادك
تحياتى لك على الموضوع بس حرقتى دمى
أولا: الشغل مش بالتقدير ولا هو بالكفاءه ولا هو بالترتيب على الدفعه- الشغل بالواسطه والواسطه لازم تكون كبيره، على فكره، فيه واحده اعرفها بتشتغل في HR بتاع شركة حلواني، عارفه راتبها كام؟ 60 ألف جنيه في الشهر، اما مدير الانتاج اللي بيبقى زي حالاتي كده -بما اني كنت مدير انتاج في مصنع لبن- بياخد 2000 جنيه شهري بالكتير، على فكره الراتب اللي ذكرته ده مش مبالغه ولا انا بضحك عليكي ده بجد، لأن فيه واحده قريبه لها كانت عاوزه تشتغل خريجة اكاديمية السادات واختها متزوجه من واحد صاحبي شغلتها معاها براتب 2500 جنيه وخط موبايل مفتوح ولا تفعل شيء طول النهار، ومدير الانتاج بتاع اللانشون بياخد قدها، شوفي باه لو خطأ حصل مع مدير الانتاج هاتبقى مصيبه كبيره وممكن المصنع يقفل، لكن هي لو اخطأت فالامر عادي
ثانيا: التقارير الموجوده عن جدو والمنتخب وده لأن المنتخب كان مخلي 80 مليون قاعدين امام التليفزيون، عشان كده التقارير كتير - ليلة فوزنا بكأس افريقيا كنت ماشي في الشارع مع واحده امريكيه معرفه، قالت لي ايه اللي بيحصل، قلت لها أصل احنا كسبنا، قالت لي طيب ما احنا بنكسب على طول ومش بنعمل كده في بلدنا، قلت لها معلش اصل احنا مش بنكسب كل يوم
ثالثا: الناس بتلبس احمر في عيد الحب لأن عندهم الحصبه
العالم بتحتفل بعيد الحب في نوفمبر وفي فبراير من الفراغ، مش كفايه عليهم يوم واحد في السنه، لأ- عاوزين يومين في السنه
كل دول عاوزين واحد يقول لهم .... عااااووووووو
(مشيها عاااووو عشان الرقابه)
:S
إيه جرعة الإكتئاب الصح دى
إزيك؟؟
بصراحة أنتى معاكى حق اوى ..و بجد حاجة تخلى الواحد يقرف من نفسه و من حياته..بصى بالنسبة لمشاكل البلد معرفش حتتحل إزاى
أما بالنسبة ليكى انتى تفائلى خيرا مهما كانت الظروف و أستعينى بالله و طورى من نفسك فى كذة مجال و دورى على شغل تانى و فى كل حتة مهما كان الرفض..و حاولى تشتغلى حاجة انتى بتحبيها غير مجالك و أملى وقتك و ادعى ربنا كل يوم..و إن شاء الله ربنا حيوفقك
اه اه يا انسان
اولا عميق تقديرى للتساؤلات
علشان تخصصك اللى عرفته من خلال التعليقات
مش سهل حد يفهمه او يعرف اهميته
يبقى ده محتاج مجهود منك فى تعريفه
وكمان فى استحداث فكرة اهميته وانعاكسه على جودة العمل
اى صاحب عمل لن يدرك تخصصك وقيمته الا عندما يؤثر فى مصنعه او شركته ويدرك اهميته
لذا
اعملى باور بوينت بشكل موجز عن تخصصك
وتاءثيره على رفع كفاءة الشركة او المصنع
وحاولى لما تروحى انترفيو تكونى قراءئتى عن الشركة او المصنع وعملتى تصميمم باستخدام تخصصك عن استفادة تلك الشركة بما دراستيه
ام عن موضوع الخبرة
فيه حاجة اسمها ارمى الطعم علشان الكبير يتغذى
يعنى ايه
فيه ناس بترمى الطعم وتصطاد سمك صغير
وفيه ناس عارفة انى فى البحر سمك كبير
علشان كده بترمى طعم مختلف
انتى بقى ارمى لصاحب الشركة او المؤسسه
انك مش عاوزه مرتب لمدة 6 شهور مثلا
وخلال الست اشهر شوف حضرتك التطور اللى هايحدث فى المؤسسسه من خلال تطبيق فكر جديد
