عن البرادعى والأمل..وجهات نظر

البرادعى اللى أثار الاحاديث حواليه الفتره اللى فاتت لانه الامل المنشود للمصريين

فى الحقيقه لحد حواره مع منى الشاذلى مكنتش اعرف عن طريقه تفكيره ولا دماغه حاجه اكتر من إنه شخصيه محترمه لا تشوبها شائبه

ولأنى مكنتش اعرف هو ممكن يبقى رئيس كويس لمصر فعلا ولا لأ كنت بعلق الامل على انه قدر يدير وكالة الطاقة الذريه 12سنة اخد بسببهم جايزة نوبل إذن هو مبدأيا اهل لانه يقدر يتولى مسئوليه حكم مصر حتى ولو كان مش هيبقى قدها اوى مهما كان مش هيكون سئ زى الوضع الحالى

كنت خايفه جدا تطلع الناس متعلقة بيه من نفس منطلق البنت العانس اللى مابتصدق يجى اى حد البيت فتقول عريس يابوى حتى لو هو كان سئ لدرجه انه لو جالها ايام عزها وجمالها كانت رفضته بالتلاته

لكن الحقيقه حواره مع منى الشاذلى كشف كتير وهو افضل نسبيا عن كونه صامت وهادى وواخد جمب زى عادته ومش عارفين دماغه فيها ايه

لكن عن الحوار كان ليا شويه ملحوظات

أولا : مال كون الراجل سقط فى امتحان فى الحضانه ولا فى الحقوق بكونه هيمسك رئيس دلوقت؟ اذا كان الراجل اخد جايزة نوبل

طب ماهو ياما ناس كانوا اوائل ودلوقت موظفين فى الحكومه بيشيلوا البطيخه ويركبوا اتوبيس الهيئه ويحطوا منديل على قفاهم

وثانيا: هو كون الراجل اضطر لانه يمر من بين الناس بعربيته مش ماشى على رجليه يبقى كده هيتعامل مع كل المشاكل بسياسه التعالى والشوكه والسكينه زى ما منى قالت؟ وحتى لو كان بيعمل كده خوف من الناس اللى جايه تستقبله ما المانع يعنى فى انه يخاف على نفسه من وجود دسيس طب ماهو الريس الموجود دلوقت بيلقى خطبه احتفالات اكتوبر من مكتبه الخاص ومن تحت المكتب لو لزم الامر

وثالثا: تقديم تقرير عن عينات من الشعب لا ليها فى التور ولا فى الطحين زى اللى مايعرفش الاسم اساسا واللى فاكره البرادعى بتاع انا البرادعى يارشدى ولا يالطفى مش فاكره ولا واحد بيقول عليه واخد الايزو مايعرفش اكيد يعنى ايه ايزو والا مش هيقول ان ممكن بنى ادم ياخدها ده على اساس ان الهيكل التنظيمى بتاعه مظبوط مثلا!!
ده هما شايفينه يدينه هو فى ايه؟ عشان كان مسافر بره؟ طب ماهو شغله واللى قاعدين جوه بيعملوا ايه؟ ماهم بيخربوا
اهو ده على الاقل عمل حاجه لاسم البلد

 ورابعا: مهاجمة منى ليه على اساس انه مالوش حزب مناصر ليه وانه بيشتغل لوحده وبيقول كلام معسول يعشم بيه الناس قد يكون تنفيذه فى الحقيقه صعب بل مستحيل. طيب هو كونه مالوش حزب ده عيب؟ انا بصراحه شايفه ان مفيش حزب محترم يستحق ان ينتخب منه رئيس فى بلدنا.لا وطنى ولا معارضه ولا من اى تيار سوا اخوان او غيره.وجهة نظرى الشخصيه ان دول كلهم كل واحد على راسه بطحه تبعده بعد المشرق والمغرب عن اهليته للوصول لرئاسه مصر واعتقد ان البلد فيها محترمين كتير بس مش ظاهرين لان الفساد اكبر والراجل ده لو مسك الرياسه مش هيغلب انه يدور على شوية المحترمين دول ويمسكهم وزراء يساعدوه فى الحكم

وأخيرا: منى الشاذلى مكنتش قادره افهم موقفها.ده لو الريس نفسه هو اللى كان معاها بكل بلاويه ومصايبه مش هتحتد عليه كده !!

فى الحقيقه دورت على تفسير لموقفها مالقيتش غير تفسيرين محتملين

1- إما إنها كان بتلعب معاه بسياسة الاتهام بالاخطر عشان هو يتحط فى موقف الدفاع عن نفسه فيضطر يستخدم كل اسلحته وهى اخراج مافى جعبته لاظهار نواياه الحسنه وساعتها الناس تقدر تحكم عليه

2-أو انها كانت سلاح فى ايد حد اتحط حوارها ده فرصه لمحاولة تصغير البرادعى فى عيون الناس فمايحاولوش انهم حتى يثقوا فيه

البرادعى من وجهة نظرى الشخصية بارع وذكى ذكاء حاد وعنده سرعة بديهه جباره واحساسى كمان وان كانت السياسه ملهاش فى الاحاسيس ان الراجل ده يستحق انه يتأمن على الناس

منى كانت رائعه فى الحوار ومتألقه جدا وعرفت تلعبه كويس اوى حتى لو كان دوافعها حاجه غير اللى فهمته بس لو الدافع كان السبب التانى فى اللى فهمته فأنا هحتقر منى وهكرهها كمان لكنها ابلت بلاء حسن على عكس اشعاع الهمجية اللى اسمه عمرو اديب

وأخيرا وجهة نظرى الشخصيه ان مهما كان البرادعى سئ فهو مش أسوأ من النظام الحالى يعنى لو بفرض لا قدر له طلع وحش فهو اقل سوء يبقى هو الامل اللى فاضل

وإشارة أخيره لحاجه ترتبط بالموضوع

فاتتنى فرصه استخراج بطاقة انتخابيه فى شهر يناير وبعد محاولات مضنيه وبهدله عشان استخرجها فضلوا يماطلوا فيا عشانها ومعرفتش اطلعها انا واخويا

المهم اضطريت انى اتصل بخالى اللى هو ظابط فى القسم عشان يخرجهالى بدال مااتبهدل رغم انى مابحبش الجأله عشان حكايه الوسطه دى وفعلا قالى ابقى عدى عليا فى القسم هعملهالك المهم من غير رغى كتير

كنت عايزة اروح اعمل فيش فى القسم هو فضل معايا عشان الزحمه لحد ماعملته وخلص معايا كل حاجه وقبل مااخلص البصمات بدقيقه قالى هطلع اعمل حاجه وفعلا طلع خلصت واتصلت بيه عشان نعمل البطاقة ليا ولاخويا قوم ايه الاقيه بيقولى طيب يانور امشى انتى بقى عشان الراجل مش هنا!!!!!!!!!!!!!!
 نااااااااااعااااااااااااام ياخويا

عايزة اعمل البطاقه قالى مش النهارده

بقالك اسبوع بتقولى مش النهارده طيب خد صور البطايق بتاعتنا وابقى اعملها وعديها عالبيت قالى ابقى ابعتيهم عالبيت

المهم نستنتج ايه من الموضوع ده

ان خالى طبعا ندل وزيهم كلهم واننا بالعند فيهم لازم نطلع البطايق صح يارجاله؟

لينك حوار منى الشاذلى مع البرادعى-اضغط للمشاهده-

تدويانت أخرى كتبت عن الموضوع

هنا

وهنا

وهنا

وهنا