أحيانا بنحب الغيبوبة بمزاجنا وبإرادتنا الكاملة
يمكن عشان بنغيب عن الوعى ونسرح شويه
بناخد اجازة من التفكير والدنيا والهموم والمشاكل؟
بس الغيبوبة الاجمل بتبقى واحنا صاحيين بس مغمضين
أنا بعملها لنفسى لما بطلع على سطوح بيتنا
هو من غير سور فاااضى وواسع وهادى
أجمل مافيه منظر الزرع اللى فى الجنينه اللى قصادنا
ولما اقعد عالارض وافرد رجليا واتركن عالعمود واسرح ساعة عصارى واشوف عباد الشمس وهو مايل ناحية الشمس بيمسى عليها ويترجاها عشان ماتغيبش وبرضه تخذله وتغيب عنه
سمعت اغنيه بصوت بنت لبنانيةاسمها اميمه الخليل تحفة
كلماتها تمس القلب والروح كمان..حسيتها اوى
انا اصلا بعشق صوت الاغنيه من غير موسيقى
بتشجينى اكتر وبستمتع بيها اكتر
اسمعوها هى رقيقه اوى
نفسى اسمع مسلسل وينتر سوناتا الكورى تانى
اكيد معظمكوا ان لم يكن كلكوا فاكرينه
التلج...وش يوجين الصافى ...وهى وحبيبها اللى زى الاطفال
عملولى مشاكل كتير ايام ثانوى لما كنت بسمعه وكان اعظمها لما جدة ماما ماتت وكنا بايتين فى بيت جدو وانا كان لازم اسمعه فنزلت الارضى سرقه عشان اسمعه وهما قاعدين فى الدور التانى ولما جت مرات خالو وقفشتنى هى وخالتو وقفت واحده فيهم عالسلم والتانيه عالباب لحد ماسمعته وكانت النتيجه ان خالتو سابت مراقبة الباب وجت تسمعه معايا :)
عملولى مشاكل كتير ايام ثانوى لما كنت بسمعه وكان اعظمها لما جدة ماما ماتت وكنا بايتين فى بيت جدو وانا كان لازم اسمعه فنزلت الارضى سرقه عشان اسمعه وهما قاعدين فى الدور التانى ولما جت مرات خالو وقفشتنى هى وخالتو وقفت واحده فيهم عالسلم والتانيه عالباب لحد ماسمعته وكانت النتيجه ان خالتو سابت مراقبة الباب وجت تسمعه معايا :)
الفيديو ده لما سمعته قعدت اعيط معرفش ليه
يمكن لانه لمس حاجات فيا؟...معرفش المهم انه رقيق
ملحوظه..التدوينة ملهاش موضوع غير انها فضفضة والصورة ملهاش علاقة بأى حاجه غير انى بعشق زهرة عباد الشمس وبقالها كام يوم مابتفارقش تفكيرى !!
*العنوان هو اسم لاغنيه رومانسيه قديمة لستيفى واندر
هناك 33 تعليقًا:
تعرفى ان الاغنيه دى
انا سمعتها وعجبتنى اوى
وفضلت ادور عليها لحد
ماسمعتها عندك تانى
ذوقك عجبنى
انتى مجنونه على فكرة
انا عمرى ما سمعت الاغنيه دى ولا شوفت المسلسل ده مع انى بعشق الرومانسيه وكنت بعمل زيك كده بالظبط زماااااااان اوى ايام اما كان بيتنا ليه سطوح
على العموم انا حملتهم عشان اعرف اسمع الاغنيه واشوف المسلسل
واكيد هيعجبونى عشان انا بثق فى زوقك ورومانسيتك كمان
جوجو عاشقه الاحزان والرومانسيه كمان
أنا أول مرة أشوف الاغنيه دي
والحقيقه هي حلوه وجميله جدا
بس محتاجه بال رايق شويه عشان يعرف يسمعها
أما بالنسبة للغيبوبه
لو لم تكن مهمه جدا في الحياه لما اشترى الناس المخدرات والاقراص اللي بتسطلهم عشان يهربوا من الواقع
يعني بيدفعوا فلوس عشان يبقى عندهم غيبوبه!