وممكن يكون اكيد عندك اسلوب مختلف
اختصارا يا نور
الفكر الابتكارى والصدمة العقلية هى اللى محتاجنها فى مصر
علشان تخلقى ليكى كيان مختلف
طبعا البوست يثير تساؤلات
بس لن يؤثر على من يفهمون الواقع ويحللوه مثلك
علشان كده خلى عندك الطموح والحلول
واعملى بصمتك بنفسك
وشوفى جانب تطبيقى لتخصصك وابدئى وكونى مع زملائك فريق اسمه فريق النجاح والابتكار
ربنا يوفقك فى حياتك ويهبك الصالح فى الحياه والاخرة ايضا
تقديرى
ورقم موبيلك كاااااااااام يا ام نبيل
(وش بيغمز)
ربنا يبعد الاكتئاب يا ستي
سيبك منه ونفضيله
وان شاء الله ربنا هيوفقك
وبالنوسبة للأسئلة
مقدرش اجاوب عليها
ليجيلي اكتئاب انا كمان
هههههههههههه
افرجها من عندك ياااااااااااااااارب
يااااااااااااه كل ده شايلاه فى قلبك وساكته هههههههههههه
يابنتى كلنا بنسأل نفس الأسئله وكلنا مش لاقيين اجابات
بس انا عارفه ايه علاقة الصوره بالموضوع ;)
ربنا يحققلك كل أحلامك يارب :)
مواضيع مهمه تطرقتى ليها وانا موافقك على وجهات نظرك الثاقبة وعيد حب سيد ان شاء الله
تحياتى ليكى
هههههههههه
والله ماقدرت أمسك نفسى من الدحك
عجبتنى أوى ياولاد الجزم دى وحكاية عيد الحب دى كل الكلام اللى قلتية كنت هقولة فى مدونتى بس خلاص إنتى حرقتى الموضوع
بجد البوست هايل ولخصتى وجبتى المفيد بس والله فعلا حرام اللى بيحصلك دة
رابع دفعة مرة واحدة يعنى مش 300 ولا حاجة ......
أول زيارة للمدونة بس إن شاء الله مش هتبقى أخر زيارة
سعيد جدا بزيارتى لمدونتك وأتمنى يبقى فى نظرة تفائل وإن شاء الله ربنا يوفقك
happy
valentines
day
joker
ياااااااه
فكرتيني بأيام زمان
اول ماتخرجت وكنت لسه شاب كده وفرحان بنفسي
دكتور في الكلية عندي اتصل بيا وقالي علي منحة لأيطاليا تبع تخصصي وهاروح احضر ماجستير وكده
بعد مامشيت في اجرأت طويلة لشهور
لقيت الموضوع كله كوسة
هي دي بلدنا يابشمهندسة
ومتزعليش نفسك خالص
ولا اكتئاب ولا بتنجان
اتمني تزوريني بمدونتي الجديدة
http://samtelghrob.blogspot.com
تحياتي
نهر الحب
********
ياخراشى
اتاريكى شايله فى قلبك وكاتمه ياايناس :))
بصى لا تعليق على كلامك لانه تفريغ شحنات ترتبط ببوستى فلا تعليق
ربنا يهونها عليكى وعلى كل اللى بيفكروا فى البلد دى
وتحياتى ليكى كمان وسلامة دمك :)
لورنس العرب
************
!!!! كلامك فى اولا صدمنى
مشكلتى ياعمو لورنس انى لسه فاهمه الدنيا حلوة اوى وجميله ومافيهاش كل الكلام اللى بيتقال ده لانى زى العيال الصغيرين بقول ده كلام افلام وجرايد بس دايما ماما تقولى مشكلتك انك متفائله بزياده لحد مالتفاؤل ده هيرزعك فى حيطه فى الاخر الدنيا مش زى ماانتى فاكراها؟ العيب فين؟!!
وثانيا التقارير مبالغ فيها اوى يالورنس
اوى اوى
هو رد على الامريكانيه منطقى زى ماسؤالها برضه منطقى وانا مش ضد الاحتفالات والفرحه لانى انا من الناس اللى فرحت اوووووووووى بس احنا برضه هايفين اوى .الاعلام عرف يختزل طموحنا وافكارنا واحلامنا وكل حاجه حلوة لينا وفينا فى كورة قدم!!
