الأربعاء، يناير 27

عالم سمسم.... مش مبسوطه :(




من كام يوم قريت خبر فى مدونة "أيام وأيام" نقلا عن جريدة اليوم السابع بيقول ان شركة الكرمه للانتاج التعليمى الترفيهى هتبتدى فى خلال الايام القليله اللى جايه تصوير الموسم العاشر من عالم سمسم 

الخبر طبعا اسعدنى جدا فى الحقيقه لانى كنت بحب خوخه جدااا :) 
بصراحه البرنامج كله كنت بعشقه يمكن اكتر من الاطفال

اولا لانه كان بيقدم وجبة جميله من البراءه والتلقائيه اللى ترضى الطفل اللى جوا أى حد فينا

وثانيا لأنه كان بيقدم وجبة تانيه أكتر دسامه واحترام وهى سلسله جميله من الاداب والعادات الجميله اللى ممكن تتنقل بدورها للاطفال عن طريق حبهم لخوخه وفلفل ونمنم وبالتأكيد حب لتقليدهم وكمان الاطفال الحقيقيين اللى كانوا بيجيبوهم يمثلوا معاهم صور حيه من حياتهم الحقيقيه


زى مثلا ان عالم سمسم هو كان من الذ البرامج واكترها تقديم لعادات اسلاميه واجتماعيه جميله افتكر منها على سبيل المثال لا الحصر 
الاطفال اللى كانوا بيجوا يتوضوا ويصلوا 
اللى كانوا بيساعدوا اطفال محتاجين
اللى كانوا بيجوا يزرعوا شجر ويرووه 
واللى بيساعدوا اهلهم سوا بنت فى شغل البيت مع مامتها او ولد فى الارض مع باباه

فضلا عن انهم كانوا بيقدموا الحكمه من ورا تقديمهم لكل نموذج من النماذج دى عشان ببساطه الطفل يفهمها ويحاول يتبعها




وعشان مااطولش فى الكلام مااحزننى بجد ان دلوقت بقى وللاسف فى انتاج الموسم العاشر مش شركه الكرمه لوحدها اللى هتقوم بالانتاج
لأ الانتاج بقى مشترك مع "سيستم وورك شوب" الأمريكيه ووزراة التربيه والتعليم من خلال المنحه المخصصه ليها من المعونة الامريكيه

بمعنى اننا وببساطه مش هنشوف دلوقت حد بيصلى ولا بيتوضأ ولا اى حاجه تمت للاسلام بصله
واذا قدموا حد بيزرع او بيساعد او بيساهم هيبقى من باب التحضر والتمدن والاتيكيت احيانا 


المشكله بقى انى قريت عند ماما فى المكتبه من حوالى 3 او 4سنين كتب كانت جايه للمدرسه من المعونه الامريكيه 
طبعا الكتب رائعه مايتقالش فيها كلمة وكفايه عوامل الجذب اللى كانت متحليه بيها 

بس لما فتحتها اتصدمت
كلها اعلانات عن كوكاكولا وماكدونالدز ومنتجات امريكانا كلها تقريبا!!

حسيت انى ماشيه على كوبرى اكتوبر ولا فى ميدان رمسيس او داخله سينما مش بقرا فى كتاب جاى لاطفال فى مدرسه ابتدائى!!

وإذا كانوا بيعلنوا للاطفال عن الحاجات دى فى السن ده اكيد هيستخدموها وهما مغمضين يعنى سياسه السم فى العسل


وإذا كانت المعونات الامريكيه اللى جت لوزاره التربيه والتعليم زمان واللى ساهمت فى بناء اضعاف اضعاف عدد المدارس اللى كانت موجوده اساسا فى مصر منعت تخصيص مساحه ولو مترين فى مترين تستخدم كمصليه فى المدارس وطبعا حقهم لان المال مالهم


دلوقت مش هنقدر نقول بم لو قدمولنا اى صوره او فكره ايا كانت حتى لو احنا رافضينها


اعتقد إن الموسم العاشر من عالم سمسم هيكون مختلف كتير عن اللى كانوا قبل كده ومش هيسعدنى زيهم


يعنى بيتهيألى مش هستنى من عالم سمسم ده غير"خوخه وفلفل ونمنم وخاله خيريه وعم حسين"
أما أى حاجه تانيه كنت بحترمها حتى لو جت هبقى شاكه فى سلامة النيه من ورا تقديمها


حد يقولى بس مع المنحه الامريكيه ازاى هنقنع العيال بالمقاطعه
يخرب بيت كدا بجد
اوف




هناك 13 تعليقًا:

romansy يقول...