ايه ياختي اللي بيهزر من وري الباب الخوشب ده لالالا في حد يهزر مع التلج هي الناس دي مش متكتكه زينا ولا ايه ده الواحد صوابع رجله متلجه
ده انا سقعتلهم ياشيخه
طب وربنا لو هزر معايا كده وحدف تلجه لتقلب بخناقه وبجد وبحق وحقيقي وانا هتغابي عليه
انا بقلك اهو ونحدف بعض بقي وفي الاخر هتقلب بتعاوير وانتي عارفه بصي هيدبله في بطنه وفي دماغه واشده من شعره وبيو بيو لحد ما يان ليه صحاب ال يحدفني بتلج ال(وش عينه رايحه جايه) (وش من الاخر بيستهبل) يعني
شوفي ياختي سهوكه البنات هو الراجل مش قاصد حاجه خالص خالص عملوا اشكال تلج وبيقرب الاشكال من بعض عادي بتحصل يعني هي بقي ما صدقت
قليله الربايه صحيح بقلك ايه انا اتنرفزت لالا انا مش قعدالك في المدونه دي ولا لحظه سبيني ياختي اقوم انام حاجه كده تضايق
تلج ايه اللي انت جي تقول عليه بس
(.
انا زمان كنت بسمع مسلسل اسمه فليستي
لو تعرفيه كنت بحبه اوي ده بصراحه اول مره اشوفه حكم انا مليش في التلج يعني
فليستي كان في الحر والصيف
والاغنيه كلمتها تحفه
زوقك دميل يادميل
تحياتي
اه بالنوسبه للتعليق في البوست اللي قبل كده
فانا عاوزه اعرفك اني بعرف لغه عربيه صرف وبوريكي قدراتي
ثم انا اقصد ان متحكميش علي حاجه
ثم كمان ان كل حاجه بتبقي تمام التمام في الاخر
لو الامور مش تمام يبقي تأكدي انها مش النهايه لان النهايه ديما ربنا كتبهالنا خير ان شاء الله
عشان لازم نكون عندنا ثقه في الله وان كل حاجه بتحصل لنا مكتوبه وخير ونرضي بيها لانها لافضل لينا
بس ياستي
شوفتي ضيعني الكلمتين الكبري اللي كنت حفظاهم والهيبه اللي كنت عاملها في التعليق واني كنت مهمه ومشغوله
ياله ياستي فداكي
تحياتي يا بيبه ياقمر
احم
دي لبنانية
فنانة ملتزمة - بالقضية الفلسطينية يعني -
وتعتبر امتداد لمارسيل خليفه وهو استاذها
الاغنية دي كلمات شاعر الحب والحرية محمود درويش
احلى حاجه فيها انها بتتكلم اللهجة المناسبة لكل كلمات اغنيه
المصري مصري والفصيح فصيح وهكذا
تحياتي
يا مشاعرك .. يا رومانسيتك .. يا حنانك يا اوختشى ...
يا بنتى .. وانا بقرأ كلماتك بحس بنفسى دايما بس حاله الهدوء والسرحان دى مش بتجيلى غير فى السفر ابص من شباك العربيه .. واسرح بجد .. فى كل حاجه جميله وكويسه مسمعش حد جنبى
لحد امبارح فضلت سرحانه لغاية ما فقت .. على العربيه اللى انا ركباها وهى بتتفشفش مع العربيه اللى قدامها ههههههههه
بس الحمد لله جت سليمه
وطلعت كويسه الحمد لله
حلم كان
********
:) يلا اى خدمه
طيب مسبتيش حاجه على باب المدونه وانتى خارجه لزوم انى وفرت عليكى المشوار؟ :)
مبسوطه ان ذوقى عجبك
نورتينى ياجميله
gogo!sf
********
ايه انتى مجنونه دى يابنتى انتى :)
تغيبى تغيبى وتيجى تشتمى كده؟
والله الكلمه دى فرحتنى
اخيرا حد فهمنى ياربى:)
على فكره ياجوجو فاتك كتير لانك مسمعتيش المسلسل ده
هو اسمه وينتر سوناتا على اى حال
اما الاغنيه فأول مره اسمعها كان من يومين على مدونة صديقه وعملت عليها سيرش وجبتها
متشكره انك بتثقى فيا ياقمر
انتى عامله ايه بقى؟؟
لورنس العرب
************
الاغنيه فعلا جميله وانا كمان مكنتش اعرفها بس لما سمعتها صوت البنت كان جبار
عجبنى جدا
وياسيدى نفضيلها بالنا شويه ونروقه هنفضل مغمومين لحد امتى ياعمو؟!