طيب اقولك لو احنا رياضيين اوى كده ممكن تقولى مفيش حد سمع عن عمر سمره ليه؟!! الولد الجميل اللى اتسلق ايفرست وغيرها 3قمم من اعلى سبع قمم فى العالم؟
طيب ليه الالام مابيعملش نفس الضجه للناس اللى كانت بتاخد ذهبيات وفضيات وبرونزيات فى الاوليمبيات؟
الموضوع بقى ضرب عالحديد وهو سخن واحنا غلبانين بنتلكك عشان ننسى همومنا ومشاغلنا ومشاكلنا
اما عن اخيرا
فى ناس كتير عايشه بشويه الرومانسيه والحب اللى فى قلبهم ياعمو
انا من الناس اللى ضد مظاهر الاحتفال بالفالنتاين رغم انى من مؤيدى اهداء الاحباب هدايا مين ماكانوا مش شرط اللى مرتبطين بيهم او مخطوبين ليهم او متجوزينهم
فخليهم يعيشوا باللى فى قلبهم
طيب خليهم يحبوا شويه يقووهم على همومهم ويصبروهم لحد ماربنا يعدل ظروفهم ويقدروا يتوجوا اللى بينهم بالحلال
طبعا كلامى مقصود بيه اللى مرتبطين وبيحبوا بعض بجد مش تسالى
وده كله ان طلعنا منه بحاجه هتبقى حاجه واحده
وهى " بخخخخخخخخخ" :)
أنا ودماغى
***********
دى مش جرعة اكتئاب دى جرعة مصارحة مع النفس بس ومع الواقع الاليم:(
بالنسبه لموضوع الشغل
فالحكايه اكبر من اللى فى دماغك بكتير
بكتير اوى
منورانى يااموره
لأ ..لالالالالالالالالا
لالالالالالالالالالالالالالالالالالالالالا
انا منذهله ومذبهله ومنشكحه وكل الاحاسيس مضروبه فى خلاط مع بعض من ساعة ماقريت الكومنت بتاعك
فى لسه ناس بتفهم فى بلدنا ياولاد
انا مبسوطه بجد ومش هفقد الامل انى الاقى حد بيفهم وبيفكر مهما حصل وحتى لو قلة قليله اهم حلوين برضه :)
اييييييييييييييه الكلام الجامد ده تسلم الدماغ
شوف ياابو على مع احترامى وكل تقديرى ورفع قبعتى كمان لافكارك انا فكرت فى حكايه البور بوينت دى فعلا ومش صعبه
وكمان حكايه رمى الطعم ومش عايزة فلوس ودى برضه مش صعبه
بس انى قبل اى انترفيو اكون قاريه عن الشركه واقول دراستى هتفيدها فى ايه؟ دى صعبه جدا جدا جداااااااااااااااااا
ليه بقى
لان الموضوع مش سهل اوى كده
هو سهل تنفيذه لانى عملت بروجيكتس كتييير قبل كده فى الحكايه دى وعلى شركات كبيره اوى فى البلد وعملت نتايج كويسه بس الفكره انى عشان اقدر اقدم دراسه مقنعه لازم بيانات واضحه عن قلب الشركه من جوه ودى صعبه من غير وجودى جواها
اما عن حكايه الراتب فانا معنديش مانع بس عارف؟
ابسط حاجه ممكن تتقالى ايه؟مفيش حد بيشتغل ببلاش دلوقت اكيد انتى دسيسه من المنافسين بتوعنا ودى اتقالتلى قبل كده فى تدريب صيفى فى شركه مالتى ناشونال فى العاشر من رمضان لما بس طلبت اشوف خطه الانتاج بتاعتهم !!