اول تعليق
يا خوخه
قصدى يا نور


ل


رومانسى

romansy يقول...

يا اهلا يا اهلا
منحه امريكيه وانتاج مشترك يعنى ببساطه هيعملوا اولاد الناس ومدارس اللغات دول الطبقه اللى هتكون موجوده دايما ونلاقى حاجات جديده علينا وممكن نلاقى كمان ازاى
كان بوش بيزرع ولا ازاى بيساعد الدول فى انتشار الفكر الجديد وازاى وازى
حاجات كتير قوى هتتغير
بس لما نشوف ايهاللى هيحصل

كيكى عوووووو يقول...

يعنى هى جت على دى

الميكروباص يقول...

المعونه

انا كنت كتبت موضوع في نحن والغرب عن المعونه من اسبوعين تقريبا
وطالما انك بتاخد المعونه يبقى لازم تسمع الكلام
وعشان تسمع الكلام وتبقى حلو وجميل لازم تطبق الاوامر
ده شيء أقل من العادي
...

مع اني عامل بيات شتوي
بس جيت مخصوص عشان أقول حاجه مهمه
وحاجه مصيريه لا تحتاج التأجيل

عااااااوووووو

gogo!sf يقول...

بجد اوف اوف

بس مش على امريكا علينا احنا
كل ما نعمل حاجه ليها لزمه نضيعها من ايدينا ومش كفايا علينا اللى هما بيبعتوه لاء ده احنا كمان بنساعدهم

بس الامل موجود طول ما فى ناس بتاخد بالها ولسه بتحذر

وعلى العموم العيب على الكبير مش على الصغير

بجد اوف لانى زهقت جدا

سلام يا قمر

جوجو

انتظرينى قريبا على مدونتى قسوة الايام كلها من واقع الحياه

Meme يقول...

حد يفهمني دخلها ايه امريكا حاشره نفسها في كل حاجه؟؟؟؟

well يقول...

احتلال امريكى جديد
خسارة والله يا عالم سمسم
تحياتى

*الطالبة عفو الله *زوزو يقول...

اولا ازيك يا نور وحشاني
والله مش لاقية اي تعليق
غير الله المستعان

تحياتي

Unknown يقول...

سياسه السم فى العسل
ماشيين بيها من زمان
واحنا ولا ندرى شيئاً
ربنا يرحمنا يارب.

MaNoOoSh يقول...

هو دة حصل من زمان اصلا
هويتنا اتمسحت
وبيتمحي كل اثارها الوقتي

شيماء الجمال يقول...

دخلت ولقيت الموضوع
بصي يا جميل هقولك كام معلومة:

1-عالم سمسم من أول حلقة وهو بيتعمل مع المعونة مش الموسم ده بس وما أعتقدش ان حد اشتكي طول السنين اللي فاتت انه بيدخل قيم مش اللي هيا ..فما تقلقيش قوي كدة :)

2- عالم سمسم مفيهوش اعلانات فإطمني

3- فريق الكتابة كله مصري وبيعمل البرنامج بما يتناسب معانا وتبعاً لثقافتنا محدش من برة بيقدملنا المحتوى .

4- دول عربية كتير بتعمل البرنامج ده مع المعونة الأمريكية ومنها الإمارات وهناك البرنامج اسم " افتح يا سمسم"


ارجو الكلام ده يكون مفيد بالنسبالك :)

حزينه يقول...

ياريت البراءه ترجع تانى لعيونا


حزينه

الميكروباص يقول...

......................... ووووو

أكمل مكان النقط!