بالمناسبه والله لو مش المخدرات حرام كنت اشتريتها لانى اتمنيت حقيقى فى وقت من الاوقات انى يغمى عليا اغماءه طويله المدى عشان ارتاح من التفكير
منور ياعمو
سمكتى العسل
**********
:))
يابت ضحكتينى والله الله يحرقك
بقى تسيبى الرومانسيه دى كلها ولعب العيال والبراءه وخفة الدم وحلاوة الروح وتمسكى فى صوابع الرجلين المتكتكه؟ ولا البرد ولا التلج؟
وبعدين يابت انتى هتفضلى لحد امتى كده ملكيش فى الرومانسيه؟
لو ماكنتش الرومانسيه تبقى فى التلج والبرد هتبقى فى ايه ولا امتى؟؟؟؟
امشى يابت انا اللى اتغظت منك
وبعدين هو الواد برئ اوى ونيته سليمه اه وهى ماصدقت ههههههههههه
قلبك ابيض ياسمكه
روحى كده ياشيخه وانتى ملكيش فى الرقه
وتقوليلى لو حدفنى بالتلج والله تقوم خناقه ؟؟! ابقى قابلينى لو قعدتى مع المتعوس جوزك تلات ايام على بعض
جتكوا داهيه بماسكاتكو دى خليها تنفعكوا يومئذ :))
انا سمعت عن فليستى ده ياسمكه لكن ماسمعتهوش ومش فاكره سمعت عنه امتى بالظبط هبقى اشوف الحكايه دى
بس آت اوول المسلسلات الكورى رهيبه
طيب انتى سمعتى مسلسل كاميلا الاسبانى؟
بتاع كاميلا مونتس دى البا والواد القمر ده اليخاندرو؟ اكيد لا ماانتى ملكيش فى الحاجات الحلوة
غورى يابه
جايه بعد ماهزأتينى وهزأتى العيال اللى استأمنونى وخلونى اجيب صورهم واغانيهم وحياتهم هنا تقوليلى ذوقك حلو؟
شرديتنى ياسمكه ياشماتة ابله طازة فيا
على فكره ياسمكه انا فعلا اتضفلى حاجه جديده فعلا من تعليقك اللى فات
انك ليكى فى اللغه العربيه اصلى ماليش فيها خالص والله :)
ضايعه ضايعه يعنى
منورنى ياسكر وانت اللى عسل عشان كده شايف كل حاجه حلوة :)
منورانى ياسموكتى
محمد رضا
********
اهلا بشاعرنا الكبير
ازيك يادوك
انا سمعت انها اردنيه مش لبنانيه
وعرفت من البحث ان الاغنيه فعلا كلمات محمود ردويش والحان مارسيل خليفه وعرفت انه استاذها من ظهوره معاها فى كام حفله وتقريبا كل اغانيها من تلحينه
اما عن حكايه انها بتعرف تغنى كل حاجه بلهجتها فدى حقيقه ولاحظتها
شكرا لوجودك يادكتور
أسماء جمعه بنت الشمس
*******************
يالهوى
صديقتى ورفيقتى واختى الصغيره سمسمه
منورانى هنا؟!! ياللهول يالالمهزله الكوابريه
ازيك ياسمسم سلامتك يابنتى فشفشتى عربيه مين بدماغك دى يخرب بيتك
هو انتى كده والله لاقول لعمو مايخرجك من البيت تانى انتى خطر على امن البلد وسلامة شوراعها :)
حاله السرحن بتاعت العربيات دى رسمى ياسمسمه والله انا بحبها جدا عشان كده مابحبش اتكلم مع حد كتير فى الطريق وفى الاخر النتيجه بتكون انى بغمض عنيا واروح فى غيبوبه نوم لا ابقى نايمه ولا صاحيه :)
منورنى ياعسل