اما عن فريق النجاح ففكره روعه جدا واحب اضيف لحضرتك انى كنت بشتغل ك team player
فى الكليه لمدة سنتين ونص يعنى خمس تيرمات متتاليه وكنت قائد الفريق رغم اختلاف اعضاؤه فى كل سنه بس النتيجه ان بعد انتهاء الدراسة كل واحد راح لحاله وشاف دنيته بقى.وتفتكر فى بلدنا المحترمه دى هيرضوا يشغلوا فريق عمل جاى مع بعضه؟ ابسط حاجه هتتقال دول جايين ممكن يعملوا رباطيه او تحالف عالادراه فى اى وقت يعنى زى المسجلين خطر :)
سيبك ياابو على هو اولا واخيرا رزق وانا عليا باخد بالاسباب :)
تحيااااااتى وتقديــرى لدماغك وافكارك ووقتك اللى ضيعته فى كتابة كومنت طويل كده عندى :)
منورنى دائما وابدا ياابو زجزج وبيج بيج ودم الغزال :)
MaNoOoSh
*********
:) توقعت انى هروح بلوجك الاقى طبل وزمر وزغاريت بعد مااتريقتى عليا فى موضوع الاكتئاب ومارضيتيش تجاوبى الاسئله خوف منه قوم اييييييييييه اتصدم لما اروح الاقيكى برضه بتتكلمى عنه :)
منوره يامنووووووش
Butterfly
**********
:) اها شوفتينى وانا كاتمه فى قلبى؟
ببقى عسل صح؟ هههههههه
عارفه علاقه الصوره بالموضوع؟ طب قولى :)
منور ياعسل
الارموطى
********
متشكره لتوافقك معايا فى وجهة نظرى
ومبسوطه بزيارتك
نورتنى :)
a7med-Mado
***********
:) ضحكت على كلامى بكم الاكتئاب اللى فيه ده؟ والله كويس :)
حرام اللى بيحصلى؟ هو رزق ومكتوبلى وانا مستنياه يااحمد
اما عن حرق الموضوع فانا اسفه
يو كان ساى وات يو وانت فيه :)
تقدر تقول اللى تحبه ولا كانك قريت حاجه
نورتنى وانا اسعد بزيارتك :)
شبــ اون لاين ـــاب
*******************
كل سنه وقلبك مليان حب ياجوكر :)
Mano
*****
:( حكايتك زعلتنى اوى يامانو
بس الشيخ الشعرواى ربنا يرحمه كان بيقول باختصار ماتزعلش من الحاجه اللى تسعى ليها وماتجيش غصب عنك لاسباب خارجه عن ارادتك لانها بتكون اختيار ربنا اللى شايف الخير اكتر منك
لعلها مكانتش خير يامانو
تسعدنى زيارتى ليك طبعا :) نورتنى
تقريبا انت كاتبة وعارفة كمان الناس حتقول اية وترد عليكي ازاي الوظيفة عشان الكوسة وجدو عشان مفيش اي حاجة تانية الريس يفتخر بها وبالنسبة لودا الأكتئاب اديكي وزعتيه على الحبايب ولقمة هنية تكفي مية ...وفلانتيين ماشي حاجة والله لولا الدباديب والورد والسبوبة ما كنت شفتي الفلانتين ده في مصر.. واقطع دراعي لو حد يعرف مين فلانتيين ولا حكايته المهبيبة انه بصريح العبارة كان قرني ولكن نصيب بقى الناس بتحتفل به ..
أول حاجة
مشكلة تواجه الجميع بعد التخرج مباشرة وتزول مع مرور الوقت
النصيحة: قبول أي وظيفة قد تكون أقل من مؤهلاتك نسبيا "لكن في صميم تخصصك" حتي تكتسبي تلك الخبرة المزعومة
تاني حاجة
في الشعوب كما في الأنهار .... التافهون يطفون علي السطح --- أنيس منصور
تالت حاجة
أغنية ليلي مراد : الحب كلمة من حرفين من غير ميعاد يقولوها اتنين
ليس للحب مكان معين ولا زمان معين ... هو بييجي خبط لزق كده ... ويجب الإحتفال بعيد الحب في الموعد الذي جاء فيه وليس تخصيص موعد معين ... حتي لا تفقد المناسبة قيمتها... زي عيد الميلاد كده ... مش كل شخص له عيد ميلاد بيحتفل بيه ... ولا بيخصصوا يوم في السنة يقولوا ده عيد المواليد ... مجرد وجهة نظر
رابع حاجة
دواء مضاد للإكتئاب : مداومة الإستغفار وذكر الله
بسم الله الرحمن الرحيم" ألا بذكر الله تطمئن القلوب" صدق الله العظيم
سؤالي لحضرتك ... مع تحمل جهلي ... مين هو .. وجيه عزيز
شكرا جزيلا
بصي يا بيبيييبه
هو رد واحد على كل ( العوأ ) اللي انتي عددتيه بجداره ولا ندابة العزى ومعلش على تشبيهي الواطي بس كلنا بقينا نعدد زي الولايا ، المهم ان ردي الوحيد لكل ده ، طبعا هو اللي حاصل قطعا خطأ ،بس هناك نوعين من الخطأ واحد فيهم متعمد ، يعني البهاوات اللي ماسكين البلد من وسطها وهيا مدياهم ضهرها ، قاصدين ان العوأ ده يحصل وبصورة تخلينا كلنا معدداتيه ولا المتأجرين للصويت في ميتم عمدة القرية .