ونتر سوناتا من ايام بس شفت الحلقة الاخيرة منه كان بيعرض على كوريا تي في
انتي ليكي في الكوري و لا ايه؟
Meme
*****
ميمى
حبيبتى
ازيك يابونيتى
طبعااااا ليا فى الكورى بس مش بسمعه كتير بحكم انى مابسمعش تليفزيون كتير ومابيبقاش ليا خلق اقعد اتابع قى مسلسلات اخرى فيلم يقول ساعتين ويخلص
الحلقه الاخيره كانت شبه مستفزة بالنسبالى لان نهايتها كانت مفتوحه وانا مابحبش النهايات دى بس مع انى اخر مره سمعتها كان من يجى 5او6سنين الا انى لسه فاكره شكل الفيلا الرهييييييييييبه اللى الواد جون سانغ كان سامن فيها وهو اعمى
يالهوى
اوعدنا يارب :)
اظهرى بقى
http://ar.wikipedia.org/wiki/%D8%A3%D9%85%D9%8A%D9%85%D8%A9_%D8%A7%D9%84%D8%AE%D9%84%D9%8A%D9%84
شوفي دا
:)
ثانكس يادوك علم
وعموما انا قلت اللى شوفته مش تحرياتى الشخصيه :)
شكرا للاهتمام
نور
جميل احاسيسك الراقية دى
التاءمل ومحاولة فصل الخارج والغوص داخل النفس وبدء رحلة التاءمل بيكون جميل جدا
ويا سلام بقى مع استحضار مشهد مع صورة او شريط يمر امامنا ونحن نشعر باءننا نعيش بداخله من فرط تاءثرنا به
الاغنية رائعة
وكمان يوجين والمسلسل الكورى فعلا تحسى فيه بالهدوء والحب الراقى السامى بالفعل
وكمان لو تلحظى فيه العيون وتركزى عليها
فعلا هاتكون فيضان للتاءمل وجريان سيل من المشاعر
باحييكى على التجوال فى السطح الجميل لمنزلكم ويبختك يا باشا
احنا مش عندنا سطح حواليه زرع
انااااااااااا باعيط
i just came to say menawara ya nour
تحياتى
SHAPE YOUR LIFE (ABOALI)
************************
:)
متشكره ليك ياابو على
اضفت للبوست بكلماتك الرقيقه
وعلى فكره فعلا لغة عيونهم فى المسلسل كانت بتعجبنى جدا جدا اصل العيال دول عليهم براءه؟! يالله عليها
الواحد بس كفايه عليه يبص فى وشهم يحس ان روحه صافيه :)
من غير قر ولا حسد تعالى اتفضل السطوح بتاعنا كله والله مايغلاش عليك بس نصيحه
المنظر بجد شاعرى ابقى هان زجزج وبيج بيج معاك وماتنساش مامتهم هتنبسط اوى :)
I just wanna say "enta kman nwrtny ya Abo3li "
:)
الواحد بيقي محتاج يفصل دماغة علشان ياخد فترة راحة بجد الاسترجاء مفيد وخصوصا لما الواحد يبطل يفكر في كل اللي حولية ويريح عقلة شوية
تحياتي
ايه جرعة الرومانسية دى كلها
لذيذة أميمة الخليل
وكمان الكليب بتاع الصينيين ... اللى هوما هيبوا بعض
اسمعى دى هتعجبك
أغنية الأماكن للفنان / محمد عبده باللغة الفرنسية ورابط للأغنية باللغة الفرنسية غناء الفنانة المغربية / فدوى المالكى
http://www.4shared.com/account/file/156406961/78d83e58/___.html
http://goodpractice-pmp.blogspot.com/2010/01/blog-post_06.html
SAYED SAAD
**********
عندك حق جدا
انا بعتبر دى زى هدنه بنديها لدماغنا عشان تقدر تواصل مسيرتها
نورتنى واسعدتنى بوجودك:)
ENG./ELSAYED,PMP
*****************
:) اللى هوما هيبوا بعض؟
:))
القليل من الرومانسيه لا يضير يابشمهندس
ده احنا عايشين بنسيمها فى وسط الهموم اللى عمتنا
الاغنيه جميله جدا
انا بحب اساسا الاغنيه دى بالعربى وكنت بقعد اسمع الساعه بتاعت محمد عبده على روتانا خليجيه بالليل مخصوص عشان لما تيجى اسمعها
ودى الست غنتها باحتراف بصراحه
يسلم ذوقك يابشمهندس
:) منورنى
بييييبه
وحشانى والله
اخبار سيادتك ايه يا هندسه
ايه الرومانسيه دى كلها
بس انا عمرى ما سمعت الاغنيه دى ولا شوفت المسلسل ده :)
عموما اول مره بقت على ايدك خلاص
الاغنيه جميله اوى على فكره زوقك رائع
هنفضل مغمومين لحد أمتى؟؟؟؟
ولله ده من أصعب الاسئله اللي سمعتها في حياتي!
عايش... ولكن !!!!
******************
اهلا اهلا علاء بك
انا تمام ياافندم وانت اخبارك ايه؟
حمد اله عالسلامه ياسيدى وان شاء الله ربنا مايضعش تعبك فى الامتحانات
مش مهم انك اول مره تسمعهم المهم انهم يكونوا عجبوك:)
نورتنى ياهندسه
عاااااااووووو
لورنس العرب
***********
لانك بس مش هتعرف تجاوب عليه !!
بخخخخ :)
بوست جميل
برغم انى ماليش اوى فى الاغاى لكن اعتقد ان كلمات الاغنيه للشاعر الكبير محمود درويس لانه اسلوبه مفرداته
الاغنيه جميله جداً كمان المطربه رائعه
بابنسبه للمسلسل فانا على ما اذكر احدث حاجه شوفتها كده كانت اوشين
ومحدش قالى ان فى حاجه جت بعدها علشان اشوفها
بالنسبه لزهره العباد فهى زهره جميله وجريئه ومواجه
وانا بحترم فيها ده...برغم ان مالهاش ريحه خاااالص
تحياتى
يا مساء الورد
انا جيت بس امسي و اسلم و اطمن
و عارف اني مقصر و زبالة و كلام كتير من ده
بس دي و الله اول مره ادخل مدونتي انا شخصيا من تلات شهور فاعذريني يا نور
سريع كده بس اسلم و اقلب
و طمنينا عليكي
momken
*******
هى فعلا للشاعر محمود درويش احييك على فراستك ياممكن :)
مسلسل اوشين ده سمعت عنه بابا الله يرحمه كان بيتابعه بس انا مكنتش كبيره بالقدر الكافى اللى يخلينى اتابع مسلسل 120حلقه يعنى
بس انت طلعت من زمان اوى :)
زهرة عباد الشمس؟ زهره حنينه اوى :)
نورتنى ياممكن
prince4ever
***********
لا
لالالالالا
لالالالالالالالالالالالا
رامى البرنس؟ ياخراشى؟ معقول؟!!!
لا لازم اشوف حد يزغرت
انت عامل ايه ياابنى وغطسان فين
وليه مابتدخلش حتى مدونتك
اتمنى يكون خلل فى النت مش حاجه وحشه عندك لا قدر الله
ربنا يطمنا عليك يارامى يارب
وولا يهمك مش زباله ولا حاجه انا مش زعلانه بس انت فعلا غيابك طول جدا
نورتنى يارامى من تانى
إرسال تعليق