وهدفهم من ده ان القدوة للشباب ميكونش حد زي زويل ولا جويده ولا حتى انتي يا محترمه ، اطلاقا ، القدوة اللي جايه على مزاجهم هما لعيبة الكورة وشوية مطربين مسقطين بناطيلهم ومبينين اللباتيييييييييييييت ، تقولي دول قدوة اقولك على عيني وراسي ، انما هتعملي فيها حلنتجي وتيجي تقشرلي الاسفلت على قفا الزمن المتكلس ، احطك في دماغي واظرفك ظرف على يد محضر بعلم الوصول
حد فاهم حاجه ؟
اللي فهم حاجه هو الوحيد اللي يقدر يرد عليكي ويقولك سبب العوأ ده ايه
لاني بصراحه مش فاهم حاجه (:
ومدونتي بتسأل عليكي وبتقولك ايه النظام (:
Tarkieb
********
اولا اهلا بيك فى مدونتى للمره الاولى :)
وثانيا والله حكايه الكوسه دى كان عندى شويه امل لسه فاضلين ان حاجه كويسه تحصل بعيد عنها بس يظهر ان احلامى الوردى بتخوننى :(
وثالثا اسفه بخصوص الاكتئاب انا ماقصدتش اشيله للناس معايا انا بحب اتكلم عن اللى جوايا وبس
اما رابعا فالاخ فانتين حكايته معروفه اللى كان بيجوز الناس بتوع الجيش من ورا الملك المفترى الظالم قام الملك شنقه ومن ساعتها واحنا بنحتفل بيه او اقصد هما بيحتفلوا بيه :)
نورتنى ياافندم
ALOKA
******
من غير ترتيب كلام اهلا بيك فى بلوجى لاول مره
بالترتيب بقى
أول حاجه
والله مش عندى مانع ابدا انى اقبل وظيفه اقل من مستوايا نسبيا بس المشكله انى مش لاقيه فى صميم تخصصى لان فى تخصصى الكبار بس هما اللى مطلوبين وحضرتك لو تابعت ردى على تعليق مهندس سيد عبد المنعم هتعرف هو ايه
تانى حاجه
تحفه المقوله دى اول مره اسمعها وجزاكم الله خيرا :)
تالت حاجه
وجهة نظرك محترمه جدا ومتفقه معاك فيها
ورابع حاجه
شكرا جزيلا على النصيحه الغاليه وخير ماقلت :)
وخامس حاجه
مش جهل من حضرتك ولا حاجه انك ماتعرفش وجيه عزيز لان البلد اللى هاضمه حقه مش الناس اللى ماتعرفوش
وجيه عزيز هو فنان من القلة القليله المحترمه فى مصر
يعنى سمعته نضيفه جدا وعمره ماكان بيتقال فيه قيل وقال
بيغنى ويحيى حفلات فى ساقيه الصاوى من وقت للتانى وجمهوره قليل اوى لانه مااخدش حقه فنيا رغم حسه الفنى الجميل جدا وصوته كمان
هو تقريبا كان فى الجيل المتوسط اللى كان بعد جيل العظماء يعنى مثلا تقدر تقول نفس جيل لحجار وهانى شاكر الا انه فعلا يستحق الاحترام
ممكن تسمعله لو ضغطت على اسمه فى البوست او تسمع اللينكات دى
http://www.youtube.com/watch?v=YI-gDvfumjE
http://www.youtube.com/watch?v=7tvnJoL-2sE&feature=related
http://www.youtube.com/watch?v=CTXFywqwOMk&feature=related
ودى احد صفحاته عالفيس بوك لو تحب تتطلع
http://www.facebook.com/nice.habiba?ref=nf#!/pages/Wagih-Aziz/22212755048?ref=search&sid=1231803521.2357123477..1
:) اسفه لو رغيت كتير
نورتنى
☼♫♪ عمــاد الدين يــوسف ☼♫♪
*****************************
:-o
:-o
:-o
يخرب بيتك ياعماد تعليقك خضنى
اقسم بإنه لو جه من حد مش واثقه انه بيعزنى وبيحترمنى زيك كنت قلت حد داخل يقل ادبه عليا هههههههههههههه
مش غريب عليك تبقى شايل فى قلبك كده بس انت النهارده طافحه شكلك
روح ياعماد بص فى عيون ملك هتنسى كل القرف ده وكل ماتقرف اكتر بص فى عنيها والمسك اديها
نسيت اقولك ياعماد نص تعليقك مافهمتوش بس حسيت انه كلام مش كويس هههههههههه ماتفسر شويه
سلملى على مدونتك وقولها انى متابعاها باماره اخر بوست ليك مضاف فى مفضلتى بس مش جالى نفس اعلق
منور يااخينا :)
إرسال تعليق